RFA Tibetan བོད།

བོད་ཀྱི་སྐྱིད་གྲོང་དང་བལ་ཡུལ་ས་མཚམས་སུ་ཟླ་༨ ཚེས་༢༦ ཉིན་བྱུང་བའི་འདམ་རྡོ་ཆུ་རུད་ཀྱི་གནོད་འཚེ་ཚབས་ཆེན་བྱུང་པའི་ཁྲོད། ཟླ་༨ ཚེས་༢༩ ཉིན་བར་འདས་གྲོངས་སུ་སོང་བ་དང་གར་སོང་ཆ་མེད་དུ་སོང་བའི་གྲངས་འབོར་མུ་མཐུད་འཕར་བཞིན་པ་དང་། བོད་ཕྱོགས་ཀྱི་སྐྱིད་གྲོང་འགག་སྒོ་བར་མྱུར་སྐྱོབ་བྱེད་མཁན་སྐྱོད་རྒྱུར་དཀའ་ངལ་ཡོད་པའི་ཐོག་གཞུང་ཕྱོགས་ནས་གནས་ཚུལ་གང་བྱུང་སྤེལ་མི་ཆོག་པ་དང་གནས་ཚུལ་གང་བྱུང་བཤད་མི་ཆོག་པའི་བཀག་འགོག་བྱས་འདུག བོད་ཀྱི་སྐྱིད་གྲོང་ཁུལ་གྱི་གནས་སྟངས། བོད་ཕྱོགས་སུ་ད་བར་མི་ ༧ འདས་གྲོངས་ཕྱིན་པ་དང་མི་ ༥༥༤ གར་སོང་ཆ་མེད་དུ་ཕྱིན་པ། གནོད་འཚེའི་ས་ཁུལ་དུ་མྱུར་སྐྱོབ་མི་སྣ་མང་པོ་བཏང་ཡོད་ཀྱང་། ལམ་ཆད་པ་དང་འཕྲིན་གཏོང་ཆད་པ། གནམ་གཤིས་ཡག་པོ་མེད་པ་སོགས་ཀྱིས་གནོད་འཚེ་ས་ཁུལ་དངོས་སུ་འཛུལ་རྒྱུར་དཀའ་ངལ་བྱུང་བ་རྒྱ་ནག་གཞུང་གིས་བརྗོད་འདུག འདི་ག་ཨེ་ཤེ་ཡ་རང་དབང་རླུང་འཕྲིན་ཁང་གིས་དེ་རིང་ཕྱི་ཚེས་ ༢༩ ཉིན་སྐྱིད་གྲོང་རྫོང་གི་འབྲེལ་ཡོད་ལས་ཁུངས་ཁག་ཅིག་ལ་གནས་ཚུལ་གསར་པ་ཇི་ཡོད་འཚོལ་ཞིབ་བྱས་པར་གནས་ཚུལ་གསར་པ་རྣམས་གསར་འགོད་ལྷན་ཚོགས་དང་བོད་ལྗོངས་ཉིན་རེའི་ཚགས་པར་སོགས་ལ་དོ་ཁུར་བྱས་ན་གནས་ཚུལ་གསར་པ་ཁག་འདིའི་ཐོག་ནས་ཤེས་ཀྱི་རེད་ཅེས་བརྗོད་བྱུང་ལ། གཞུང་གི་འགག་སྒོ་ལས་ཁུངས་ནས་སྐྱིད་གྲོང་འགག་སྒོར་སྐྱོད་རྒྱུའི་དམིགས་བསལ་ལག་འཁྱེར་བཟོ་མཚམས་འཇོག་ཡོད་པས། ད་ལྟ་སྐྱིད་གྲོང་དུ་ཡོང་ཐུབ་ཀྱི་མ་རེད། ས་གནས་ཀྱི་མི་ཁག་ཅིག་མགྲོན་ཁང་ནང་བཞག་ཡོད། ཞིབ་ཕྲ་མི་ག་ཚོད་ཙམ་ཡོད་མེད་འདི་གསལ་པོ་བཤད་ཁག་པོ་འདུག་ཅེས་བརྗོད་བྱུང་། དེ་ནས་སྐྱིད་གྲོང་གྲོང་རྡལ་ནང་གི་མགྲོན་ཁང་ཞིག་ལ་འབྲེལ་བ་བྱེད་སྐབས་མགྲོན་ཁང་ནང་མགྲོན་པོ་མེད་པ་དང་ཚང་མ་མྱུར་སྐྱོབ་བྱེད་མཁན་མི་སྣ་ཡིན་པ་བརྗོད་བྱུང་ལ། ད་ལྟའི་ཆར་མགྲོན་པོ་ཡོང་ཐུབ་ཀྱི་མེད་པ་དང་། མང་ཚོགས་གང་དུ་བཞག་ཡོད་མེད་ཤེས་ཀྱི་མེད། འདིར་མཚན་མོ་ཆར་པ་བབ་ཀྱི་འདུག་ཅེས་བརྗོད་བྱུང་། འདམ་རྡོ་ཆུ་རུད་ཀྱི་གནོད་འཚེ་ཕོག་ཡུལ་གྱི་ཚེས་ ༢༨ ཉིན་གྱི་གནས་སྟངས། (cnsphoto/via REUTERS) གཞན་ཡང་གཞིས་རྩེ་ཁུལ་ནས་མི་ཞིག་གིས། དྭང་བླངས་ཞབས་ཞུར་འགྲོ་འདོད་ཆེན་པོ་བྱུང་རུང་། ད་ལྟའི་ཆར་གཞུང་གིས་གཏོང་གི་མི་འདུག སྐྱིད་གྲོང་རྫོང་གི་ལས་བྱེད་ཁག་ཅིག་དྭང་བླངས་ཞབས་ཞུ་བྱེད་པར་ཕྱིན་འདུག མི་འཚོལ་མཁན་མང་པོ་འདུག་ལ། ནང་མི་རེ་གཉིས་སྐྱིད་གྲོང་རྫོང་བར་སླེབས་ནས་འགག་སྒོ་བར་སྐྱོད་ཐབས་མེད་པར་བརྟེན་ཕྱིར་ལོག་བཏང་འདུག་ལ། ས་གནས་སུ་མི་གར་སོང་ཆ་མེད་སོང་བའི་མི་སྣ་འཚོལ་མཁན་ཧ་ཅང་མང་པོ་འདུག་པས། ཁ་པར་ལེན་མཁན་ཡང་ཁག་པོ་འདུག་ཅེས་བརྗོད་བྱུང་། ད་ལྟ་གནོད་འཚེའི་ས་ཁུལ་དུ་མྱུར་སྐྱོབ་དང་འཚོལ་ཞིབ་ཀྱི་ལས་ཀ་མུ་མཐུད་བྱེད་བཞིན་ཡོད་འདུག་ལ། རྒྱ་ནག་གཞུང་འབྲེལ་ཤིན་ཧྭ་གསར་འགྱུར་ཁང་གིས་གནས་ཚུལ་སྤེལ་བའི་ནང་དོན་ལྟར་ན། གནོད་འཚེ་ཕོག་པའི་མི་ ༤༩༩ གནས་སྤོས་དང་གནས་སྐབས་སྡོད་གནས་བཀོད་སྒྲིག་བྱས་ཡོད་པ་དང་། ས་གནས་སུ་ལུས་པའི་ཡུལ་སྐོར་བ་༥༥༥ ཡང་ས་ཁུལ་གཞན་དུ་གནས་སྤོས་བྱས་ཡོད་འདུག བལ་ཡུལ་ཕྱོགས་ཀྱི་གནས་སྟངས། བལ་ཡུལ་ཕྱོགས་སུ་གནོད་འཚེ་དེ་བས་ཚབས་ཆེ་བ་བྱུང་ཡོད་པ་དང་། ཚེས་ ༢༩ ཉིན་མི་ ༦༢༦ འདས་གྲོངས་དང་ ༢༤༢༦ གར་སོང་ཆ་མེད་དུ་ཕྱིན་ཡོད་པའི་ཁོངས་ནས་ཕྱི་རྒྱལ་གྱི་མི་ ༥༡༧ ཡོད་པར་བལ་ཡུལ་གྱི་གནོད་འཚེ་དོ་དམ་ལས་ཁུངས་ཀྱིས་བརྗོད་སྐོར་རོལ་ཌར་གསར་འགྱུར་ཁང་གིས་གནས་ཚུལ་སྤེལ་འདུག བལ་ཡུལ་ནང་དྲ་རྒྱའི་དམ་བསྒྲགས་མེད་པ་དང་གནོད་འཚེ་ཚབས་ཆེ་ཤོས་ཀྱི་ས་ཁུལ་ཁག་ནི་བལ་ཡུལ་གྱི་ར་སུ་བ་དང་ནུ་ཝ་ཀོཊི་ (Nuwakot) རྫོང་གཉིས་ཡིན་ཞིང་། གྲོང་ཚོ་དང་ལམ། ཟམ་པ། ཆུ་གློག་ལས་གྲྭ་བཅས་ལ་གཏོར་སྐྱོན་ཚབས་ཆེན་བྱུང་འདུག ས་གནས་ཁ་ཤས་སུ་ས་རྡོ་དང་འདམ་གྱིས་ཁང་པ་དང་། ལམ་སྣེ་རྣམས་ཆུས་བསྣུབས་ཡོད་པས། ལག་པ་དང་འཕྲུལ་ཆས་གཉིས་ཀ་བེད་སྤྱོད་བྱས་ནས་གསོན་པོར་གནས་པའི་མི་འཚོལ་བཞིན་ཡོད་འདུག ཚེས་ ༢༧ ཉིན་བལ་ཡུལ་གྱི་དམག་མིས་མྱུར་སྐྱོབ་བྱེད་བཞིན་ཡོད་པ། (NEPALI ARMY/via REUTERS) ད་བར་བལ་ཡུལ་ནང་མི་ ༣༧༠༠ ལྷག་སྐྱོབ་ཐུབ་ཡོད་པ་དང་། གནོད་འཚེ་ས་ཁུལ་ནས་རྨས་མ་དང་རྒན་རྒོན། ཕྲུ་གུ་སོགས་གནམ་གྲུས་བདེ་འཇགས་ས་ཁུལ་དུ་སྐྱེལ་བཞིན་ཡོད་རུང་། ཚེས་ ༢༩ ཉིན་ཆར་པ་དང་གནམ་གཤིས་ཞན་པས་གནམ་གྲུའི་འཚོལ་སྐྱོབ་ལས་ཀར་བར་ཆད་བྱུང་འདུག བལ་ཡུལ་གཞུང་གིས་རྒྱ་གར་དང་རྒྱ་ནག་ལ་ཆེད་ལས་ལག་རྩལ་རོགས་སྐྱོར་ཞུས་ཡོད་པ་དང་། གཙོ་བོ་ས་འོག་ནས་མི་སྐྱོབ་རྒྱུ་དང་། ཟམ་པ་དང་འགྲིམ་འགྲུལ་ལམ་སྐྱར་གསོ་བྱེད་རྒྱུ། དེ་བཞིན་འདས་པོའི་ཕུང་པོ་ངོས་འཛིན་བྱེད་པའི་ DNA བརྟག་དཔྱད་སོགས་ལ་ཆེད་ལས་རོགས་སྐྱོར་དགོས་པ་བརྗོད་འདུག འབྲེལ་ཡོད་གནས་ཚུལ། བོད་ཀྱི་སྐྱིད་གྲོང་དང་བལ་ཡུལ་གྱི་ས་མཚམས་སུ་འདམ་རུད་དང་ཆུ་ལོག་ཚབས་ཆེན་བྱུང་འདུག ༧གོང་ས་མཆོག་གིས་བལ་བོད་ས་མཚམས་སུ་ཆུ་ལོག་གི་དོན་རྐྱེན་ཕོག་པ་ཚོར་ཐུགས་གསོ་མཛད་འདུག འདམ་རུད་ཀྱི་རྐྱེན་རྩ་འདི་འཁྱགས་རྡོ་ཉིལ་བའི་རྐྱེན་གྱིས་ཡིན་པར་ངོས་འཛིན་གནང་གི་འདུག

RFA Tibetan འཛམ་གླིང༌།

