RFA Tibetan བོད།

བོད་ནང་ས་ཡོམ་འགུལ་ཚད་རིམ་ ༥ ཅན་ཞིག་བརྒྱབ་འདུག གློ་བུར་དུ་ཐོན་པའི་གནས་ཚུལ་གསར་པ། གཟའ་ཕུར་བུ་ཕྱི་ཟླ་ ༩ ཚེས་ ༣ ཉིན་བོད་ནང་ས་ཡོམ་ཚད་རིམ་ ༥ ཅན་ཞིག་བྱུང་ཡོད་པ་འཇར་མཎ་ས་ཁམས་ཚན་རིག་ཉམས་ཞིབ་སྡེ་ཚན་ལུང་འདྲེན་བྱས་ཏེ་རོའི་ཊརསི་གསར་སྤེལ་ཁང་གིས་གནས་ཚུལ་སྤེལ་འདུག་ལ། ཨ་རིའི་ས་གཞི་དཔྱད་རིག་སྡེ་ཚན་གྱིས་ར་སྤྲོད་གནང་འདུག ས་ཡོམ་དེ་ས་འོག་གི་གཏིང་ཚད་སྤྱི་ལེ་ ༡༠ ཙམ་གྱི་སར་བྱུང་ཡོད་པ་རེད། ༢༠༢༥ ཟླ་ ༡ པོའི་ནང་བོད་གཞིས་ཀ་རྩེ་དིང་རིར་ས་ཡོམ་བྱུང་རྗེས་གནམ་ཐོག་ནས་པར་ལེན་བྱས་པའི་པར་རིས། (Stringer/VIA REUTERS) རྒྱ་གར་རྒྱལ་ཡོངས་ས་ཡོམ་དཔྱད་ཞིབ་སྡེ་ཚན་གྱིས་བརྗོད་པ་ལྟར་ན། ས་ཡོམ་འདི་བཞིན་རྒྱ་གར་གྱི་ཨུ་ཏྲ་ཁནཌི་ (Uttrakhand) གྱི་འཇོ་ཤི་མཐི་ (Joshimath) ནས་རྒྱང་ཐག་ཀི་ལོ་མི་ཊར་ ༡༢༨ བྱང་ཤར་ས་ཁུལ་བོད་ནང་དུ་བྱུང་ཡོད་པ་བརྗོད་ཡོད་ཅིང་། (USGS) ཨ་རིའི་ས་ཁམས་དཔྱད་ཞིབ་རིག་པའི་དྲ་རྒྱའི་ཐོག་ལའང་ས་ཡོམ་བྱུང་ཡུལ་འདི་གསལ་སྟོན་བྱས་འདུག ད་ལྟའི་ཆར་མི་རྒྱུ་གཉིས་ལ་གནོད་འཚེ་བྱུང་མིན་གསལ་ཁ་མི་འདུག སྤྱིར་ས་ཡོམ་འགུལ་ཚད་རིམ་ ༥ ནི་ཚད་གཞི་འབྲིང་ཙམ་ལ་ངོས་འཛིན་བྱེད་ཀྱི་ཡོད་ཅིང་། ཉེ་ཁུལ་དུ་དུད་ཁྱིམ་ཁང་པ་རྣམས་རྨང་གཞི་བརྟན་པོ་ཡོད་ན་གནོད་འཚེ་ཆེན་པོ་འབྱུང་ཉེན་དུ་རྩིས་ཀྱི་མེད་ནའང་། ས་གཞི་འདི་ཧི་མ་ལ་ཡའི་གཉན་འཕྲང་ཆེ་བའི་ས་ཚིགས་འཁེལ་གྱི་ཡོད་སྟབས་ཁང་བཟོ་བརྟན་པོ་མེད་པ་དག་ལ་གནོད་འཚེ་འབྱུང་སྲིད་པའི་ཉེན་ཁ་དང་སྔོན་དཔག་བྱེད་ཀྱི་ཡོད་པ་རེད། རེས་གཟའ་ཕུར་བུ་ཉིན་བོད་ནང་བྱུང་པའི་ས་ཡོམ་འདི་ནི་ བལ་བོད་ས་མཚམས་སུ་“འཁྱགས་རོམ་ཉིལ་ཏེ་“འདམ་རྡོ་ཆུ་རུད་ བྱུང་སྟེ་མི་བརྒྱ་ཕྲག་མང་པོ་རྐྱེན་འདས་དང་སྟོང་ཚོ་མང་པོ་གར་སོང་མེད་པར་གྱུར་ཏེ་ཉིན་གྲངས་ ༨ ཀྱི་རྗེས་སུ་བྱུང་པའི་རང་འབྱུང་གི་འཇིགས་པ་ཞིག་ཡིན་སྟབས། དོ་སྣང་ཆེན་པོ་བྱེད་གཞིར་གྱུར་ཡོད་པ་རེད། ས་ཡོམ་གྱི་གནས་ཚུལ་འདིའི་སྐོར་ཞིབ་ཕྲ་མུ་མཐུད་རྩད་གཅོད་ཞུས་ཏེ་གནས་ཚུལ་ཁ་སྣོན་ཞུ་མུས་ཡིན།།

RFA Tibetan ▶ Clip བཙན་བྱོལ།

བཞུགས་སྒར་རྡ་རམ་ས་ལར་མང་གཙོའི་དུས་ཆེན་ཉིན་རྒྱ་རིགས་དམངས་གཙོ་དོན་གཉེར་བ་མང་དག་ཅིག་གིས་མཉམ་ཞུགས་གནང་འདུག

RFA Tibetan ▶ Clip བཙན་བྱོལ།

བཞུགས་སྒར་རྡ་རམ་ས་ལར་མང་གཙོའི་དུས་ཆེན་ཉིན་རྒྱ་རིགས་དམངས་གཙོ་དོན་གཉེར་བ་མང་དག་ཅིག་གིས་མཉམ་ཞུགས་གནང་འདུག

RFA Tibetan བཙན་བྱོལ།

རྒྱ་ནག་གི་དྲུག་བཞིའི་དོན་རྐྱེན་སྐབས་སྣེ་འཁྲིད་མཁན་ཁོངས་ཀྱི་རྒྱ་རིགས་མང་གཙོ་དོན་གཉེར་བས། བོད་མི་རྣམས་དང་མཉམ་ལས་ཀྱི་ནུས་པ་སྤུངས་ཏེ་རྒྱ་ནག་གཞུང་ལ་རྒོལ་ལན་ཁ་གཏད་གཅོག་དགོས་གལ་ཆེ་བ་གསུང་གི་འདུག ཕྱི་ལོ་ ༡༩༨༩ ལོར་རྒྱ་ནག་པེ་ཅིང་གནམ་སྡེ་སྒོ་མོ་ཆེ་ཐང་ཆེན་དུ་སློབ་ཕྲུག་གྱིས་ཞི་བའི་ངོ་རྒོལ་ལས་འགུལ་སྤེལ་སྐབས་ཀྱི་འགོ་ཁྲིད་གཙོ་བོའི་གྲས་ཝང་ཌན་ (Wang Dan) ལགས་ཀྱིས་བོད་མི་རྣམས་དང་རྒྱ་ནག་མང་གཙོ་དོན་གཉེར་བ་རྣམས་ཀྱི་དམིགས་ཀྱི་དམིགས་ཡུལ་ནི་གཅིག་པ་ཡིན་པས། ཕན་ཚུན་མཉམ་ལས་ཀྱིས་ནུས་པ་སྤུངས་ཐུབ་ན་ལེགས་ཞེས་གསུང་གི་འདུག དེ་ཡང་ཁོང་གིས། “རྒྱ་ནག་གཞུང་ནི་ང་ཚོའི་དགྲ་བོ་ཡིན་པ་གཅིག་པ་ཡིན་པས། ང་ཚོས་ཕན་ཚུན་མཉམ་ལས་ཀྱིས་རང་དབང་ཆེད་དུ་རྒྱ་ནག་གཞུང་ལ་རྒོལ་ཐབས་བྱ་དགོས་ཤིང་། དེས་ང་ཚོ་ཕན་ཚུན་གཉིས་ཀར་ཁེ་ཕན་ཡོང་གི་རེད། ངས་གཞོན་དུས་ནས་རྒྱ་ནག་གི་མང་གཙོའི་ཆེད་དུ་ལས་ཀ་བྱེད་འགོ་བཙུགས་ཡིན་པས། ད་ཆ་ཕྱིར་མིག་ཅིག་བལྟས་ཚེ་ངའི་བསམ་པར་མི་ཚེ་དོན་སྙིང་ལྡན་པ་ཞིག་བྱུང་དྲན་གྱི་འདུག བོད་པའི་གཞོན་སྐྱེས་རྣམས་ལ་ཞུས་ཡ་ལ། དཔལ་འབྱོར་ལ་སོགས་པ་ཁོ་ནར་མ་དམིགས་པར། རང་དབང་གི་ཆེད་དུ་འཐབ་རྩོད་བྱ་དགོས་གལ་ཆེ་བ་ཡིན།” ཞེས་འདི་ག་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་། རྩ་བའི་དེ་སྔ་རྒྱ་ནག་དམར་ཤོག་ཚོགས་པ་བཙུགས་ནས་ལོ་བརྒྱ་འཁོར་བའི་སྐབས། རྒྱ་ནག་གི་གདུག་རྩུབ་ཅན་གྱི་བྱ་སྤྱོད་སྲིད་ཇུས་ཐོག་བགྲོ་གླེང་ཞིག་ཨ་རིའི་མངའ་སྡེ་ (Virginia) ནང་ཚོགས་པའི་སྐབས། རྒྱ་ནག་མང་གཙོ་དོན་གཉེར་བ་ལྦང་ཌན་ལགས་དང་ལྷན་བོད་མིའི་སྐུ་ཚབ་ཁག་ཅིག་ཀྱང་མཉམ་ཞུགས་གནང་འདུག གཞན་རྒྱ་རིགས་ཁག་གཅིག་གིས་དཔྱད་རྩོམ་ཕྱོགས་བསྡུས་ཀྱི་དཔེ་དེབ་རྒྱ་གཞུང་གིས་༧གོང་ས་ཏཱ་ལའི་བླ་མའི་ཡང་སྲིད་ཐོག་ཐེ་ཇུས་བྱེད་དབང་མེད་ཅེས་པ་རྒྱ་ཡིག་ཐོག་ཡོད་པ་ཞིག་འདོན་སྤེལ་དབུ་འབྱེད་གནང་སྟེ། དཔེ་དེབ་དེའི་རྩོམ་སྒྲིག་ཐོག་འགན་བཞེས་མཁན་གཙོ་གྲས་སུ་ཡོད་ཅིང་། ཁེ་ན་ཌར་གནས་བཞུགས་གསར་འགོད་པ་དང་སྤྱི་ཚོགས་དྲྭ་ལམ་ཡུ་ཊུབ་ཐོག་བརྙན་ཐུང་བཟོ་མཁན་ཊེ་རེན་སི་ཤེན་ (Terenceshen) ལགས་ཀྱིས། ཐེངས་འདིར་དཔེ་དེབ་དེ་བཞིན་འདོན་སྤེལ་བརྒྱུད། ང་ཚོས་རྒྱ་ནག་གཞུང་གིས་བོད་བཙན་བཟུང་བྱས་པ་དང་མཉམ་ད་ལྟའི་ཆར་༧སྐུའི་ཡང་སྲིད་ཀྱི་གནད་དོན་ཐོག་ཐེ་ཇུས་བྱེད་བཞིན་པར་ངོས་ལེན་མེད་པའི་རྣམ་པ་གསལ་སྟོན་བྱེད་ཆེད་དུ་ཡིན་ཞེས་གསུང་གི་འདུག དེ་ཡང་ཁོང་གིས། “རྒྱ་ནག་གཞུང་གིས་བོད་བཙན་བཟུང་བྱས་ཡོད་ལ། ད་ཆ་༧གོང་ས་མཆོག་གི་༧སྐུའི་ཡང་སྲིད་ཀྱི་གནད་དོན་ལའང་ཐེ་བྱུས་བྱེད་བཞིན་ཡོད་པས། ང་ཚོས་དེར་ངོ་རྒོལ་དང་ངོས་ལེན་མེད་པའི་རྣམ་པ་གསལ་སྟོན་བྱེད་ཆེད་དང་། རྒྱ་ནག་གཞུང་གིས་༧གོང་ས་མཆོག་གི་ཡང་སྲིད་རྫུན་མ་ཞིག་ཁྲིད་བསླེབས་ཀྱིས་རེད་ལ་ང་ཚོས་དེར་རྫུན་མ་རེད་ཅེས་བརྗོད་དགོས་པ་རེད། མ་ཟད་ང་ད་ལན་བཞུགས་སྒར་རྡ་སར་བསླེབས་པ་ཐེངས་དང་པོ་ཡིན་པས། དེའི་བརྒྱུད་བཙན་བྱོལ་བོད་མིའི་སྤྱི་ཚོགས་ཆགས་སྟངས་དང་། ཁོར་ཡུག་སོགས་ཀྱི་སྐོར་ལ་གསར་པ་མང་པོ་ཤེས་སོང་བས། ཁེ་ན་ཌར་ཕྱིར་ལོག་རྗེས་ངའི་རོགས་པ་ཁེ་ན་ཌའི་གཞུང་འབྲེལ་མི་སྣ་དང་གསར་འགོད་པ་རྣམས་ལ་བོད་དོན་གོ་རྟོགས་སྤེལ་རྒྱུ་ཡིན།” ཞེས་གསུང་གི་འདུག རྒྱ་རིགས་དམངས་གཙོ་དོན་གཉེར་བ་ཝང་ཌན་དང་། ཊེ་རེན་སི་ཤེན་ལགས། ༢༠༢༦།༠༩།༠༢ (RFA Tibetan) ཝང་ཌན་ (Wang Dan) ལགས་དང་རྒྱ་རིགས་ཁག་གཅིག་ཐེངས་འདིར་བཞུགས་སྒར་རྡ་སར་འཚོགས་པའི་མང་གཙོ་རྒྱ་ནག་དང་བོད་ཀྱི་མ་འོངས་གླེང་སྟེགས་ཞེས་པའི་ཚོགས་འདུའི་ཐོག་མཉམ་ཞུགས་དང་། བོད་ཀྱི་མང་གཙོ་དབུ་བརྙེས་ཏེ་ལོ་ངོ་ ༦༦ འཁོར་བའི་གཞུང་འབྲེལ་མཛད་སྒོར་སྐུ་མགྲོན་དུ་བཅར་འདུག་ཅིང་། རིང་མིན་ཁོང་རྣམ་པས་བཞུགས་སྒར་རྡ་སར་༧གོང་ས་༧སྐྱབས་མགོན་ཆེན་པོ་མཆོག་གི་མཇལ་ཁ་ཞུ་རྒྱུ་ཡིན་པ་རེད་འདུག ལྦང་ཌན་ལགས་ལ་མཚོན་ན་རིང་མིན་ཁོང་ལ་༧གོང་ས་༧སྐྱབས་མགོན་ཆེན་པོ་མཆོག་གི་མཇལ་ཁ་ཐོབ་རྒྱུ་ཡིན་པ་དེ་ནི་ལོ་ཉི་ཤུའི་རྗེས་སུ་ཐོག་མ་དེ་ཆགས་ཀྱི་ཡོད་པ་འགྲེལ་བརྗོད་གནང་བྱུང་། གཡོན་ནས་གཡས། བདེ་སྲུང་བཀའ་བློན་ཀུན་དགའ་བཀྲིས་ལགས་དང་། དགའ་ལྡན་ཕོ་བྲང་གི་དྲུང་ཆེ་ཡང་སྟེང་རིན་པོ་ཆེ་མཆོག ༢༠༢༦།༩།༢ (RFA Tibetan) གཞན་ཐེངས་འདིར་མང་གཙོའི་དུས་ཆེན་གྱི་གཞུང་འབྲེལ་མཛད་སྒོར་སྲིད་སྐྱོང་སྤེན་པ་ཚེ་རིང་ལགས་དང་སྤྱི་འཐུས་ཚོགས་གཙོ་སྒྲོལ་མ་ཚེ་རིང་ལགས་གཉིས་ཀྱིས། བཀའ་ཤག་དང་སྤྱི་འཐུས་ལྷན་ཚོགས་ཀྱི་གསུང་འཕྲིན་སྒྲོག་སྦྱང་གནང་བའི་ནང་། བོད་མི་ཚོས་བོད་དོན་འཐབ་རྩོད་རྒྱུན་གནས་ལ་དམིགས་ཤིང་། ལྷག་པར་རྒྱ་གཞུང་གི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ལ་རྒོལ་ལེན་གྱིས། ཁྱིམ་ཚང་ནས་འགོ་བཙུགས་ཏེ་བོད་ཀྱི་སྐད་ཡིག་དང་རིག་གཞུང་ཆོས་བཅས་པ་སྲུང་སྐྱོབ་ལ་འབད་དགོས་པ་གསུངས་སོང་། མང་གཙོ་ཡུན་གནས་དང་སྲ་བརྟན་ཆེད་ཁྲིམས་སྒྲིག་རྟོགས་པ་བྱ་རྒྱུ་གལ་ཆེ་ཡིན་པ་མི་མང་ཞིག་གིས་གསུངས་ཡོད་པ་དང་། དགའ་ལྡན་ཕོ་བྲང་གི་དྲུང་ཆེ་ཡང་སྟེང་རིན་པོ་ཆེ་མཆོག་གིས་བོད་མི་ནང་ཁུལ་མཐུན་ལམ་དང་རྡོག་རྩ་ཆིག་སྒྲིལ་དགོས་པ་གསུངས་སོང་། ཡང་སྟེང་རིན་པོ་ཆེ་མཆོག་གིས་བོད་མི་ནང་ཁུལ་མཐུན་ལམ་དང་རྡོག་རྩ་ཆིག་སྒྲིལ་དགོས་པ་གསུངས་སོང་། རྒྱ་གར་ལྷོ་ཕྱོགས་སྦེ་ལ་ཀོ་པིར་ས་གནས་གཞོན་ནུས་གོ་སྒྲིག་འོག་མ་འོངས་བོད་དོན་འཐབ་རྩོད་ཀྱི་ཁ་ཕྱོགས་གླེང་པ་ཞེས་པའི་བགྲོ་གླེང་གི་ལས་རིམ་ཞིག་ཚོགས་ཏེ། བོད་མིའི་མདུན་ལམ་དང་འཐབ་རྩོད་ཀྱི་ཐབས་བྱུས་སོགས་ཀྱི་ཐད་བགྲོ་གླེང་གནང་ཡོད་པ་རེད། རྒྱ་གར་ལྷོ་ཕྱོགས་སྦེ་ལ་ཀོ་པིར་དམངས་གཙོའི་དུས་ཆེན་ཉིན་བོད་མི་ཚོས་མ་འོངས་འཐབ་རྩོད་ཀྱི་ཁ་ཕྱོགས་ཐད་བགྲོ་གླེང་གནང་འདུག ཁ་སྣོན་གསར་འགོད། བསྟན་འཛིན་དོན་ཡོད། པར་ལེན་སྒྲིག་སྦྱོར་བ། བསྟན་འཛིན་དོན་ཡོད། འཕྲིན་ལས་ཆོས་སྒྲོན། པདྨ་དངོས་གྲུབ།

RFA Tibetan བོད།

བོད་ཀྱི་སྐྱིད་གྲོང་དང་བལ་ཡུལ་ས་མཚམས་སུ་འཁྱགས་རུད་ལས་བྱུང་བའི་འདམ་རྡོ་ཆུ་རུད་ཀྱི་གོད་ཆག་གནོད་འཚེ་བྱུང་བའི་རྗེས་སུ་རྒྱ་ནག་གཞུང་གིས་གནས་ཚུལ་ལ་མུ་མཐུད་སྟངས་འཛིན་དང་། མྱུར་སྐྱོབ་ལས་དོན་ལ་མུ་མཐུད་དཀའ་ངལ་འཕྲད་བཞིན་ཡོད་པའི་ཐོག་ཐ་སྙད་བེད་སྤྱོད་ལ་ཚོད་འཛིན་བྱེད་བཞིན་ཡོད་འདུག བོད་ཕྱོགས་ཀྱི་ས་གནས་གནས་ཚུལ། ད་རེས་གནོད་འཚེ་ཕོག་ཡུལ་གཙོ་བོ་འདི་སྐྱིད་གྲོང་འགག་སྒོ་ཡོད་ས་དེ་རང་ལ་ཡིན་རུང་། གཞུང་གིས་ཉེན་ཁ་ཡོད་པ་བརྗོད་ནས་རི་སྟེང་གི་མང་ཚོགས་དང་ཉེ་ཁོར་གྲོང་ཚོའི་མང་ཚོགས་ཚང་མ་ཁྲིད་དེ་མགྲོན་ཁང་ནང་བཞག་ཡོད་པ་དང་། སྤོམ་པ་གྲོང་ཚོའི་ཡུལ་མིས་འདམ་རྡོ་ཆུ་རུད་ཐོན་སྐབས་ཀྱི་གནས་ཚུལ་དངོས་སུ་མཐོང་ཡོད་པ་བདེ་འཇགས་ཆེད་མིང་བརའཇོད་འདོད་མེད་པའི་མི་སྣ་ཞིག་གི་བོད་ནས་བརྗོད་བྱུང་། ཡུལ་མི་ཞིག་གིས་གཞུང་གི་གཅིག་གྱུར་བཀོད་སྒྲིག་འོག་མང་ཚོགས་ཀྱིས་ཁང་ཁྱིམ་དང་ཕྱུགས་ཟོག་དང་བཅས་པ་བློས་བཏང་ནས་ད་ལྟ་མགྲོན་ཁང་ནང་བསྡད་རྒྱུ་ལས་གང་ཡང་བྱ་ཐབས་མེད་པ་བརྗོད་བྱུང་། ད་རེས་འཁྱགས་རུད་དང་རྡོ་རི་ཉིལ་སའི་རི་བོ་དེ་ས་གནས་མི་མང་གིས་གནས་རིར་བརྩི་སྲོལ་ཡོད་འདུག ཟླ་ ༩ ཚེས་ ༢ ཉིན་གྱི་རྒྱ་ནག་གི་འགག་སྒོ་གནས་ཡུལ། (cnsphoto/VIA REUTERS) འདས་གྲོངས་དང་གར་སོང་ཆ་མེད་ཀྱི་གནས་སྟངས། རྒྱ་ནག་གཞུང་གིས་ཟླ་ ༩ ཚེས་ ༢ ཉིན་གསར་འགོད་གསལ་བསྒྲགས་ཤིག་སྤེལ་ཡོད་པའི་ནང་། ཚེས་ ༢ བར་སྐྱིད་གྲོང་གི་གནོད་འཚེའི་ཁྲོད་མི་ ༢༡ འདས་གྲོངས་སུ་སོང་ཡོད་པ་དང་། མི་ ༥༤༡ གར་སོང་ཆ་མེད་དུ་གྱུར་ཡོད་པ། གནོད་འཚེ་ཕོག་ཁུལ་ནས་མི་སྒེར་གྱི་ཅ་དངོས་ ༨༤༧ རྙེད་ཡོད་སྐོར་བརྗོད་འདུག སྐྱིད་གྲོང་འགག་སྒོ་བར་གྱི་གཞུང་ལམ་ ༢༡༦ འདི་བསྐྱར་གསོ་ཐུབ་སྟེ། ས་རྐོ་འཕྲུལ་ཆས་དང་ཚེ་སྲོག་རྟོག་ཞིབ་ཡོ་ཆས། དྲ་ལམ་སོགས་གནོད་འཚེ་ཕོག་ཡུལ་ལྟེ་གནས་སུ་སླེབས་ཐུབ་ཡོད་པ་བརྗོད་འདུག ཡང་བལ་ཡུལ་དུ་མཚོན་ན། ད་བར་མི་ ༡༢༠༤ འདས་གྲོངས་སུ་སོང་ཡོད་པ་དང་། མི་ ༤༢༠༠ ལྷག་གར་སོང་ཆ་མེད་དུ་གྱུར་ཡོད་པ་བརྗོད་འདུག་ལ། བལ་ཡུལ་དུ་རྒྱལ་སྤྱིའི་གསར་འགྱུར་བརྒྱུད་ལམ་གྱི་གསར་འགོད་པ་ཆེད་མངགས་སླེབས་ནས་སྐབས་ཐོག་གི་གནས་ཚུལ་སྤེལ་བཞིན་ཡོད་པ་དང་། བོད་ཕྱོགས་ནས་རྒྱ་ནག་གཞུང་གི་གཞུང་འབྲེལ་བརྒྱུད་ལམ་གྱི་གསར་འགོད་པ་མ་གཏོགས་གཏོང་གི་མེད་པ་རེད་འདུག བལ་ཡུལ་དུ་ཆུ་གློག་ཕུག་ལམ་ནང་གསོན་པོ་འཚོལ་ཐབས། བལ་ཡུལ་ཕྱོགས་སུ་གནོད་འཚེ་བྱུང་ནས་ཉིན་བདུན་སོང་བའི་རྗེས་སུའང་མྱུར་སྐྱོབ་ཀྱི་ལས་ཀ་བྱས་ཏེ་གསོན་པོ་རྙེད་པའི་རེ་བ་བྱེད་བཞིན་ཡོད་པ་དང་། རེ་བ་ཆེ་ཤོས་ནི་བལ་ཡུལ་ཕྱོགས་ཀྱི་ཆུ་གློག་ལས་གྲའི་ས་འོག་ཕུག་ལམ་ནང་ལས་མི་ ༩༠༠ ཙམ་ལུས་ཡོད་པའི་ཚོད་དཔག་བྱེད་ཀྱི་ཡོད་ཅིང་། ཕུག་ལམ་ཁ་ཤས་ཀྱི་ནང་དུ་རླུང་དང་ཆུ། ཟས་རིགས་ཡོད་སའི་ཁང་མིག་ཡོད་པས། ལས་མི་ཁག་ཅིག་ད་དུང་གསོན་པོར་གནས་ཡོད་སྲིད་པའི་རེ་བ་བྱས་ཏེ། རྒྱ་གར་དང་རྒྱ་ནག ཨ་རིའི་ཆེད་ལས་མྱུར་སྐྱོབ་རུ་ཁག་ཀྱང་ཕུག་ལམ་ནང་གི་མི་སྐྱོབ་པའི་ལས་ཀར་མཉམ་ཞུགས་བྱས་ཡོད་སྐོར་རོའི་ཊརསི་གསར་ཁང་གིས་གནས་ཚུལ་སྤེལ་འདུག གཞན་ཡང་ལྷོ་ཀོ་རི་ཡ་སོགས་རྒྱལ་སྤྱིའི་ཚོགས་པ་ཁག་གི་མྱུར་སྐྱོབ་རུ་ཁག་ཀྱང་བལ་ཡུལ་ནང་འབྱོར་བཞིན་ཡོད་འདུག ཉིན་གྲངས་ཁ་ཤས་གོང་ལ་ཕུག་ལམ་དེ་དག་གི་ནང་དུ་ལས་ཀ་བྱེད་མཁན་གྱི་གཉེན་སྤུན་ཡོད་པས་གསོན་པོར་གནས་ཡོད་པའི་རེ་བ་བྱེད་བཞིན་ཡོད་པ་བརྗོད་མཁན་བྱུང་ལ། འདམ་རྡོ་ཆུ་རུད་ཀྱི་ནང་དུ་ཚུད་པའི་མི་སྣ་མང་པོ་ཞིག་གསོན་པོར་བརྙེད་རྒྱུའི་རེ་བ་ཉུང་དུ་སོང་ཡོད་པས་དངངས་འཚབ་བྱེད་མཁན་ཁག་ཅིག་ཀྱང་འདུག ལྷོ་ཀོ་རི་ཡའི་མྱུར་སྐྱོབ་རོགས་རམ་ཚོགས་པ་ཞིག་འབྱོར་ཡོད་པ། (REUTERS) འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་དཔྱད་གཏམ། ཨ་རིར་རྟེན་གཞི་བྱས་པའི་རྒྱ་ནག་གི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པ་ནས། བལ་ཡུལ་དང་བོད་ཀྱི་ས་མཚམས་སུ་བྱུང་བའི་ཆུ་རུད་ཀྱི་གནོད་འཚེ་འདི་བྱུང་བའི་རྗེས་སུ་རྒྱ་ནག་དབང་འཛིན་པས་གནས་ཚུལ་ལ་དམ་དྲག་བྱས་པ་དང་། འདས་གྲོངས་དང་གཏོར་སྐྱོན་གྱི་ཚད་གཞིའི་སྐོར་གྱི་གནས་ཚུལ་ཁ་གསལ་གསལ་བསྒྲགས་བྱས་མེད་པ་བརྗོད་ཡོད་ལ། གནོད་འཚེ་བྱུང་མ་ཐག་གནས་ཚུལ་མང་ཆེ་བ་བལ་ཡུལ་ཕྱོགས་ནས་ཕྱིར་ཐོན་པ་ལས། བོད་ཕྱོགས་སུ་དབང་འཛིན་པས་གཏོར་སྐྱོན་གྱི་ཚད་གཞི་དང་འབྲེལ་བའི་གནས་ཚུལ་ལ་ཚོད་འཛིན་བྱས་ཤིང་། གཞུང་གི་གསར་འགྱུར་ནང་གཙོ་བོ་མྱུར་སྐྱོབ་ལས་ཀ་དང་གཞུང་གི་བཀོད་སྒྲིག་ལ་དམིགས་ཡོད་པ། ས་གནས་མི་མང་གིས་བླངས་པའི་པར་དང་བརྙན་ཁག་རྒྱ་ནག་གི་སྤྱི་ཚོགས་དྲ་ལམ་ནས་མེད་པར་གྱུར་བ་དང་། པར་རིས་ངོས་འཛིན་གྱི་ལག་རྩལ་དང་། གནས་ཚུལ་མང་པོ་གཅིག་རྗེས་གཉིས་མཐུད་དུ་སྤེལ་ནས་རང་དབང་གི་གནས་ཚུལ་ཁག་མཐོང་དཀའ་བ་བཟོ་ཐབས་བྱས་ཡོད་པ་བརྗོད་འདུག ཤི་ཙང་ཞེས་པའི་རྒྱ་སྐད་སྒྲ་བསྒྱུར་བཙན་གྱིས་སྤྱོད་པ། ད་རེས་བལ་བོད་གཉིས་ཀྱི་ས་མཚམས་སུ་གོད་ཆག་ཚབས་ཆེན་འདི་བྱུང་པའི་སྐབས་སུ་གསར་འགྱུར་བརྒྱུད་ལམ་དང་། གཞུང་སྒེར་མང་པོ་ཞིག་གིས་དབྱིན་སྐད་ཐོག་སྔར་ནས་འབོད་བཞིན་ཡོད་པའི་ Tibet ཞེས་པའི་ཐ་སྙད་འདི་བེད་སྤྱོད་བཏང་པར་རྒྱ་ནག་གཞུང་གིས་བཙན་ཤེད་ངང་ Xizang ཟེར་རྒྱ་སྐད་བེད་སྤྱོད་བྱ་དགོས་པ་བརྗོད་ཡོད་ལ། བོད་དང་བལ་ཡུལ་ཞེས་ཐད་ཀར་བེད་སྤྱོད་བྱས་པར་ཡང་རྒྱ་ནག་གཞུང་གིས་སྐྱོན་བརྗོད་བྱས་ནས་སྤྱི་ཚོགས་དྲ་རྒྱའི་ཐོག་བཞག་པའི་གནས་ཚུལ་འགའ་ཤས་ཕྱིར་འཐེན་བྱ་དགོས་པའི་གནས་ཚུལ་ཡང་ཐོན་འདུག་ལ། སྐབས་འཕྲལ་བོད་ནང་ནས་དྲ་ཐོག་ཏུ་བཀོད་པའི་དངོས་ཡོད་གནས་ཚུལ་མང་དག་ཅིག་ནག་བསུབ་བཏང་ནས་ཡུད་ཙམ་གྱི་རྗེས་མངོན་རྒྱུ་མེད་པར་འགྱུར་བཞིན་འདུག ཨ་རིའི་གྲོས་ཚོགས་སུ་བལ་བོད་གོད་ཆག་གི་འདས་པོ་ཚོར་མྱ་ངན། ཟླ་༩ ཚེས་༢ ཉིན་ནིའུ་ཡོག་མངའ་སྡེའི་ཨ་རིའི་གྲོས་ཚོགས་འོག་མའི་འཐུས་མི་གྷརེསི་མེང་(Grace Meng) གིས་ཨ་རིའི་གྲོས་ཚོགས་སུ་བལ་བོད་ས་མཚམས་སུ་བྱུང་བའི་འདམ་རྡོ་ཆུ་རུད་ཀྱི་གོད་ཆག་ཁྲོད་འདས་གྲོངས་སུ་སོང་བ་ཚོར་མྱ་ངན་གྱི་ངག་བཅད་གུས་འདུད་ཞུས་གནང་ཡོད་ཅིང་། ཁོང་གིས་དེ་རིང་ང་ཚོ་འདིར་བལ་ཡུལ་དང་བོད་དུ་བྱུང་བའི་ཆུ་རུད་གོད་ཆག་ཚབས་ཆེན་ཁྲོད་འདས་གྲོངས་སུ་སོང་བ་རྣམས་ལ་མྱ་ངན་གུས་འདུད་ཞུ་རྒྱུ་དང་། འདིའི་ཁྲོད་ནས་གནོད་འཚེ་ཚབས་ཆེན་བྱུང་བར་ཡིད་སྐྱོ་དགོས་པ་ཞིག་ཡོང་གི་འདུག ཡ་ང་བའི་གོད་ཆག་འདིས་མི་ ༡༠༠༠ ཙམ་གྱི་ཚེ་སྲོག་འཕྲོག་པ་དང་། གྲངས་ལས་འདས་པའི་མི་ཚོའི་ཁང་ཁྱིམ་དང་འཚོ་རྟེན་ལ་གནོད་འཚེ་བཏང་བ། དེ་བཞིན་མི་ཤི་ཁྱིམ་སྟོང་བྱུང་ནས་མྱ་ངན་གྱི་གནས་སུ་གྱར་ཡོད། འཚོལ་ཞིབ་དང་མྱུར་སྐྱོབ་ཀྱི་ལས་ཀ་མུ་མཐུད་བྱེད་བཞིན་པའི་སྐབས་དེར། གོད་ཆག་འདིའི་རྗེས་སུ་ད་དུང་གར་སོང་ཆ་མེད་ཀྱི་གནས་སུ་ཡོད་པའི་མི་༤༠༠༠ ལྷག་བདེ་འཇགས་ངང་རྙེད་ཐུབ་པར་ང་ཚོས་སྨོན་ལམ་རྒྱབ་བཞིན་ཡོད། དེའི་ཁོངས་སུ་ཚོད་དཔག་ལྟར་ན་ཨ་རིའི་མི་སེར་ ༩༠ ཙམ་ཚུད་ཡོད་ཅེས་གསུངས་འདུག དེ་བཞིན་ཨ་རིའི་གྲོས་ཚོགས་འོག་མའི་ཚོགས་ཟུར་དང་གྲོས་ཚོགས་འཐུས་མི་ལྕམ་ནེན་སི་པེ་ལོ་སི་མཆོག་དང་། གྲོས་ཚོགས་འཐུས་མི་འཇིམ་མེཀ་གྷོ་ཝརནི། ཀུ་ཤུ་ (Apple Inc.) བཟོ་གྲྭའི་སྤྱི་ཁྱབ་པ་ཊིམ་ཀུཀ་ (Tim Cook)། དེ་བཞིན་ཨ་རིའི་ནིའུ་ཡོཀ་གི་གྲོང་ཁྱེར་སྤྱི་ཁྱབ་པ་ཛོ་རན་མཱམ་དྷ་ནིས་བོད་ཡིག་ཐོག་ནས་བརྡ་འཕྲིན་སྤེལ་ཏེ་བལ་བོད་ས་མཚམས་སུ་གོད་ཆག་ཕོག་པ་ཚོར་མྱ་ངན་དང་གདུང་སེམས་མཉམ་སྐྱེད་ཞུས་གནང་ཡོད་པ་རེད།།

RFA Tibetan བོད།

བལ་བོད་ས་མཚམས་སུ་བྱུང་བའི་འདམ་རུད་ཆུ་ལོག་གི་གོད་ཆག་དེ་ནི་རྒྱ་ནག་གིས་བཟོས་པའི་གོད་ཆག་ཅིག་ཡིན་པ་ཁོར་ཡུག་ཉམས་ཞིབ་པས་བརྗོད་པ། ཟླ་ ༨ ཚེས་ ༢༦ ཉིན་བྱུང་བའི་བལ་བོད་ས་མཚམས་ཀྱི་འདམ་རུད་ཆུ་ལོག་རྐྱེན་པས་མི་བརྒྱ་ཕྲག་མང་པོ་རྐྱེན་འདས་དང་གར་སོང་ཆ་མེད། ཁང་ཁྱིམ་དང་འཛུགས་སྐྲུན་ཤུལ་མེད་དུ་བཏང་བ་སོགས་བྱུང་ཡོད་པས། འདམ་རུད་ཀྱི་གོད་ཆག་དེ་ནི་གངས་རིའི་འཁྱགས་རོམ་ཉིལ་བའི་རྐྱེན་བྱས་ཡོད་པ་ཁོར་ཡུག་ཉམས་ཞིབ་པ་སོགས་བརྗོད་ཀྱི་ཡོད་ཅིང་། འཁྱགས་རོམ་ཉིལ་བ་དེ་ནི། རྒྱ་ནག་གིས་བཟོས་པའི་གོད་ཆག་གཅིག་ཡིན་ཞིང་། གོད་ཆག་དེས་གཤམ་འོག་རྒྱལ་ཁབ་ཁག་ལ་ཉེན་བརྡ་ཞིག་བཏང་ཡོད་པ་བོད་པའི་ཁོར་ཡུག་ཉམས་ཞིབ་པ་ཁག་ཅིག་གིས་གསུང་གི་འདུག དེ་ཡང་བོད་ཀྱི་སྲིད་བྱུས་ཉམས་ཞིབ་ཁང་གི་ཁོར་ཡུག་ཉམས་ཞིབ་པ་དོན་གྲུབ་དབང་མོ་ལགས་ཀྱིས། བོད་ཀྱི་ས་མཚམས་ཁུལ་དུ་ཆུ་རུད་བྱུང་བ་དེ་ནི་ཐེངས་དང་པོ་མ་ཡིན་པར་དེ་སྔ་ཡང་། ཆུ་རུད་དང་ས་ཡོམ་གྱི་དཀའ་ངལ་མང་དག་ཅིག་འཕྲད་མྱོང་ཡོད་པས། ཁོར་ཡུག་གི་གནོད་འཚེ་ཆེན་པོ་བྱུང་མྱོང་སའི་ས་ཆ་དེར་རྒྱ་ནག་གཞུང་གིས་ལྟ་རྟོག་དང་ཚན་རིག་གྱིས་ཞིབ་འཇུག་སྔོན་འགོག་སོགས་བྱེད་དགོས་ཀྱང་། རྒཡ་ནག་གཞུང་གིས་དེ་ལས་ལྡོག་སྟེ་སྣང་མེད་ཀྱིས་ས་ཆའི་འཁྱོག་ཚད་ལས་བརྒལ་བའི་འཛུགས་སྐྲུན་གྱི་ལས་གཞི་སྤེལ་བ་དེས་ཁོར་ཡུག་ལ་གནོད་སྐྱོན་ཤུགས་ཆེ་རུ་བཏང་ཞིང་། མ་འོངས་འཁྱགས་རོམ་མང་པོ་ལྷག་ཡོད་པ་དེ་དག་ཀྱང་བཞུར་བའི་ཉེན་ཁ་ཆེན་པོ་ཡོད་པ་འདི་ག་ཨེ་ཤེ་ཡ་རང་དབང་རླུང་འཕྲིན་ཁང་ལ་འགྲེལ་བརྗོད་གནང་བྱུང་ལ། རྒྱལ་སྤྱིའི་བོད་དོན་འབྲེལ་མཐུད་ལས་ཁང་གི་ཁོར་ཡུག་ཉམས་ཞིབ་པ་བློ་བཟང་དབྱངས་མཚོ་ལགས་ཀྱིས། བལ་བོད་ས་མཚམས་སུ་འཕྲད་པའི་ཆུ་རུད་ཀྱི་གོད་ཆག་དེ་ནི་རྒྱ་ནག་གཞུང་གིས་བོད་ཀྱི་ས་ཆའི་ཆགས་བབ་སོགས་ལ་ལྟོས་མེད་ཀྱིས། ཆུ་མཛོད་དང་མེ་འཁོར་ལྕགས་ལམ། ཕུག་ལམ་སོགས་འཛུགས་སྐྲུན་མང་དག་བྱས་པའི་རྐྱེན་གྱིས་ཁོར་ཡུག་གཏོར་སྐྱོན་དང་། དེས་གནམ་གཤིས་འགྱུར་ལྡོག་བཏང་བར་བརྟེན་ཡིན་པས། བོད་ཀྱི་ཁྱིམ་མཚེས་རྒྱལ་ཁབ་ཁག་གིས་བལ་ཡུལ་ལ་འཕྲད་པའི་གོད་ཆག་དེ་ལས་བསླབ་བྱ་བླངས་ཏེ། ཡར་ཀླུང་གཙང་པོའི་ཐོག་རྒྱ་ནག་གཞུང་གིས་འཛུགས་སྐྲུན་བྱེད་བཞིན་པའི་འཛམ་གླིང་གི་ཆུ་མཛོད་ཆེ་ཤོས་ཀྱི་ལས་གཞི་བཀག་སྡོམ་ལ་འབད་དེ། མི་ས་ཡ་མང་པོའི་ཚེ་སྲོག་སྐྱོབ་ཐབས་གནང་དགོས་གལ་ཆེ་བ་ལས། གལ་ཏེ་དེ་ལྟར་བྱེད་མ་ཐུབ་ཚེ་མ་འོངས་བལ་ཡུལ་གྱི་གོད་ཆག་དང་ཡང་ན་དེ་ལས་ཆེས་ཚབས་ཆེ་འི་གོད་ཆག་བྱུང་ཉེན་ཆེ་ཞེས་གསུང་གི་འདུག ཁོར་ཡུག་ཉམས་ཞིབ་པ་དོན་གྲུབ་དབང་མོ་ལགས་དང་། རྒྱལ་སྤྱིའི་བོད་དོན་དྲ་བའི་ཁོར་ཡུག་ཉམས་ཞིབ་པ་བགྲེས་པ་འབུམ་རམས་པ་བློ་བཟང་གཡང་མཚོ་ལགས། ༢༠༢༦།༠༩།༠༡ (RFA Tibetan) བལ་ཡུལ་གྱི་ (Department of Hydrology and Meteorology’s Flood Forecasting Division) ཞེས་ཆུ་དང་གནམ་གཤིས་རིག་པའི་ལས་ཁུངས་ཀྱིས་ཟླ་ ༨ ཚེས་ ༢༧ ཉིན་དམིགས་བསལ་བརྡ་ཁྱབ་ཅིག་བཏང་སྟེ། བལ་བོད་ས་མཚམས་ཀྱི་ཆུ་ལོག་འབྱུང་ཁུངས་ས་ཚིགས་སུ་ཆུ་ལོག་གི་གོད་ཆགས་བྱུང་བའི་རྐྱེན་གྱིས་ཁུལ་དེའི་ Lhende གཙང་པོར་འཁྱགས་རོམ་དང་འདམ་རུད་སོགས་ཀྱིས་ཆུ་རྒྱུན་བཀག་པའི་གནས་སྟངས་འོག་མཚོའི་འགག་སྒོ་ཞིག་ཆགས་ཡོད་པ་དེས། ་སླར་ཡང་གཙང་པོའི་གཤམ་རྒྱུད་ཀྱི་ས་ཁུལ་ཁག་ཏུ་ཆུ་ལོག་ཚབས་ཆེན་འབྱུང་སྲིད་པའི་ཉེན་བརྡ་བཏང་ཡོད་པ་དང་འབྲེལ། ཁོར་ཡུག་ཉམས་ཞིབ་པ་བློ་བཟང་དབྱངས་མཚོ་ལགས་ཀྱིས། བོད་ཀྱི་ཁོར་ཡུག་ནང་འཁྱགས་རོམ་མང་པོ་ཞིག་ཡོད་པ་དེ་དག་བོད་ནང་གི་གནམ་གཤིས་ལ་འགྱུར་ལྡོག་འགྲོ་བ་དང་བསྟུན། འཁྱགས་རོམ་དེ་དག་བཞུར་ཏེ་མཚོ་མང་པོ་ཆགས་ཀྱི་ཡོད་པས། མཚོ་དེ་དག་རྡོལ་ཏེ་མ་འོངས་གོད་ཆག་གཉིས་པ་འབྱུང་སྲིད་ལ། རྒྱ་ནག་གིས་བོད་ནང་གི་ཁོར་ཡུག་ལ་ཚད་ལྡན་ཞིབ་འཇུག་གནང་མཁན་གྱི་ཚན་རིག་པ་བསྐྱོད་བཅུག་གི་མེད་པ་དེས། མ་འོངས་དེས་མི་ས་ཡ་མང་པོའི་སྲོག་ལ་ཉེན་ཁ་ཆགས་ངེས་ཡིན་པ་གསུང་གི་འདུག བོད་ནང་དུ་གནས་ཚུལ་ལ་བཀག་འདོམས། བལ་བོད་ས་མཚམས་ཀྱི་ཆུ་རུད་དེ་བྱུང་བ་ནས་བཟུང་། བལ་ཡུལ་ནང་གི་གོད་ཆགས་རྗེས་ཀྱི་གནས་སྟངས་ནི་གཅིག་རྗེས་གཉིས་མཐུད་ཀྱིས་སྤྱི་ཚོགས་དྲ་ལམ་ཁག་ཏུ་ཐོན་བཞིན་ཡོད་ཀྱང་། བོད་ཀྱི་གནོད་ཐེབས་ས་ཁུལ་གྱི་བརྙན་དང་གནས་ཚུལ་ཤེས་རྟོགས་ཐུབ་པར་དཀའ་བར་གྱུར་ཡོད་པའི་ཐད། ཨ་རིར་རྟེན་གཞི་བྱས་པའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་ཨེ་ཤེ་ཡ་སྡེ་ཚན་གྱི་འགན་འཛིན་གཞོན་པ་མ་ཡ་ཝང་ (Maya Wang) ལགས་ཀྱིས། འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་ངོས་ནས་རྒྱ་ནག་གཞུང་གིས་བོད་ནང་དུ་དམིགས་བསལ་ཕྱི་ཕྱོགས་སུ་འབྲེལ་བ་བྱེད་པ་དང་གནས་ཚུལ་བརྗེ་ལེན་བྱེད་པ་ཙམ་གྱིས་རྒྱལ་ཁབ་ཀྱི་བདེ་འཇགས་ལ་གནོད་སྐྱོན་བཟོས་པའི་ཉེས་མིང་འོག་བཙོན་བཅུག་བྱས་པ་སོགས་ཀྱི་གནད་དོན་ཐད་དེ་སྔ་ནས་གླེང་བཞིན་ཡོད་པ་ལྟར། ཐེངས་འདིར་རྒྱ་ནག་གཞུང་གིས་གསར་འགོད་པ་རྣམས་གནོད་ཐེབས་ས་ཁུལ་ཁག་ཏུ་བསྐྱོད་དེ་མི་རྣམས་དང་སྐད་ཆ་བཤད་པར་དམ་དྲག་དང་། སྐྱབས་ཟིན་པའི་མི་ཚོར་རྒྱ་ནག་གི་འདོད་མོས་ལྟར་དུ་སྐད་ཆ་བཤད་དུ་བཅུག་པ་སོགས་བྱེད་ཀྱི་ཡོད་པས། གནོད་འཚེ་ཕོག་མཁན་རྣམས་ཀྱི་སྐད་ཆ་དངོས་དང་། རྐྱེན་འདས་སུ་ཕྱིན་པ། གར་སོང་ཆ་མེད་དུ་ཕྱིན་པ། གནོད་ཐེབས་ས་ཁུལ་གྱི་གནས་བབ། སྐྱོབ་གསོའི་ལས་དོན་སོགས་ཀྱི་སྐོར་གནས་སྟངས་ཁ་གསལ་གང་ཡང་མེད་པ་སོགས་ཐེར་འདོན་གནང་ཞིང་། གནོད་འཚེ་ཕོག་མཁན་རྣམས་ལ་སྨྲ་བརྗོད་རང་དབང་དགོས་པ་གསུངས་འདུག འཁོར་སྐར་པར་རིས་ནང་གསལ་ལྟར་དབྱེ་ཞིབ་པ་ཚོས་འཁྱགས་རོམ་ཉིལ་ཏེ་ (Glacier Collapse) ཕྱི་ཟླ་ ༨ ཚེས་ ༢༦ ཉིན་འདམ་རྡོ་ཆུ་བྱུང་པར་ངོས་འཛིན་བྱེད་ཀྱི་ཡོད་པ་རེད། (USGS/Landsat 9/via REUTERS) དེ་བཞིན་ཕ་ཡུལ་སྐྱིད་གྲོང་ནས་ཡིན་པ་བཙན་བྱོལ་ནང་གནས་བཞུགས་རྒན་བྱམས་པ་དཔལ་ལྡན་ལགས་ཀྱིས་བལ་བོད་ས་མཚམས་སུ་འདམ་རུད་ཆུ་ལོག་གི་གོད་ཆག་བྱུང་བའི་རྗེས་ཁོང་གིས་ས་གནས་སུ་འབྲེལ་བ་མཐུད་ཐབས་ག་ཚོད་བྱས་ཀྱང་། འབྲེལ་བ་མཐུད་ཐུབ་ཀྱི་མེད་པ་གསུང་གི་འདུག་ལ། ས་གནས་སུ་ལམ་དང་ཟམ་པ་མང་པོ་ཆད་དེ་བོད་ཀྱི་ས་ཁུལ་གཞན་ནས་ཀྱང་མི་ཕར་འགྲོ་ཚུར་འོང་ལ་རྒྱ་ནག་གཞུང་གིས་དམ་བསྒྲགས་བྱེད་ཀྱི་ཡོད་སྲིད་ཅེས་འདི་ག་རླུང་འཕྲིན་ཁང་ལ་གསུང་གི་འདུག ཟླ་ ༨ ཚེས་ ༣༡ ཉིན་རྒྱ་ནག་སྤྱི་བདེ་ལྷན་ཁང་གིས་སྤེལ་བའི་གནས་ཚུལ་ནང་། ༢༠༢༦ གི་དྲ་རྒྱ་གཙང་སེལ་ཞེས་པའི་ལས་འགུལ་འོག སྐྱིད་གྲོང་ཁུལ་གྱི་གནོད་འཚེའི་ཁྲོད་འདས་གྲོངས་སུ་སོང་བའི་གྲངས་ཐོ་དང་གར་སོང་ཆ་མེད་དུ་སོང་བའི་གྲངས་ཐོ་རྫུན་གཏམ་བཤད་པར་ངོས་འཛིན་གྱིས་ཉེས་ཆད་བཏང་ཡོད་འདུག ཟླ་ ༨ ཚེས་ ༣༡ ཉིན་རྒྱ་ནག་ཕྱི་འབྲེལ་ལྷན་ཁང་གི་མགྲིན་ཚབ་པ་ཀུའོ་ཅཱ་ཁུན་གྱིས་ཀྱང་། རྒྱ་ནག་དང་བལ་ཡུལ་གཉིས་ཀྱི་ཆེད་ལས་མི་སྣ་དང་གཞུང་འབྲེལ་ལས་ཁུངས་ཀྱི་དཔྱད་ཞིབ་བྱས་པ་བརྒྱུད། གནོད་འཚེ་དེ་གོ་ལའི་དྲོད་ཚད་ཡུན་རིང་འཕེལ་བའི་ཤུགས་རྐྱེན་འོག་བལ་ཡུལ་ས་ཁོངས་ཀྱི་ས་མཐོའི་གངས་རིའི་འཁྱགས་རོམ་ཉིལ་བ་ལས་བྱུང་བ་བརྗོད་འདུག་ཀྱང་། རོའི་ཊརསི་གསར་ཁང་ལ་བལ་ཡུལ་གྱི་ལས་བྱེད་གཉིས་ཀྱིས། འདི་ལོའི་སྔོན་དུ་གནོད་འཚེའི་ཐད་མཉམ་ལས་སྐོར་གྲོས་མོལ་བྱས་རྗེས་པའི་རྗེས་སུ་ཡང་། རྒྱ་ནག་གིས་གངས་རིའི་ཉེན་ཁ་དང་ཆུ་ཚད་སྐོར་གྱི་གནས་ཚུལ་འདང་ངེས་མཉམ་སྤྱོད་བྱས་མེད་ཅིང་། དེས་མ་འོངས་པའི་གནོད་འཚེར་སྔོན་འགོག་བྱེད་པར་དཀའ་ངལ་བཟོ་སྲིད་པའི་སེམས་འཚབ་ཡོད་པ་བརྗོད་འདུག རྒྱ་ནག་ཕྱི་སྲིད་ལྷན་ཁང་གིས་དེའི་ལན་དུ། རྒྱ་ནག་གིས་བལ་ཡུལ་ལ་གནམ་གཤིས་དང་ཆུའི་དཔྱད་ཞིབ་ཀྱི་གནས་ཚུལ་མུ་མཐུད་མཁོ་སྤྲོད་བྱས་ཡོད་པ་བརྗོད་སྐོར་རོའི་ཊརསི་གསར་ཁང་གིས་ལུང་འདྲེན་བྱས་འདུག