བལ་བོད་ས་མཚམས་ཀྱི་ཚབས་ཆེའི་ཆུ་ལོག་དང་འདམ་རུད་ཀྱི་འབྱུང་རྐྱེན་ནི་འཁྱགས་རྡོ་ཉིལ་བའི་དབང་གིས་ཡིན་པའི་རྟགས་ཚན་མངོན་གྱི་ཡོད་པ་འབྲེལ་ཡོད་ཁྱད་ལས་པས་གསུངས་བྱུང་། ཚབས་ཆེའི་ཆུ་ལོག་གི་འབྱུང་རྐྱེན། བལ་ཡུལ་དང་བོད་ཀྱི་སྐྱིད་གྲོང་ས་མཚམས་སུ་ཕྱི་ཚེས་ ༢༨ ཉིན་ཚབས་ཆེའི་འདམ་རུད་བྱུང་སྟེ་མི་གྲངས་བརྒྱ་ཕྲག་མང་པོའི་ཚེ་སྲོག་ཤོར་བ་དང་། སྟོང་འཚོ་བརྒལ་བ་གར་སོང་ཆ་མེད་དུ་གྱུར་བའི་ཚབས་ཆེའི་ཆུ་ལོག་དང་འདམ་རུད་ཀྱི་རྐྱེན་རྩ་ནི་རྟགས་མཚན་ལ་གཞིགས་ན། བྲག་དང་འཁྱགས་རྡོ་ཆེན་པོ་དེ་འདྲ་ཉིལ་བར་བརྟེན་ནས་བྱུང་པ་ཞིག་ཡིན་པ་བསྟན་གྱི་ཡོད་པ་དང་། འཁྱགས་རྡོ་ཆེན་པོ་ཉིལ་བའི་འཁྱགས་རོམ་ཉིལ་བའི་གངས་རུད་བྱུང་པ་ཞེས་མིང་ཚིག་འདི་བེད་སྤྱོད་བྱེད་ཀྱི་ཡོད་པ་ནེ་དྷར་ལེནཌི་ནང་Utrecht གཙུག་ལག་སློབ་ཆེན་གྱི་ས་ཁམས་དངོས་ཀྱི་ཉམས་ཞིབ་སྡེ་ཚན་ནང་འབུམ་རམས་པའི་ཉམས་ཞིབ་སློབ་གཉེར་གནང་བཞིན་ཡོད་པ་དང་དེ་སྔ་ལོ་བརྒྱད་རིང་བལ་ཡུལ་ནང་དུ་ཧི་མ་ལ་ཡའི་གངས་དང་འཁྱགས་རོམ་གྱི་ཁོར་ཡུག་ལ་ཉམས་ཞིབ་པ་ཤར་པ་བསྟན་འཛིན་ཆོས་རྒྱལ་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ་འགྲེལ་བཤད་བསྐྱོན་བྱུང་། ཁོང་གིས་ད་དུང་། འདི་ནི་རྒྱུན་ལྡན་གྱི་གཙང་པོར་ཆུ་ལོག་རྒྱུག་པ་གཅིག་པུ་མིན་པར་བྲག་རྡོ་དང་འཁྱགས་པ་ཉིལ་ཏེ་ཆུ་རྒྱུན་དུ་ཟགས་ཏེ་ཚད་ལས་བརྒལ་བའི་ཆུས་འདེད་པའི་ས་དང་རྡོ་མང་པོ་ཞིག་ཡུལ་གཤོངས་སུ་འཁྱེར་ཡོད་བ་འདི་གསལ་པོ་མངོན་རྒྱུ་ཡོད་ཅེས་འགྲེལ་བཤད་གནང་བྱུང་། འབྱུང་རྐྱེན་ནི་བྲག་རྡོ་དང་འཁྱགས་རོམ་རྡིབ་སྐྱོན་ཡིན་པ་དབྱེ་ཞིབ་གནང་པ། བལ་ཡུལ་གྱི་རི་བོའི་འཁྱགས་ཁམས་ཞིབ་འཇུག་ལྟེ་གནས་རྒྱལ་སྤྱི་མཉམ་འབྲེལ་ཚོགས་པ་ (ICIMOD) ཡི་འཁྱགས་ཁམས་དོ་དམ་ཆེད་ལས་པ་རྒན་པ་མོཧ་མདྷ་ཕ་རུཁ་ཨ་ཛམ་ Mohd Farooq Azam གྱིས། “ད་རེས་ཀྱི་གློ་བུར་ཆུ་ལོག་དེ་ནི་བྲག་རྡོ་དང་འཁྱགས་རོམ་གྱི་རྡིབ་སྐྱོན་ (rock-ice avalanche) ཞིག་བྱུང་བའི་རྐྱེན་གྱིས་ཆགས་པ་རེད།”ཅེས་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་།ཁོང་གིས་ད་དུང་། ཕྱི་ཚེས་ ༢༦ གི་དོན་རྐྱེན་འདིའི་རྗེས་སུ་ད་དུང་ཡང་ཆུ་ལོག་གི་ཉེན་ཁ་ཡོད་པའི་ཉེན་བརྡ་བཏང་གནང་གི་འདུག དེ་ཡང་ཁོང་གིས་མུ་མཐུད་གསུངས་དོན་དུ། “འདི་ལྟ་བུའི་གནོད་འཚེ་བྱུང་རྗེས། ཆུ་རོང་གི་གྱང་རྡོ་ཆུས་བཤལ་བའི་ས་ཆ་ནས་ས་རྡིབ་ཡང་ཡང་བྱུང་སྲིད། ས་རྡོའི་རྒྱུན་འབབ་ཀྱིས་ཆུ་བོའི་ནང་གནས་སྐབས་ཀྱི་ཆུ་རགས་ཤིག་ཆགས་པའང་བྱུང་ཡོད་པས། གློ་བུར་དུ་ཡང་བསྐྱར་ཆུ་ལོག་གཉིས་པ་ཞིག་བྱུང་སྲིད་པའི་ཉེན་ཁ་ཡོད།”ཅེས་བརྗོད་བྱུང་། གནམ་གཤིས་འགྱུར་ལྡོག་དང་འབྲེལ་བ་ཡོད་དམ། མོཧ་མདྷ་ཕ་རུཁ་ཨ་ཛམ ་ ལགས་ཀྱིས་ད་དུང་། “ད་རེས་ཀྱི་གནོད་འཚེ་འདི་ནི་རི་བྲག་གི་རྨང་རྡོ་རྡིབ་པ་ (bedrock failure) ཡི་དཔེ་མཚོན་ཞིག་རེད། དེས་རྡོ་ཆེན་རྣམས་དང་འཁྱགས་རོམ་གྱི་མཇུག་མཐའི་ཆ་ཤས་ཤིག་མཉམ་དུ་མར་ལྷུང་དུ་བཅུག་པ་རེད། དེར་གནམ་གཤིས་འགྱུར་ལྡོག་གིས་ཇི་ལྟར་ཤུགས་རྐྱེན་བཟོས་ཡོད་མེད་ད་དུང་ཞིབ་འཇུག་བྱ་དགོས། འོན་ཀྱང་སྤྱིར་བཏང་ཚ་དྲོད་འཕར་བའི་རྐྱེན་གྱི་འཁྱགས་རོམ་དང་རི་ངོས་རྣམས་བརྟན་པོ་མེད་པར་གྱུར་བཞིན་ཡོད། དེར་བརྟེན་གནམ་གཤིས་འགྱུར་ལྡོག་གིས་ད་རེས་ཀྱི་གནོད་འཚེར་ཐད་ཀར་རམ་ཡང་ན་ཐད་ཀར་མ་ཡིན་པའི་ཤུགས་རྐྱེན་ཞིག་བཟོས་ཡོད་སྲིད།”ཅེས་བརྗོད་བྱུང་། བལ་ཡུལ་ར་སུ་བ་དགེ་རྒྱས་གླིང་བོད་མིའི་གཞིས་ཆགས་ཀྱི་བོད་མི་གཅིག་ཆུས་འཁྱེར་པ་དང་བོད་མི་མང་པོ་ཞིག་གར་སོང་མེད་པར་གྱུར་འདུག ས་མཚམས་ཉེ་འགྲམ་གྱི་ཊི་མུ་རེ་(Timure) ས་ཁུལ་དུ་བོད་རིགས་དུད་ཚང་ལྔའི་ཁང་པ་དང་རྒྱུ་ནོར་ཆུས་འཁྱེར་བ་དང་། དུད་ཚང་གཉིས་ཀྱི་བོད་མི་ཁག་ཅིག་དང་ད་དུང་འབྲེལ་བ་ཐུབ་མེད་པར་གནས་ཡོད་འདུག་ལ། དུད་ཚང་གཞན་གསུམ་གྱི་མི་རྣམས་ཉེ་འགྲམ་གྱི་རི་སྒང་དུ་བྲོས་ཏེ་སྲོག་ཉེན་ལས་ཐར་ཡོད་པའི་སྐོར་བལ་ཡུལ་སྐུ་ཚབ་དོན་གཅོད་ཁང་གིས་གསལ་བཤད་གནང་པ་ཞིག་ཨེ་ཤེ་ཡ་རང་དབང་རླུང་འཕྲིན་ཁང་ལ་ལག་ཐོབ་བྱུང་པའི་ནང་གསལ་འདུག དེ་བཞིན་ར་སུ་བའི་དགེ་རྒྱས་གླིང་བོད་མིའི་གཞིས་ཆགས་སུ་ཁང་པ་ ༡༡ དང་ཉེ་འཁོར་གྱི་ས་ཁུལ་ཆུས་བསྣུབས་ཏེ་གནོད་འཚེ་ཚབས་ཆེན་ཕོག་ཡོད་པ་དང་། གཞིས་ཆགས་དེའི་མི་ཁག་ཅིག་གི་གནས་སྟངས་ད་དུང་ཁ་གསལ་མེད་པར་གནས་འདུག་ལ། ས་གནས་སུ་འབྲེལ་བ་ཡོད་པའི་བལ་ཡུལ་ནང་གི་བོད་མི་ཞིག་གིས་ས་གནས་སུ་གློག་དང་ལམ་ཆད་པའི་རྐྱེན་གྱིས། ཁ་པར་སོགས་ཀྱི་ཐོག་ནས་འབྲེལ་བ་བྱེད་ཐུབ་ཀྱི་མེད་པ་བརྗོད་བྱུང་། སྲིད་སྐྱོང་སྤེན་པ་ཚེ་རིང་ལགས་ཀྱིས་བལ་ཡུལ་ཤ་ལྦ་ར་གསུམ་ས་གནས་འགོ་འཛིན་ཁྱབ་ཁོངས། ཤབ་རུ་གཞིས་ཆགས་དང་། ཉེ་འགྲམ་ཤབ་རུ་ཁྲོམ། སྐྱིད་གྲོང་ས་མཚམས་ཀྲི་མུ་རེ་སོགས་སུ་ཐེངས་འདིར་ཚབས་ཆེའི་ཆུ་རུད་ཀྱི་གནོད་ཐེབས་ཚད་ཆེ་ཤོས་ཡིན་པ་བལ་ཡུལ་གཞུང་གིས་ངོས་འཛིན་བྱས་ཡོད་པ་འགྲེལ་བརྗོད་གནང་བ་དང་སྦྲགས། ཁུལ་དེའི་བོད་མི་ཁ་འཐོར་འདུ་གནས་ལྔ་སྟེ། ༡། ར་སུ་བ་དགེ་རྒྱས་གླིང་གཞིས་ཆགས་ཀྱི་ཁྱིམ་ཚང་ ༡༡ ཆ་ཚང་ཆུས་བསྣུབས་ཏེ། དེར་གནས་སྡོད་བྱེད་མཁན་རྒན་རྒོན་གཉིས་གར་སོང་ཆ་མེད་དང་། ཤབ་རུ་ཁྲོམ་ཆ་ཚང་ཆུས་འཁྱེར་ཏེ་དེར་གནས་སྡོད་བྱེད་མཁན་ཁང་ཁྱིམ་ ༢ ལས་གཅིག་ནས་མི་ ༡ འདས་གྲོངས་དང་། ཁྱིམ་ཚང་གཞན་དེ་ནས་མི་གྲངས་ ༣ གར་སོང་ཆ་མེད། ༢) ཏི་མུ་རེ་ས་གནས་སུ་བོད་མིའི་ཁྱིམ་ཚང་ ༢ ལ་མི་གྲངས་ ༦ ཡོད་པ་གར་སོང་ཆ་མེད་དུ་གྱུར་འདུག ༣) ཐང་པོ་ཆེ་དང་། ༤) ཁང་ཅིམ། ༥) བི་རི་ཐིམ་བཅས་ས་ཁག་གསུམ་དུ་ཁྱིམ་ཚང་ ༦ ཡོད་པ་དེ་དག་ས་མཐོ་སར་ཆགས་ཡོད་པས་གནོད་སྐྱོན་བྱུང་མེད་པ་གསུངས་སོང་། མ་ཟད་ཁོང་གིས་འདི་ཚེས་ ༢༧ ཉིན་གྱི་སྔ་དྲོར་བོད་མི་ ༦ བལ་ཡུལ་གཞུང་གིས་མྱུར་སྐྱོབ་ཐུབ་འདུག་ཅེས་གསུངས་བྱུང་། བོད་མི་མྱུར་སྐྱོབ་བྱེད་པའི་ཁོངས་ནས་གསུམ་བལ་ཡུལ་འཕགས་ཤིང་ས་གནས་སུ་ཕྱིར་ལོག་ཟིན་ཡོད་པ་དང་། གཞན་གསུམ་པོ་དེ་རིང་ཕྱིར་ལོག་ཐུབ་པའི་ཚོད་དཔག་གནང་གི་ཡོད་པ་གསུངས་བྱུང་།ར་སུ་ཝ་ཁུལ་དུ་བོད་མིའི་གནས་ཡུལ་དུ་ཁྱིམ་ཚང་ ༢༠ ཙམ་གནས་སྡོད་བྱེད་ཀྱི་ཡོད་འདུག འདི་ག་རླུང་འཕྲིན་ཁང་ནས་བལ་ཡུལ་ནང་གི་བོད་མིའི་གཞུང་འབྲེལ་མི་སྣ་དང་། ས་གནས་གནོད་ཐེབས་ཀྱི་ས་ཁུལ་དུ་འབྲེལ་བ་མུ་མཐུད་ཞུ་བཞིན་ཡོད། བོད་ནང་རྐྱེན་འདས་དང་གར་སོང་མེད་པར་གྱུར་བའི་བོད་མི། རྒྱ་ནག་གཞུང་འབྲེལ་བརྒྱུད་ལམ་གྱིས་སྐྱིད་གྲོང་ཁུལ་དུ་མི་ ༥ རྐྱེན་འདས་དང་། ༥༥༨ གར་སོང་མེད་པར་གྱུར་ཡོད་པ་བསྒྲགས་འདུག འདི་ག་རླུང་འཕྲིན་ཁང་གི་གནས་ཚུལ་ཡོང་ཁུངས་ཤིག་གིས་སྐྱིད་གྲོང་ཁུལ་དུ་བོད་མི་ ༡༢ རྐྱེན་འདས་ཕྱིན་པ་དང་། ཁང་པ་བརྒྱ་ཕྲག་ཆུས་འཁྱེར་ཡོད་ཚུལ་བརྗོད་བྱུང་ཡང་། ད་ཆ་འདི་ནས་ཐད་ཀར་ར་སྤྲོད་ཐུབ་མ་བྱུང་པས་མུ་མཐུད་རྩད་གཅོད་ཞུ་མུས་ཡིན། སྐྱིད་གྲོང་རྫོང་སྲིད་གཞུང་གི་ལས་བྱེད་པས། རྒྱ་ཁྱབ་གཞུང་འབྲེལ་གྱི་གསལ་བསྒྲཊ་ལས་ལྷག་པའི་གནས་ཚུལ་འགྲེལ་བརྗོད་གནང་རྒྱུ་མི་འདུག སྐྱིད་གྲོང་འགག་སྒོ་ནི་བོད་དང་བལ་ཡུལ་གྱི་ས་མཚམས་སུ་གནས་ཤིང་། བོད་ནས་བལ་ཡུལ་དུ་སྐྱོད་པའི་སྐམ་སའི་ལམ་གལ་ཆེ་ཞིག་ཆགས་ཡོད། གནོད་འཚེ་བྱུང་པའི་སྐབས་སུ། ས་གནས་ཀྱི་གྲོང་མི་ཕུད། ད་དུང་འགག་སྒོའི་ལས་བྱེད་མི་སྣ་དང་། དོས་པོ་སྐྱེལ་མཁན། ཨར་ལས་བྱེད་མཁན། ཚོང་པ། དེ་བཞིན་ཕྱི་རྒྱལ་ཡུལ་སྐོར་བ་བཅས་ཡོད། ད་ལྟའི་ཆར་གར་སོང་ཆ་མེད་དུ་གྱུར་བའི་མི་སྣ་འདི་རྣམས་ཀྱི་ཞིབ་ཕྲའི་གནས་ཚུལ་གསལ་བསྒྲགས་བྱས་མེད། རྒྱ་ནག་ཕྱོགས་ནས་མེ་གསོད་རུ་ཁག་དང་། ཨར་ལས་མྱུར་སྐྱོབ། དམག་དཔུང་བཅས་ཀྱི་སྟོབས་ཤུགས་གནོད་འཚེ་ཕོག་ཡུལ་དུ་མངགས་གཏོང་བྱས་ནས་འཚོལ་ཞིབ་དང་མྱུར་སྐྱོབ་ཀྱི་ལས་དོན་ནང་མཉམ་ཞུགས་བྱས་འདུག ཨེ་ཤེ་ཡ་རང་དབང་རླུང་འཕྲིན་ཁང་གི་རྒྱ་སྐད་ཚན་པའི་གསར་འགོད་པས་ཚེས་ ༢༧ གྱི་ཕྱི་དྲོའི་ཆུ་ཚོད་༢ དང་སྐར་མ་༣༠ ཐོག་ སྐྱིད་གྲོང་རྫོང་མི་དམངས་སྲིད་གཞུང་གི་གཞུང་ལས་ཁང་ལ་ཁ་པར་བཏང་སྐབས། ཁ་པར་ལེན་མཁན་བོད་རིགས་ལས་བྱེད་ཅིག་གིས། རྫོང་སྲིད་གཞུང་གི་གཞུང་ལས་ཁང་ནས་གནོད་འཚེ་ཕོག་ཡུལ་གྱི་གནས་ཚུལ་ཐད་ཀར་ཤེས་རྟོགས་མེད། མིག་སྔའི་ཆར་ཤེས་རྟོགས་བྱུང་པའི་གནས་ཚུལ་བྱུང་ཁུངས་གཙོ་བོ་འདི་མདུན་ཕྱོགས་ཀྱི་བཀོད་འདོམས་ཁང་ནས་ཡིན་པ་མ་ཟད། ད་དུང་གནས་ཚུལ་ཚང་མ་གཅིག་གྱུར་ཐོག་ནས་རྒྱ་ཁྱབ་ཏུ་སྤེལ་བའི་གནས་ཚུལ་གཞི་བཟུང་བྱ་དགོས་ཀྱི་ཡོད་པ་བརྗོད་བྱུང་། གསར་འགོད་པ། ད་ལྟ་གནོད་འཚེ་ཕོག་པའི་སྐོར་གྱི་གནས་ཚུལ་གསར་པ་གང་ཡོད་དམ། ལས་བྱེད། ད་ལྟའི་ཆར་གནས་ཚུལ་གསར་པ་ནི་དེ་རིང་ཞོགས་པར་གསལ་བསྒྲགས་བྱས་པ་དེ་རེད། གང་ཡིན་ཞེ་ན། ང་ཚོའི་འདི་ནས་གནས་ཚུལ་ཤེས་རྟོགས་ཐུབ་ཀྱི་མ་རེད། ཚང་མ་མདུན་ཕྱོགས་ཀྱི་བཀོད་འདོམས་ཁང་ནས་གཅིག་གྱུར་ངང་སྤེལ་བའི་གནས་ཚུལ་ལ་གཞི་བཞག་དགོས་ཀྱི་ཡོད། གསར་འགོད་པ། གོ་ཐོས་ལ་རྒྱལ་སྲིད་སྤྱི་ཁྱབ་ཁང་གི་སྲིད་བློན་གཞོན་པ་ཀྲང་གོ་ཆིང་ས་གནས་སུ་འབྱོར་ཟིན་ཡོད་ས་རེད། ལས་བྱེད། ད་ལྟ་རྫོང་གྲོང་ལ་འབྱོར་མི་འདུག མགྱོགས་པོ་འབྱོར་གྱི་ཡོད་ས་རེད། རྫོང་གྲོང་ནས་གནོད་འཚེ་ཕོག་ཡུལ་ས་གནས་བར་ད་དུང་ཆུ་ཚོད་གཉིས་ཙམ་འགོར་གྱི་རེད། ཆུ་ཚོད་གཉིས་ཟིན་མ་ཟིན་གྱི་ལམ་ཐག་རེད། གསར་འགོད་པ། ད་ལྟ་སྐྱིད་གྲོང་འགག་སྒོར་གནོད་འཚེ་ཕོག་ཚད་ཀྱི་གནས་སྟངས་གང་འདྲ་ཡིན་ནམ། ལས་བྱེད། དེ་གསལ་པོ་ཤེས་མ་སོང་། གང་ཡིན་ཞེ་ན། ང་ཚོ་ད་ལྟ་ས་གནས་རང་ལ་སླེབས་མེད། ང་ཚོས་ཀྱང་གཞུང་ཕྱོགས་ཀྱི་གནས་ཚུལ་ལ་ལྟ་བཞིན་ཡོད། དེ་རིང་གི་གནས་ཚུལ་ཡོངས་རྫོགས་གཞུང་ཕྱོགས་ནས་སྤེལ་བའི་གནས་ཚུལ་ལ་གཞི་འཛིན་གྱི་ཡོད། གསར་འགོད་པ། རྫོང་ནང་ད་ལྟ་ལས་ཀ་གཙོ་བོ་གང་བྱེད་ཀྱི་ཡོད་དམ། ལས་བྱེད། གཙོ་བོ་གནོད་འཚེ་ཕོག་པའི་ནང་མི་ཚོར་སེམས་གསོ་བྱེད་རྒྱུ་དེ་རེད། གསར་འགོད་པ། གར་སོང་ཆ་མེད་དུ་གྱུར་བའི་མི་སྣའི་ནང་མི་མང་ཆེ་བ་བོད་རིགས་རེད་དམ། ལས་བྱེད། བོད་རིགས་ཀྱང་ཡོད། རྒྱ་རིགས་ཀྱང་ཡོད། ཧ་ལམ་འདྲ་པོ་རེད། གཉིས་ཀ་ཡོད་རེད། བོད་དང་བལ་ཡུལ་གྱི་གནས་སྟངས། ཟླ་༨ ཚེས་༢༦ ཉིན་བོད་དང་བལ་ཡུལ་ས་མཚམས་ཁུལ་དུ་འཁྱགས་རོམ་ཉིལ་བ་ལས་བྱུང་བའི་འདམ་རྡོ་ཆུ་རུད་ཀྱི་གནོད་འཚེ་ཚབས་ཆེན་ཞིག་བྱུང་ནས་བལ་ཡུལ་དུ་ཉུང་མཐར་མི་༥༧༩ དང་བོད་དུ་མི་༥ རྐྱེན་ལམ་དུ་ཤོར་ཡོད། ཚེས་༢༨ བར་བལ་ཡུལ་དུ་མི་༡༩༢༤ གར་སོང་ཆ་མེད་དང་། སྐྱིད་གྲོང་རྫོང་དུ་མི་༥༥༨ གར་སོང་ཆ་མེད་ཡིན་པའི་ནང་ཕྱི་རྒྱལ་བ་༢༦༠ ཚུད་ཡོད། རྒྱལ་སྤྱིའི་རྒྱ་གྲམ་དམར་པོའི་ཚོགས་པས་མི་༩༠,༠༠༠ ལྷག་ལ་གནོད་འཚེའི་ཤུགས་རྐྱེན་ཐེབས་ཡོད་པར་ཚོད་དཔག་བྱས་ཡོད་སྐོར་རོལ་ཌར་གསར་འགྱུར་ཁང་གིས་བརྗོད་འདུག འདམ་རྡོ་ཆུ་རུད་ཀྱི་གནོད་འཚེ་འདིས་གྲོང་གསེབ་དང་གློག་ཁང་། ལམ་དང་ཟམ་པ་སོགས་མང་པོ་གཏོར་སྐྱོན་ཕོག་ཡོད་པ་དང་། བལ་ཡུལ་གྱི་རྒྱལ་ས་ཀ་ཐ་མན་ཌུ་དང་ལྷ་ས་བར་གྱི་འབྲེལ་ལམ་གཙོ་བོ་འདི་ཡང་ཆད་ཡོད་འདུག་ལ། གར་སོང་ཆ་མེད་དུ་སོང་བའི་མིའི་ཁྲོད་ཕྱི་རྒྱལ་བ་ཉུང་མཐར་ལྔ་བརྒྱ་ལྷག་ཙམ་ཡོད་པ་དང་། དེའི་ནང་ནས་མང་པོ་ཞིག་གངས་རིན་པོ་ཆེ་དང་མ་ཕམ་གཡུ་མཚོར་གནས་མཇལ་དུ་སྐྱོད་རེད་འདུག འདམ་རྡོ་ཆུ་རུད་བྱུང་པའི་རྗེས་རི་ཁུལ་དུ་ཆུ་མཚོ་གཉིས་ཆགས་ཡོད་པ་ལས་གཅིག་གི་ཆུ་ལུས་ཡོད་པས། ཚེས་༢༨ ཉིན་བལ་ཡུལ་དང་བོད་ནང་གི་མྱུར་སྐྱོབ་ལས་དོན་ཆུ་ཚོད་གསུམ་ཙམ་ཞིག་གནས་སྐབས་ཤིག་རིང་མཚམས་བཞག་དགོས་བྱུང་ཡོད་ན་ཡང་། ཉེན་ཁ་ཆུང་དུ་ཕྱིན་པའི་རྗེས་མྱུར་སྐྱོབ་ལས་དོན་སླར་གསོ་བྱས་འདུག འོན་ཀྱང་ཆུ་མཚོ་གཞན་དེའི་ཆུ་མང་དུ་འགྲོ་བཞིན་ཡོད་པས། བསྐྱར་དུ་གནོད་འཚེ་ཡོང་བའི་ཉེན་ཁ་ཡོད་འདུག བལ་ཡུལ་གྱི་ཉེན་སྐྱོབ་རུ་ཁག་གིས་ཐད་འཕུར་གནམ་གྲུ་བཏང་ནས་གར་སོང་ཆ་མེད་དུ་སོང་བའི་མི་འཚོལ་ཞིབ་བྱེད་བཞིན་ཡོད་པ་དང་། ལམ་ཆད་པའི་ས་ཁུལ་དུ་ཛ་དྲག་མཁོ་ཆས་སྐྱེལ་བཞིན་ཡོད་འདུག་ལ། བོད་ཕྱོགས་སུ་མྱུར་སྐྱོབ་ལས་དོན་མུ་མཐུད་བྱེད་བཞིན་ཡོད་ཀྱང་། ལམ་གཙོ་བོ་ཁག་ཆད་པར་བརྟེན་གནོད་འཚེ་ཆེ་ཤོས་ཕོག་ཡུལ་དུ་ད་དུང་ཡང་སླེབས་ཐུབ་མེད་པ་རེད་འདུག དེ་བཞིན་ཨ་རིའི་གཞུང་གིས་བལ་ཡུལ་ལ་མྱུར་སྐྱོབ་ལས་དོན་ཐོག་རོགས་སྐྱོར་ཨ་སྒོར་ས་ཡ་ཕྱེད་ཀ་ཙམ་གནང་ཟིན་འདུག་ལ། མུ་མཐུད་རོགས་སྐྱོར་གནང་རྒྱུ་གསུངས་འདུག འབྲེལ་ཡོད་གནས་ཚུལཿ བོད་ཀྱི་སྐྱིད་གྲོང་དང་བལ་ཡུལ་གྱི་ས་མཚམས་སུ་འདམ་རུད་དང་ཆུ་ལོག་ཚབས་ཆེན་བྱུང་འདུག ༧གོང་ས་མཆོག་གིས་བལ་བོད་ས་མཚམས་སུ་ཆུ་ལོག་གི་དོན་རྐྱེན་ཕོག་པ་ཚོར་ཐུགས་གསོ་མཛད་འདུག

RFA Tibetan ▶ Clip ༸གོང་ས་མཆོག

ར་སུ་ཝ་ས་ཁུལ་དང་། བོད་ཀྱི་སྐྱིད་གྲོང་ས་ཁུལ་དུ་ཆུ་ལོག་ཚབས་ཆེན་བྱུང་པར་ཐུགས་གསོའི་གསུང་འཕྲིན་བསྩལ་འདུག

RFA Tibetan ༸གོང་ས་མཆོག