RFA Tibetan འཛམ་གླིང༌།

སྐྱིད་གྲོང་འགག་སྒོའི་ར་སུ་གྲོང་ཚོའི་ཁྱིམ་དུད་ ༡༥ དང་སྐྱིད་གྲོང་དུ་སྐྱོད་མཁན་བོད་པའི་སྣེ་ཤེན་པ་ ༡༠ གར་སོང་ཆ་མེད་དུ་སོང་ཡོད་ཅིང་། རྒྱ་རིགས་མཁས་པས་གནོད་འཚེ་འདིའི་བྱུང་རྐྱེན་ནི་གནམ་གཤིས་ཚ་དྲོད་འཕེལ་ནས་འཁྱགས་རོམ་ཞུར་བ་ལས་བྱུང་བ་བརྗོད་ཡོད། སྐྱིད་གྲོང་ར་སུ་གྲོང་ཚོའི་ཁྱིམ་དུད་དང་བོད་མི་སྣེ་ཤེན་པ། འདི་ག་ཨེ་ཤེ་ཡ་རང་དབང་རླུང་འཕྲིན་ཁང་ལ་སྐྱིད་གྲོང་གི་བོད་མི་ཞིག་གིས་བརྗོད་པར། སྐྱིད་གྲོང་གི་གནོད་འཚེ་ཕོག་ཡུལ་གྱི་ར་སུ་གྲོང་ཚོ་ནས་མི་གཉིས་རི་སྟེང་དུ་བྲོས་ཐུབ་པའི་གནས་ཚུལ་ཐོས་ཡོད་པ་བརྗོད་བྱུང་། ཡང་ཁོང་གིས་སྐྱིད་གྲོང་རྫོང་རང་དུ་གནོད་འཚེ་བྱུང་མེད་པ་དང་ཆུ་འདི་ཀི་ལོ་མི་ཊར་ (3 km) གསུམ་ཙམ་གྱེན་ལ་རྒྱུགས་ཡོད་པས། འགག་སྒོ་ཡོད་སའི་ར་སུ་གྲོང་ཚོའི་ཁྱིམ་དུད་ ༡༥ ཙམ་ཡོད་པ་ཚང་མ་མེད་པ་ཆགས་འདུག དེར་ལས་ཀ་བྱེད་མཁན་ནང་དམག་མི་མང་པོ་ཡོད་རེད་ལ། ས་ཆ་འདི་འགག་སྒོ་ཡིན་དུས་བལ་ཡུལ་དུ་སྐྱོད་ས་དང་། ང་ཚོའི་འགག་སྒོ་དང་ཉེན་རྟོག་པ་སོགས་མི་བརྒྱ་ཕྲག་ཡོད་ཀྱི་རེད། ང་ཚོ་འབྲེལ་བ་བྱེད་ཐུབ་ཀྱི་མི་འདུག་ཅེས་བརྗོད་བྱུང་ལ། ང་ཚོ་ལས་བྱེད་ཀྱང་གནོད་འཚེ་ཕོག་ཡུལ་ས་ཆར་གཏོང་གི་མི་འདུག ལས་འགན་གཙོ་བོ་ནི་གནོད་འཚེ་ཕོག་པའི་ནང་མིར་སེམས་གསོ་བྱས་ནས་བསྡད་རྒྱུ་རེད། ད་ལྟ་མགྲོན་ཁང་ནང་ཉེ་འཁོར་གྱི་ཉེན་ཁ་ཡོད་པའི་ས་ཆ་ནས་སྤོས་ཡོང་བའི་མང་ཚོགས་བཞག་ཡོད་པ་དང་། གནོད་འཚེ་བྱུང་ཡུལ་དངོས་ལ་དམག་མི་དང་དྲག་ཆས་ཉེན་རྟོག་པ། ཉེན་རྟོག་པ་ལས་གཏོང་གི་མི་འདུག་ཅེས་བརྗོད་བྱུང་། ཡང་བོད་ནང་ནས་འབྱོར་བའི་གནས་ཚུལ་ལྟར་ན། བལ་བོད་ས་མཚམས་སུ་ཕྱི་རྒྱལ་ཡུལ་སྐོར་བ་དང་གནས་མཇལ་བ་རྩིས་ལེན་དང་སྣེ་ཤེན་བྱེད་མཁན་བོད་མི་ ༡༠ ད་དུང་གར་སོང་ཆ་མེད་དུ་གནས་ཡོད་པ་འབྲེལ་ཡོད་མི་སྣས་བརྗོད་བྱུང་བ་དང་། བོད་མི་འདི་རྣམས་ནི་རྒྱུན་དུ་བལ་བོད་ས་མཚམས་ནས་ཡུལ་སྐོར་བ་དང་གནས་མཇལ་བ་རྩིས་ལེན་བྱས་ཏེ། གངས་རིན་པོ་ཆེ་དང་མ་ཕམ་གཡུ་མཚོ་སོགས་ལ་ཁྲིད་སྐབས་སྐད་བསྒྱུར་དང་སྣེ་ཤེན་བྱེད་ཀྱི་ཡོད་འདུག་ལ། གར་སོང་ཆ་མེད་དུ་སོང་བའི་མི་བཅུ་དེའི་ནང་ལྷ་ས་དང་སྟོད་ལུང་། དེ་བཞིན་ས་ཁུལ་གཞན་གྱི་བོད་མི་ཡོད་པ་བརྗོད་བྱུང་། ཟླ་ ༨ ཚེས་༢༨ ཉིན་བལ་བོད་ས་མཚམས་སུ་འཁོར་སྐར་ཐོག་ནས་ལེན་པའི་འདྲ་པར། (SPOT ©CNES 2026, Distribution A/via REUTERS) རྒྱ་རིགས་མཁས་དབང་གི་དབྱེ་ཞིབ། འཇར་མ་ཎིའི་ཌོར་ཊི་མུན་ཌི་ཚན་རྩལ་སློབ་ཆེན་ (Technische Universität Dortmund) གྱི་སློབ་དཔོན་ཝང་ཝིལ་སླའོ་ཡིས་ད་རེས་ཀྱི་འདམ་རྡོ་ཆུ་རུད་ཀྱི་བྱུང་རྐྱེན་ནི་གནམ་གཤིས་ཚ་དྲོད་འཕེལ་བའི་རྒྱུན་རིང་གི་གནས་སྟངས་འོག་འཁྱགས་རོམ་བརྟན་པོ་མེད་པ་ཆགས་པ་ནས་བྱུང་བ་ཞིག་ཡིན་པར་ངོས་འཛིན་གནང་གི་འདུག་ལ། དེ་མིན་ཁ་སྣོན་དགོས་པའི་རྒྱུ་རྐྱེན་གཞན་ཞིག་ནི། འཁྱགས་རོམ་བརྟན་པོ་མེད་པའི་ས་ཁུལ་དུ་ ༢༠༡༥ ལོར་བལ་ཡུལ་དུ་ས་ཡོམ་གྱི་གནོད་འཚེ་ཆེན་པོ་ཞིག་བྱུང་བའི་རྗེས་སུ་འཁྱགས་རོམ་ཐེངས་མང་པོ་ཉིལ་ཡོད། དེར་བརྟེན་འཁྱགས་རོམ་འོག་གི་བྲག་རྡོ་བརྟན་པོ་མེད་པ་ཆགས་ཡོད་ཅེས་གསུངས་བྱུང་། བོད་ནང་མང་ཚོགས་ཀྱི་མཆོད་འབུལ། སྐྱིད་གྲོང་དུ་གནོད་འཚེ་བྱུང་ནས་ཉིན་བདུན་ཕྱིན་པའི་མཚམས་འདིར་བོད་ནང་ནས་བརྗོད་པར། ལྷ་སའི་རུ་བཞི་དང་། སེ་ར། འབྲས་སྤུངས། དགའ་ལྡན་བཅས་སུ་གནོད་འཚེའི་ནང་འདས་གྲོངས་སུ་སོང་བ་རྣམས་ཀྱི་ཆེད་མཆོད་འབུལ་དང་སྨོན་ལམ་ཞུ་མཁན་ཧ་ཅང་མང་པོ་ཡོད་པ་བརྗོད་བྱུང་། དེ་མིན་ཡང་སྤྱི་ཚོགས་དྲ་ལམ་ཐོག་བོད་མི་སྒེར་དང་དགོན་པ་ཁག་ཅིག་གིས་བསྔོ་སྨོན་དང་བརྒྱ་མཆོད་སྟོང་མཆོད་ཕུལ་བའི་བརྙན་ཡང་མཐོང་རྒྱུ་འདུག ༢༠༢༥ ལོའི་ཟླ་ ༡་ཚེས་ ༨ ཉིན་བལ་ཡུལ་གྱི་བོད་མི་བཙན་བྱོལ་པས་སྨོན་ལམ་འདེབས་བཞིན་ཡོད་པ། (Navesh Chitrakar/REUTERS) ཤི་རྨས་དང་གར་སོང་ཆ་མེད་ཀྱི་གནས་སྟངས། ཟླ་ ༩ ཚེས་ ༡ ཉིན་བལ་ཡུལ་གྱི་གནོད་འཚེ་དོ་དམ་ལས་ཁུངས་ཀྱི་གྲངས་ཐོ་ལྟར་ན། བལ་ཡུལ་དུ་མི་ ༩༨༧ འདས་གྲོངས་དང་། མི་ ༣༩༡༦ གར་སོང་ཆ་མེད་དུ་སོང་ཡོད་པའི་ཁོངས་ནས་ཕྱི་རྒྱལ་རྒྱལ་ཁབ་ ༣༠ ལྷག་གི་མི་སེར་ ༥༨༣ ཡོད་འདུག བོད་ཕྱོགས་སུ་རྒྱ་ནག་གཞུང་འབྲེལ་བརྒྱུད་ལམ་ཐོག་འགྱུར་བ་མེད་པར། སྐྱིད་གྲོང་དུ་མི་ ༡༦ འདས་གྲོངས་དང་། མི་ ༥༤༦ གར་སོང་ཆ་མེད་དུ་སོང་ཡོད་པའི་ཁོངས་ནས་ཕྱི་རྒྱལ་རྒྱལ་ཁབ་ ༢༣ གྱི་མི་སེར་ ༢༦༡ ཡོད་པར་བརྗོད་འདུག བོད་དང་བལ་ཡུལ་གཉིས་ཀྱི་གཞུང་འབྲེལ་གསལ་བསྒྲགས་ལ་གཞིགས་ན། ༡༠༠༣ ཙམ་འདས་གྲོངས་སོང་ཡོད་པ་དང་། མི་ ༤༤༦༢ གར་སོང་ཆ་མེད་དུ་སོང་ཡོད་འདུག ཚེས་ ༡ ཉིན་རྒྱ་ནག་གཞུང་གིས་སྐྱིད་གྲོང་གྲོང་རྡལ་དུ་འདས་པོ་ཚོར་མྱ་ངན་ཞིག་ཚོགས་ཡོད་པ་དང་། མྱུར་སྐྱོབ་ལས་དོན་སྤེལ་མཁན་གྱི་འཕྲུལ་ཆས་ཁ་ཤས་ཤིག་ས་ཡུལ་དངོས་ལ་འབྱོར་ཡོད་པ་བརྗོད་འདུག

RFA Tibetan ༸གོང་ས་མཆོག

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་ལ་དྭགས་ཀྱི་ཆོས་ལུགས་འདྲ་མིན་གྱིས་ཆེ་བསྟོད་སྣེ་ལེན་ཞུས་ཤིང་། ཁ་ཆེའི་སྐུ་ཚབ་ཀྱིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ལ་དྭགས་གཅིག་པུ་མིན་པར་འཛམ་གླིང་ཁྱོན་ཡོངས་ལ་མིག་གི་འོད་གསལ་བཞིན་ལམ་སྟོན་སྩོལ་གྱི་ཡོད་རེད་ཅེས་ཆེ་བསྟོད་ཞུས་འདུག བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་ ༢༠༢༦ ཕྱི་ཟླ་ ༩ ཚེས་ ༡ ཉིན་ལ་དྭགས་ས་གནས་སུ་ཡོད་པའི་ནང་པ་དང་། ཁ་ཆེ། ཡི་ཤུ་བཅས་ཆོས་ལུགས་འདྲ་མིན་ཐུན་མོང་གིས་༧མགོན་པོ་མཆོག་ལ་ཆེ་བསྟོད་སྣེ་ལེན་དང་སྟོན་འཁོར་ལྷན་རྒྱས་ལ་གསོལ་ཚིགས་འདེགས་འབུལ་ཞུས་གནང་ཡོད་པ་རེད། སྐབས་དེར་ཆོས་ཚོགས་འདྲ་མིན་གྱི་སྐུ་ཚབ་ནས་གསུང་བཤད་གནང་པའི་ནང་ནས་ལ་དྭགས་ཀྱི་ཨན་ཇུ་མན་ཨི་མ་མི་ཡའི་ཆོས་ཚོགས་ཀྱི་ཚོགས་གཞོན་ཤེཀ་ན་ཟིར་ལགས་ཀྱིས་ལ་དྭགས་སུ་ཆོས་ལུགས་དབྱེ་བ་མེད་པའི་མི་གང་པོ་༧རྒྱལ་བ་རིན་པོ་ཆེ་མཆོག་ཉི་མ་ལྟ་བུ་མཚོན་གྱི་ཡོད་པ་གསུངས་སོང་། ཁོང་གིས་ད་དུང་། ༧རྒྱལ་བ་རིན་པོ་ཆེ་མཆོག་གིས་ནང་པ་གཅིག་པོ་མིན་པར་ཁ་ཆེ་ནང་ཁུལ་གྱི་ཤི་ཡ་དང་སུ་ནི་གཉིས་ཀྱི་དབར་ལ་རྩོད་གླེང་བྱུང་བ་དེར་བཀའ་སློབ་ལམ་སྟོན་གནང་པར་བརྟེན་ནས་ཕན་ཐོགས་ཆེན་པོ་བྱུང་ཡོད་པ་དེ་བཀའ་དྲིན་ཆེན་པོ་ཡིན་ཞེས་གསུངས་སོང་། ཡང་ལ་དྭགས་ས་གནས་ཀྱི་ཆོས་ལུགས་ཚང་མ་མཉམ་འཛོམས་ཐོག་༧རྒྱལ་བ་རིན་པོ་ཆེ་མཆོག་ལ་ཆེ་བསྟོད་སྣེ་ལེན་ཞུ་རྒྱུ་དེ་ལོ་རྒྱུས་ནང་ཐེངས་དང་པོ་ཡིན་དུས་ཚང་མས་དགའ་དགོས་པའི་གཏམ་ཞིག་ཡིན་པ་ལ་དྭགས་ནང་ཚོགས་ཀྱི་དབུ་སྐྱོང་ཚེ་རིང་རྡོ་རྗེ་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་། ༧རྒྱལ་བ་རིན་པོ་ཆེ་དེ་སྔོན་ཞབས་སྤུས་ལ་སྨན་བཅོས་མཛད་ནས་ཐོག་མ་ཕེབས་དུས་ཆིབས་ཌོར་ཕེབས་ཡོད་པ་དང་དེ་རིང་ང་ཚོ་ཚང་མས་མིག་གི་མདུན་དུ་༧རྒྱལ་བ་རིན་པོ་ཆེ་ཞབས་པུས་དྭངས་སྐྱེས་བྱུང་སྟེ་ཞབས་གོམ་བསྐྱོན་གནང་བ་མཇལ་རྒྱུ་བྱུང་པ་འདི་ལ་དྭགས་པ་ཀུན་ལ་འདི་ལས་དགའ་བའི་གནས་འཚུལ་ཞིག་མེད་པ་ལ་དྭགས་ཨན་ཇུ་མན་མོན་ཨིན་ཨུལ་ཨིསི་ལམ་ཆོས་ཚོགས་ཀྱི་དབུ་སྐྱོང་ཁྲིམས་རྩོད་པ་ཤ་ཕི་ལ་སུ་ལགས་ཀྱིས་གསུངས་བྱུང་། འདས་པའི་ལོ་ ༤༠ ལྷག་གི་རིང་ལ་དྭགས་ཡི་ཤུའི་ཆོས་ཚོགས་ནས་༧རྒྱལ་བ་རིན་པོ་ཆེ་མཆོག་ལ་དམིགས་བཀར་ཆེ་བསྟོད་ཀྱི་ཞུ་སྒོའི་ལས་འཆར་དམིགས་བསལ་ཅི་ཡང་བྱེད་རྒྱུ་མ་བྱུང་བར་ད་རེས་ལ་དྭགས་ཀྱི་ཆོས་ཚོགས་ཚང་མ་དང་མཉམ་༧རྒྱལ་བ་རིན་པོ་ཆེ་མཆོག་ལ་ཐུགས་རྗེ་ཆེ་ཞུའི་ལས་རིམ་ཞིག་སྤེལ་རྒྱུ་བྱུང་བ་དེ་ཡག་པོ་བྱུང་བ་ལ་དྭགས་ཡི་ཤུའི་ཆོས་ཚོགས་ཀྱི་ཚོགས་གཙོ་བདེ་ཆེན་ཅམ་ག་ལགས་ཀྱིས་གསུངས་བྱུང་། ཁོང་གིས་ད་དུང་མུ་མཐུད་གསུངས་དོན་དུ། ༧རྒྱལ་བ་རིན་པོ་ཆེ་ལ་དྭགས་གཅིག་པུར་མ་རེད། ནང་པ་གཅིག་པུར་མ་རེད། ༧རྒྱལ་བ་རིན་པོ་ཆེ་དེ་རིང་འཇིག་རྟེན་གང་པོར་ཞི་བདེ་དང་། བཟོད་སྒོམ། སྤུན་མཆེད་ཀྱི་འདུ་ཤེས་ཐོག་ལ་ཁོང་གིས་བཀའ་སློབ་ལམ་སྟོན་གནང་གི་ཡོད་པ་དེ་དག་དཔེ་གལ་ཆེན་པོ་ཆགས་ཀྱི་ཡོད་རེད། དེར་བརྟེན་ཁོང་༧སྐུ་འཚོ་བཞུགས་བདེ་ཐང་བཞུགས་རྒྱུ་དེ་ང་ཚོ་ཚང་མ་ལ་གལ་ཆེན་པོ་རེད། ང་ཚོ་ཡི་ཤུའི་སྤྱི་ཚོགས་ལ་དེ་རིང་གི་ཉིན་མོ་དེ་དཔེ་གལ་ཆེན་པོ་ཡིན། ང་ཚོའི་ངོས་ནས་༧རྒྱལ་བ་རིན་པོ་ཆེ་ལ་ཆེ་བསྟོད་སྣེ་ལེན་ཞུ་ཡག་དེ་ལོ་ ༤༠ ཙམ་གྱི་སྔོན་ལ་རེད་འདུག སྤྱིར་བཏང་གི་༧རྒྱལ་བ་ཡིད་བཞིན་ནོར་བུ་ལ་དྭགས་ལ་ནམ་ཞིག་ཕེབས་ན། ཁ་ཆེའི་མཱསི་ཇིདྷ་དང་ང་ཚོའི་ཡི་ཤུའི་མཆོད་ཁང་ལ་ཕེབས་ཀྱི་ཡོད་རེད། འོན་ཀྱང་ང་རང་ཚོས་དྭང་དུ་ལེན་ནས་ཁོང་ལ་ཆེ་བསྟོད་གདན་ཞུ་རྒྱུ་དེ་ལོ་ཞི་བཅུ་ལྷག་འགྲོ་ཡི་འདུག ད་ལོ་ང་ཚོ་བསོད་བདེ་ཅན་ཞིག་ཚོར་གྱི་འདུག སེམས་དགའ་བོ་ཡང་འདུག ༧རྒྱལ་བ་རིན་པོ་ཆེ་མཆོག་གི་བསླབ་བྱ་བཟང་པོ་བསྩལ་བ་དེར་༧རྒྱལ་བ་རིན་པོ་ཆེ་ང་ཚོ་ཚང་ལ་རིན་ཆེན་ལྟ་བུ་འཚོར་གྱི་འདུག་ཅེས་གསུངས་བྱུང་།། པར་ལེན་སྒྲིག་སྦྱོར་བ། འཕྲིན་ལས་ཆོས་སྒྲོན།