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ར་སུ་ཝ་ས་ཁུལ་དང་། བོད་ཀྱི་སྐྱིད་གྲོང་ས་ཁུལ་དུ་ ཆུ་ལོག་ཚབས་ཆེན་བྱུང་པར་ ཐུགས་གསོའི་གསུང་འཕྲིན་བསྩལ་འདུག དེ་ཡང་ཕྱི་ཟླ་ ༨ ཚེས་ ༢༧ ཉིན་གསུང་འཕྲིན་ཕེབས་པའི་ནང་། བལ་ཡུལ་གྱི་ར་སུ་ཝ་ས་ཁུལ་དང་། བོད་ཀྱི་སྐྱིད་གྲོང་ས་ཁུལ་དུ་ཆུ་ལོག་ཚབས་ཆེན་བྱུང་སྟེ། མིའི་ཚེ་སྲོག་ཤོར་བ་དང་ཁང་རྩིག་དང་བཟོ་བཀོད་ཁག་ལ་གཏོར་སྐྱོན་ཚབས་ཆེན་བྱུང་འདུག་པར་ཐུགས་ཕམ་བྱུང་པ་དང་། རྐྱེན་འདས་སུ་སོང་བ་རྣམས་ལ་ཐུགས་སྨོན་དང་། འདས་པོའི་ནང་མི་རྣམས་དང་གནོད་འཚེ་འདིས་ཤུགས་རྐྱེན་ཕོག་པ་ཚང་མར་༧གོང་ས་༧སྐྱབས་མགོན་ཆེན་པོ་མཆོག་གིས་ཐུགས་གསོ་ཡོད་ཅེས་བཀའ་གནང་འདུག ཐུགས་གསོའི་གསུང་འཕྲིན་ནང་ད་དུང་། ས་ཁུལ་འདིར་སྔོན་ཆད་ཀྱང་གོད་ཆག་འདྲ་མིན་བྱུང་མྱོང་ཡོད་པས། དེ་དག་ནི་རྒྱུ་རྐྱེན་གཏིང་ཟབ་མོ་ཞིག་ཡོད་དེ་གནམ་གཤིས་འགྱུར་ལྡོག་གམ་ཡང་ན་རྒྱུ་རྐྱེན་གཞན་དག་བཅས་རྟགས་མཚན་ངེས་ཏན་ཞིག་ཡོད་པར་གཟིགས་ཀྱི་ཡོད་པས། མ་འོངས་པར་འདི་འདྲའི་གོད་ཆག་ཡང་བསྐྱར་མི་འབྱུང་བའི་འོས་འཚམས་ཀྱི་ཐབས་ལམ་ཇི་ཡོད་རྣམས་གང་ཐུབ་ཅི་ཐུབ་ཀྱིས་སྤེལ་ཐུབ་པར་ཐུགས་རེ་གནང་གི་ཡོད་ཅེས་བཀའ་སློབ་ཕེབས་འདུག བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག (CTA) སྲིད་སྐྱོང་སྤེན་པ་ཚེ་རིང་ལགས་ཀྱིས་ཐུགས་གསོ་གནང་པ། དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་ལགས་ཀྱིས་ X དྲ་རྒྱའི་ཐོག་ནས། བོད་དང་བལ་ཡུལ་ས་མཚམས་སུ་གློ་བུར་ཆུ་ལོག་དང་འདམ་རུད་ཀྱི་གནོད་འཚེ་བྱུང་བར་བློ་ཕམ་ཆེན་པོ་བྱུང་ཞེས་དང་། བོད་ཀྱི་གཞིས་རྩེ་གྲོང་ཁྱེར་ཁོངས་ཀྱི་སྐྱིད་གྲོང་དང་བལ་ཡུལ་ནང་མི་ཤི་རྨས་དང་གནོད་འཚེ་ཚབས་ཆེན་བྱུང་བ་མ་ཟད། ད་དུང་མི་བརྒྱ་ཕྲག་ཁ་ཤས་ག་སོང་ཆ་མེད་དུ་སོང་བའི་གནས་ཚུལ་དེ་ནི་ཡིད་སྐྱོ་དགོས་པ་ཞིག་རེད་ཅེས་གསུངས་འདུག་ལ། ཁོང་གིས་དབུས་བོད་མིའི་སྒྲིག་འཛུགས་དང་བོད་མིའི་ཚབ་ཞུས་ཏེ། འདས་གྲོངས་སུ་སོང་བའི་ནང་མི་དང་། དེ་བཞིན་གནོད་འཚེ་ཕོག་པའི་མང་ཚོགས་ཚང་མར་སེམས་གསོ་དང་། གར་སོང་ཆ་མེད་དུ་གྱུར་པ་རྣམས་བདེ་འཇགས་ཡོང་བར་སྨོན་ལམ་ཞུས་གནང་འདུག རྡ་སར་མཆོད་འབུལ་སྨོན་ལམ་ཚོགས་པ། བོད་མིའི་སྒྲིག་འཛུགས་ཀྱིས། བལ་བོད་ས་མཚམས་སུ་འཕྲད་པའི་གོད་ཆག་ནི་རྒྱ་ནག་གཞུང་གིས་བོད་ཀྱི་ཁོར་ཡུག་ལ་གཏོར་སྐྱོན་དང་འཛུགས་སྐྲུན་བསྟུད་མར་བྱས་རྐྱེན་ཡིན་ཞིང་། བོད་ཀྱི་གནོད་ཐེབས་ས་ཁུལ་གྱི་གནས་སྟངས་ཐད་རྒྱ་གཞུང་གིས་ཕྱི་གསལ་ནང་གསལ་བྱེད་ཀྱི་མེད་པ་གསུངས་སོང་། བལ་བོད་ས་མཚམས་སུ་འདམ་རུད་འོག་ཚེ་སྲོག་ཤོར་བ་རྣམས་ཀྱི་ཆེད་བཞུགས་སྒར་རྡ་རམ་ས་ལར་མཆོད་འབུལ་གནང་ཞིང་། སྲིད་སྐྱོང་མཆོག་གིས་ས་གནས་བོད་མིའི་གནས་སྟངས་ངོ་སྤྲོད་གནང་པ། ཕྱི་ལོ་ ༢༠༢༦ ཟླ་ ༨ ཚེས་ ༢༦ ཉིན་བོད་ཀྱི་སྐྱིད་གྲོང་དང་བལ་ཡུལ་གྱི་ར་སུ་བ་ས་ཁུལ་གྱི་ས་མཚམས་ཁུལ་དུ་གློ་བུར་འདམ་རུད་དང་ཆུ་རུད་ཚབས་ཆེན་བྱུང་སྟེ། མི་རྒྱུ་གཉིས་ལ་གོད་ཆག་བྱུང་བ་དང་འབྲེལ་གདུང་སེམས་མཉམ་སྐྱེད་དང་མྱ་ངན་མཚོན་ཚེད་བཞུགས་སྒར་རྡ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་བོད་མིའི་སྒྲིག་འཛུགས་ཀྱིས་གཞུང་འབྲེལ་མཆོད་འབུལ་སྨོན་ལམ་ཞིག་གོ་སྒྲིག་གནང་སྟེ། སྐབས་དེར་སྲིད་སྐྱོང་སྤེན་པ་ཚེ་རིང་ལགས་ཀྱིས། བལ་ཡུལ་ཤ་ལྦ་ར་གསུམ་ས་གནས་འགོ་འཛིན་ཁྱབ་ཁོངས། ཤབ་རུ་གཞིས་ཆགས་དང་། ཉེ་འགྲམ་ཤབ་རུ་ཁྲོམ། སྐྱིད་གྲོང་ས་མཚམས་ཀྲི་མུ་རེ་སོགས་སུ་ཐེངས་འདིར་ཚབས་ཆེའི་ཆུ་རུད་ཀྱི་གནོད་ཐེབས་ཚད་ཆེ་ཤོས་ཡིན་པ་བལ་ཡུལ་གཞུང་གིས་ངོས་འཛིན་བྱས་ཡོད་པ་འགྲེལ་བརྗོད་གནང་བ་དང་སྦྲགས། ཁུལ་དེའི་བོད་མི་ཁ་འཐོར་འདུ་གནས་ལྔ་སྟེ། ༡། ར་སུ་བ་དགེ་རྒྱས་གླིང་གཞིས་ཆགས་ཀྱི་ཁྱིམ་ཚང་ ༡༡ ཆ་ཚང་ཆུས་བསྣུབས་ཏེ། དེར་གནས་སྡོད་བྱེད་མཁན་རྒན་རྒོན་གཉིས་གར་སོང་ཆ་མེད་དང་། ཤབ་རུ་ཁྲོམ་ཆ་ཚང་ཆུས་འཁྱེར་ཏེ་དེར་གནས་སྡོད་བྱེད་མཁན་ཁང་ཁྱིམ་ ༢ ལས་གཅིག་ནས་མི་ ༡ འདས་གྲོངས་དང་། ཁྱིམ་ཚང་གཞན་དེ་ནས་མི་གྲངས་ ༣ གར་སོང་ཆ་མེད། ༢) ཏི་མུ་རེ་ས་གནས་སུ་བོད་མིའི་ཁྱིམ་ཚང་ ༢ ལ་མི་གྲངས་ ༦ ཡོད་པ་གར་སོང་ཆ་མེད་དུ་གྱུར་འདུག ༣) ཐང་པོ་ཆེ་དང་། ༤) ཁང་ཅིམ། ༥) བི་རི་ཐིམ་བཅས་ས་ཁག་གསུམ་དུ་ཁྱིམ་ཚང་ ༦ ཡོད་པ་དེ་དག་ས་མཐོ་སར་ཆགས་ཡོད་པས་གནོད་སྐྱོན་བྱུང་མེད་པ་གསུངས་སོང་། མ་ཟད་ཁོང་གིས་འདི་ཚེས་ ༢༧ ཉིན་གྱི་སྔ་དྲོར་བོད་མི་དྲུག་བལ་ཡུལ་གཞུང་གིས་མྱུར་སྐྱོབ་ཐུབ་པའི་གནས་ཚུལ་ཐོན་འདུག་ཅེས་གསུངས་བྱུང་། གཞན་ཡང་སྲིད་སྐྱོང་མཆོག་གིས། ཐེངས་འདིའི་བལ་བོད་ས་མཚམས་སུ་ཆུ་རུད་སོགས་ཀྱི་གནོད་སྐྱོན་བྱུང་བཞིན་པ་ནི་རྒྱ་ནག་གཞུང་གིས་བོད་ནང་ཚད་ལས་བརྒལ་བའི་འཛུགས་སྐྲུན་ལ་བརྟེན་ནས་ཡིན་ཞིང་། ད་ཆ་རྒྱ་གཞུང་གི་དམ་བསྒྲགས་འོག་སྐྱིད་གྲོང་ཁུལ་དུ་གནས་ཚུལ་ཤེས་རྟོགས་དཀའ་བར་གྱུར་ཡོད་པའི་ཐད་སེམས་ཚབས་གསལ་སྟོན་གནང་གི་འདུག་ལ། འབྲེལ་ཡོད་སྡེ་ཁག་ལ་གནོད་ཐེབས་ས་ཁུལ་དུ་གཟིགས་ཞིབ་ཏུ་ཕེབས་དགོས་པའི་བཀའ་མངགས་ཞུས་པ་ཡིན་ཞེས་གསུང་གི་འདུག ཁོར་ཡུག་ཉམས་ཞིབ་པའི་དབྱེ་ཞིབ། རྒྱལ་སྤྱིའི་བོད་དོན་དྲ་བའི་ཁོར་ཡུག་ཉམས་ཞིབ་པ་བགྲེས་པ་བློ་བཟང་དབྱངས་མཚོ་ལགས་ཀྱིས་བོད་ནི་ས་བབ་ཀྱི་ཆ་ནས་ས་ཡོམ་དང་ཆུ་ལོག་སོགས་བྱུང་སླ་བའི་ས་ཁུལ་དུ་རྒྱ་ནག་གཞུང་གིས་འཛུགས་སྐྲུན་ལ་སྐྱོན་བརྗོད་གནང་གི་འདུག་ལ། ད་ཆ་བོད་ནང་ནས་རྐྱེན་འདས་དང་གར་སོང་ཆ་མེད་དུ་སོང་བའི་གནས་ཚུལ་རྣམས་ཕྱི་གསལ་ནང་གསལ་གྱིས་ཕྱིར་བསྒྲགས་མི་བྱེད་པར་རྒྱ་ནག་གཞུང་ལ་སྐྱོན་བརྗོད་གནང་སོང་། འདས་གྲོངས་དང་གར་སོང་མེད་པའི་གནས་སྟངས། (༢༠༢༦།༠༨།༢༧) འདི་ཚེས་ ༢༧ ཉིན་རོ་ཊར་གསར་ཁང་གིས་སྤེལ་བའི་གནས་ཚུལ་ནང་། ས་རུད་ཀྱི་གོད་ཆགས་དེའི་རྐྱེན་པས་ད་ལྟའི་ཆར་བལ་ཡུལ་ནས་མི་ ༡༥༧ ལྷག་འདས་གྲོངས་དང་། ༨༢༦ ཙམ་གར་སོང་ཆ་མེད་དུ་གྱུར་ཡོད་པའི་ནང་ནས་ཉུང་མཐར་ ༣༤༠ ནི་ཕྱི་རྒྱལ་མི་སེར་ཡིན་འདུག་ཅིང་། དེ་འབྲེལ་བལ་ཡུལ་ཉེན་རྟོག་པའི་མགྲིན་ཚབ་པ་ཞིག་གིས། ད་ཆ་ཉེན་སྐྱོབ་རུ་ཁག་གིས་ཁུལ་དེར་མི་སྣ་འཚོལ་ཞིབ་བྱེད་བཞིན་པ་དང་བསྟུན། གར་སོང་ཆ་མེད་དང་འདས་གྲོངས་སུ་གྱུར་བའི་གྲངས་འབོར་མང་དུ་འགྲོ་རྒྱུའི་ཚོད་དཔག་གནང་གི་ཡོད་པ་བརྗོད་འདུག རྒྱ་ནག་གཞུང་འབྲེལ་བརྒྱུད་ལམ་ཁག་ཏུ་བོད་ཀྱི་སྐྱིད་གྲོང་ཕྱོགས་སུ་ཡང་གནོད་འཚེ་ཚབས་ཆེན་བྱུང་བའི་གྲངས་ཐོ་ལྟར་ན། མི་ ༣ འདས་གྲོངས་དང་། མི་ ༥༥༨ གར་སོང་ཆ་མེད་དུ་སོང་ཡོད་ཅིང་། དེའི་ནང་ནས་ ༢༦༠ ཕྱི་རྒྱལ་བ་ཡིན་པ་བརྗོད་འདུག ཁ་སྣོན།ཿ རྡ་སར་མཆོད་འབུལ་དང་ས་གནས་ཀྱི་གནས་ཚུལ་ཁག་ཁ་སྣོན་ཞུས། བརྙན་པར་སྒྲིག་སྦྱོར་བ། བསྟན་འཛིན་དོན་ཡོད།