RFA Tibetan བཙན་བྱོལ།

ནིའུ་ཡོཀ་མཉམ་འབྲེལ་རྒྱལ་ཚོགས་ཀྱི་མདུན་དབུས་བོད་ཀྱི་གཞོན་ནུ་ལྷན་ཚོགས་ཀྱིས་རྒྱུན་མཐུད་ཟས་བཅད་ལས་འགུལ་སྤེལ་བཞིན་པའི་ཁྲོད་ལོ་ཚད་མི་འདྲ་བའི་བོད་མི་ཚོས་མཉམ་ཞུགས་གནང་བཞིན་ཡོད་པ་དང་། ལས་འགུལ་ནང་མི་བདུན་རེ་བྱས་ཏེ་དུས་མཉམ་དུ་ཆུ་ཚོད་ ༢༤ རིང་ཟས་བཅད་ངོ་རྒོལ་གནང་བཞིན་འདུག བློ་དགའ་རང་བཙན་ལགས་ཀྱིས་མཉམ་འབྲེལ་རྒྱལ་ཚོགས་ཀྱི་མདུན་དུ་རང་ལུས་མེར་སྲེག་བཏང་ནས་འདས་གྲོངས་སུ་གྱུར་ཏེ་ཟླ་བ་གཉིས་མ་ཟིན་ཙམ་སོང་བའི་དུས་འདིར་ད་ལྟ་བོད་མིས་ལས་འགུལ་འདྲ་མིན་སྤེལ་བཞིན་ཡོད་ཀྱང་འཛམ་གླིང་མཉམ་འབྲེལ་རྒྱལ་ཚོགས་དང་རྒྱལ་སྤྱིའི་སྤྱི་ཚོགས་ངོས་ནས་ཡ་ལེན་དོན་འབྲས་ལྡན་པ་ཞིག་བྱེད་ཀྱི་ཡོད་མེད་ནི་དྲི་བ་ཞིག་ཆགས་ཡོད། ཨོསི་ཊརེ་ལི་ཡའི་རྒྱལ་སྤྱིའི་ཉེས་ཡངས་ཚོགས་པའི་རྒྱལ་སྤྱིའི་ཐབས་ཇུས་ལས་འགུལ་བ་ཨན་ཌྲུ་ཝིཐི་ཕོརཌི་ལགས་ཀྱིས་བློ་དགའ་རང་བཙན་ལགས་ཀྱི་སྐོར་གནས་ཚུལ་དེ་དང་པོ་མཐོང་དུས་ཧང་སང་པ་དང་སེམས་སྡུག་བློ་འགྱོད་ཆེན་པོ་བྱུང་བ། ངས་བལྟས་ན་དེ་ནི་འགྲོ་བ་མི་སུ་ཞིག་ཡིན་རུང་འཇིགས་སུ་རུང་བ་ཞིག་རེད། ད་རེས་ཀྱི་དོན་རྐྱེན་དེས་བོད་མིའི་སྤྱི་ཚོགས་ཀྱི་མི་འགའ་ཤས་འ་ཆད་འུ་ཐུགས་པ་དང་རེ་ཐག་ཆད་པའི་ཚད་ཐོ་ཤོས་ལ་སླེབས་པའི་མཚོན་རྟགས་ཤིག་རེད་བསམ་གྱི་འདུག་ཅེས་ཨེ་ཤེ་ཡ་རང་དབང་རླུང་འཕྲིན་ཁང་གསུངས་བྱུང་། ད་དུང་ཁོང་གིས་མུ་མཐུད་གསུངས་དོན་དུ། བཙན་ཤེད་ཀྱི་ཐོག་ནས་གྲངས་ཉུང་མི་རིགས་རྒྱ་མི་རིགས་ཀྱི་ཁོངས་སུ་མཉམ་བསྲེས་བྱེད་པ་དེ་སྲིད་གཞུང་གི་སྲིད་ཇུས་ཤིག་ཡིན་ཞིང་། སྲིད་ཇུས་དོན་འཁྱོལ་ཆེད་ཁྲིམས་ལུགས་ཀྱིས་རྒྱབ་སྣོན་བྱེད་ཀྱི་ཡོད་པ་གསལ་པོ་བསྟན་ཡོད་པ་དང་། བོད་ལ་རྒྱལ་སྤྱིའི་དོ་སྣང་རྒྱུན་འཁྱོངས་བྱེད་པར་དཀའ་ངལ་འཕྲད་དོན་སྐོར་ཁོང་གིས་རྒྱལ་ཁབ་མང་ཆེ་བའི་དུས་རྒྱུན་ནས་འགྲོ་བ་མིའི་ཐོབ་ཐང་གི་གནས་དོན་ལས་སོ་སོའི་རྒྱལ་ཁབ་ཀྱི་རྒྱ་ནག་མཉམ་དུ་དཔལ་འབྱོར་དང་འཐབ་ཇུས་ཀྱི་འབྲེལ་བ་དེ་ལ་རྒྱུན་དུ་གཙོ་གནད་ཆེ་བར་རྩི་ཡི་ཡོད་པ་རེད་ཅེས་གསུངས་བྱུང་། དེ་བཞིན་བོད་མི་དང་གྲངས་ཉུང་མི་རིགས་གཞན་ཚོར་རྒྱ་ནག་ནང་འཕྲད་བཞིན་པའི་འགྲོ་བ་མིའི་ཐོབ་ཐང་གི་དཀའ་ངལ་དེ་རྒྱལ་ཁབ་གཞན་ཁག་གིས་ཤེས་ཀྱི་ཡོད་ཀྱང་། ཁོང་ཚོས་རྒྱ་ནག་མཉམ་དུ་ཆབ་སྲིད་དང་དཔལ་འབྱོར་ཡང་ན་འཐབ་ཇུས་ཀྱི་འབྲེལ་བར་གནོད་སྐྱོན་གཏོང་རྒྱུར་དྭོགས་ཟོན་དང་ཡིད་གཟབ་བྱེད་ཀྱི་ཡོད་པའི་རྐྱེན་གྱིས་གནད་དོན་དེ་དག་ལ་གལ་ཆེན་པོ་མ་བརྩིས་པ་རེད་ཅེས་བརྗོད་བྱུང་། ཡང་རྒྱ་ནག་ནང་གི་འགྲོ་བ་མིའི་ཐོབ་ཐང་དང་ཆོས་ལུགས་རང་དབང་ཐད་ལྟ་ཞིབ་བྱེད་མཁན་ཨི་ཊ་ལིའི་གསར་འགོད་པ་མཱར་ཀོ་རེས་པིན་ཊི་ལགས་ཀྱིས་བློ་དགའ་རང་བཙན་ལགས་ནི་རྒྱ་ནག་དམར་ཤོག་གཞུང་གི་སྲིད་བྱུས་ལ་ངོ་རྒོལ་ཆེད་རང་ལུས་མེར་བསྲེགས་གཏོང་མཁན་གྱི་བོད་མི་བཅུ་ཕྲག་མང་པོའི་ཁོངས་ནས་གཅིག་ཡིན་པ་དང་ཁོང་འདས་གྲོངས་སུ་གྱུར་བ་དེས་བོད་ནང་གི་གནས་སྟངས་ཛ་དྲག་ཡིན་པ་མཚོན་གྱི་ཡོད་པ་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང། དེ་ཡང་བློ་དགའ་རང་བཙན་ལགས་ཀྱིས་རང་ལུས་མེར་བསྲེགས་བཏང་པའི་རེ་འབོད་ཀྱི་ནང་རྒྱ་ནག་གི་མི་རིགས་མཐུན་སྒྲིལ་དང་ཡར་ཐོན་སྐུལ་སྤེལ་གྱི་ཁྲིམས་གསར་པར་ངོ་རྒོལ་གཅིག་ཆགས་ཡོད་ལ། འགྲོ་བ་མིའི་ཐོབ་ཐང་ཚོགས་པ་ཁག་གིས་ཁྲིམས་དེས་གྲངས་ཉུང་མི་རིགས་ཚོ་རྒྱ་རྒྱུར་གྱི་སྲིད་ཇུས་ལ་སྔར་བས་ཤུགས་ཆེ་རུ་གཏོང་བ་ཞིག་ཡིན་པར་སྐྱོན་བརྗོད་བྱེད་ཀྱི་འདུག མཱར་ཀོ་རེས་པིན་ཊི་ལགས་ཀྱིས་ད་དུང་། གང་ཟག་གཅིག་གིས་རང་ཉིད་མེར་སྲེག་གཏོང་རྒྱུའི་ཐག་གཅོད་བྱེད་དགོས་འཁེལ་སྐབས། གནས་སྟངས་དེ་བཟོད་དཀའ་བ་ཞིག་མཚོན་གྱི་ཡོད་པས། བློ་དགའ་རང་བཙན་ལགས་རང་སྲོག་བློས་གཏོང་བྱེད་རྒྱུ་འདི་གདམ་ཁར་མཐོང་ཡོད། བོད་ནང་གི་གནས་སྟངས་དེ་བཟོད་ཐབས་བྲལ་བ་ཞིག་རེད། འོན་ཀྱང་འཛམ་གླིང་གིས་དེར་ཉན་འཇོག་བྱེད་ཀྱི་མེད་པ་དང་། ག་རེ་བྱེད་ནས་དོ་སྣང་བྱེད་ཀྱི་མེད་པ་དེ་ཚོ་འདྲི་དགོས། འཛམ་གླིང་ནང་གཞུང་མང་པོ་ཞིག་གིས་རང་དབང་དང་འགྲོ་བ་མིའི་ཚེ་སྲོག་ལས་དཔལ་འབྱོར་གྱི་ཁེ་ཕན་དང་ཚོང་ལས་ལ་རིན་ཐང་ཆེ་བ་སྤྲོད་ཀྱི་ཡོད་པ་འགྲེལ་བརྗོད་གནང་སོང་། མཉམ་འབྲེལ་རྒྱལ་ཚོགས་ཀྱི་མདུན་དང་བོད་མི་གནས་ཡུལ་གང་སར་བོད་དོན་ངོ་རྒོལ་བྱེད་མཁན་ཚོར་རྒྱལ་སྤྱིའི་ངོས་ནས་ཡ་ལན་གང་འདྲ་ཡོང་གི་ཡོད་མེད་ད་ཆ་ལྟ་ཞིབ་དོ་སྣང་བྱེད་པའི་གནད་དོན་ཞིག་ཏུ་གྱུར་ཡོད་པ་རེད།། བརྙན་པར་སྒྲིག་སྦྱོར་བ། ནོར་སྡེ་སྒྲོལ་མ།

RFA Tibetan ༸གོང་ས་མཆོག

བོད་དང་བལ་ཡུལ་ས་མཚམས་སུ་ཕྱི་ཟླ་ ༨ ཚེས་ ༢༦ ཉིན་བྱུང་བའི་འདམ་རྡོ་ཆུ་རུད་ཀྱི་གནོད་འཚེའི་རྗེས་སུ་ཆེད་ལས་མི་སྣས་བྱུང་རྐྱེན་ནི་འཁྱགས་རོམ་ཉིལ་བ་ལས་བྱུང་བ་ཞིག་དང་། རྒྱ་ནག་གཞུང་གིས་དྲ་རྒྱར་དམ་བསྒྲགས་དང་། བལ་ཡུལ་གྱི་མྱུར་སྐྱོབ་རུ་ཁག་གིས་རྒྱ་གར་དང་རྒྱ་ནག་གི་ཆེད་ལས་མི་སྣའི་རོགས་རམ་འོག ཆུ་གློག་ལས་གཞིའི་གཉེར་བཞིན་པའི་ཕུག་ལམ་ཁག་ནང་མི་ལུས་ཡོད་པར་ཚོད་དཔག་གིས་སྐྱོབ་ཐབས་བྱེད་བཞིན་འདུག གངས་རི་བསྐྱར་དུ་ཉིལ་བའི་ཉེན་ཁ་དང་བྱུང་རྐྱེན། གནོད་འཚེ་བྱུང་སའི་ཉེ་འཁོར་དུ་གངས་རི་བསྐྱར་དུ་ཉིལ་བའི་ཉེན་ཁ་ཡོད་པ་དང་། འདམ་རྡོ་ས་རུད་བྱུང་ནས་ཆུ་འགག་སྟེ་མཚེའུ་གསར་པ་ཆགས་པའི་ཉེན་ཁ་ཡོད་པ་ཡང་རྒྱ་ནག་གཞུང་གི་བརྒྱུད་ལམ་ནས་བརྗོད་འདུག་ཅིང་། རྒྱ་ནག་གཞུང་ཕྱོགས་ཀྱིས་ད་རེས་ཀྱི་གནོད་འཚེ་འདི་ནི་གོ་ལའི་དྲོད་ཚད་ཡུན་རིང་འཕེལ་བའི་ཤུགས་རྐྱེན་འོག བལ་ཡུལ་ས་ཁོངས་ཀྱི་ས་མཐོའི་གངས་རི་ཞིག་གི་འཁྱགས་རོམ་བརྟན་པོར་གནས་མི་ཐུབ་པར་ཉིལ་བ་ལས་བྱུང་བའི་གནོད་འཚེ་ཡིན་པ་བརྗོད་ཡོད། ཚེས་ ༣༡ ཉིན་རྒྱ་ནག་ཕྱི་འབྲེལ་ལྷན་ཁང་གི་མགྲིན་ཚབ་པ་ཀུའོ་ཅཱ་ཁུན་གྱིས་ཀྱང་། རྒྱ་ནག་དང་བལ་ཡུལ་གཉིས་ཀྱི་ཆེད་ལས་མི་སྣ་དང་གཞུང་འབྲེལ་ལས་ཁུངས་ཀྱི་དཔྱད་ཞིབ་བྱས་པ་བརྒྱུད། གནོད་འཚེ་དེ་བལ་ཡུལ་ས་ཁོངས་ཀྱི་ས་མཐོའི་གངས་རིའི་འཁྱགས་རོམ་ཉིལ་བ་ལས་བྱུང་བ་བརྗོད་འདུག འོན་ཀྱང་རོའི་ཊརསི་གསར་ཁང་ལ་བལ་ཡུལ་གྱི་ལས་བྱེད་གཉིས་ཀྱིས། འདི་ལོའི་སྔོན་དུ་གནོད་འཚེའི་ཐད་མཉམ་ལས་སྐོར་གྲོས་མོལ་བྱས་རྗེས་ཀྱང་། རྒྱ་ནག་གིས་གངས་རིའི་ཉེན་ཁ་དང་ཆུ་ཚད་སྐོར་གྱི་གནས་ཚུལ་འདང་ངེས་མཉམ་སྤྱོད་བྱས་མེད་པ་དང་། གནས་ཚུལ་མཉམ་སྤྱོད་མ་བྱས་པ་དེས་མ་འོངས་པའི་གནོད་འཚེར་སྔོན་འགོག་བྱེད་པར་དཀའ་ངལ་བཟོ་སྲིད་པའི་སེམས་འཚབ་ཡོད་པ་བརྗོད་འདུག རྒྱ་ནག་ཕྱི་སྲིད་ལྷན་ཁང་གིས་དེའི་ལན་དུ། རྒྱ་ནག་གིས་བལ་ཡུལ་ལ་གནམ་གཤིས་དང་ཆུའི་དཔྱད་ཞིབ་ཀྱི་གནས་ཚུལ་མུ་མཐུད་མཁོ་སྤྲོད་བྱས་ཡོད་པ་བརྗོད་སྐོར་རོའི་ཊརསི་གསར་ཁང་གིས་ལུང་འདྲེན་བྱས་འདུག བལ་བོད་ས་མཚམས་སུ་འདམ་རྡོ་ཆུ་རུད་ཀྱི་གནོད་འཚེ་ཚབས་ཆེན་བྱུང་ཡུལ། (བོད་ལྗོངས་ཉིན་རེའི་ཚགས་པར།) རྒྱ་ནག་གཞུང་གིས་དྲ་ལམ་ཐོག་གནས་ཚུལ་སྤེལ་མཁན་ལ་ཉེས་ཆད། ཡང་ཚེས་ ༣༡ ཉིན་སྤེལ་བའི་རྒྱ་ནག་སྤྱི་བདེ་ལྷན་ཁང་གིས་ ༢༠༢༦ གི་དྲ་རྒྱ་གཙང་སེལ་ཞེས་པའི་ལས་འགུལ་ཁྲོད་ནས་སྐྱིད་གྲོང་འགག་སྒོའི་གནོད་འཚེའི་སྐོར་དྲ་ལམ་ཐོག་ལ་དཀྲོག་གཏམ་སྤེལ་མཁན་ལ་ཉེས་ཆད་གཏོང་བཞིན་ཡོད་པ་བརྗོད་ནས་གྱོད་དོན་དཔེ་མཚོན་ ༡༠ གསལ་བསྒྲགས་བྱས་འདུག དེ་ཡང་སྐྱིད་གྲོང་ཁུལ་གྱི་གནོད་འཚེའི་ཁྲོད་འདས་གྲོངས་སུ་སོང་བའི་གྲངས་ཐོ་དང་གར་སོང་ཆ་མེད་དུ་སོང་བའི་གྲངས་ཐོ་རྫུན་གཏམ་བཤད་པར་ངོས་འཛིན་གྱིས་ཉེས་ཆད་བཏང་ཡོད་འདུག་ལ། རྒྱ་ནག་གི་《བདེ་འཇགས་དོ་དམ་ཉེས་ཆད་བཅའ་ཁྲིམས་》ཀྱི་དོན་ཚན་ ༢༩ ལྟར་ན། ཆེད་མངགས་ཀྱིས་གནོད་འཚེ་སོགས་ཀྱི་རྫུན་གཏམ་སྤེལ་ཏེ་སྤྱི་ཚོགས་ལ་གནོད་པ་བཟོས་པར་ཉིན་ལྔ་ནས་བཅུ་བར་བཀག་ཉར་དང་དངུལ་གྱི་ཉེས་ཆད་གཅོད་ཆོག་པ་གསལ་ཡོད་པ་རེད། འོན་ཀྱང་རྒྱ་ནག་གི་སྤྱི་ཚོགས་དྲ་ལམ་ཐོག་འབྲེལ་ཡོད་སྐྱིད་གྲོང་ཁུལ་གྱི་གནོད་འཚེ་འདིའི་གནས་ཚུལ་དང་བརྙན་བཞག་པ་ཁག་གང་མྱུར་དྲ་རྒྱའི་དོ་དམ་པས་མེད་པ་བཟོས་པ་དང་བཀག་བཞིན་ཡོད་པ་བོད་ནས་བརྗོད་བྱུང་ལ། སྐྱིད་གྲོང་ཁུལ་གྱི་ལས་ཁུངས་ཁག་ལ་གནས་ཚུལ་རྩད་གཅོད་བྱས་སྐབས་གཞུང་གི་གསར་འགྱུར་གཞི་བཞག་བྱ་རོགས་ཟེར་བ་དང་། གནས་ཚུལ་གསར་པ་ཁག་གཞུང་གི་གསར་འགྱུར་ནང་ཡོད་ཅེས་བརྗོད་ཀྱི་འདུག བོད་བལ་གཉིས་ཀྱི་འགག་སྒོ་ཤུལ་མེད་སོང་ཡོད་པ། ཚེས་ ༣༡ ཉིན་བར་མཚོན་ན། བལ་ཡུལ་དུ་མི་ ༩༠༣ འདས་གྲོངས་སུ་སོང་བ་གཏན་འཁེལ་བྱུང་ཡོད་པ་དང་། གར་སོང་ཆ་མེད་དུ་སོང་བའི་མི་ ༤༢༤༧ ཡོད་པའི་ནང་མི་ ༩༣༣ ནི་ཆུ་གློག་ལས་གཞི་དང་འབྲེལ་བའི་ལས་མི་ཡིན་པ་དང་། མང་པོ་ཞིག་ཕུག་ལམ་ཁག་ནང་ལུས་ཡོད་པར་ཚོད་དཔག་བྱེད་བཞིན་འདུག་ལ། བལ་ཡུལ་དམག་དཔུང་གིས་ཐབས་ཤེས་འདྲ་མིན་བེད་སྤྱད་དེ་ཕུག་ལམ་གཉིས་ནང་འཛུལ་རྗེས་ཕུང་པོ་གསུམ་རྙེད་ཡོད་ཀྱང་། ས་ཁུལ་མང་པོ་ད་དུང་འདམ་རྡོས་ཁེངས་ཡོད་པས་འཚོལ་ཞིབ་མུ་མཐུད་བྱེད་བཞིན་ཡོད་སྐོར་རོའི་ཊརསི་གསར་ཁང་གིས་གནས་ཚུལ་སྤེལ་འདུག བལ་ཡུལ་ཕྱོགས་ནས་ཕྱི་རྒྱལ་རྒྱལ་ཁབ་ ༣༩ ཡི་མི་སེར་ ༥༩༠ ཙམ་ད་དུང་རྩད་རྙེད་མི་ཐུབ་པར་གནས་ཤིང་། ཕྱི་རྒྱལ་མི་སེར་ ༣༢༣ ཚུད་པའི་མི་ཁྲི་གཅིག་ལྷག་ཙམ་སྐྱོབ་ཐུབ་ཡོད་པ་བརྗོད་འདུག ཡང་བོད་ཀྱི་སྐྱིད་གྲོང་རྫོང་དུ་མི་ ༡༦ འདས་གྲོངས་སུ་སོང་བ་དང་མི་ ༥༤༦ གར་སོང་ཆ་མེད་དུ་སོང་ཡོད་པ་རྒྱ་ནག་གཞུང་ཕྱོགས་ཀྱིས་བརྗོད་ཡོད་ལ། ཕྱི་རྒྱལ་རྒྱལ་ཁབ་ ༢༣ གྱི་མི་སེར་ ༢༦༡ དང་འབྲེལ་བ་ཆད་ཡོད་པ་བརྗོད་ཡོད། སྐྱིད་གྲོང་འགག་སྒོའི་གནོད་འཚེ་ཕོག་ཡུལ་དུ་མྱུར་སྐྱོབ་མི་སྣ་འབྱོར་རྗེས་རྒྱ་ནག་གཞུང་འབྲེལ་གྱི་བརྒྱུད་ལམ་ཁག་ནས་ཐོག་བརྩེགས་ཅན་གྱི་འགག་སྒོ་ད་ལྟའི་ཆར་ཤུལ་ཙམ་ཡང་མ་ལྷག་པར་མཐོང་རྒྱུ་མེད་པ་བཟོས་ཡོད་པའི་བརྙན་མཐོང་རྒྱུ་འདུག་ལ། འཚོལ་ཞིབ་ལས་ཀར་དཀའ་ངལ་འཕྲད་བཞིན་ཡོད་འདུག སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ཐུགས་སྨོན་གནང་བ། (OHHDL) ཆོས་ཕྱོགས་དབུ་ཁྲིད་ནས་དམིགས་བསལ་ཐུགས་སྨོན་གནང་བ། ཚེས་ ༣༠ ཉིན་ལ་དྭགས་སུ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་ཞུ་སྐབས། ༧གོང་ས་མཆོག་གིས་བོད་ཕྱོགས་སྐྱིད་གྲོང་དང་བལ་ཡུལ་ཕྱོགས་ཀྱི་ར་སུ་ཝ་ཁུལ་གྱི་ས་གནས་མང་པོར་ཆུ་ལོག་དང་ས་རུད་ཚབས་ཆེའི་རྐྱེན་ངན་འོག་འདས་གྲོངས་ཕྱིན་པ་དང་གར་སོང་ཆ་མེད་དུ་གྱུར་པ། རྨས་སྐྱོན་ཕོག་པ་དང་དཀའ་ངལ་འཕྲད་པ། ཤུལ་ལུས་ནང་མི་བཅས་ཀྱི་ཆེད་དུ་དམིགས་བསལ་ཐུགས་སྨོན་གནང་ཡོད་པ་དང་། ཡང་དེ་དང་དུས་མཚུངས་ཚེས་ ༣༠ ཉིན། ཡི་ཤུའི་བླ་ཆེན་པོཔ་ལིའུ་༡༤ མཆོག་གིས་རེས་གཟའ་ཉི་མའི་སྨོན་ལམ་གྱི་སྐབས་སུ། བལ་ཡུལ་དང་བོད་དུ་ཐོན་པའི་ཆུ་ལོག་གི་གནོད་འཚེས་ཤུགས་རྐྱེན་ཐེབས་པའི་མི་རྣམས་ཀྱི་ཆེད་དུ་ངས་སྨོན་ལམ་འདེབས་ཀྱི་ཡོད། ང་ཚོས་འདས་གྲོངས་སུ་སོང་བ་དང་རྨས་སྐྱོན་ཕོག་པ། གར་སོང་ཆ་མེད་དུ་སོང་བ། དེ་བཞིན་ཁོང་ཚོའི་ནང་མི་དང་མྱུར་སྐྱོབ་ལས་དོན་པ་རྣམས་ཀྱི་ཆེད་དུ་མཉམ་དུ་སྨོན་ལམ་འདེབས་རྒྱུ་དང་། ཚང་མའི་བྱམས་བརྩེ་དང་སྙིང་རྗེའི་ཀུན་སློང་གིས་གནོད་འཚེ་ཕོག་པའི་མི་རྣམས་ཀྱི་སྡུག་བསྔལ་ཆུང་དུ་གཏོང་བ་དང་། ཁོང་ཚོར་དགོས་ངེས་ཀྱི་རོགས་སྐྱོར་ཐོབ་པར་ཤོག་ཅེས་སྨོན་ལམ་གནང་འདུག