RFA Tibetan རྒྱ་དཀར་ནག

སྐྱིད་གྲོང་དང་བལ་ཡུལ་ས་མཚམས་སུ་འདམ་རུད་དང་ཆུ་རུད་ཚབས་ཆེན་བྱུང་ནས་ཉུང་མཐར་མི་ ༣ རྐྱེན་འདས་སོང་པ་དང་མི་ ༢༦༥ ལྷག་གར་སོང་ཆ་མེད་དུ་སོང་འདུག་ཅིང་། བལ་ཡུལ་ར་སུ་བའི་དགེ་རྒྱས་གླིང་བོད་མིའི་གཞིས་ཆགས་ཀྱི་བོད་མི་གཅིག་ཆུས་འཁྱེར་པ་དང་ཁང་པ་ ༡༡ ལ་གནོད་འཚེ་ཕོག་འདུག་ལ། བོད་མི་མང་པོ་ཞིག་ལ་འབྲེལ་བ་བྱེད་མ་ཐུབ་པར་ལུས་འདུག ཕྱི་ལོ་ ༢༠༢༦ ཟླ་ ༨ ཚེས་ ༢༦ ཉིན་བོད་ཀྱི་སྐྱིད་གྲོང་དང་བལ་ཡུལ་གྱི་ར་སུ་བ་ས་ཁུལ་གྱི་ས་མཚམས་རྒྱུད་དུ་འདམ་རུད་དང་གློ་བུར་ཆུ་རུད་ཚབས་ཆེན་བྱུང་སྟེ། ཁང་པ་དང་གཞུང་ལམ། ཟམ་པ། གློག་ཤུགས་ལས་གཞི་སོགས་གཏོར་བཤིག་ཚབས་ཆེན་བྱུང་འདུག བལ་ཡུལ་ཕྱོགས་སུ་ཤི་རྐྱེན་ཚབས་ཆེན་བྱུང་ཞིང་། ད་ལྟ་བར་མི་ ༩༥ འདས་གྲོངས་སུ་སོང་བ་དང་། ཡུལ་སྐོར་བ་དང་གནས་མཇལ་བ་བརྒྱ་ཕྲག་མང་པོ་ད་དུང་འབྲེལ་བ་བྱེད་མི་ཐུབ་པར་ལུས་འདུག་ལ། ཤི་རྨས་དང་གར་སོང་ཆ་མེད་ཀྱི་གྲངས་ཐོ་མུ་མཐུད་ཕར་བཞིན་ཡོད་པ་རོའི་ཊརསི་གསར་སྤེལ་ཁང་གིས་གནས་ཚུལ་ནང་བཀོད་འདུག བལ་ཡུལ་ར་སུ་བའི་དགེ་རྒྱས་གླིང་བོད་མིའི་གཞིས་ཆགས་ཀྱི་བོད་མི་གཅིག་ཆུས་འཁྱེར་པ་དང་ཁང་པ་ ༡༡ ལ་གནོད་འཚེ་ཕོག་འདུག ས་མཚམས་ཉེ་འགྲམ་གྱི་ཊི་མུ་རེ་(Timure) ས་ཁུལ་དུ་བོད་རིགས་དུད་ཚང་ལྔའི་ཁང་པ་དང་རྒྱུ་ནོར་ཆུས་འཁྱེར་བ་དང་། དུད་ཚང་གཉིས་ཀྱི་བོད་མི་ཁག་ཅིག་དང་ད་དུང་འབྲེལ་བ་ཐུབ་མེད་པར་གནས་ཡོད་འདུག་ལ། དུད་ཚང་གཞན་གསུམ་གྱི་མི་རྣམས་ཉེ་འགྲམ་གྱི་རི་སྒང་དུ་བྲོས་ཏེ་སྲོག་ཉེན་ལས་ཐར་ཡོད་པའི་སྐོར་བལ་ཡུལ་སྐུ་ཚབ་དོན་གཅོད་ཁང་གིས་གསལ་བཤད་གནང་པ་ཞིག་ཨེ་ཤེ་ཡ་རང་དབང་རླུང་འཕྲིན་ཁང་ལ་ལག་ཐོབ་བྱུང་པའི་ནང་གསལ་འདུག ༢༠༢༦ ལོའི་ཟླ་ ༨ ཚེས་ ༢༦ ཉིན་བོད་ཀྱི་སྐྱིད་གྲོང་ཁུལ་དུ་འདམ་རུད་དང་ཆུ་རུད་ཀྱི་གནོད་འཚེ་བྱུང་སྐབས། (མི་སེར་གྱི་འདྲ་པར།) དེ་བཞིན་ར་སུ་བའི་དགེ་རྒྱས་གླིང་བོད་མིའི་གཞིས་ཆགས་སུ་ཁང་པ་ ༡༡ དང་ཉེ་འཁོར་གྱི་ས་ཁུལ་ཆུས་བསྣུབས་ཏེ་གནོད་འཚེ་ཚབས་ཆེན་ཕོག་ཡོད་པ་དང་། གཞིས་ཆགས་དེའི་མི་ཁག་ཅིག་གི་གནས་སྟངས་ད་དུང་ཁ་གསལ་མེད་པར་གནས་འདུག ཤབ་རུ་ཁྲོམ་ཁུལ་དུ་བོད་རིགས་གཞོན་སྐྱེས་ཤིག་ཆུས་འཁྱེར་ཡོད་པའང་ངོ་ཤེས་མི་སྣས་བརྗོད་ཡོད་པ་དང་། བལ་ཡུལ་ཕྱོགས་སུ་ད་བར་མི་ ༦༩ ཡི་ཕུང་པོ་རྙེད་འདུག་ལ། ད་དུང་མི་མང་པོ་གར་སོང་ཆ་མེད་དུ་གྱུར་པ་དང་། ཐད་འཕུར་གནམ་གྲུ་བརྒྱུད་མི་ ༢༥༠ ལྷག་ཉེན་སྐྱོབ་བྱས་ཡོད་འདུག སྐྱིད་གྲོང་རྫོང་སྲིད་གཞུང་གི་ལས་བྱེད་པས། གནོད་འཚེ་ཕོག་པའི་མི་སྣའི་ནང་མིར་སེམས་གསོ་བྱེད་ཀྱི་ཡོད་ཟེར། སྐྱིད་གྲོང་འགག་སྒོ་ནི་བོད་དང་བལ་ཡུལ་གྱི་ས་མཚམས་སུ་གནས་ཤིང་། བོད་ནས་བལ་ཡུལ་དུ་སྐྱོད་པའི་སྐམ་སའི་ལམ་གལ་ཆེ་ཞིག་ཆགས་ཡོད། གནོད་འཚེ་བྱུང་པའི་སྐབས་སུ། ས་གནས་ཀྱི་གྲོང་མི་ཕུད། ད་དུང་འགག་སྒོའི་ལས་བྱེད་མི་སྣ་དང་། དོས་པོ་སྐྱེལ་མཁན། ཨར་ལས་བྱེད་མཁན། ཚོང་པ། དེ་བཞིན་ཕྱི་རྒྱལ་ཡུལ་སྐོར་བ་བཅས་ཡོད། ད་ལྟའི་ཆར་གར་སོང་ཆ་མེད་དུ་གྱུར་བའི་མི་སྣ་འདི་རྣམས་ཀྱི་ཞིབ་ཕྲའི་གནས་ཚུལ་གསལ་བསྒྲགས་བྱས་མེད། རྒྱ་ནག་ཕྱོགས་ནས་མེ་གསོད་རུ་ཁག་དང་། ཨར་ལས་མྱུར་སྐྱོབ། དམག་དཔུང་བཅས་ཀྱི་སྟོབས་ཤུགས་གནོད་འཚེ་ཕོག་ཡུལ་དུ་མངགས་གཏོང་བྱས་ནས་འཚོལ་ཞིབ་དང་མྱུར་སྐྱོབ་ཀྱི་ལས་དོན་ནང་མཉམ་ཞུགས་བྱས་འདུག ཨེ་ཤེ་ཡ་རང་དབང་རླུང་འཕྲིན་ཁང་གི་རྒྱ་སྐད་ཚན་པའི་གསར་འགོད་པས་ཚེས་ ༢༧ གྱི་ཕྱི་དྲོའི་ཆུ་ཚོད་༢ དང་སྐར་མ་༣༠ ཐོག་ སྐྱིད་གྲོང་རྫོང་མི་དམངས་སྲིད་གཞུང་གི་གཞུང་ལས་ཁང་ལ་ཁ་པར་བཏང་སྐབས། ཁ་པར་ལེན་མཁན་བོད་རིགས་ལས་བྱེད་ཅིག་གིས། རྫོང་སྲིད་གཞུང་གི་གཞུང་ལས་ཁང་ནས་གནོད་འཚེ་ཕོག་ཡུལ་གྱི་གནས་ཚུལ་ཐད་ཀར་ཤེས་རྟོགས་མེད། མིག་སྔའི་ཆར་ཤེས་རྟོགས་བྱུང་པའི་གནས་ཚུལ་བྱུང་ཁུངས་གཙོ་བོ་འདི་མདུན་ཕྱོགས་ཀྱི་བཀོད་འདོམས་ཁང་ནས་ཡིན་པ་མ་ཟད། ད་དུང་གནས་ཚུལ་ཚང་མ་གཅིག་གྱུར་ཐོག་ནས་རྒྱ་ཁྱབ་ཏུ་སྤེལ་བའི་གནས་ཚུལ་གཞི་བཟུང་བྱ་དགོས་ཀྱི་ཡོད་པ་བརྗོད་བྱུང་། གསར་འགོད་པ། ད་ལྟ་གནོད་འཚེ་ཕོག་པའི་སྐོར་གྱི་གནས་ཚུལ་གསར་པ་གང་ཡོད་དམ། ལས་བྱེད། ད་ལྟའི་ཆར་གནས་ཚུལ་གསར་པ་ནི་དེ་རིང་ཞོགས་པར་གསལ་བསྒྲགས་བྱས་པ་དེ་རེད། གང་ཡིན་ཞེ་ན། ང་ཚོའི་འདི་ནས་གནས་ཚུལ་ཤེས་རྟོགས་ཐུབ་ཀྱི་མ་རེད། ཚང་མ་མདུན་ཕྱོགས་ཀྱི་བཀོད་འདོམས་ཁང་ནས་གཅིག་གྱུར་ངང་སྤེལ་བའི་གནས་ཚུལ་ལ་གཞི་བཞག་དགོས་ཀྱི་ཡོད། གསར་འགོད་པ། གོ་ཐོས་ལ་རྒྱལ་སྲིད་སྤྱི་ཁྱབ་ཁང་གི་སྲིད་བློན་གཞོན་པ་ཀྲང་གོ་ཆིང་ས་གནས་སུ་འབྱོར་ཟིན་ཡོད་ས་རེད། ལས་བྱེད། ད་ལྟ་རྫོང་གྲོང་ལ་འབྱོར་མི་འདུག མགྱོགས་པོ་འབྱོར་གྱི་ཡོད་ས་རེད། རྫོང་གྲོང་ནས་གནོད་འཚེ་ཕོག་ཡུལ་ས་གནས་བར་ད་དུང་ཆུ་ཚོད་གཉིས་ཙམ་འགོར་གྱི་རེད། ཆུ་ཚོད་གཉིས་ཟིན་མ་ཟིན་གྱི་ལམ་ཐག་རེད། གསར་འགོད་པ། ད་ལྟ་སྐྱིད་གྲོང་འགག་སྒོར་གནོད་འཚེ་ཕོག་ཚད་ཀྱི་གནས་སྟངས་གང་འདྲ་ཡིན་ནམ། ལས་བྱེད། དེ་གསལ་པོ་ཤེས་མ་སོང་། གང་ཡིན་ཞེ་ན། ང་ཚོ་ད་ལྟ་ས་གནས་རང་ལ་སླེབས་མེད། ང་ཚོས་ཀྱང་གཞུང་ཕྱོགས་ཀྱི་གནས་ཚུལ་ལ་ལྟ་བཞིན་ཡོད། དེ་རིང་གི་གནས་ཚུལ་ཡོངས་རྫོགས་གཞུང་ཕྱོགས་ནས་སྤེལ་བའི་གནས་ཚུལ་ལ་གཞི་འཛིན་གྱི་ཡོད། གསར་འགོད་པ། རྫོང་ནང་ད་ལྟ་ལས་ཀ་གཙོ་བོ་གང་བྱེད་ཀྱི་ཡོད་དམ། ལས་བྱེད། གཙོ་བོ་གནོད་འཚེ་ཕོག་པའི་ནང་མི་ཚོར་སེམས་གསོ་བྱེད་རྒྱུ་དེ་རེད། གསར་འགོད་པ། གར་སོང་ཆ་མེད་དུ་གྱུར་བའི་མི་སྣའི་ནང་མི་མང་ཆེ་བ་བོད་རིགས་རེད་དམ། ལས་བྱེད། བོད་རིགས་ཀྱང་ཡོད། རྒྱ་རིགས་ཀྱང་ཡོད། ཧ་ལམ་འདྲ་པོ་རེད། གཉིས་ཀ་ཡོད་རེད། བལ་བོད་ས་མཚམས་སུ་གནོད་འཚེ། བལ་ཡུལ་ཡུལ་སྐོར་ལས་ཁུངས་ཀྱིས་ཐོག་མའི་གནས་ཚུལ་ནང་། ས་ཁུལ་དེར་སྐྱོད་མཁན་ཡུལ་སྐོར་བ་ ༣༨༤ ཡོད་པ་དེ་དག་དང་འབྲེལ་བ་ཆད་པ་དང་། དེའི་ནང་ཕྱི་རྒྱལ་བ་ ༢༩༡ ཚུད་ཡོད་ཅིང་། དེའི་ཁོངས་རྒྱ་གར་དང་། ཨ་རི། དབྱིན་ཡུལ། ཨོསི་ཊརེ་ལི་ཡ་སོགས་རྒྱལ་ཁབ་མང་པོའི་མི་སྣ་འདུག་ལ། ཁག་ཅིག་གངས་རིན་པོ་ཆེ་དང་མ་ཕམ་གཡུ་མཚོར་གནས་མཇལ་དུ་སྐྱོད་མཁན་ཡིན་འདུག ཡང་བོད་ཀྱི་སྐྱིད་གྲོང་ཕྱོགས་སུ་ཡང་གནོད་འཚེ་ཚབས་ཆེན་བྱུང་བ་དང་། ཐོག་མའི་གྲངས་ཐོ་ལྟར་ན། མི་༣ འདས་གྲོངས་དང་། མི་༢༦༥ གར་སོང་ཆ་མེད་དུ་སོང་ཡོད་ཅིང་། གྲངས་ཐོ་འདི་ད་དུང་མཐའ་མའི་གཏན་འཁེལ་བྱས་པ་མིན་སྐོར་བརྗོད་ཡོད། ཤེས་རྟོགས་བྱུང་བར་གཞིགས་ན། སྐྱིད་གྲོང་ཕྱོགས་སུ་སྐྱོད་སའི་ལམ་དང་། འཕྲིན་གཏོང་། གློག་ཤུགས་བཅས་ཆད་ཡོད་པས། ས་གནས་མི་མང་པོའི་གནས་སྟངས་ད་དུང་ཁ་གསལ་མེད་པར་གྱུར་འདུག ས་གནས་མིས་བརྗོད་པར། སྐྱིད་གྲོང་དང་ས་མཚམས་ཁུལ་དུ་དེའི་སྔོན་ལ་ས་རུད་དང་ཆུ་རུད། འདམ་རུད་བྱུང་མྱོང་ཡོད་ཀྱང་། ད་རེས་ཀྱི་གནོད་འཚེ་འདི་དེ་སྔོན་དང་བསྡུར་ན་ཚབས་ཆེ་ཤོས་ཤིག་ཡིན་པ་བརྗོད་འདུག བོད་ཀྱི་སྐྲིད་གྲོང་ཁུལ་དུ་འདམ་རུད་དང་ཆུ་རུད་ཀྱི་གནོད་འཚེ་བྱུང་སྐབས། (Xinhua) ད་ལྟ་གནོད་འཚེ་འདིའི་རྒྱུ་རྐྱེན་ཁ་གསལ་བརྗོད་མེད་རུང་། བལ་ཡུལ་གྱི་གནོད་འཚེ་དོ་དམ་ལས་ཁུངས་ཀྱིས་འཁོར་སྐར་པར་རིས་ལ་དཔྱད་ཞིབ་བྱས་པར། གངས་དང་རྡོ་རི་ཉིལ་ཏེ་(སྒྲ་སྒྱུར་ - ལྷན་སྡེ་ Lhende) ཆུ་བོར་ཟགས་པ་ལས་འདམ་དང་རྡོ་འདྲེས་པའི་ཆུ་རུད་ཚབས་ཆེན་བྱུང་བའི་ཚོད་དཔག་བྱས་འདུག དེ་མིན་གནོད་འཚེ་མ་བྱུང་གོང་བལ་ཡུལ་གྱི་ཀོ་ཌ་རིའི་བྱང་ནུབ་ཏུ་རྒྱང་ཐག་ཀི་ལོ་མི་ཊར་ ༧༧ སར་ས་ཡོམ་འགུལ་ཚད་ ༤.༤ ཙམ་ཞིག་བྱུང་ཡོད་པ་ཨ་རིའི་ས་གཞི་དཔྱད་རིག་སྡེ་ཚན་གྱིས་ཟིན་ཐོར་བཀོད་འདུག འོན་ཀྱང་ས་ཡོམ་དེ་དང་གནོད་འཚེའི་བར་ཐད་ཀར་འབྲེལ་བ་ཡོད་མེད་དང་བོད་ནང་ཆུ་རགས་སོགས་ཀྱི་འཛུགས་སྐྲུན་བྱེད་བཞིན་པའི་ས་ཚིགས་ཁག་དང་འབྲེལ་བ་ཡོད་མེད་ར་སྤྲོད་ཐུབ་ཀྱི་མི་འདུག་པས། མུ་མཐུད་རྩད་གཅོད་ཞུ་མུས་ཡིན། དེ་བཞིན་ས་ཁམས་དང་ཁོར་ཡུག་ཆེད་མཁས་པས། ཆུ་བོའི་གོང་རྒྱུད་དུ་ད་དུང་གངས་རྡོ་དང་འདམ་གྱིས་ཆུ་ལམ་བཀག་ཡོད་སྲིད་པས། ཆུ་རུད་ཐེངས་གཉིས་པ་བྱུང་སྲིད་པའི་ཉེན་ཁ་ཡོད་པའི་ཉེན་བརྡ་བཏང་ཡོད་པ་དང་། བལ་ཡུལ་གྱི་གནོད་འཚེ་ཕོག་ཡུལ་ཁག་ཅིག་ཏུ་ཆུའི་ཚད་གཞི་མཐོ་བས་མྱུར་སྐྱོབ་གནམ་གྲུ་ཡང་འབབ་མ་ཐུབ་པའི་གནས་སྟངས་བྱུང་འདུག གནོད་འཚེ་འདི་ནི་སྐྱིད་གྲོང་དང་བལ་ཡུལ་བར་གྱི་ཚོང་ལམ་དང་གནས་མཇལ་གྱི་ལམ་ཁ་གལ་ཆེན་ཞིག་ཏུ་བྱུང་ཡོད་པས། མི་ཤི་རྨས་ཀྱི་གྲངས་ཐོ་དང། བོད་དང་བལ་ཡུལ་བར་གྱི་འགྲིམ་འགྲུལ་སྐྱེལ་འདྲེན་དང་། ཚོང་འབྲེལ། གངས་རིན་པོ་ཆེའི་གནས་མཇལ་བཅས་ལ་ཡང་ཤུགས་རྐྱེན་ཆེན་པོ་ཕོག་སྲིད་པ་རེད། རྒྱ་ནག་གཞུང་འབྲེལ་གྱི་བརྒྱུད་ལམ་ཁག་ནང་གཞུང་གིས་མྱུར་སྐྱོབ་མི་སྣ་དང་དཔོན་རིགས་ཀྱི་བཀོད་ཁབྱ་སོགས་གཙོ་བོ་བྱས་ཏེ་གནས་ཚུལ་སྤེལ་བ་ལས། སྤྱི་ཚོགས་དྲ་ལམ་ཐོག་འབྲེལ་ཡོད་ཀྱི་གནས་ཚུལ་བཞག་པ་མང་པོ་མེད་པ་བཟོས་ཤིང་། གཞུང་འབྲེལ་གྱི་བརྒྱུད་ལམ་ཐོག་ནས་མྱུར་སྐྱོབ་ཀྱི་གནས་ཚུལ་གཙོ་བོ་བྱས་ཏེ་སྤེལ་བཞིན་ཡོད་འདུག ཆུ་ལོག་དང་འདམ་རུད་ཀྱི་འབྱུང་རྐྱེན་ཐད་དབྱེ་ཞིབ། ཡོ་རོབ་ནེ་དྷར་ལེནཌི་ཡི་ Utrecht གཙུག་ལག་སློབ་ཆེན་གྱི་ས་ཁམས་དངོས་ཀྱི་ཉམས་ཞིབ་སྡེ་ཚན་ནང་འབུམ་རམས་པའི་ཉམས་ཞིབ་སློབ་གཉེར་གནང་བཞིན་ཡོད་པ་དང་དེ་སྔ་ལོ་བརྒྱད་རིང་བལ་ཡུལ་ནང་དུ་ཧི་མ་ལ་ཡའི་གངས་དང་འཁྱགས་རོམ་གྱི་ཁོར་ཡུག་ལ་ཉམས་ཞིབ་དང་། ས་གནས་སུ་དངོས་སུ་ཚད་འཇལ་དང་རྟོག་ཞིབ། གྲངས་ཐོག་དཔེ་དབྱིབས་བཟོ་བའི་ཕྱག་ལས་གནང་མྱོང་བ་ཤར་པ་བསྟན་འཛིན་ཆོས་རྒྱལ་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ་ཡིག་ཐོག་ནས་གསལ་བཤད་གནང་པར་གཞིགས་ན། རྟགས་མཚན་ཁག་ཏུ་བྲག་དང་འཁྱགས་རྡོ་ཆེན་པོ་དེ་འདྲ་ཉིལ་བ་ཞིག་བསྟན་གྱི་ཡོད་དུས། འཁྱགས་རྡོ་ཆེན་པོ་ཉིལ་བའི་གངས་རུད་ཅེས་ཟབ་ནན་གྱིས་ཚིག་འདི་སྤྱོད་རྒྱུའི་གདམ་ཁ་བྱེད་རྒྱུ་ལས། ཞིབ་འཇུག་ཡག་པོ་ཞིག་མ་བྱུང་གི་བར་དུ་འཁྱགས་རོམ་ཉིལ་བ་ཞེས་འབོད་འདོད་མི་འདུག་ཅེས་དང་། འདི་ནས་ག་རེ་གསལ་པོ་ཆགས་ཀྱི་འདུག་ཟེར་ན། འདི་ནི་རྒྱུན་ལྡན་གྱི་གཙང་པོར་ཆུ་ལོག་རྒྱུག་པ་གཅིག་པུ་མིན་པར་བྲག་རྡོ་དང་འཁྱགས་པ་ཉིལ་ཏེ་ཆུ་རྒྱུན་དུ་ཟགས་ཏེ་ཚད་ལས་བརྒལ་བའི་ཆུས་འདེད་པའི་ས་དང་རྡོ་མང་པོ་ཞིག་ཡུལ་གཤོངས་སུ་འཁྱེར་ཡོད་བ་འདི་གསལ་པོ་མངོན་རྒྱུ་ཡོད་ཅེས་འགྲེལ་བཤད་གནང་བྱུང་། སྲིད་སྐྱོང་སྤེན་པ་ཚེ་རིང་ལགས་ཀྱིས་ཐུགས་གསོ་གནང་པ། དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་ལགས་ཀྱིས། བོད་དང་བལ་ཡུལ་ས་མཚམས་སུ་གློ་བུར་ཆུ་ལོག་དང་འདམ་རུད་ཀྱི་གནོད་འཚེ་བྱུང་བར་བློ་ཕམ་ཆེན་པོ་བྱུང་ཞེས་དང་། བོད་ཀྱི་གཞིས་རྩེ་གྲོང་ཁྱེར་ཁོངས་ཀྱི་སྐྱིད་གྲོང་དང་བལ་ཡུལ་ནང་མི་ཤི་རྨས་དང་གནོད་འཚེ་ཚབས་ཆེན་བྱུང་བ་མ་ཟད། ད་དུང་མི་བརྒྱ་ཕྲག་ཁ་ཤས་ག་སོང་ཆ་མེད་དུ་སོང་བའི་གནས་ཚུལ་དེ་ནི་ཡིད་སྐྱོ་དགོས་པ་ཞིག་རེད་ཅེས་གསུངས་འདུག་ལ། ཁོང་གིས་དབུས་བོད་མིའི་སྒྲིག་འཛུགས་དང་བོད་མིའི་ཚབ་ཞུས་ཏེ། འདས་གྲོངས་སུ་སོང་བའི་ནང་མི་དང་། དེ་བཞིན་གནོད་འཚེ་ཕོག་པའི་མང་ཚོགས་ཚང་མར་སེམས་གསོ་དང་། གར་སོང་ཆ་མེད་དུ་གྱུར་པ་རྣམས་བདེ་འཇགས་ཡོང་བར་སྨོན་ལམ་ཞུས་གནང་འདུག ཚེས་ ༢༧ ཉིན་བལ་ཡུལ་གྱི་དམག་མིས་མྱུར་སྐྱོབ་བྱེད་བཞིན་པ། (NEPALI ARMY/via REUTERS) ཚེས་ ༢༧ ཉིན་གྱི་ཁ་སྣོན་གནས་ཚུལ། བོད་ཀྱི་སྐྱིད་གྲོང་དང་བལ་ཡུལ་གྱི་ར་སུ་བ་ས་མཚམས་ཁུལ་དུ་ཟླ་༨ ཚེས་༢༦ ཉིན་བྱུང་བའི་འདམ་རྡོ་ཆུ་རུད་ཀྱི་གནོད་འཚེའི་ཁྲོད་ནས་ཤི་རྨས་དང་གར་སོང་ཆ་མེད་ཀྱི་གྲངས་འབོར་མུ་མཐུད་འཕར་བཞིན་འདུག