RFA Tibetan འཛམ་གླིང༌།

འདམ་རྡོ་ཆུ་རུད་ནས་ཐར་པའི་ལོ་རྒྱུས། ཟླ་ ༨ ཚེས་ ༢༦ ཉིན་བལ་བོད་ས་མཚམས་སུ་བྱུང་བའི་འདམ་རྡོ་ཆུ་རུད་ཀྱི་གོད་ཆག་དེའི་ཁྲོད་ནས་ཚེས་ ༢༧ དང་ ༢༨ ཉིན་བལ་ཡུལ་གཞུང་ཕྱོགས་ཀྱི་ཉེན་སྐྱོབ་རུ་ཁག་གིས་ཐད་འཕུར་གནམ་གྲུ་བརྒྱུད་མི་ཁག་ཅིག་སྐྱབས་ཏེ་བལ་ཡུལ་རྒྱལ་ས་ཀཐ་མཎ་ཌུར་འབྱོར་འདུག་པའི་ཁོངས་ནས་གཅིག་གི་ཨ་མ་ལོ་ ༩༨ ཅན་ཞིག་གཡུག་སྟེ་བྲོས་དགོས་འཁེལ་འདུག བལ་ཡུལ་ར་སུ་ཝ་ནས་ཡིན་པ་མི་ཞིག་གིས། གློ་བུར་ཆུ་རུད་བྱུང་བའི་སྐབས་དེར་གནམ་གྲུ་བྲག་ལ་བརྡབ་པ་ལྟ་བུའི་སྐད་སྒྲ་ཚོར་བ་བྱུང་ཞིང་། གཞུང་ཕྱོགས་ནས་ཆུ་རུད་ཡོང་གི་ཡོད་པའི་སྔོན་བརྡ་གང་ཡང་བྱུང་མི་འདུག་ལ། གློག་ཆད་པའི་རྐྱེན་གྱིས་ཁ་པར་སོགས་ཀྱི་འབྲེལ་མཐུད་ཡང་ཆ་ཚང་ཆད་ཡོད་པའི་གནས་སྟངས་འགྲེལ་བརྗོད་གནང་གི་འདུག་ལ། ཆུ་རུད་ཀྱིས་ཁོང་གི་འབྲེལ་ཡོད་ནང་མི་ཆ་ཚང་ཆུས་འཁྱེར་སོང་བས་ཚོར་བ་སྐྱོ་བོ་དང་ཡིད་མ་ཆེས་པ་བྱུང་འདུག ད་ཆ་ཁོང་ལ་ཡོད་པ་ནི་ལུས་པོ་གཅིག་པུ་ལས་ཁང་པ་དང་རྒྱུ་ནོར་ལོངས་སྤྱོད་གང་ཡང་མེད་ཅེས་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་། ཆུ་རུད་འདི་གནམ་ནས་འཕྱུར་བ་ལྟ་བུ་མཐོང་འདུག བལ་ཡུལ་ཕྱོགས་ཀྱི་སེར་ཐང་ཏི་མུ་རེ་ནས་ཡིན་པ་རང་ལོ་ ༦༧ ཡིན་པའི་མི་གཞན་ཞིག་གིས། ཆུ་རུད་དེ་གནམ་ནས་འཕྱུར་བ་ལྟར་དུ་ཡོང་སྟེ་སྐབས་དེར་ས་འགུལ་ཡང་ཚོར་ཡོད་ཅིང་། ཆུ་རུད་ཡོང་བཞིན་པ་མཐོང་བ་དང་ཆུ་རུད་དེ་ཁོང་གི་ནང་ཁྱིམ་དུ་འབྱོར་བ་གཉིས་དུས་མཉམ་ཡིན་པ་འགྲེལ་བརྗོད་གནང་བ་དང་། སྐབས་དེར་ཁོང་དང་ཁོང་གི་ནང་མི། ཡུལ་མི་ ༩ བཅས་ཁོང་གི་བུ་ཆུང་བར་བུ་ཞིག་སྐྱེས་པའི་སྐྱེས་སྟོན་གཏོང་བཞིན་ཡོད་པའི་སྐབས་འདིར་དེར་འདུས་མི་ཆ་ཚང་མཉམ་དུ་བྲོས་ཏེ་ཐར་ཐུབ་པ་བྱུང་ཞེས་གསུང་གི་འདུགཨ་མ་རྒན་རྒོན་ཞིག་གཡུག་སྟེ་བྲོས་དགོས་བྱུང་པ། སེར་ཐང་ཏི་མུ་རེར་ཆུ་ལོག་བྱུང་སྐབས་བྲོས་པའི་སྐབས། རྒན་རྒོན་དང་བུ་ཕྲུག ལུས་པོའི་ནུས་སྟོབས་ཀྱི་ཆ་ནས་བྲོས་མ་ཐུབ་མཁན་མང་པོ་བྱུང་འདུགདེ་ཡང་སེར་ཐང་ཏི་མུ་རེ་ནས་ཡིན་པ་རང་ལོ་ ༥༨ མི་གཞན་ཞིག་གིས། ཆུ་གློག་མ་བྱུང་བའི་གོང་ཁོང་དང་བཟའ་ཟླ་གཉིས་ཁོང་གི་ཨ་མ་ལོ་ ༩༨ ཡིན་པ་དང་མཉམ་བསྡད་ཡོད་ཀྱང་། ཆུ་རུད་བྱུང་སྐབས་ཨ་མ་སྒུག་ན་རང་སྲོག་ཤོར་བར་བསམ་སྟེ། ཨ་མ་རྒྱབ་ཏུ་གཡུག་བཞག་སྟེ་ཨ་མ་མིག་གི་མཐོང་གིན་ཆུས་འཁྱེར་ཕྱིན་པའི་གནས་སྟངས་བྱུང་པ་དང་། ཁོང་གི་བཟའ་ཟླ་ནི་ཆུ་རུད་ཀྱི་བར་ན་ཐར་ཐུབ་ཙམ་བྱུང་ཡོད་པ་གསུངས་བྱུང་། སྐར་མ་གཉིས་ནང་གྲོང་གཞིས་ཡོངས་སུ་ཆུས་འཁྱེར་བ། མི་སྣ་གཞན་ཞིག་གིས་གསུངས་དོན་དུ། ཆུ་རུད་མ་བྱུང་གོང་ཁྱིམ་ཚང་ཆ་ཚང་གི་གློག་ཆད་པ་དང་། དེ་ནས་གློ་བུར་དིང་སྒྲ་བསྒྲགས་ཞིང་། གྲོང་པ་ཆ་ཚང་མིའི་སྐད་གཅོར་གྱིས་འཁེངས་ཏེ། སྐར་མ་གཉིས་ནང་གྲོང་པ་ཚང་མ་ཆུས་བསྣུབས་སོང་ཞེས་དང་། ཆུ་རུད་དེ་བྱུང་སྐབས་ཁོང་ལ་དངངས་སྐྲག་ཞེ་དྲགས་བྱུང་སྟེ་རྐང་བརྗེ་མ་བྲོས་ཕྱིན་ཡིན་ཞེས་གསུངས་བྱུང་། དེ་སྔ་ཁུལ་དེར་ཆུ་རུད་ཚབས་ཆེ་དེ་འདྲ་བྱུང་མེད་སྟབས་ཚང་མས་སྣང་མེད་དུ་ཤོར་ཡོད་ཀྱང་། ཆུ་རུད་དེ་ནི་ཁང་བརྩེགས་ཧ་ཅང་མཐོ་བའི་ཁང་པའི་མཐོ་ཚད་དང་མཉམ་ཞིང་། ཆུ་གནམ་ལ་ཡོད་པ་ལྟར་དུ་སྣང་བས། དེའི་བར་ན་ཁང་པ་མཐོང་ཐུབ་ཐབས་བྲལ་བར་གྱུར་ཡོད་པ་གསུངས་བྱུང་། རི་མགོར་ཡོད་མཁན་ཚོ་ཐར་འདུག ས་གནས་ནས་བྲོས་ཐར་མཁན་མང་པོ་ཞིག་དོན་རྐྱེན་བྱུང་ཡུལ་དུ་མེད་པའམ་རི་མགོར་འགྲོ་བ། ཡང་ན་ཕྱི་ལ་ཐོན་ནས་བྲོས་རྒྱུའི་དུས་ཚོད་ཕྲན་བུ་ཐོབ་པ་ཤ་སྟག་རེད་འདུག་ལ། ཁོང་ཚོ་འདམ་རྡོ་ཆུ་རུད་འདི་དམག་སར་སླེབས་པ་སྟེ་མེ་མདའ་དང་འབར་རྫས་གས་པ་ལྟ་བུའི་སྒྲ་ཐོས་པ་དང་མྱོང་ཚོར་བྱུང་འདུག དེ་ཡང་གསེར་ཐང་ཏི་མུ་རེ་ནས་ཡིན་པ་མི་སྣ་གཞན་ཞིག་གིས། ཆུ་རུད་འབྱུང་བའི་སྐབས་སུ་ཁོང་ཞིང་ཁར་ཚལ་བཏབ་ཆེད་ཏོག་རྩེ་ལེན་པར་འགྲོ་བཞིན་ཡོད་པ་དང་། སྐབས་དེར་ནམ་མཁར་དར་ལྕོག་དཀར་པོ་ལྟ་བུ་ཞིག་རྒྱ་ཆེན་པོ་ཞིག་འཕྱུར་བའམ་གནམ་གྲུ་ལྟ་བུ་བསྐོར་བ་རྒྱབ་པ་ལྦིང་ལྦིང་ཞེས་སྐད་སྒྲ་སྒྲོག་གིན་ཡོང་བ་ཞིག་དང་། དེའི་བརྒྱབ་ན་ཆུ་རུད་དེ་ནག་པོ་འདྲ་པོ་ཞིག་ཡོང་བཞིན་མེ་མདའ་རྒྱག་པ་ལྟར་དུ་གཤམ་གྱི་གྲོང་པ་ཆ་ཚང་ནག་ཐིམ་མེར་བཟོས་ཏེ། སྐར་མ་གཅིག་གཉིས་ཙམ་ནང་ཆ་ཚང་སྟོང་སེང་ངེ་བཟོས་ཏེ་ཐག་ཆོད་ཡོད་པ་འགྲེལ་བརྗོད་གནང་བྱུང་ལ། ཆུ་རུད་དེས་ཁང་གི་སྤུན་ཉེ་བཅོ་ལྔ་ཉི་ཤུ་ཙམ་ཆུས་འཁྱེར་ཕྱིན་ཡོད་ཀྱང་། ཁོང་གིས་སྐྱེ་དམན་གང་དུ་ཡོད་ན་བསམ་བཞིན་སྤྱན་རས་གཟིགས་སྒོམ་བཞིན་གསོལ་བ་སྙིང་དབུས་ནས་བཏབ་སྐབས། ཆུ་ཚོད་གཅིག་གི་ནང་སྐྱེ་དམན་ཡང་ངུ་སྒྲ་སྒྲོག་བཞིན་ཁོང་འཚོལ་དུ་ཡོང་བཞིན་པ་མཐོང་བས་སེམས་པ་ལྷོད་ལ་བབ་ཡོད་པའི་གནས་སྟངས་ཤིག་འགྲེལ་བརྗོད་གནང་བྱུང་། བོད་དང་བལ་ཡུལ་ས་མཚམས་སུ་འབྲེལ་ཐག་ཆད་པ། ས་གནས་སུ་ད་ཆ་དཀའ་ངལ་ཆེ་ཤོས་ནི་བགྲོད་ལམ་ཆད་པ་དང་། གློག་ཆད་ནས་བོད་དང་བལ་ཡུལ་གཉིས་ཀའི་ནང་ཁ་པར་གྱི་འབྲེལ་མཐུད་ཆད་དེ་ད་ལྟ་ཡིན་ཡང་ང་ཚོར་གནས་ཚུལ་བརྗོད་མཁན་མང་པོས་ས་གནས་སུ་འབྲེལ་བ་མཐུད་ཐུབ་ཀྱི་མེད་པ་བརྗོད་བྱུང་། ད་ལྟའི་ཆར་ཉེན་སྐྱོབ་ཟིན་པ་ཁག་གཅིག་བལ་ཡུལ་ཀཌ་མན་ཌུ་ཁུལ་གྱི་དགོན་པ་ཁག་དང་། ཁག་གཅིག་གཞུང་གིས་གྲ་སྒྲིག་བྱས་པའི་སྡོད་སྒར་ནང་བཞུགས་ཀྱི་ཡོད་པའི་གནས་ཚུལ་གོ་རྒྱུ་འདུག ངལ་སེལ་དྭང་བླངས་རོགས་སྐྱོར། བལ་བོད་ས་མཚམས་སུ་བྱུང་བའི་འདམ་རུད་ཀྱི་གོད་ཆག་འོག་རྐྱེན་འདས་སུ་ཕྱིན་པ་རྣམས་ཀྱི་ཤུལ་ལུས་བུ་ཕྲུག་ཚོར་རོགས་སྐྱོར་ཆེད། ཨ་རི་ལྦ་ཤིང་ཊོན་དུ་གནས་སྡོད་བོད་རིགས་གཞོན་སྐྱེས་མིང་བརྗོད་འདོད་མེད་པ་ཞིག་གིས་སྣེ་ཁྲིད་དེ་ཁག་ཅིག་གིས་ཆུ་ཚོད་ ༤༨ རིང་གི་དཔལ་འབྱོར་འདུ་འགོད་འགོ་འཛུགས་བྱས་འདུག དེ་ཡང་ཨ་རིའི་རྒྱལ་ས་ལྦ་ཤིན་ཊོན་དུ་གནས་བཞུགས་བོད་མི་དེས་ཆུ་རུད་ཀྱི་གནས་ཚུལ་ཐོས་མ་ཐག་ཏི་མུ་རེ་ཁུལ་དུ་བོད་ཁྱིམ་སློབ་གྲོགས་ལ་འབྲེལ་བ་བྱས་པར། སློབ་གྲོགས་དེ་སྐར་མ་གཉིས་ཙམ་འགོར་ན་ཆུས་འཁྱེར་ཟིན་ཡོད་ཀྱང་དུས་ཐོག་བྲོས་ཐར་ཐུབ་ཙམ་བྱུང་སྟེ། མི་ ༣༠༠ ལྷག་དང་མཉམ་བལ་ཡུལ་རྒྱལ་ས་ཀཐ་མན་གྲུའི་ཡ་ལོ་དགོན་པར་བསྡད་ཡོད་པས། ཁོང་གི་ལུང་པར་གལ་ཏེ་དེ་སྔ་མི་བརྒྱ་ཡོད་ན་ད་ཆ་སུམ་བཅུ་མ་གཏོགས་ལྷག་མེད་ཅིང་ཁང་པ་སོགས་ཀྱི་ཤུལ་ཙམ་ཡང་ལྷག་མེད་པ་འགྲེལ་བརྗོད་གནང་འདུག ཀཐ་མན་གྲུའི་དགོན་པ་དེར་མྱུར་སྐྱོབས་ངལ་སེལ་གྱི་སླེབས་པའི་ཕྲུ་གུ་ཆུང་ཆུང་མང་པོ་ཞིག་ནང་མི་སྤུན་མཆེད་གང་ཡང་མེད་པར་ལུས་ཡོད་པས། བོད་མི་དེ་དག་གིས་ཆུ་ཚོད་ ༤༨ རིང་ཉེ་འཁོར་གྲོགས་པོ་གྲོགས་མོའི་བརྒྱུད་ཞལ་འདེབས་འཚོལ་སྒྲུབ་བྱེད་བཞིན་ཡོད་པ་གསུངས་བྱུང་།། བརྙན་པར་སྒྲིག་སྦྱོར་བ། བསྟན་འཛིན་དོན་ཡོད།

RFA Tibetan བོད།

ཆུ་ཚོད་ ༡༠ དང་སྐར་མ་ ༥༦། སྐྱིད་གྲོང་གི་རི་སྟེང་དུ་ཡོད་པའི་ཕྱུགས་རྫི་ཞིག་གིས་གཤམ་གྱི་ཡུལ་མིར་ཁ་པར་བཏང་ནས་ཆུ་རུད་ཡོང་བཞིན་པའི་ཉེན་བརྡ་བཏང་འདུག འོན་ཀྱང་། སྐར་མ་གསུམ་ཙམ་ལས་མ་འགོར་བར། ཆུ་ཚོད་ ༡༠ དང་སྐར་མ་ ༥༩ ཙམ་ལ། ཁ་པར་འབྲེལ་ལམ་ཆད་པ་དང་། འདམ་དང་རྡོ། ཆུ་བོ་བཅས་མཉམ་དུ་འཕྱུར་ནས་སླེབས་པའི་ཆུ་རུད་ཀྱིས་སྐྱིད་གྲོང་འགག་སྒོའི་ཉེ་འཁོར་ཧ་ལམ་མིག་སྔ་ནས་བསུབས་ཤིང་། “ད་གང་ཡང་ལྷག་མ་སོང་།”ཞེས་སྐྱིད་གྲོང་གི་ཡུལ་མི་ཞིག་གིས་ཨེ་ཤེ་ཡ་རང་དབང་རླུང་འཕྲིན་ལ་བཤད་པའི་ཚིག་ཅིག་རེད། ཁོང་གིས། “གནོད་འཚེ་མ་བྱུང་གོང་གི་དགོང་མོར་མཉམ་དུ་སྐད་ཆ་བཤད་ནས་བསྡད་པའི་མི་ཁ་ཤས། ཕྱི་ཉིན་དེར་འདས་གྲོངས་སུ་སོང་འདུག ཚང་མ་གློ་བུར་དུ་བྱུང་བས། རྨི་ལམ་ནང་བཞིན་འདུག” ཅེས་བརྗོད་བྱུང་། འཁོར་སྐར་ནས་པར་ལེན་བྱས་པའི་ཆུ་ལོག་བྱུང་རྗེས་ཀྱི་ས་ཁྲ། ༢༠༢༦།༨།༢༦ (RFA) ཡུད་ཙམ་གྱི་ནང་གྲོང་སྡེའི་རྣམ་པ་བསྒྱུར་བ། ཟླ་༨ ཚེས་༢༦ ཉིན། བོད་ཀྱི་སྐྱིད་གྲོང་དང་བལ་ཡུལ་གྱི་ར་སུ་ཝ་ས་མཚམས་ཁུལ་དུ་འདམ་རྡོ་ཆུ་རུད་ཀྱི་གནོད་འཚེ་ཚབས་ཆེ་དེ་བྱུང་ཞིང་། གནོད་འཚེ་དེས་མིའི་ཚེ་སྲོག་ཙམ་མ་ཟད། ཁང་ཁྱིམ་དང་། ལམ་ཁ། ཞིང་ཁ། ཕྱུགས་ཟོག་དང་ས་གནས་མི་མང་གི་འཚོ་བའི་རྟེན་གཞི་ཚང་མ་མེད་པ་བཟོས་ཡོད་པ་རེད། སྐྱིད་གྲོང་འགག་སྒོའི་ཉེ་འཁོར་དུ་ཡོད་པའི་ཁང་པ་ཁག་རྩ་མེད་དུ་གྱུར་བ་དང་། སྔོན་ཆད་འགག་སྒོའི་འཁྲིས་སུ་མཐོང་རྒྱུ་ཡོད་པའི་དངོས་པོ་མང་པོ་ད་ལྟ་མཐོང་རྒྱུ་མེད་པ་ཆགས་ཡོད་པ་བརྗོད་བྱུང་ལ། གྲོང་ཚོ་དེར་ཡུལ་མི་ ༣༠ ཙམ་གནས་སྡོད་བྱེད་ཀྱི་ཡོད་འདུག་ལ། དེའི་སྔོན་ཞིག་ལ་ཆུས་ལམ་ཁ་འཁྱེར་བས་ལམ་བཟོ་བྱེད་མཁན་སྐྱིད་གྲོང་གི་ལས་མི་མང་པོ་ཞིག་ས་གནས་དེར་འཛོམས་ཡོད་འདུག ཆུ་རུད་སླེབས་དུས། རི་བོ་ཧ་ཅང་གཟར་པོ་ཡིན་པས་མི་མང་ཚོར་བྲོས་ཐར་བའི་ལམ་ཁ་མེད་ལ། བྲོས་ཐར་བའི་དུས་ཚོད་ཀྱང་ཧ་ལམ་བྱུང་མེད་པ་འགྲེལ་བརྗོད་གནང་བྱུང་། མི་ཤི་རྨས་དང་གར་སོང་ཆ་མེད་ཀྱི་གྲངས་འབོར་མུ་མཐུད་འཕར་བཞིན་པ། རོའི་ཊརསི་གསར་ཁང་གིས་ཚེས་༣༠ ཉིན་སྤེལ་བའི་གནས་ཚུལ་ལྟར་ན། བལ་ཡུལ་དུ་མི་༧༣༤ འདས་གྲོངས་དང་། མི་༢༤༩༨ གར་སོང་ཆ་མེད་དུ་གྱུར་འདུག་ལ། བོད་ནང་ཕྱི་རྒྱལ་ཡུལ་ཁག་༢༣ གྱི་མི་སེར་༢༦༡ དང་འབྲེལ་བ་བྱེད་ཐུབ་ཀྱི་མེད་པ་རེད་འདུག མི་༧༥༡༤ སྐྱོབ་ཐུབ་ཡོད། བོད་ཀྱི་སྐྱིད་གྲོང་རྫོང་དུ་མི་༡༦ འདས་གྲོངས་དང་། མི་༥༤༦ གར་སོང་ཆ་མེད་དུ་གྱུར་ཡོད་པ་རྒྱ་ནག་གཞུང་ཕྱོགས་ཀྱིས་བརྗོད་ཡོད། འོན་ཀྱང་རྒྱལ་སྤྱིའི་གསར་ལམ་ཁག་གིས་རྒྱ་ནག་གཞུང་གིས་ས་གནས་དེར་དམ་དྲག་ཧ་ཅང་ཆེན་པོ་བྱེད་བཞིན་པ་དང་། ལྷག་པར་དུ་གནས་ཚུལ་འགྲོ་འོང་ཐད་ཧ་ཅང་གི་དམ་དྲག་བྱེད་བཞིན་པ་དེས་དངོས་ཡོད་གནས་ཚུལ་ཤེས་རྟོགས་ཡོང་རྒྱུར་འགོག་རྐྱེན་བཟོ་བཞིན་ཡོད་པ་བརྗོད་བཞིན་འདུག བོད་ནང་གི་བོད་མི་དེས་བརྗོད་པར་གཞིགས་ན། རྨས་མ་ཁག་སྨན་ཁང་དུ་སྐྱེལ་འདུག་ཅིང་། མི་མང་པོའི་ལག་པ་དང་རྐང་པ་སོགས་ལ་གནོད་སྐྱོན་ཚབས་ཆེན་ཕོག་ཡོད་པ་རེད་འདུག སྤྱི་སྤྱོད་འགྲུལ་སྐྱེལ་མོ་ཊ་ཁག་ཀྱང་འདམ་གྱི་འོག་ཏུ་དིམ་ཡོད་པ་བརྗོད་བྱུང་། སྐྱིད་གྲོང་ཁུལ་ཁང་ཁྱིམ་དང་ས་ཞིང་མེད་པ་ཆགས་ཏེ་ཕྱིར་ལོག་བྱ་ཡུལ་མེད་པ་ཆགས་པ། གནོད་འཚེའི་རྗེས་སུ་ཉེ་འཁོར་གྱི་མང་ཚོགས་མང་པོ་མགྲོན་ཁང་ཁག་ཏུ་གནས་སྐབས་སྡོད་དུ་བཅུག་ཡོད་ཀྱང་། ཁོང་ཚོས་རང་གི་ཁང་ཁྱིམ་ཙམ་མ་ཡིན་པར། ཞིང་ཁ། ཕྱུགས་ཟོག འཚོ་བའི་རྟེན་གཞི་ཚང་མ་ཤོར་ཚར་བ་ཡིན་ཙང་ཕྱིར་ལོག་བྱ་ཡུལ་མེད་ཆགས་པ་འགྲེལ་བརྗོད་གནང་གི་འདུག་ལ། “མགྲོན་ཁང་ནི་ཁོང་ཚོའི་ཁྱིམ་རེད། ཁོང་ཚོ་དེར་སྡོད་འདོད་ཀྱང་ཡོད་མ་རེད། འོན་ཀྱང་ད་ལྟ་ཁོང་ཚོར་གདམ་ག་གཞན་མེད་པ་རེད།” སྐྱིད་གྲོང་གྲོང་རྡལ་ནང་གི་དགོན་པ་གཅིག་པུ་དེར་ད་ལྟ་འདས་པོ་ཚོའི་ཆེད་མཆོད་འབུལ་དང་སྨོན་ལམ་ཞུ་མཁན་གྱིས་ཁེངས་ཡོད་འདུག ཕྱོགས་གཅིག་ཏུ་མི་ཚོས་འདས་པོར་སྨོན་ལམ་ཞུ་བཞིན་པ་དང་། ཕྱོགས་གཞན་ནས་གར་སོང་ཆ་མེད་ཀྱི་མི་ཚོ་འཚོལ་བཞིན་པའི་གནས་སྟངས་འདིའི་འོག་གསོན་པོར་གནས་པའི་མི་ཚོ་ཧ་ལས་ཧོན་ཐོར་ནས་ལུས་ཡོད་པ་རེད། “སྔར་གྱི་སྐྱིད་གྲོང་ཕྱིར་སླེབས་པར་ལོ་ལྔ་འགོར་སྲིད།” སྐྱིད་གྲོང་གི་ཡུལ་མི་དེས།། གཞུང་ལམ་དང་མཁོ་བའི་རྨང་གཞིའི་སྒྲིག་བཀོད་ཚང་མ་བསྐྱར་སྐྲུན་བྱས་ནས་སྔར་གྱི་གནས་བབ་ལ་སླེབས་རྒྱུར་ལོ་ལྔ་ཙམ་འགོར་སྲིད་པའི་ཚོད་དཔག་བྱེད་བཞིན་འདུག ཁོང་གིས་སྐྱིད་གྲོང་ནི་ཡུལ་སྐོར་བ་མང་པོ་འགྲོ་སའི་ས་ཁུལ་ཞིག་ཡིན་པ་དང་། ད་ལྟའི་དུས་ཚོད་ནི་གངས་རིན་པོ་ཆེར་གནས་མཇལ་དུ་འགྲོ་མཁན་ཕྱི་རྒྱལ་བ་མང་བའི་དུས་ཚོད་དེ་ཡིན་པ་བརྗོད་ཀྱི་འདུག ཚེས་ ༢༩ ཉིན་སྐྱིད་གྲོང་ཁུལ་དུ་མྱུར་སྐྱོབ་ཀྱི་ལས་དོན་སྤེལ་བཞིན་པ། (CHINA DAILY/via REUTERS) གནོད་འཚེའི་འབྱུང་རྐྱེན། གནོད་འཚེ་འདིའི་བྱུང་རྐྱེན་ཞིབ་ཕྲ་ད་དུང་གསལ་པོ་ཆགས་མེད། ཚན་རིག་ཁག་ཅིག་གིས་འཁྱགས་རོམ་ཞུར་ནས་འཁྱགས་རྡོ་ཉིལ་བ་རྐྱེན་བྱེད་པ་ཡིན་པ་བརྗོད་བཞིན་ཡོད་ལ། རྒྱ་ནག་གི་ཚན་རིག་པས། གོ་ལའི་ཚ་དྲོད་ཚད་གཞི་ཡུན་རིང་འཕར་བས་གངས་རིའི་ཁུལ་ལ་ཤུགས་རྐྱེན་ཕོག་པ་དེ་གནོད་འཚེ་དང་འབྲེལ་བ་ཡོད་སྲིད་པ་བརྗོད་འདུག། འོན་ཀྱང་རོའི་ཊརསི་གསར་ཁང་གིས། བྱུང་རྐྱེན་ཞིབ་ཕྲའི་ཐད་ད་དུང་ཞིབ་འཇུག་བྱེད་བཞིན་ཡོད་པའི་གནས་ཚུལ་བཀོད་འདུག མྱུར་སྐྱོབ་གཅིག་མ་ཚར་གོང་ཉེན་ཁ་གསར་པ། ཆུ་རུད་གོད་ཆགས་ཚབས་ཆེ་དེའི་ཉེན་ཁ་མ་ཡལ་གོང་། བལ་ཡུལ་ཕྱོགས་སུ་ཉེ་ཆར་ཆར་པ་བསྐྱར་དུ་བབས་པས་ཆུ་བོ་རྒྱས་ནས། ས་གནས་མི་མང་ཙམ་མ་ཟད། མྱུར་སྐྱོབ་ལས་དོན་མི་སྣ་ཚོ་ཡང་ས་མཐོ་སར་སྤོ་དགོས་བྱུང་ཡོད་པ་རེད། འདམ་རྡོ་ཆུ་རུད་ཀྱིས་བཟོས་པའི་མཚེའུ་ཞིག་གི་ཉེན་ཁ་ཅུང་ཟད་ཆུང་དུ་ཕྱིན་ཡོད་ཀྱང་། དེའི་གཤམ་དུ་ས་རུད་གསར་པ་ཞིག་གིས་ཆུ་བཀག་ནས་མཚེའུ་གསར་པ་ཞིག་ཆགས་འདུག་པ་དང་། དེས་ཆུ་རུད་བསྐྱར་དུ་ཡོང་སྲིད་པའི་ཉེན་ཁ་གསར་པ་ཞིག་བསྐྲུན་པར་ཞེད་སྣང་བྱེད་བཞིན་འདུག ལམ་ཁ་ཆུས་འཁྱེར་བ་དང་། ས་རུད་ཀྱི་ཉེན་ཁ་མུ་མཐུད་གནས་པ། ཆར་པ་བསྐྱར་དུ་འབབ་པ་བཅས་ཀྱིས་མྱུར་སྐྱོབ་ཀྱི་ལས་དོན་སྤེལ་རྒྱུར་འགོག་རྐྱེན་བཟོ་བཞིན་ཡོད་འདུག