ཚེས་༢༧ ཉིན་བལ་ཡུལ་ཕྱོགས་སུ་ད་བར་མི་༡༥༧ ལྷག་འདས་གྲོངས་སུ་སོང་ཡོད་པ་དང་། མི་༨༢༦ ཙམ་གར་སོང་ཆ་མེད་དུ་གྱུར་ཡོད་པའི་ནང་ཉུང་མཐར་མི་༣༤༠ ཙམ་ཞིག་ཕྱི་རྒྱལ་མི་སྣ་རེད་འདུག ཉེན་སྐྱོབ་རུ་ཁག་གིས་མུ་མཐུད་མི་སྣ་འཚོལ་ཞིབ་བྱེད་བཞིན་པས། ཤི་རྨས་དང་གར་སོང་ཆ་མེད་ཀྱི་གྲངས་འབོར་མུ་མཐུད་འཕར་སྲིད་པ་རོའི་ཊརསི་གསར་ཁང་གིས་བརྗོད་འདུག ཡང་བོད་ཀྱི་སྐྱིད་གྲོང་ཕྱོགས་སུ་གནོད་འཚེ་ཚབས་ཆེན་བྱུང་པའི་ཁྲོད་ནས་མི་༣ འདས་གྲོངས་སུ་སོང་ཡོད་པ་དང་། མི་༥༥༨ གར་སོང་ཆ་མེད་དུ་གྱུར་བའི་ནང་༢༦༠ ཕྱི་རྒྱལ་གྱི་མི་སྣ་ཡིན་པ་རྒྱ་ནག་གཞུང་འབྲེལ་གྱི་བརྒྱུད་ལམ་ཐོག་བརྗོད་འདུག བོད་ནས་ཤེས་རྟོགས་བྱུང་བར་གཞིགས་ན། ༢༠༢༥ ལོར་བོད་ཀྱི་དིང་རི་ཁུལ་དུ་ས་ཡོམ་གྱི་གནོད་འཚེ་བྱུང་སྐབས་བོད་ཀྱི་ས་ཕྱོགས་གང་ས་ནས་མི་སྒེར་གྱི་མྱུར་སྐྱོབ་ལས་དོན་དང་དང་བླངས་ཞབས་ཞུ་གྲུབ་མཁན་ཧ་ཅང་མང་པོ་བྱུང་ཡོད། འོན་ཀྱང་ད་རེས་སྐྱིད་གྲོང་དུ་འདམ་རྡོ་ཆུ་རུད་ཀྱི་བར་ཆད་ཡོང་སྐབས་བོད་མི་སྒེར་མང་པོས་དང་བླངས་མྱུར་སྐྱོར་ལ་སྐྱོད་འདོད་ཧ་ཅང་ཆེན་པོ་བྱུང་ན་ཡང་གཞུང་ཕྱོགས་ནས་སྐྱོད་མི་ཆོག་པ་དང་གལ་ཏེ་སྐྱོད་མཁན་ཡིན་ཚེ། སྙན་ཞུ་ཕུལ་དགོས་པ་བརྗོད་ནས་གཏོང་གི་མི་འདུག་པས། དགོན་པ་ཁག་ལ་སྨོན་ལམ་འདེབས་རྒྱུ་ལས་བྱ་ཐབས་མི་འདུག་ཅེས་བརྗོད་མཁན་བྱུང་། གཞུང་ཕྱོགས་ནས་ཚེས་ ༢༦ ཉིན་སྐྱིད་གྲོང་དུ་འདམ་རྡོ་ཆུ་རུད་ཀྱི་གནོད་འཚེ་བྱུང་པའི་རྗེས་མྱུར་སྐྱོབ་ལས་དོན་གྱི་མོ་ཌ་དང་མི་སྣ་ཕུད་པའི་དེ་མིན་མོ་ཌ་དང་མི་སྣ་སྐྱིད་གྲོང་ཁུལ་དུ་ཉིན་བདུན་རིང་སྐྱོད་མི་ཆོག་པའི་བཀག་སྡོམ་བྱས་འདུག གནོད་འཚེའི་ཁྲོད་བལ་ཡུལ་ནང་གི་བོད་མིའི་གཞིས་ཆགས་ཁག་ལའང་གནོད་སྐྱོན་ཚབས་ཆེན་ཕོག་ཡོད་པས། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་ལགས་ཀྱིས་ཚེས་ ༢༧ ཉིན་གསུངས་པར། ར་སུ་བ་དགེ་རྒྱས་གླིང་གཞིས་ཆགས་ཀྱི་ཁྱིམ་ཚང་༡༡ ཆ་ཚང་ཆུས་བསྣུབས་པ་དང་། རྒན་རྒོན་གཉིས་གར་སོང་ཆ་མེད་དུ་གྱུར་ཡོད་འདུག་ལ། ཤབ་རུ་ཁྲོམ་དུ་བོད་མི་གཅིག་འདས་གྲོངས་དང་གསུམ་གར་སོང་ཆ་མེད་དུ་གྱུར་ཡོད་པ་དང་། ཏི་མུ་རེ་ས་ཁུལ་དུ་བོད་མིའི་ཁྱིམ་ཚང་གཉིས་ཀྱི་མི་དྲུག་གར་སོང་ཆ་མེད་དུ་གྱུར་ཡོད་ཀྱང་། ཚེས་ ༢༧ ཉིན་སྔ་དྲོ་བོད་མི་དྲུག་བལ་ཡུལ་གཞུང་གིས་ཉེན་སྐྱོབ་ཐུབ་ཡོད་པའི་གནས་ཚུལ་ཐོན་སྐོར་ཡང་གསུངས་འདུག བོད་ཀྱི་སྐྱིད་གྲོང་དང་བལ་ཡུལ་ས་མཚམས་སུ་གནོད་འཚེའི་རྐྱེན་པས་འདས་གྲོངས་སུ་སོང་བ་དང་གར་སོང་ཆ་མེད་དུ་གྱུར་བའི་མི་རྣམས་ལ་མྱ་ངན་དང་གདུང་སེམས་མཉམ་སྐྱེད་མཚོན་ཆེད། བོད་མིའི་སྒྲིག་འཛུགས་ཀྱིས་བཞུགས་སྒར་དྷ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་གཞུང་འབྲེལ་མཆོད་འབུལ་སྨོན་ལམ་ཞིག་ཀྱང་འཚོགས་གནང་འདུག གཞན་ཡང་ཚེས་༢༧ ཉིན་རྒྱ་ནག་གི་སྲིད་བློན་ལི་བྱང་སྐྱིད་གྲོང་གི་གནོད་འཚེ་ཕོག་ཡུལ་དུ་སླེབས་ཏེ་གནོད་འཚེའི་གནས་སྟངས་ལ་རྟོག་ཞིབ་བྱས་པ་བརྗོད་འདུག ཁ་སྣོན། སྲིད་སྐྱོང་གི་ཐུགས་གསོ་གནང་པ་ཁ་སྣོན་ཞུས། ༢༠༢༦།༠༨།༢༦ ཕྱེད་ཡོལ་ཆུ་ཚོད་ ༣།༤༠ ཁ་སྣོན། ཚེས་ ༢༧ ཉིན་བོད་ཀྱི་སྐྱིད་གྲོང་དང་བལ་ཡུལ་ཕྱོགས་ཀྱི་གནས་ཚུལ་དང་། ཁྱད་ལས་པའི་དབྱེ་ཞིབ། སྐྱིད་གྲོང་རྫོང་གི་ལས་བྱེད་ལ་བཀའ་དྲི་ཞུས་པ་བཅས་ཁ་སྣོན་ཞུས། ཁ་སྣོན་གསར་འགོད་པ། བདེ་སྐྱིད་ཀུན་སྒྲོལ། སྒྲོལ་དཀར། བཀྲ་དབང་། བརྙན་པར་སྒྲིག་སྦྱོར་བ། ནོར་སྡེ་སྒྲོལ་མ།

RFA Tibetan བོད།

༢༠༢༧ ལོར་རྒྱ་ནག་དམར་ཤོག་གི་ཚོགས་ཆེན་ ༢༡ པ་འདི་ཚོགས་རྒྱུར་གྲ་སྒྲིག་བྱེད་བཞིན་ཡོད་པའི་སྐབས་དེར། རྒྱ་ནག་གཞུང་གིས་བོད་དུ་ཆབ་སྲིད་ཐོག་བསམ་པ་རྣམ་དག་དང་། དམར་ཤོག་ཚོགས་པའི་ལྟ་བ་དང་མཐུན་པ། མི་རིགས་མཉམ་བསྲེས་ཀྱི་སྲིད་ཇུས་ལག་བསྟར་བྱེད་ཐུབ་མཁན་གྱི་མི་རབས་གསར་པའི་འགོ་ཁྲིད་དཔུང་ཁག་ཅིག་གསོ་སྐྱོང་བྱེད་བཞིན་ཡོད་པ་རྒྱལ་སྤྱིའི་བོད་དོན་ལས་འགུལ་ཁང་གིས་ཕྱི་ཟླ་ ༨ ཚེས་ ༡༨ ཉིན་སྙན་ཐོ་ཞིག་བཏོན་ཡོད་པའི་ནང་བཀོད་འདུག གྲངས་ཐོ་ནས་གསལ་བའི་དབང་ཆ། ད་ལྟ་བོད་ནང་གི་དངོས་ཡོད་གནས་སྟངས་ནི། བོད་ཁུལ་གྱི་དམར་ཤོག་ཚོགས་པ་དང་གཞུང་། བདེ་འཇགས། ཁྲིམས་ཁང་སོགས་ཀྱི་ཚན་པའི་ནང་དབང་ཆ་ཡོད་མཁན་ཆེས་མཐོའི་འགོ་ཁྲིད་ཀྱི་གོ་གནས་ ༢༤༠ ཡོད་པའི་ནང་བོད་པ་ ༦༢ ལས་མེད་པ་དེ་བརྒྱ་ཆ་ ༢༥.༨ ལས་ཟིན་གྱི་མེད་པ་དང་། བོད་པ་མ་ཡིན་པ་ ༡༧༨ ཡོད་པ་དེ་བརྒྱ་ཆ་ ༧༤.༢ ཀྱིས་འགོ་ཁྲིད་ཀྱི་གོ་གནས་བཟུང་ཡོད་འདུག་ལ། དེ་བཞིན་བོད་ཁུལ་གྱི་ཞིང་ཆེན་རིམ་པའི་དམར་ཤོག་ཚོགས་པའི་འགོ་ཁྲིད་མཐོ་ཤོས་སུ་ད་བར་བོད་མི་གཅིག་ཀྱང་བསྐོ་བཞག་བྱས་མེད་པ་རེད་ཅེས་སྙན་ཐོའི་ནང་བཀོད་འདུག རྒྱལ་སྤྱིའི་བོད་དོན་ལས་འགུལ་ཁང་གི་ཉམས་ཞིབ་འགན་འཛིན་བུ་ཆུང་ཚེ་རིང་ལགས་ཀྱིས། རྒྱ་ནག་དམར་ཤོག་ཚོགས་པའི་འགྲོ་ལུགས་ཐོག་ལ་བོད་མིར་གོ་གནས་ཡོད་པ་དང་བོད་མིར་ཐག་གཅོད་བྱེད་པའི་དབང་ཆ་ཡོད་པ་འདི་ཁྱད་པར་ཆགས་ཡོད། དམར་ཤོག་ཚོགས་པའི་འགྲོ་ལུགས་ནང་ལ་དམར་ཤོག་གཙོ་བོ་བཟུང་ནས་ཐག་གཅོད་བྱ་རྒྱུའི་ལམ་སྲོལ་ཞིག་ཡོད་པ་རེད། དེར་བརྟེན་གལ་ཏེ་དམར་ཤོག་ཚོགས་པའི་ཐག་གཅོད་བྱེད་མཁན་མཐའ་མ་འདིའི་ནང་བོད་པའི་དབང་ཆ་ཡོད་པ་དེ་འདྲ་ཞིག་མེད་ན། དམར་ཤོག་ཚོགས་པའི་ལག་ལེན་བསྟར་མཁན་འདི་གོ་གནས་ཡོད་མཁན་མི་དེ་ཚོ་ཆགས་ཡོད་ཅེས་གསུངས་བྱུང། བོད་ནང་གི་དཔོན་རིགས་ཀྱི་གྲུབ་ཆ་དང་མི་རིགས་ཀྱི་ཁྱད་པར། (ICT) དེ་སྔའི་འགོ་ཁྲིད་དང་ད་ལྟའི་མི་རབས། སྙན་ཐོའི་ནང་༧ཀུན་གཟིགས་པཎ་ཆེན་སྐུ་ཕྲེང་བཅུ་པ་དང་། ང་ཕོད་ངག་དབང་འཇིགས་མེད། ཕུན་ཚོགས་དབང་རྒྱལ་སོགས་དེ་སྔོན་གྱི་བོད་པའི་འགོ་ཁྲིད་ཁ་ཤས་ཀྱིས་དམར་ཤོག་གི་ལམ་ལུགས་ནང་ནས་བོད་ཀྱི་སྐད་ཡིག རིག་གཞུང་དང་བོད་མིའི་ཁེ་ཕན་ཐད་སྐད་ཆ་བཤད་ཐུབ་པའི་ཁོར་ཡུག་ངེས་ཅན་ཡོད་པ་དབྱེ་ཞིབ་གནང་འདུག