RFA Tibetan ▶ Clip ༸གོང་ས་མཆོག

ནང་པ་སངས་རྒྱས་པའི་ཆོས་དེ་བཞིན་ཉིན་ལྟར་ཉམས་ལེན་བྱེད་དགོས་པ་གལ་ཆེ་རེད་ཅེས་བཀའ་སློབ་བསྩལ་པ།

RFA Tibetan ༸གོང་ས་མཆོག

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་ཕྱི་ལོ་ ༢༠༢༦ ཕྱི་ཟླ ༨ ཚེས་ ༣༠ ཉིན་ལ་དྭགས་ནང་པའི་ཚོགས་འདུ་དང་ལ་དྭགས་དགོན་སྤྱི་ལྷན་ཚོགས། ཡང་ལ་དྭགས་བསོད་ནམས་གླིང་བོད་མིའི་གཞིས་ཆགས་བཅས་ནས་བརྟན་བཞུགས་བལྟར་འབུལ་ཞུས་པའི་སྐབས། བོད་དང་བལ་ཡུལ་ས་འཚམས་ཕྱོགས་སུ་ཆུ་ལོག་གི་རྐྱེན་ངན་བྱུང་བར་༧མགོན་པོ་མཆོག་གིས་ཐུགས་སྨོན་གནང་སོང་བ་དང་མཉམ་བཀའ་སློབ་བསྩལ་བའི་ནང་དམིགས་བསལ་དུ་ནང་པ་སངས་རྒྱས་པའི་ཆོས་དེ་བཞིན་ཁ་ནས་བཤད་པ་གཅིག་པུ་མ་ཡིན་པར་ལག་ལེན་དང་ཉིན་ལྟར་ཉམས་ལེན་བྱེད་དགོས་པ་གལ་ཆེ་ཡིན་པ་བཀའ་སློབ་བསྩལ་གནང་མཛད་སོང་། བརྟན་བཞུགས་གྱི་མཛད་སྒོ་འདི་བཞིན་ལ་དྭགས་གཤམ་སྟོད་གཞུང་གསུམ་དང་ས་གནས་སུ་བཞུགས་མཁན་གྱི་བོད་མི་ཡོངས་ནས་འབུལ་བ་ཡོད་པ་དང་ལྷག་པར་འཕགས་པའི་གནས་བརྟན་བཅུ་དྲུག་གི་ཆོ་གའི་སྒོ་ནས་བསྒྲུབས་ཡོད་པ་བརྟན་བཞུགས་གོ་སྒྲིག་ཚོགས་ཆུང་གི་ཚོགས་མི་རྒན་བློ་བཟང་རྡོ་རྗེ་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་། བརྟན་བཞུགས་མཛད་སྒོར་ཆིབས་སྒྱུར་གནང་སྐབས་ཆིབས་ཊོ་ནས་བཞུགས་ཁྲིའི་བར་ཞབས་གོམ་བསྐྱོན་གནང་མཛད་པ། ཡང་བརྟན་བཞུགས་འབུལ་ཡུལ་དུ་བཅར་པའི་ཐའེ་ཝན་ནས་ཡིན་པ་ཕེ་ནི་ལགས་ཀྱིས་བརྟན་བཞུགས་ནང་མཉམ་ཞུགས་བྱེད་པའི་མྱོང་བ་བརྗོད་པར། ངའི་སྐྱེ་བ་ཚང་མར་ཁོང་གི་དགེ་ཕྲུག་ཞིག་ཡིན་ན་བསམ་གྱི་འདུག འདི་ངའི་སྙིང་ནས་གསོལ་བ་འདེབས་ཀྱི་ཡོད། ང་ཁོང་གི་དགེ་ཕྲུག་ཞིག་ཏུ་འགྱུར་བར་ཅི་ཞིག་ཡིན་ན་བློས་བཏང་ཐུབ་ས་རེད། དེ་བྱེད་ནས་ད་ལྟ་ང་རང་ཆོས་གང་ཐུབ་བྱེད་ཀྱི་ཡོད། ང་རང་སྐྱེ་བ་གང་པོ་ནང་པ་ཞིག་སྐྱེ་བར་ཤོག་ཟེར་ཏེ་སྨོན་ལམ་འདེབས་ཀྱི་ཡོད། ལོ་བཅུ་སྔོན་ལ་ང་རང་ལ་དྭགས་ལ་དྭང་བླང་གི་ལས་ཀ་ཞིག་ལ་ཡོང་དུས་༧རྒྱལ་བ་རིན་པོ་ཆེ་ཕོ་བྲང་འདིར་ཐེངས་དང་པོ་མཇལ་བྱུང་། དེ་དུས་ཁོང་གི་བཀའ་སློབ་ཚིག་གཅིག་ཐོས་མེད་ཀྱང་ང་རང་དད་པ་ཞེ་དྲགས་སྐྱེས་བྱུང་། ང་རང་སྤྱིར་བཏང་གི་ཆགས་པ་དང་སྤོབས་པ་ཆེན་པོ་ཡོད་མཁན་ཞིག་ཡིན། འོན་ཀྱང་༧རྒྱལ་བ་རིན་པོ་ཆེ་མཆོག་གི་ང་ལ་ལམ་སྟོན་གནང་གི་ཡོད་པ་ཧ་གོ་གི་འདུག ༧རྒྱལ་བ་རིན་པོ་ཆེ་མཆོག་ཐེངས་དང་པོ་མཇལ་བ་ནས་བཟུང་ངའི་དགེ་རྒན་ཁོང་ཡིན་པ་ང་རང་ཧ་གོ་བྱུང་ཞེས་བརྗོད་བྱུང་། ཡང་བརྟན་བཞུགས་གྲུབ་རྗེས་བཞུགས་ཁྲི་དང་སྡིངས་ཆེའི་དྲུང་ནས་མེ་ཏོག་འདུས་བཞིན་ཡོད་པ་ལ་དྭགས་ཡུལ་མི་ཡིན་པ་ཕུན་ཚོགས་ལགས་ཀྱིས་དེའི་སྐོར་དྲིའི་མེ་ཏོག་བདུག་སྤོས་མར་མེ་ཞལ་རྫས་རོལ་མོ་བསྣམས་ཟེར་ནས་ད་ལྟ་སངས་རྒྱས་ལ་ཕུལ་བ་དེ་༧རྒྱལ་བ་རིན་པོ་ཆེ་སངས་རྒྱས་དངོས་སུ་བཞུགས་བསྡད་ཡོད་པ་དང་ད་ཁོང་ནི་ང་ཚོ་ཤི་ན་ཕྱི་མའི་ལམ་ལ་འདྲེན་གྱི་ཡོད་པ། དེ་མ་ཟད་མ་འགྱུར་མཐའ་དང་མཉམ་པའི་སེམས་ཅན་ཇི་ཙམ་ཞིག་ཡོད་ན་དེ་རིང་གསུང་ཆོས་རྭ་བར་འཛོམས་པ་ཚང་མ་འདྲེན་གྱི་ཡོད་ལ། ཡང་མེ་ཏོག་འདི་ཚོ་དེ་རིང་འདུས་རྗེས་བསང་རྫས་ལ་མཆོད་པ་འབུལ་རྒྱུ་དང་སངས་རྒྱས་ལ་མར་མེ་ཕུལ་རྒྱུ་ཡིན་པ་གསུངས་བྱུང་། ༧གོང་ས་༧སྐྱབས་མགོན་ཆེན་པོ་མཆོག་བརྟན་བཞུགས་ཀྱི་མཛད་སྒོར་ཆིབས་སྒྱུར་མཛད་སྐབས་ཆིབས་ཌོ་ནས་བཞུགས་ཁྲིའི་བར་ཆིབས་སྒྱུར་བཀའ་དྲིན་བསྐྱངས་སྐབས་ཞབས་གོམ་བསྐྱོན་དེ་ཕེབས་གནང་སོང་། མཛད་རིམ་ལྟར་ན་ཕྱི་ཟླ་ ༩ ཚེས་ ༡ ཉིན་ཞི་བའི་ཚལ་གསུངས་ཆོས་ར་བར་ལ་དྭགས་ས་གནས་སུ་ཡོད་པའི་ཁ་ཆེ་དང་ནང་པ། ཡང་ཡི་ཤུ་བཅས་ཀྱི་ཆོས་ཚོགས་མཐུན་མོང་གིས་༧གོང་ས་༧སྐྱབས་མགོན་ཆེན་པོ་མཆོག་ལ་ཆེ་བསྟོད་ཆེ་བསྟོད་ཕེབས་བསུའི་སྣེ་ལེན་དང་སྟོན་འཁོར་ལྷན་རྒྱས་ལ་གསོལ་ཚིགས་འདེགས་འབུལ་ཞུ་རྒྱུ་རེད་འདུག པར་ལེན་སྒྲིག་སྦྱོར་བ། འཕྲིན་ལས་ཆོས་སྒྲོན། བརྙན་ཐུང་སྒྲིག་སྦྱོར་བ། བཀྲ་དབང་།

RFA Tibetan ▶ Clip བོད།

བལ་ཡུལ་ཏི་མུ་རེ་ནས་བོད་པ་ ༣༥ ཙམ་དང་བོད་སྐྱིད་གྲོང་གི་བོད་མི་ཁྱིམ་ཚང་མང་པོ་ཆུས་འཁྱེར་ཡོད་པ་འབྲེལ་ཡོད་ཀྱིས་བརྗོད་པ།

RFA Tibetan བོད།

བལ་ཡུལ་ས་མཚམས་ཏི་མུ་རེ་ནས་བོད་པ་ ༣༥ ཙམ་ཆུས་འཁྱེར་ཡོད་པ་དང་། བོད་ནང་བོད་མི་ཁྱིམ་ཚང་ཧ་ཅང་མང་པོ་ཆུས་འཁྱེར་ཡོད་པ་སྤུན་མཆེད་ཚོས་བརྗོད་བྱུང་། བལ་ཡུལ་ཏི་མུ་རེ་ནས་ཡིན་པ་རྡ་ས་རྒྱུད་སྟོད་གྲྭ་ཚང་གི་དགེ་འདུན་པ་སྤེན་པ་ལགས་ཀྱིས། བོད་དང་བལ་ཡུལ་ས་མཚམས་སུ་བྱུང་བའི་ཆུ་ལོག་དང་འདམ་རུད་ཀྱི་གོད་ཆག་འོག་ཁོང་གི་སྤུན་ཉེ་མི་གྲངས་ ༩ ཆུས་འཁྱེར་ཡོད་པ་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་། སྤེན་པ་ལགས་ཀྱི་ཨ་ཞང་དང་ཨ་ནེ། ཚ་བོ་བཅས་ཁྱོན་མི་གྲངས་ ༩ ཆུས་འཁྱེར་བ་ལས། ཆུ་རུད་བྱུང་སྐབས་ཨ་ཞང་ལ་བུ་གཉིས་ཡོད་པ་ལས་བུ་རྒན་ཤོས་དེས་མི་ཚང་མ་ཆུ་རུད་བྱུང་བཞིན་པའི་གནས་སྐབས་སུ་བྲོས་རྩིས་བྱས་ཀྱང་། ཁོང་གི་ཕྲུ་གུ་བརྒྱབ་ཏུ་ལུས་ཡོད་པ་དེ་སྐྱོབ་ཏུ་ཕྱིན་པར། ལམ་ལྷོངས་སུ་མ་སོང་བར་བུ་རྒན་པ་དང་མནའ་མ། ཕྲུ་གུ་བཅས་གསུམ་ཀ་ཆུས་ཁྱེར་འདུག་ཅིང་། ཨ་ཅག་གཅིག་གི་ཁྱོ་ག་དེ་བྲོས་ན་བྲོས་ཐུབ་ཡོད་ཀྱང་ཁྱིམ་དུ་པ་ཕ་རྒས་ཁོག་ཅིག་ཡོད་དུས་ཆུ་རུད་བྱུང་སྐབས་སུ་པ་ཕ་འཁུར་བོ་བཞིན་དུ་འཁྱེར་མ་ཐུབ་ཙང་ཕ་བུ་གཉིས་ཀ་ཆུས་འཁྱེར་ཡོད་པའི་གནས་སྟངས་ཤིག་ཁོང་གིས་འདི་ག་ཨེ་ཤེ་ཡ་རང་དབང་རླུང་འཕྲིན་ཁང་ལ་འགྲེལ་བརྗོད་གནང་བྱུང་། ཏི་མུ་རི་ནི་བལ་བོད་ས་མཚམས་ཀྱི་དོན་རྐྱེན་བྱུང་སའི་བལ་ཡུལ་ཕྱོགས་སུ་འཁེལ་གྱི་ཡོད་དུས་ཁུལ་དེར་དོལ་སྐྱེལ་ཅ་དངོས་དབོར་འདྲེན་དང་མོ་ཊ་སྔོག་བཤེར་སོགས་ཀྱི་ལས་ཀ་གཉེར་ནས་གཞིས་ཆགས་པ་མང་པོ་བྱུང་སྟེ། ད་ཆ་གྲོང་པ་ཆེན་པོ་ཆགས་ཡོད་འདུག ཚབས་ཆེའི་ཆུ་ལོག་དང་འདམ་རུད་བྱུང་བའི་ཉིན་མོ་དེ་རེས་གཟའ་ལྷག་པ་འཁེལ་གྱི་ཡོད་དུས་སྐབས་དེར་བོད་མི་མང་པོ་ཞིག་ལྷག་དཀར་སྲུང་བརྩི་ཆེད་རི་མགོར་བསང་གསོལ་བཏང་བར་ཕྱིན་པའི་མི་བརྒྱད་ཙམ་ཡོད་པ་མ་གཏོགས་གཞན་ཁུལ་དེའི་གྲོང་པ་ ༡༣ ནས་མི་ཚང་མ་ཆུས་འཁྱེར་ཡོད་འདུག ཁྱོན་ཁོང་གི་ཨ་ཞང་དང་ཨ་ནེ་གཉིས་ཀྱི་ཚ་བོ་ཚ་མོ་སོགས་ཁྱོན་མི་གྲངས་ ༩ དང་། གཞན་ཁོང་གི་ངོ་ཤེས་པ་དེ་སྔ་རྒྱུད་སྟོད་གྲྭ་ཚང་ནས་ཡིན་པ་ཞིག་གི་ཨ་མ་དང་སྤུན་ཆུང་སོགས་འབྲེལ་ཡོད་ཉེ་འབྲེལ་ ༢༦ ཆུས་འཁྱེར་ཏེ་འདས་གྲོངས་ཕྱིན་ཡོད་པ། མདོར་ན་ཏི་མུ་རེ་གཅིག་པུ་ནས་བོད་མི་ ༣༥ ཙམ་ཆུས་ཁྱེར་ཡོད་པ་ཤེས་རྟོགས་ཐུབ་ཡོད་ལ། ས་གནས་དེར་བལ་པོའི་མི་སེར་གནས་སྡོད་བྱེད་མཁན་ཡང་མང་པོ་ཞིག་ཡོད་དུས། ཁུལ་དེར་རི་སྒང་གི་ཁྱིམ་ཚང་ཁག་གཅིག་མ་གཏོགས་དེ་མིན་ཆུ་ཁར་ཡོད་པའི་གྲོང་པ་བརྒྱ་ཆ་དགུ་བཅུ་ཆུས་བསྣུབས་ཟིན་པ་བརྗོད་བྱུང་། ཁོང་གི་ཨ་ཞང་གི་བུ་ཞིག་ཧྥ་རན་སིར་གནས་སྡོད་བྱེད་ཀྱི་ཡོད་པ་དེས་ཕ་མ་གཉིས་ཆུས་འཁྱེར་ཏེ་གྲོངས་ཟིན་པའི་གནས་ཚུལ་ཐོས་མ་ཐག ཧྥ་རན་སི་ནས་བལ་ཡུལ་དུ་ཤུག་ལྷག་ཕྲུ་གུ་ཚོར་ལྟ་རྟོགས་ཆེད་ཐོན་ཟིན་པ་གསུང་གི་འདུག ལོ་གསུམ་བཞི་ཙམ་གྱི་རིང་སྐྱིད་གྲོང་དུ་བསྡད་མྱོང་མཁན་དགེ་འདུན་པ་སྤེན་པ་ལགས་ཀྱི་དགེ་ཕྲུག་ཞིག་གིས་ཁོང་ལ་བརྗོད་དོན་ལྟར་ན། ཆུ་རུད་བྱུང་སའི་ས་ཁུལ་དུ་དམིགས་བསལ་ཆུ་མཛོད་ཆེན་པོ་དེ་འདྲ་མེད་ཀྱང་། སྐྱིད་གྲོང་སྒང་དུ་མཚོ་ཧ་ཅང་ཆེན་པོ་ (ལེན་སྟོག)ཟེར་བ་ཞིག་ཡོད་པ་དེའི་ཐོག་འཁྱགས་རྡོ་ཉིལ་ནས། མཚོ་ཆུང་གི་ས་ཚིགས་ཆ་བརྒལ་ཏེ་ཆུ་རུད་དེ་བྱུང་བ་ཞིག་ཡིན་པའི་ཚོད་དཔག་གནང་གི་ཡོད་པ་དང་ད་ཆ་བརྒྱུད་ལམ་ཆེ་ཁག་མང་པོས་བལ་བོད་ས་མཚམས་སུ་འདམ་རུད་ཀྱི་རྐྱེན་རྩ་དེ་འཁྱགས་རོམ་ཉིལ་བར་བརྟེན་ནས་ཡིན་པའི་བརྙན་ཐུང་མང་དག་ཅིག་ཀྱང་ཐོན་བཞིན་ཡོད་པ་རེད། ཚོད་དཔག་གནང་དོན་ལ་ཏི་མུ་རེ་གཅིག་པུར་བོད་མི་དང་གཞན་བལ་པོའི་མི་རིགས་མི་བདུན་བརྒྱ་ལྷག་ཆུས་ཁྱེར་ཡོད་པ་དང་དོན་རྐྱེན་དེ་བྱུང་སྐབས་ཡུལ་སྐོར་སྤྲོ་འཆམ་པ་མང་པོ་ཞིག་ཁུལ་དེར་ཡོད་འདུག སྐྱིད་གྲོང་དང་བལ་ཡུལ་ས་མཚམས་སུ་འདམ་རུད་དང་ཆུ་རུད་ཚབས་ཆེན་བྱུང་ནས་མི་བརྒྱ་ཕྲག་ལྷག་གར་སོང་ཆ་མེད་དུ་སོང་འདུག སྐྱིད་གྲོང་དང་བལ་ཡུལ་ས་མཚམས་སུ་འདམ་རུད་དང་ཆུ་རུད་ཚབས་ཆེན་བྱུང་ནས་མི་བརྒྱ་ཕྲག་ལྷག་གར་སོང་ཆ་མེད་དུ་སོང་འདུག བོད་མང་ཡུལ་སྐྱིད་གྲོང་ནང་གི་བོད་མི་མང་པོ་ཆུས་འཁྱེར་ཡོད་པ། བོད་ནང་སྤུན་མཆེད་དང་ནང་མི་ཡོད་པའི་བོད་མི་འབྲེལ་ཡོད་ཅིག་གིས་འདི་ག་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་དོན་ལ། བལ་བོད་ས་མཚམས་ཀྱི་འགག་སྒོར་ཆུ་རུད་བྱུང་བ་དེའི་ས་ཚིགས་བོད་ཕྱོགས་ལ་ཁོང་གི་སྤུན་མཆེད་རྣམས་བཅའ་སྡོད་བྱེད་ཀྱི་ཡོད་པ་དང་། ཁོང་གི་ཨ་ཁུའི་བུ་དེ་ཁུལ་དེར་གཞིས་འགོ་ལྟ་བུ་ཡིན་པ་དེ་སྐྱིད་གྲོང་རྒྱལ་ས་ཁུལ་དུ་ཕྲུ་གུ་སློབ་གྲྭ་སྐྱེལ་དུ་ཕྱིན་སྐབས་ཆུ་རུད་བྱུང་སྟེ། ཁོང་གི་བཟའ་ཟླ་དང་བུ་གཅིག མནའ་མའི་ཨ་མ་བཅས་ཆུས་ཁྱེར་བ་ཙམ་མ་ཟད་བོད་ཕྱོགས་ཀྱི་འགག་སྒོའི་ཉེ་ཁུལ་གྱི་གྲོང་ཚོའི་ནང་གི་མི་ཕལ་ཆེ་བ་ཆུས་ཁྱེར་ཡོད་པ་གསུངས་བྱུང་། ཁུལ་དེར་གཞིས་ཀ་རྩེ། ལྷོ་ཁ།་དིང་རི་ཁུལ་སོགས་ནས་བོད་པ་ཧ་ཅང་མང་པོ་ལས་ཀ་བྱེད་ནས་གནས་སྡོད་བྱེད་མཁན་ཡོད་ཅིང་། ཁོང་གིས་གསུངས་ན་བརྙན་ཐུང་ནང་དུ་མི་མང་པོ་ཞིག་འགག་སྒོ་དེ་ནས་བྲོས་བཞིན་པ་དེ་དག་ཁྲོད་བོད་མི་ཧ་ཅང་མང་པོ་ཡོད་པ་གསུངས་བྱུང་། ཁོང་གིས་གསུངས་དོན་ལ། རྒྱ་ནག་གཞུང་གིས་ཕྱིར་བསྒྲགས་བྱེད་པ་ལྟར་འདས་གྲོངས་སུ་གྱུར་བའི་མི་གྲངས་དེ། དྲྭ་ཐོག་ཏུ་དམ་བསྒྲགས་བྱེད་པའི་དབང་གིས་འབྲེལ་ཡོད་ནང་མིས་རྐྱེན་འདས་སུ་སོང་བའི་གྲངས་ཀ་བཤད་པར་ཧ་ཅང་གཟབ་གཟབ་བྱེད་བཞིན་པ་དང་། ཁོང་གི་ངོ་ཤེས་པ་ ༡༠ ལྷག་ཆུས་འཁྱེར་ནས་གོ་ཐོས་མེད་པ་གྱུར་ཡོད་པ་ཤེས་རྟོགས་བྱུང་ཞིང་། མདོར་ན་ཁོང་གིས་བོད་སྐྱིད་གྲོང་ཕྱོགས་སུ་ཆུ་ལོག་དང་འདམ་རུད་རྐྱེན་པས་བོད་མི་བརྒྱ་ལྷག་ཙམ་བརྒྱ་ཆ་བརྒྱ་ཆུས་འཁྱེར་ཡོད་པའི་ཚོད་དཔག་གནང་གི་འདུག འབྲེལ་ཡོད་ཀྱི་ནང་མི་སྐྱིད་གྲོང་དུ་ཡོད་པ་ཞིག་གིས། ཁུལ་དེར་བོད་མི་ཆུས་ཁྱེར་ཏེ་གར་སོང་ཆ་མེད་དུ་གྱུར་བ་ཧ་ཅང་མང་པོ་ཡོད་ཀྱང་། རྒྱ་ནག་གཞུང་གིས་བོད་ཕྱོགས་ཀྱི་གནོད་འཚེ་ཕོག་ཡུལ་གྱི་ས་ཁུལ་དུ་མི་རྙེད་པ་གཅིག་པུར་གཞིར་བཞག་གིས་གྲངས་ཐོ་ཕྱིར་བསྒྲགས་བྱེད་ཀྱི་ཡོད་པ་གསུང་གི་འདུག ཨེ་ཤེ་ཡ་རང་དབང་རླུང་འཕྲིན་ཁང་ལ་འབྱོར་བའི་གནས་ཚུལ་གཉིས་ཀར་གཞིགས་ཚེ། བལ་བོད་ས་མཚམས་ཀྱི་འགག་སྒོའི་ཁུལ་དུ་ལས་རིགས་གཉེར་མཁན་གྱི། བོད་ཕྱོགས་དང་བལ་ཡུལ་ཕྱོགས་ནས་བོད་མི་མང་དག་ཅིག་ཆུས་འཁྱེར་ཡོད་པ་ར་སྤྲོད་ཐུབ་པ་བྱུང་ཡོད་སྐོར་ཉེ་འབྲེལ་ནང་མི་ཞིག་གིས་བརྗོད་བྱུང་ལ། གནས་ཚུལ་ངོ་སྤྲོད་པ་ཁོང་གི་ནང་མི་ཉེ་སྤུན་གསུམ་ཡོད་པ་ཆུས་འཁྱེར་འདུག བོད་ཕྱོགས་སུ་ཚེས་ ༢༩ བར་མི་ ༧ འདས་གྲོངས་ཕྱིན་པ་དང་མི་ ༥༥༤ གར་སོང་ཆ་མེད་དུ་ཕྱིན་པ། གནོད་འཚེའི་ས་ཁུལ་དུ་མྱུར་སྐྱོབ་མི་སྣ་མང་པོ་བཏང་ཡོད་ཀྱང་། ལམ་ཆད་པ་དང་འཕྲིན་གཏོང་ཆད་པ། གནམ་གཤིས་ཡག་པོ་མེད་པ་སོགས་ཀྱིས་གནོད་འཚེ་ས་ཁུལ་དངོས་སུ་འཛུལ་རྒྱུར་དཀའ་ངལ་བྱུང་བ་རྒྱ་ནག་གཞུང་གིས་བརྗོད་འདུག་ཀྱང་། བལ་ཡུལ་ཕྱོགས་ནས་བསྐྱོད་པའི་འབྲེལ་ཡོད་ཅིག་ཆུ་རུད་བྱུང་སྐབས་སུ་སྐྱིད་གྲོང་ཁུལ་དུ་ཡོད་པ་དང་། སྐབས་དེར་རྒྱ་ནག་གི་ཉེན་སྐྱོབ་རུ་ཁག་དང་དམག་མིས་མི་འབོར་ཆེན་ཞིག་གི་ཕུང་པོ་ཁྱེར་ཡོང་སྟེ། ངོ་ཤེས་ཡོད་མེད་རྩད་གཅོད་བྱེད་བཅུག་པ་དང་། འབྲེལ་ཡོད་བོད་མི་དེས་རང་ཉིད་ཀྱི་ཕ་ཡུལ་གཅིག་པ་བོད་མི་གཉིས་འདི་གར་ངོ་རྟགས་ཆོད་ཡོད་པ་དང་། དེའི་ཁོངས་སུ་ཕུང་པོ་ཧ་ཅང་མང་པོ་དངོས་སུ་མཐོང་ཡོད་པ་འགྲེལ་བརྗོད་གནང་བྱུང་།། པར་ལེན་སྒྲིག་སྦྱོར་བ། བསྟན་འཛིན་དོན་ཡོད། བརྙན་པར་སྒྲིག་སྦྱོར་བ། ནོར་སྡེ་སྒྲོལ་མ།

RFA Tibetan བོད།

བོད་ཀྱི་སྐྱིད་གྲོང་དང་བལ་ཡུལ་ས་མཚམས་སུ་ཟླ་༨ ཚེས་༢༦ ཉིན་བྱུང་བའི་འདམ་རྡོ་ཆུ་རུད་ཀྱི་གནོད་འཚེ་ཚབས་ཆེན་བྱུང་པའི་ཁྲོད། ཟླ་༨ ཚེས་༢༩ ཉིན་བར་འདས་གྲོངས་སུ་སོང་བ་དང་གར་སོང་ཆ་མེད་དུ་སོང་བའི་གྲངས་འབོར་མུ་མཐུད་འཕར་བཞིན་པ་དང་། བོད་ཕྱོགས་ཀྱི་སྐྱིད་གྲོང་འགག་སྒོ་བར་མྱུར་སྐྱོབ་བྱེད་མཁན་སྐྱོད་རྒྱུར་དཀའ་ངལ་ཡོད་པའི་ཐོག་གཞུང་ཕྱོགས་ནས་གནས་ཚུལ་གང་བྱུང་སྤེལ་མི་ཆོག་པ་དང་གནས་ཚུལ་གང་བྱུང་བཤད་མི་ཆོག་པའི་བཀག་འགོག་བྱས་འདུག བོད་ཀྱི་སྐྱིད་གྲོང་ཁུལ་གྱི་གནས་སྟངས། བོད་ཕྱོགས་སུ་ད་བར་མི་ ༧ འདས་གྲོངས་ཕྱིན་པ་དང་མི་ ༥༥༤ གར་སོང་ཆ་མེད་དུ་ཕྱིན་པ། གནོད་འཚེའི་ས་ཁུལ་དུ་མྱུར་སྐྱོབ་མི་སྣ་མང་པོ་བཏང་ཡོད་ཀྱང་། ལམ་ཆད་པ་དང་འཕྲིན་གཏོང་ཆད་པ། གནམ་གཤིས་ཡག་པོ་མེད་པ་སོགས་ཀྱིས་གནོད་འཚེ་ས་ཁུལ་དངོས་སུ་འཛུལ་རྒྱུར་དཀའ་ངལ་བྱུང་བ་རྒྱ་ནག་གཞུང་གིས་བརྗོད་འདུག འདི་ག་ཨེ་ཤེ་ཡ་རང་དབང་རླུང་འཕྲིན་ཁང་གིས་དེ་རིང་ཕྱི་ཚེས་ ༢༩ ཉིན་སྐྱིད་གྲོང་རྫོང་གི་འབྲེལ་ཡོད་ལས་ཁུངས་ཁག་ཅིག་ལ་གནས་ཚུལ་གསར་པ་ཇི་ཡོད་འཚོལ་ཞིབ་བྱས་པར་གནས་ཚུལ་གསར་པ་རྣམས་གསར་འགོད་ལྷན་ཚོགས་དང་བོད་ལྗོངས་ཉིན་རེའི་ཚགས་པར་སོགས་ལ་དོ་ཁུར་བྱས་ན་གནས་ཚུལ་གསར་པ་ཁག་འདིའི་ཐོག་ནས་ཤེས་ཀྱི་རེད་ཅེས་བརྗོད་བྱུང་ལ། གཞུང་གི་འགག་སྒོ་ལས་ཁུངས་ནས་སྐྱིད་གྲོང་འགག་སྒོར་སྐྱོད་རྒྱུའི་དམིགས་བསལ་ལག་འཁྱེར་བཟོ་མཚམས་འཇོག་ཡོད་པས། ད་ལྟ་སྐྱིད་གྲོང་དུ་ཡོང་ཐུབ་ཀྱི་མ་རེད། ས་གནས་ཀྱི་མི་ཁག་ཅིག་མགྲོན་ཁང་ནང་བཞག་ཡོད། ཞིབ་ཕྲ་མི་ག་ཚོད་ཙམ་ཡོད་མེད་འདི་གསལ་པོ་བཤད་ཁག་པོ་འདུག་ཅེས་བརྗོད་བྱུང་། དེ་ནས་སྐྱིད་གྲོང་གྲོང་རྡལ་ནང་གི་མགྲོན་ཁང་ཞིག་ལ་འབྲེལ་བ་བྱེད་སྐབས་མགྲོན་ཁང་ནང་མགྲོན་པོ་མེད་པ་དང་ཚང་མ་མྱུར་སྐྱོབ་བྱེད་མཁན་མི་སྣ་ཡིན་པ་བརྗོད་བྱུང་ལ། ད་ལྟའི་ཆར་མགྲོན་པོ་ཡོང་ཐུབ་ཀྱི་མེད་པ་དང་། མང་ཚོགས་གང་དུ་བཞག་ཡོད་མེད་ཤེས་ཀྱི་མེད། འདིར་མཚན་མོ་ཆར་པ་བབ་ཀྱི་འདུག་ཅེས་བརྗོད་བྱུང་། འདམ་རྡོ་ཆུ་རུད་ཀྱི་གནོད་འཚེ་ཕོག་ཡུལ་གྱི་ཚེས་ ༢༨ ཉིན་གྱི་གནས་སྟངས། (cnsphoto/via REUTERS) གཞན་ཡང་གཞིས་རྩེ་ཁུལ་ནས་མི་ཞིག་གིས། དྭང་བླངས་ཞབས་ཞུར་འགྲོ་འདོད་ཆེན་པོ་བྱུང་རུང་། ད་ལྟའི་ཆར་གཞུང་གིས་གཏོང་གི་མི་འདུག སྐྱིད་གྲོང་རྫོང་གི་ལས་བྱེད་ཁག་ཅིག་དྭང་བླངས་ཞབས་ཞུ་བྱེད་པར་ཕྱིན་འདུག མི་འཚོལ་མཁན་མང་པོ་འདུག་ལ། ནང་མི་རེ་གཉིས་སྐྱིད་གྲོང་རྫོང་བར་སླེབས་ནས་འགག་སྒོ་བར་སྐྱོད་ཐབས་མེད་པར་བརྟེན་ཕྱིར་ལོག་བཏང་འདུག་ལ། ས་གནས་སུ་མི་གར་སོང་ཆ་མེད་སོང་བའི་མི་སྣ་འཚོལ་མཁན་ཧ་ཅང་མང་པོ་འདུག་པས། ཁ་པར་ལེན་མཁན་ཡང་ཁག་པོ་འདུག་ཅེས་བརྗོད་བྱུང་། ད་ལྟ་གནོད་འཚེའི་ས་ཁུལ་དུ་མྱུར་སྐྱོབ་དང་འཚོལ་ཞིབ་ཀྱི་ལས་ཀ་མུ་མཐུད་བྱེད་བཞིན་ཡོད་འདུག་ལ། རྒྱ་ནག་གཞུང་འབྲེལ་ཤིན་ཧྭ་གསར་འགྱུར་ཁང་གིས་གནས་ཚུལ་སྤེལ་བའི་ནང་དོན་ལྟར་ན། གནོད་འཚེ་ཕོག་པའི་མི་ ༤༩༩ གནས་སྤོས་དང་གནས་སྐབས་སྡོད་གནས་བཀོད་སྒྲིག་བྱས་ཡོད་པ་དང་། ས་གནས་སུ་ལུས་པའི་ཡུལ་སྐོར་བ་༥༥༥ ཡང་ས་ཁུལ་གཞན་དུ་གནས་སྤོས་བྱས་ཡོད་འདུག བལ་ཡུལ་ཕྱོགས་ཀྱི་གནས་སྟངས། བལ་ཡུལ་ཕྱོགས་སུ་གནོད་འཚེ་དེ་བས་ཚབས་ཆེ་བ་བྱུང་ཡོད་པ་དང་། ཚེས་ ༢༩ ཉིན་མི་ ༦༢༦ འདས་གྲོངས་དང་ ༢༤༢༦ གར་སོང་ཆ་མེད་དུ་ཕྱིན་ཡོད་པའི་ཁོངས་ནས་ཕྱི་རྒྱལ་གྱི་མི་ ༥༡༧ ཡོད་པར་བལ་ཡུལ་གྱི་གནོད་འཚེ་དོ་དམ་ལས་ཁུངས་ཀྱིས་བརྗོད་སྐོར་རོལ་ཌར་གསར་འགྱུར་ཁང་གིས་གནས་ཚུལ་སྤེལ་འདུག བལ་ཡུལ་ནང་དྲ་རྒྱའི་དམ་བསྒྲགས་མེད་པ་དང་གནོད་འཚེ་ཚབས་ཆེ་ཤོས་ཀྱི་ས་ཁུལ་ཁག་ནི་བལ་ཡུལ་གྱི་ར་སུ་བ་དང་ནུ་ཝ་ཀོཊི་ (Nuwakot) རྫོང་གཉིས་ཡིན་ཞིང་། གྲོང་ཚོ་དང་ལམ། ཟམ་པ། ཆུ་གློག་ལས་གྲྭ་བཅས་ལ་གཏོར་སྐྱོན་ཚབས་ཆེན་བྱུང་འདུག ས་གནས་ཁ་ཤས་སུ་ས་རྡོ་དང་འདམ་གྱིས་ཁང་པ་དང་། ལམ་སྣེ་རྣམས་ཆུས་བསྣུབས་ཡོད་པས། ལག་པ་དང་འཕྲུལ་ཆས་གཉིས་ཀ་བེད་སྤྱོད་བྱས་ནས་གསོན་པོར་གནས་པའི་མི་འཚོལ་བཞིན་ཡོད་འདུག ཚེས་ ༢༧ ཉིན་བལ་ཡུལ་གྱི་དམག་མིས་མྱུར་སྐྱོབ་བྱེད་བཞིན་ཡོད་པ། (NEPALI ARMY/via REUTERS) ད་བར་བལ་ཡུལ་ནང་མི་ ༣༧༠༠ ལྷག་སྐྱོབ་ཐུབ་ཡོད་པ་དང་། གནོད་འཚེ་ས་ཁུལ་ནས་རྨས་མ་དང་རྒན་རྒོན། ཕྲུ་གུ་སོགས་གནམ་གྲུས་བདེ་འཇགས་ས་ཁུལ་དུ་སྐྱེལ་བཞིན་ཡོད་རུང་། ཚེས་ ༢༩ ཉིན་ཆར་པ་དང་གནམ་གཤིས་ཞན་པས་གནམ་གྲུའི་འཚོལ་སྐྱོབ་ལས་ཀར་བར་ཆད་བྱུང་འདུག བལ་ཡུལ་གཞུང་གིས་རྒྱ་གར་དང་རྒྱ་ནག་ལ་ཆེད་ལས་ལག་རྩལ་རོགས་སྐྱོར་ཞུས་ཡོད་པ་དང་། གཙོ་བོ་ས་འོག་ནས་མི་སྐྱོབ་རྒྱུ་དང་། ཟམ་པ་དང་འགྲིམ་འགྲུལ་ལམ་སྐྱར་གསོ་བྱེད་རྒྱུ། དེ་བཞིན་འདས་པོའི་ཕུང་པོ་ངོས་འཛིན་བྱེད་པའི་ DNA བརྟག་དཔྱད་སོགས་ལ་ཆེད་ལས་རོགས་སྐྱོར་དགོས་པ་བརྗོད་འདུག འབྲེལ་ཡོད་གནས་ཚུལ། བོད་ཀྱི་སྐྱིད་གྲོང་དང་བལ་ཡུལ་གྱི་ས་མཚམས་སུ་འདམ་རུད་དང་ཆུ་ལོག་ཚབས་ཆེན་བྱུང་འདུག ༧གོང་ས་མཆོག་གིས་བལ་བོད་ས་མཚམས་སུ་ཆུ་ལོག་གི་དོན་རྐྱེན་ཕོག་པ་ཚོར་ཐུགས་གསོ་མཛད་འདུག འདམ་རུད་ཀྱི་རྐྱེན་རྩ་འདི་འཁྱགས་རྡོ་ཉིལ་བའི་རྐྱེན་གྱིས་ཡིན་པར་ངོས་འཛིན་གནང་གི་འདུག

RFA Tibetan འཛམ་གླིང༌།

བལ་བོད་ས་མཚམས་ཀྱི་ཚབས་ཆེའི་ཆུ་ལོག་དང་འདམ་རུད་ཀྱི་འབྱུང་རྐྱེན་ནི་འཁྱགས་རྡོ་ཉིལ་བའི་དབང་གིས་ཡིན་པའི་རྟགས་ཚན་མངོན་གྱི་ཡོད་པ་འབྲེལ་ཡོད་ཁྱད་ལས་པས་གསུངས་བྱུང་། ཚབས་ཆེའི་ཆུ་ལོག་གི་འབྱུང་རྐྱེན། བལ་ཡུལ་དང་བོད་ཀྱི་སྐྱིད་གྲོང་ས་མཚམས་སུ་ཕྱི་ཚེས་ ༢༨ ཉིན་ཚབས་ཆེའི་འདམ་རུད་བྱུང་སྟེ་མི་གྲངས་བརྒྱ་ཕྲག་མང་པོའི་ཚེ་སྲོག་ཤོར་བ་དང་། སྟོང་འཚོ་བརྒལ་བ་གར་སོང་ཆ་མེད་དུ་གྱུར་བའི་ཚབས་ཆེའི་ཆུ་ལོག་དང་འདམ་རུད་ཀྱི་རྐྱེན་རྩ་ནི་རྟགས་མཚན་ལ་གཞིགས་ན། བྲག་དང་འཁྱགས་རྡོ་ཆེན་པོ་དེ་འདྲ་ཉིལ་བར་བརྟེན་ནས་བྱུང་པ་ཞིག་ཡིན་པ་བསྟན་གྱི་ཡོད་པ་དང་། འཁྱགས་རྡོ་ཆེན་པོ་ཉིལ་བའི་འཁྱགས་རོམ་ཉིལ་བའི་གངས་རུད་བྱུང་པ་ཞེས་མིང་ཚིག་འདི་བེད་སྤྱོད་བྱེད་ཀྱི་ཡོད་པ་ནེ་དྷར་ལེནཌི་ནང་Utrecht གཙུག་ལག་སློབ་ཆེན་གྱི་ས་ཁམས་དངོས་ཀྱི་ཉམས་ཞིབ་སྡེ་ཚན་ནང་འབུམ་རམས་པའི་ཉམས་ཞིབ་སློབ་གཉེར་གནང་བཞིན་ཡོད་པ་དང་དེ་སྔ་ལོ་བརྒྱད་རིང་བལ་ཡུལ་ནང་དུ་ཧི་མ་ལ་ཡའི་གངས་དང་འཁྱགས་རོམ་གྱི་ཁོར་ཡུག་ལ་ཉམས་ཞིབ་པ་ཤར་པ་བསྟན་འཛིན་ཆོས་རྒྱལ་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ་འགྲེལ་བཤད་བསྐྱོན་བྱུང་། ཁོང་གིས་ད་དུང་། འདི་ནི་རྒྱུན་ལྡན་གྱི་གཙང་པོར་ཆུ་ལོག་རྒྱུག་པ་གཅིག་པུ་མིན་པར་བྲག་རྡོ་དང་འཁྱགས་པ་ཉིལ་ཏེ་ཆུ་རྒྱུན་དུ་ཟགས་ཏེ་ཚད་ལས་བརྒལ་བའི་ཆུས་འདེད་པའི་ས་དང་རྡོ་མང་པོ་ཞིག་ཡུལ་གཤོངས་སུ་འཁྱེར་ཡོད་བ་འདི་གསལ་པོ་མངོན་རྒྱུ་ཡོད་ཅེས་འགྲེལ་བཤད་གནང་བྱུང་། འབྱུང་རྐྱེན་ནི་བྲག་རྡོ་དང་འཁྱགས་རོམ་རྡིབ་སྐྱོན་ཡིན་པ་དབྱེ་ཞིབ་གནང་པ། བལ་ཡུལ་གྱི་རི་བོའི་འཁྱགས་ཁམས་ཞིབ་འཇུག་ལྟེ་གནས་རྒྱལ་སྤྱི་མཉམ་འབྲེལ་ཚོགས་པ་ (ICIMOD) ཡི་འཁྱགས་ཁམས་དོ་དམ་ཆེད་ལས་པ་རྒན་པ་མོཧ་མདྷ་ཕ་རུཁ་ཨ་ཛམ་ Mohd Farooq Azam གྱིས། “ད་རེས་ཀྱི་གློ་བུར་ཆུ་ལོག་དེ་ནི་བྲག་རྡོ་དང་འཁྱགས་རོམ་གྱི་རྡིབ་སྐྱོན་ (rock-ice avalanche) ཞིག་བྱུང་བའི་རྐྱེན་གྱིས་ཆགས་པ་རེད།”ཅེས་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་།ཁོང་གིས་ད་དུང་། ཕྱི་ཚེས་ ༢༦ གི་དོན་རྐྱེན་འདིའི་རྗེས་སུ་ད་དུང་ཡང་ཆུ་ལོག་གི་ཉེན་ཁ་ཡོད་པའི་ཉེན་བརྡ་བཏང་གནང་གི་འདུག དེ་ཡང་ཁོང་གིས་མུ་མཐུད་གསུངས་དོན་དུ། “འདི་ལྟ་བུའི་གནོད་འཚེ་བྱུང་རྗེས། ཆུ་རོང་གི་གྱང་རྡོ་ཆུས་བཤལ་བའི་ས་ཆ་ནས་ས་རྡིབ་ཡང་ཡང་བྱུང་སྲིད། ས་རྡོའི་རྒྱུན་འབབ་ཀྱིས་ཆུ་བོའི་ནང་གནས་སྐབས་ཀྱི་ཆུ་རགས་ཤིག་ཆགས་པའང་བྱུང་ཡོད་པས། གློ་བུར་དུ་ཡང་བསྐྱར་ཆུ་ལོག་གཉིས་པ་ཞིག་བྱུང་སྲིད་པའི་ཉེན་ཁ་ཡོད།”ཅེས་བརྗོད་བྱུང་། གནམ་གཤིས་འགྱུར་ལྡོག་དང་འབྲེལ་བ་ཡོད་དམ། མོཧ་མདྷ་ཕ་རུཁ་ཨ་ཛམ ་ ལགས་ཀྱིས་ད་དུང་། “ད་རེས་ཀྱི་གནོད་འཚེ་འདི་ནི་རི་བྲག་གི་རྨང་རྡོ་རྡིབ་པ་ (bedrock failure) ཡི་དཔེ་མཚོན་ཞིག་རེད། དེས་རྡོ་ཆེན་རྣམས་དང་འཁྱགས་རོམ་གྱི་མཇུག་མཐའི་ཆ་ཤས་ཤིག་མཉམ་དུ་མར་ལྷུང་དུ་བཅུག་པ་རེད། དེར་གནམ་གཤིས་འགྱུར་ལྡོག་གིས་ཇི་ལྟར་ཤུགས་རྐྱེན་བཟོས་ཡོད་མེད་ད་དུང་ཞིབ་འཇུག་བྱ་དགོས། འོན་ཀྱང་སྤྱིར་བཏང་ཚ་དྲོད་འཕར་བའི་རྐྱེན་གྱི་འཁྱགས་རོམ་དང་རི་ངོས་རྣམས་བརྟན་པོ་མེད་པར་གྱུར་བཞིན་ཡོད། དེར་བརྟེན་གནམ་གཤིས་འགྱུར་ལྡོག་གིས་ད་རེས་ཀྱི་གནོད་འཚེར་ཐད་ཀར་རམ་ཡང་ན་ཐད་ཀར་མ་ཡིན་པའི་ཤུགས་རྐྱེན་ཞིག་བཟོས་ཡོད་སྲིད།”ཅེས་བརྗོད་བྱུང་། བལ་ཡུལ་ར་སུ་བ་དགེ་རྒྱས་གླིང་བོད་མིའི་གཞིས་ཆགས་ཀྱི་བོད་མི་གཅིག་ཆུས་འཁྱེར་པ་དང་བོད་མི་མང་པོ་ཞིག་གར་སོང་མེད་པར་གྱུར་འདུག ས་མཚམས་ཉེ་འགྲམ་གྱི་ཊི་མུ་རེ་(Timure) ས་ཁུལ་དུ་བོད་རིགས་དུད་ཚང་ལྔའི་ཁང་པ་དང་རྒྱུ་ནོར་ཆུས་འཁྱེར་བ་དང་། དུད་ཚང་གཉིས་ཀྱི་བོད་མི་ཁག་ཅིག་དང་ད་དུང་འབྲེལ་བ་ཐུབ་མེད་པར་གནས་ཡོད་འདུག་ལ། དུད་ཚང་གཞན་གསུམ་གྱི་མི་རྣམས་ཉེ་འགྲམ་གྱི་རི་སྒང་དུ་བྲོས་ཏེ་སྲོག་ཉེན་ལས་ཐར་ཡོད་པའི་སྐོར་བལ་ཡུལ་སྐུ་ཚབ་དོན་གཅོད་ཁང་གིས་གསལ་བཤད་གནང་པ་ཞིག་ཨེ་ཤེ་ཡ་རང་དབང་རླུང་འཕྲིན་ཁང་ལ་ལག་ཐོབ་བྱུང་པའི་ནང་གསལ་འདུག དེ་བཞིན་ར་སུ་བའི་དགེ་རྒྱས་གླིང་བོད་མིའི་གཞིས་ཆགས་སུ་ཁང་པ་ ༡༡ དང་ཉེ་འཁོར་གྱི་ས་ཁུལ་ཆུས་བསྣུབས་ཏེ་གནོད་འཚེ་ཚབས་ཆེན་ཕོག་ཡོད་པ་དང་། གཞིས་ཆགས་དེའི་མི་ཁག་ཅིག་གི་གནས་སྟངས་ད་དུང་ཁ་གསལ་མེད་པར་གནས་འདུག་ལ། ས་གནས་སུ་འབྲེལ་བ་ཡོད་པའི་བལ་ཡུལ་ནང་གི་བོད་མི་ཞིག་གིས་ས་གནས་སུ་གློག་དང་ལམ་ཆད་པའི་རྐྱེན་གྱིས། ཁ་པར་སོགས་ཀྱི་ཐོག་ནས་འབྲེལ་བ་བྱེད་ཐུབ་ཀྱི་མེད་པ་བརྗོད་བྱུང་། སྲིད་སྐྱོང་སྤེན་པ་ཚེ་རིང་ལགས་ཀྱིས་བལ་ཡུལ་ཤ་ལྦ་ར་གསུམ་ས་གནས་འགོ་འཛིན་ཁྱབ་ཁོངས། ཤབ་རུ་གཞིས་ཆགས་དང་། ཉེ་འགྲམ་ཤབ་རུ་ཁྲོམ། སྐྱིད་གྲོང་ས་མཚམས་ཀྲི་མུ་རེ་སོགས་སུ་ཐེངས་འདིར་ཚབས་ཆེའི་ཆུ་རུད་ཀྱི་གནོད་ཐེབས་ཚད་ཆེ་ཤོས་ཡིན་པ་བལ་ཡུལ་གཞུང་གིས་ངོས་འཛིན་བྱས་ཡོད་པ་འགྲེལ་བརྗོད་གནང་བ་དང་སྦྲགས། ཁུལ་དེའི་བོད་མི་ཁ་འཐོར་འདུ་གནས་ལྔ་སྟེ། ༡། ར་སུ་བ་དགེ་རྒྱས་གླིང་གཞིས་ཆགས་ཀྱི་ཁྱིམ་ཚང་ ༡༡ ཆ་ཚང་ཆུས་བསྣུབས་ཏེ། དེར་གནས་སྡོད་བྱེད་མཁན་རྒན་རྒོན་གཉིས་གར་སོང་ཆ་མེད་དང་། ཤབ་རུ་ཁྲོམ་ཆ་ཚང་ཆུས་འཁྱེར་ཏེ་དེར་གནས་སྡོད་བྱེད་མཁན་ཁང་ཁྱིམ་ ༢ ལས་གཅིག་ནས་མི་ ༡ འདས་གྲོངས་དང་། ཁྱིམ་ཚང་གཞན་དེ་ནས་མི་གྲངས་ ༣ གར་སོང་ཆ་མེད། ༢) ཏི་མུ་རེ་ས་གནས་སུ་བོད་མིའི་ཁྱིམ་ཚང་ ༢ ལ་མི་གྲངས་ ༦ ཡོད་པ་གར་སོང་ཆ་མེད་དུ་གྱུར་འདུག ༣) ཐང་པོ་ཆེ་དང་། ༤) ཁང་ཅིམ། ༥) བི་རི་ཐིམ་བཅས་ས་ཁག་གསུམ་དུ་ཁྱིམ་ཚང་ ༦ ཡོད་པ་དེ་དག་ས་མཐོ་སར་ཆགས་ཡོད་པས་གནོད་སྐྱོན་བྱུང་མེད་པ་གསུངས་སོང་། མ་ཟད་ཁོང་གིས་འདི་ཚེས་ ༢༧ ཉིན་གྱི་སྔ་དྲོར་བོད་མི་ ༦ བལ་ཡུལ་གཞུང་གིས་མྱུར་སྐྱོབ་ཐུབ་འདུག་ཅེས་གསུངས་བྱུང་། བོད་མི་མྱུར་སྐྱོབ་བྱེད་པའི་ཁོངས་ནས་གསུམ་བལ་ཡུལ་འཕགས་ཤིང་ས་གནས་སུ་ཕྱིར་ལོག་ཟིན་ཡོད་པ་དང་། གཞན་གསུམ་པོ་དེ་རིང་ཕྱིར་ལོག་ཐུབ་པའི་ཚོད་དཔག་གནང་གི་ཡོད་པ་གསུངས་བྱུང་།ར་སུ་ཝ་ཁུལ་དུ་བོད་མིའི་གནས་ཡུལ་དུ་ཁྱིམ་ཚང་ ༢༠ ཙམ་གནས་སྡོད་བྱེད་ཀྱི་ཡོད་འདུག འདི་ག་རླུང་འཕྲིན་ཁང་ནས་བལ་ཡུལ་ནང་གི་བོད་མིའི་གཞུང་འབྲེལ་མི་སྣ་དང་། ས་གནས་གནོད་ཐེབས་ཀྱི་ས་ཁུལ་དུ་འབྲེལ་བ་མུ་མཐུད་ཞུ་བཞིན་ཡོད། བོད་ནང་རྐྱེན་འདས་དང་གར་སོང་མེད་པར་གྱུར་བའི་བོད་མི། རྒྱ་ནག་གཞུང་འབྲེལ་བརྒྱུད་ལམ་གྱིས་སྐྱིད་གྲོང་ཁུལ་དུ་མི་ ༥ རྐྱེན་འདས་དང་། ༥༥༨ གར་སོང་མེད་པར་གྱུར་ཡོད་པ་བསྒྲགས་འདུག འདི་ག་རླུང་འཕྲིན་ཁང་གི་གནས་ཚུལ་ཡོང་ཁུངས་ཤིག་གིས་སྐྱིད་གྲོང་ཁུལ་དུ་བོད་མི་ ༡༢ རྐྱེན་འདས་ཕྱིན་པ་དང་། ཁང་པ་བརྒྱ་ཕྲག་ཆུས་འཁྱེར་ཡོད་ཚུལ་བརྗོད་བྱུང་ཡང་། ད་ཆ་འདི་ནས་ཐད་ཀར་ར་སྤྲོད་ཐུབ་མ་བྱུང་པས་མུ་མཐུད་རྩད་གཅོད་ཞུ་མུས་ཡིན། སྐྱིད་གྲོང་རྫོང་སྲིད་གཞུང་གི་ལས་བྱེད་པས། རྒྱ་ཁྱབ་གཞུང་འབྲེལ་གྱི་གསལ་བསྒྲཊ་ལས་ལྷག་པའི་གནས་ཚུལ་འགྲེལ་བརྗོད་གནང་རྒྱུ་མི་འདུག སྐྱིད་གྲོང་འགག་སྒོ་ནི་བོད་དང་བལ་ཡུལ་གྱི་ས་མཚམས་སུ་གནས་ཤིང་། བོད་ནས་བལ་ཡུལ་དུ་སྐྱོད་པའི་སྐམ་སའི་ལམ་གལ་ཆེ་ཞིག་ཆགས་ཡོད། གནོད་འཚེ་བྱུང་པའི་སྐབས་སུ། ས་གནས་ཀྱི་གྲོང་མི་ཕུད། ད་དུང་འགག་སྒོའི་ལས་བྱེད་མི་སྣ་དང་། དོས་པོ་སྐྱེལ་མཁན། ཨར་ལས་བྱེད་མཁན། ཚོང་པ། དེ་བཞིན་ཕྱི་རྒྱལ་ཡུལ་སྐོར་བ་བཅས་ཡོད། ད་ལྟའི་ཆར་གར་སོང་ཆ་མེད་དུ་གྱུར་བའི་མི་སྣ་འདི་རྣམས་ཀྱི་ཞིབ་ཕྲའི་གནས་ཚུལ་གསལ་བསྒྲགས་བྱས་མེད། རྒྱ་ནག་ཕྱོགས་ནས་མེ་གསོད་རུ་ཁག་དང་། ཨར་ལས་མྱུར་སྐྱོབ། དམག་དཔུང་བཅས་ཀྱི་སྟོབས་ཤུགས་གནོད་འཚེ་ཕོག་ཡུལ་དུ་མངགས་གཏོང་བྱས་ནས་འཚོལ་ཞིབ་དང་མྱུར་སྐྱོབ་ཀྱི་ལས་དོན་ནང་མཉམ་ཞུགས་བྱས་འདུག ཨེ་ཤེ་ཡ་རང་དབང་རླུང་འཕྲིན་ཁང་གི་རྒྱ་སྐད་ཚན་པའི་གསར་འགོད་པས་ཚེས་ ༢༧ གྱི་ཕྱི་དྲོའི་ཆུ་ཚོད་༢ དང་སྐར་མ་༣༠ ཐོག་ སྐྱིད་གྲོང་རྫོང་མི་དམངས་སྲིད་གཞུང་གི་གཞུང་ལས་ཁང་ལ་ཁ་པར་བཏང་སྐབས། ཁ་པར་ལེན་མཁན་བོད་རིགས་ལས་བྱེད་ཅིག་གིས། རྫོང་སྲིད་གཞུང་གི་གཞུང་ལས་ཁང་ནས་གནོད་འཚེ་ཕོག་ཡུལ་གྱི་གནས་ཚུལ་ཐད་ཀར་ཤེས་རྟོགས་མེད། མིག་སྔའི་ཆར་ཤེས་རྟོགས་བྱུང་པའི་གནས་ཚུལ་བྱུང་ཁུངས་གཙོ་བོ་འདི་མདུན་ཕྱོགས་ཀྱི་བཀོད་འདོམས་ཁང་ནས་ཡིན་པ་མ་ཟད། ད་དུང་གནས་ཚུལ་ཚང་མ་གཅིག་གྱུར་ཐོག་ནས་རྒྱ་ཁྱབ་ཏུ་སྤེལ་བའི་གནས་ཚུལ་གཞི་བཟུང་བྱ་དགོས་ཀྱི་ཡོད་པ་བརྗོད་བྱུང་། གསར་འགོད་པ། ད་ལྟ་གནོད་འཚེ་ཕོག་པའི་སྐོར་གྱི་གནས་ཚུལ་གསར་པ་གང་ཡོད་དམ། ལས་བྱེད། ད་ལྟའི་ཆར་གནས་ཚུལ་གསར་པ་ནི་དེ་རིང་ཞོགས་པར་གསལ་བསྒྲགས་བྱས་པ་དེ་རེད། གང་ཡིན་ཞེ་ན། ང་ཚོའི་འདི་ནས་གནས་ཚུལ་ཤེས་རྟོགས་ཐུབ་ཀྱི་མ་རེད། ཚང་མ་མདུན་ཕྱོགས་ཀྱི་བཀོད་འདོམས་ཁང་ནས་གཅིག་གྱུར་ངང་སྤེལ་བའི་གནས་ཚུལ་ལ་གཞི་བཞག་དགོས་ཀྱི་ཡོད། གསར་འགོད་པ། གོ་ཐོས་ལ་རྒྱལ་སྲིད་སྤྱི་ཁྱབ་ཁང་གི་སྲིད་བློན་གཞོན་པ་ཀྲང་གོ་ཆིང་ས་གནས་སུ་འབྱོར་ཟིན་ཡོད་ས་རེད། ལས་བྱེད། ད་ལྟ་རྫོང་གྲོང་ལ་འབྱོར་མི་འདུག མགྱོགས་པོ་འབྱོར་གྱི་ཡོད་ས་རེད། རྫོང་གྲོང་ནས་གནོད་འཚེ་ཕོག་ཡུལ་ས་གནས་བར་ད་དུང་ཆུ་ཚོད་གཉིས་ཙམ་འགོར་གྱི་རེད། ཆུ་ཚོད་གཉིས་ཟིན་མ་ཟིན་གྱི་ལམ་ཐག་རེད། གསར་འགོད་པ། ད་ལྟ་སྐྱིད་གྲོང་འགག་སྒོར་གནོད་འཚེ་ཕོག་ཚད་ཀྱི་གནས་སྟངས་གང་འདྲ་ཡིན་ནམ། ལས་བྱེད། དེ་གསལ་པོ་ཤེས་མ་སོང་། གང་ཡིན་ཞེ་ན། ང་ཚོ་ད་ལྟ་ས་གནས་རང་ལ་སླེབས་མེད། ང་ཚོས་ཀྱང་གཞུང་ཕྱོགས་ཀྱི་གནས་ཚུལ་ལ་ལྟ་བཞིན་ཡོད། དེ་རིང་གི་གནས་ཚུལ་ཡོངས་རྫོགས་གཞུང་ཕྱོགས་ནས་སྤེལ་བའི་གནས་ཚུལ་ལ་གཞི་འཛིན་གྱི་ཡོད། གསར་འགོད་པ། རྫོང་ནང་ད་ལྟ་ལས་ཀ་གཙོ་བོ་གང་བྱེད་ཀྱི་ཡོད་དམ། ལས་བྱེད། གཙོ་བོ་གནོད་འཚེ་ཕོག་པའི་ནང་མི་ཚོར་སེམས་གསོ་བྱེད་རྒྱུ་དེ་རེད། གསར་འགོད་པ། གར་སོང་ཆ་མེད་དུ་གྱུར་བའི་མི་སྣའི་ནང་མི་མང་ཆེ་བ་བོད་རིགས་རེད་དམ། ལས་བྱེད། བོད་རིགས་ཀྱང་ཡོད། རྒྱ་རིགས་ཀྱང་ཡོད། ཧ་ལམ་འདྲ་པོ་རེད། གཉིས་ཀ་ཡོད་རེད། བོད་དང་བལ་ཡུལ་གྱི་གནས་སྟངས། ཟླ་༨ ཚེས་༢༦ ཉིན་བོད་དང་བལ་ཡུལ་ས་མཚམས་ཁུལ་དུ་འཁྱགས་རོམ་ཉིལ་བ་ལས་བྱུང་བའི་འདམ་རྡོ་ཆུ་རུད་ཀྱི་གནོད་འཚེ་ཚབས་ཆེན་ཞིག་བྱུང་ནས་བལ་ཡུལ་དུ་ཉུང་མཐར་མི་༥༧༩ དང་བོད་དུ་མི་༥ རྐྱེན་ལམ་དུ་ཤོར་ཡོད། ཚེས་༢༨ བར་བལ་ཡུལ་དུ་མི་༡༩༢༤ གར་སོང་ཆ་མེད་དང་། སྐྱིད་གྲོང་རྫོང་དུ་མི་༥༥༨ གར་སོང་ཆ་མེད་ཡིན་པའི་ནང་ཕྱི་རྒྱལ་བ་༢༦༠ ཚུད་ཡོད། རྒྱལ་སྤྱིའི་རྒྱ་གྲམ་དམར་པོའི་ཚོགས་པས་མི་༩༠,༠༠༠ ལྷག་ལ་གནོད་འཚེའི་ཤུགས་རྐྱེན་ཐེབས་ཡོད་པར་ཚོད་དཔག་བྱས་ཡོད་སྐོར་རོལ་ཌར་གསར་འགྱུར་ཁང་གིས་བརྗོད་འདུག འདམ་རྡོ་ཆུ་རུད་ཀྱི་གནོད་འཚེ་འདིས་གྲོང་གསེབ་དང་གློག་ཁང་། ལམ་དང་ཟམ་པ་སོགས་མང་པོ་གཏོར་སྐྱོན་ཕོག་ཡོད་པ་དང་། བལ་ཡུལ་གྱི་རྒྱལ་ས་ཀ་ཐ་མན་ཌུ་དང་ལྷ་ས་བར་གྱི་འབྲེལ་ལམ་གཙོ་བོ་འདི་ཡང་ཆད་ཡོད་འདུག་ལ། གར་སོང་ཆ་མེད་དུ་སོང་བའི་མིའི་ཁྲོད་ཕྱི་རྒྱལ་བ་ཉུང་མཐར་ལྔ་བརྒྱ་ལྷག་ཙམ་ཡོད་པ་དང་། དེའི་ནང་ནས་མང་པོ་ཞིག་གངས་རིན་པོ་ཆེ་དང་མ་ཕམ་གཡུ་མཚོར་གནས་མཇལ་དུ་སྐྱོད་རེད་འདུག འདམ་རྡོ་ཆུ་རུད་བྱུང་པའི་རྗེས་རི་ཁུལ་དུ་ཆུ་མཚོ་གཉིས་ཆགས་ཡོད་པ་ལས་གཅིག་གི་ཆུ་ལུས་ཡོད་པས། ཚེས་༢༨ ཉིན་བལ་ཡུལ་དང་བོད་ནང་གི་མྱུར་སྐྱོབ་ལས་དོན་ཆུ་ཚོད་གསུམ་ཙམ་ཞིག་གནས་སྐབས་ཤིག་རིང་མཚམས་བཞག་དགོས་བྱུང་ཡོད་ན་ཡང་། ཉེན་ཁ་ཆུང་དུ་ཕྱིན་པའི་རྗེས་མྱུར་སྐྱོབ་ལས་དོན་སླར་གསོ་བྱས་འདུག འོན་ཀྱང་ཆུ་མཚོ་གཞན་དེའི་ཆུ་མང་དུ་འགྲོ་བཞིན་ཡོད་པས། བསྐྱར་དུ་གནོད་འཚེ་ཡོང་བའི་ཉེན་ཁ་ཡོད་འདུག བལ་ཡུལ་གྱི་ཉེན་སྐྱོབ་རུ་ཁག་གིས་ཐད་འཕུར་གནམ་གྲུ་བཏང་ནས་གར་སོང་ཆ་མེད་དུ་སོང་བའི་མི་འཚོལ་ཞིབ་བྱེད་བཞིན་ཡོད་པ་དང་། ལམ་ཆད་པའི་ས་ཁུལ་དུ་ཛ་དྲག་མཁོ་ཆས་སྐྱེལ་བཞིན་ཡོད་འདུག་ལ། བོད་ཕྱོགས་སུ་མྱུར་སྐྱོབ་ལས་དོན་མུ་མཐུད་བྱེད་བཞིན་ཡོད་ཀྱང་། ལམ་གཙོ་བོ་ཁག་ཆད་པར་བརྟེན་གནོད་འཚེ་ཆེ་ཤོས་ཕོག་ཡུལ་དུ་ད་དུང་ཡང་སླེབས་ཐུབ་མེད་པ་རེད་འདུག དེ་བཞིན་ཨ་རིའི་གཞུང་གིས་བལ་ཡུལ་ལ་མྱུར་སྐྱོབ་ལས་དོན་ཐོག་རོགས་སྐྱོར་ཨ་སྒོར་ས་ཡ་ཕྱེད་ཀ་ཙམ་གནང་ཟིན་འདུག་ལ། མུ་མཐུད་རོགས་སྐྱོར་གནང་རྒྱུ་གསུངས་འདུག འབྲེལ་ཡོད་གནས་ཚུལཿ བོད་ཀྱི་སྐྱིད་གྲོང་དང་བལ་ཡུལ་གྱི་ས་མཚམས་སུ་འདམ་རུད་དང་ཆུ་ལོག་ཚབས་ཆེན་བྱུང་འདུག ༧གོང་ས་མཆོག་གིས་བལ་བོད་ས་མཚམས་སུ་ཆུ་ལོག་གི་དོན་རྐྱེན་ཕོག་པ་ཚོར་ཐུགས་གསོ་མཛད་འདུག

RFA Tibetan ▶ Clip ༸གོང་ས་མཆོག

ར་སུ་ཝ་ས་ཁུལ་དང་། བོད་ཀྱི་སྐྱིད་གྲོང་ས་ཁུལ་དུ་ཆུ་ལོག་ཚབས་ཆེན་བྱུང་པར་ཐུགས་གསོའི་གསུང་འཕྲིན་བསྩལ་འདུག