ད་ལྟ་ཁོར་ཡུག་འདི་ཆུང་དུ་འགྲོ་བཞིན་ཡོད་པ་འདི་སྲིད་བྱུས་ཀྱི་འགྱུར་བའི་གནད་འགག་ཅིག་ཆགས་ཡོད། བུ་ཆུང་ཚེ་རིང་ལགས་ཀྱིས་དེ་སྔ་བོད་ཁུལ་གྱི་འགོ་ཁྲིད་འགའ་ཤས་ནི་བོད་རང་བཙན་ཡོད་པའི་སྐབས་ནས་ཕྱག་ལས་གནང་མྱོང་མཁན་དང་། དེའི་རྗེས་ལ་བོད་ཀྱི་དེ་སྔའི་གནས་སྟངས་དེ་ཚོ་ཡག་པོ་མཁྱེན་མཁན་ཡིན་དུས་སེམས་འཁུར་ཡོད་མཁན་དང་། ཁོང་ཚོས་རྒྱ་ནག་མི་དམངས་སྤྱི་མཐུན་རྒྱལ་ཁབ་དང་རྒྱ་ནག་དམར་ཤོག་ཚོགས་པའི་རེ་འདུན་གཞི་བཟུང་བྱེད་ཀྱི་ཡོད་པ་འདི་བརྗོད་མི་དགོས་པ་རེད། འོན་ཀྱང་དེ་དང་ཆབས་ཅིག་བོད་པའི་མི་རིགས་ཀྱི་ངོ་བོའི་ཐོག་ལ་ཕན་ཐོགས་བྱེད་ཐུབ་པའི་ཐབས་ཤེས་གང་ཐུབ་གནང་ཡོད་ཅེས་དང་། ད་ལྟའི་བོད་ཁུལ་གྱི་འགོ་ཁྲིད་ཚོར་དེ་སྔའི་རྒྱབ་ལྗོངས་མེད་པ་དང་། ད་ལྟ་དམར་ཤོག་ཚོགས་པའི་འདོད་འདུན་གཙོ་བོ་བཟུང་སྟེ། དེ་ཡང་བོད་ས་ཁུལ་འདི་རྒྱ་ནག་གི་ས་ཁུལ་གཞན་ནང་བཞིན་འཛིན་སྐྱོང་གི་ངོ་བོ་གཅིག་པུར་བསམ་བློ་བཏང་ནས་ཕྱག་ལས་གནང་གི་ཡོད་པ་ད་ལྟའི་ཆ་ལ་འདི་ལྟར་མཐོང་གི་འདུག་ཅེས་གསུངས་བྱུང་། རྒྱལ་སྤྱིའི་བོད་དོན་ལས་འགུལ་ཁང་གི་ཉམས་ཞིབ་འགན་འཛིན་བུ་ཆུང་ཚེ་རིང་ལགས། (ICT) ཁྲིམས་གསར་པ་དང་དམར་ཤོག་གི་ལྟ་བ། ཕྱི་ལོ་ ༢༠༢༦ ཟླ་ ༧ ཚེས་ ༡ ནས་ལག་བསྟར་བྱས་པའི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་དང་། ཞི་ཅིན་ཕིང་གི་དམར་ཤོག་འཛུགས་སྐྲུན་གྱི་དགོངས་པ་ཟེར་བ་གཉིས་ནི་མ་འོངས་པའི་བོད་སྐྱོང་གི་ཆབ་སྲིད་དང་ཁྲིམས་ཀྱི་གཞི་རྩ་གཙོ་བོ་ཆགས་རྒྱུ་དང་། དེས་བོད་ཀྱི་སྐད་ཡིག་གི་སློབ་གསོ་དང་། ཆོས་ལུགས། རིག་གཞུང་། མི་རིགས་ཀྱི་ངོ་བོ་བཅས་ལ་དམ་དྲག་སྔར་ལས་ཤུགས་ཆེ་རུ་འགྲོ་རྒྱུའི་ཉེན་ཁ་ཡོད་སྐོར་སྙན་ཐོའི་ནང་དབྱེ་ཞིབ་གནང་འདུག ད་ལྟ་བོད་ནང་མཚོན་ན། ཕྱོགས་གཅིག་ནས་མི་རིགས་ས་ཁོངས་རང་སྐྱོང་གི་ཁྲིམས་དང་། ཡང་གསར་དུ་གཏན་འབེབས་བྱས་པའི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་འདི་གཉིས་ནས་བོད་ཐོག་འཛིན་པའི་སྲིད་བྱུས་ལ་གཞིགས་ན། ཁྲིམས་གསར་པའི་འགྱུར་བའི་ཁྲོད་ནས་བོད་སྐད་གཙོ་བོའི་སློབ་ཁྲིད་ནས་རྒྱ་སྐད་གཙོ་བོའི་སློབ་ཁྲིད་ལ་སྒྱུར་བཞིན་པ་དང་། ༢༠༢༥ ལོའི་ནང་བོད་ཀྱི་སློབ་གྲྭའི་དཔེ་དེབ་དང་ཀློག་དེབ་བརྒྱ་ཆ་ ༩༥ རྒྱ་ཡིག་ཐོག་ཡིན་པ་བཀོད་ཡོད། རྒྱལ་སྤྱིའི་བོད་དོན་ལས་འགུལ་ཁང་གི་ཉམས་ཞིབ་འགན་འཛིན་བུ་ཆུང་ཚེ་རིང་ལགས་ཀྱིས་མུ་མཐུད་གསུངས་པར། ད་ལོའི་ང་ཚོའི་སྙན་ཐོར་གཟིགས་པ་ཡིན་ན། བོད་ཁུལ་གྱི་འགོ་ཁྲིད་གདམ་སྟངས་འདི་ཡང་རྒྱ་ནག་དམར་ཤོག་ཚོགས་པའི་བཀོད་སྒྲིག་འོག་ལ་ཁྲིམས་དང་གོམ་སྲོལ་གཏན་འབེབས་བྱས་པ་དེ་དང་མཉམ་དུ་འབྲེལ་བ་ཆགས་འདུག དཔེར་ན། ད་ལྟ་བཀའ་མོལ་ཞུ་བཞིན་ཡོད་པའི་མི་རིགས་མཐུན་སྒྲིལ་ཡར་ཐོན་གྱི་ཁྲིམས་འདི་གཏན་འབེབས་བྱས་ཟིན་ནས་ལག་ལེན་བསྟར་བའི་དུས་ཚོད་འདི་འཁེལ་ཡོད། འདིའི་སྐབས་ལ་གལ་ཆེ་ཤོས་འདི་དེ་སྔ་བོད་ཁུལ་གྱི་འགོ་ཁྲིད་ཚོ་ལ་གུ་བཤངས་ཡོད་པའི་གནད་དོན་དེ་ཚོ་ད་ལྟའི་ཆར་ཁོང་ཚོར་གུ་བཤངས་མེད་པའི་རྣམ་པ་འདི་ཆགས་ཡོད། དེ་ཡང་བོད་པའི་སྐད་དང་རིག་གཞུང་། ཐ་ན་ཆོས་ལུགས་ཀྱང་ས་གནས་ས་ཐོག་ཏུ་ཉམས་ལེན་བྱེད་ཐུབ་པ་འདི་ད་ལྟའི་ཆར་ཁོང་རྣམ་པ་ཚོས་བྱེད་པའི་སྤོབས་པ་དང་གདེང་ཚོད་ཉུང་དུ་ཕྱིན་པ་དང་། ད་ལྟའི་མི་རིགས་མཐུན་སྒྲིལ་གྱི་ཁྲིམས་འདི་ཉིད་གཞི་བཟུང་གི་ཐོག་ནས་ཁོང་ཚོར་འགོག་རྐྱེན་བཟོས་པ་འདི་ཆགས་འདུག་ཅེས་གསུངས་བྱུང་། བོད་ནང་གི་དཔོན་རིགས། (ICT) ཆོས་དང་རིག་གཞུང་ནི་བདེ་འཇགས་ཀྱི་གནད་དོན་ལ་ངོས་འཛིན། བོད་ནང་དགོན་པ་ཚང་མར་གཞུང་གི་ལས་བྱེད་མི་སྣ་མངགས་གཏོང་བྱས་པའི་ཐོག་དམག་མི་དང་ཉེན་རྟོག་ས་ཚིགས། མེ་གསོད་རུ་ཁག་སོགས་ཀྱིས་ཁྱབ་ནས་ཡོད་པ་དང་། དེང་དུས་ཀྱི་པར་ཆས་དྲ་བ་ནི་དགོན་པའི་ནང་མེད་དུ་མི་རུང་བའི་ཆ་ཤས་ཤིག་བཟོས་ཡོད་པས། སྙན་ཐོའི་ནང་བོད་ཀྱི་འཛིན་སྐྱོང་དེ་རིམ་བཞིན་རྒྱལ་ཁབ་ཀྱི་བདེ་འཇགས་ཀྱི་ལྟ་ཚུལ་བཟུང་བཞིན་དུ་སྐད་ཡིག་དང་། ཆོས་ལུགས། རིག་གཞུང་སོགས་ཀྱང་བདེ་འཇགས་དང་སྦྲེལ་བཞིན་ཡོད་པར་དབྱེ་ཞིབ་གནང་འདུག བུ་ཆུང་ཚེ་རིང་ལགས་ཀྱིས་ངོས་འཛིན་གནང་བར། བོད་དང་འབྲེལ་བ་ཡོད་པའི་གནད་དོན་མང་པོ་ཞིག་རྒྱལ་ཁབ་ཀྱི་བདེ་འཇགས་དང་མཉམ་དུ་འབྲེལ་བ་བཟོས་ཡོད། དཔེར་ན། ཞི་ཅིན་ཕིང་གི་སྲིད་བྱུས་གཙོ་བོ་འདི་རྒྱ་ནག་འཛིན་སྐྱོང་ཡག་པོ་དགོས་ན་མཐའ་མཚམས་ས་ཁུལ་སྲུང་སྐྱོབ་ཡག་པོ་དགོས་པ་དང་། མཐའ་མཚམས་ས་ཁུལ་སྲུང་སྐྱོབ་ཡག་པོ་དགོས་པར། བོད་ཁུལ་དུ་བདེ་འཇགས་དགོས་པ་བརྗོད་ཡོད། དེར་བརྟེན་བོད་ནང་གི་གནད་དོན་གཙོ་བོ་ནི་ཁོང་ཚོས་བདེ་འཇགས་འདི་གལ་ཆེ་བ་བརྩིས་ནས་བདེ་འཇགས་ལ་ཉེན་ཁ་ཡོད་པ་ལྟ་བུ་མཐོང་ནས་བོད་ཀྱི་ངོ་བོ་དང་བོད་མི་ཆོས་སོགས་ཚང་མའི་ཐོག་སྟངས་འཛིན་བྱས་པ་འདི་ཆགས་ཡོད་ཅེས་བརྗོད་བྱུང་། སྙན་ཐོ་འདིའི་མཇུག་ཏུ། འགྱུར་བ་འདིའི་ཁྲོད་ནས་རྒྱ་ནག་གཞུང་གིས་ཉིན་རེ་བཞིན་དབང་ཆ་ཕྱོགས་གཅིག་ཏུ་བསྡུས་བཞིན་ཡོད་པ་མངོན་གྱི་ཡོད་པ་མ་ཟད། ད་དུང་བོད་དང་འབྲེལ་བ་ཆགས་པའི་ཆབ་སྲིད་ཀྱི་ཐག་གཅོད་ནང་བོད་མིས་མཉམ་ཞུགས་བྱེད་ཚད་ཤུགས་ཆུང་དུ་འགྲོ་བཞིན་ཡོད་པ་བརྗོད་འདུག་ལ། རྒྱལ་སྤྱིའི་སྤྱི་ཚོགས་ནས་བོད་མིའི་སྒྲིག་འཛུགས་དང་འབྲེལ་བ་བྱ་རྒྱུར་ཤུགས་གནོན་རྒྱབ་སྟེ། དམངས་གཙོའི་ལམ་ལུགས་སྲ་བརྟན་ཡོང་རྒྱུར་རྒྱབ་སྐྱོར་དགོས་པའི་འབོད་སྐུལ་གནང་འདུག མཐར་རྒྱལ་སྤྱིའི་བོད་དོན་ལས་འགུལ་ཁང་གི་ཉམས་ཞིབ་འགན་འཛིན་བུ་ཆུང་ཚེ་རིང་ལགས་ཀྱིས། ད་ལྟ་ང་ཚོས་རྒྱ་ནག་གི་འགོ་ཁྲིད་ཚོར་ལྟ་སྟངས་དང་རྒྱ་ནག་གི་སྟངས་འཛིན་སྲིད་བྱུས་ལ་ལྟ་སྟངས་སོགས་ཚང་མས་བོད་ཀྱི་མ་འོངས་པའི་ཐབས་ལམ་ང་ཚོས་གང་འདྲ་འཚོལ་གྱི་ཡོད་མེད་དང་། མཐའ་མའི་བོད་ཀྱི་བདེན་མཐའ་སེལ་བའི་ཐད་ལ་ག་རེ་གནང་དགོས་ཀྱི་ཡོད་མེད་ཐོག་ལ་དགོངས་པ་བཞེས་ཏེ་དེ་རྩིས་ཀྱི་ཐབས་ཇུས་ཤིག་གཏིང་དགོས་པར་ངོས་འཛིན་གནང་གི་འདུག བོད་ནང་གི་བོད་པའི་མི་རབས་ཀྱི་འགྱུར་བའི་ཁྲོད་ནས་རྒྱ་ནག་གཞུང་གིས་མི་རབས་གསར་པའི་བོད་ནང་གི་འགོ་ཁྲིད་དཔུང་ཁག་ལ་འགྱུར་བ་ཆེན་པོ་གཏོང་བཞིན་ཡོད་པ་དེར་རྒྱལ་སྤྱིའི་བོད་དོན་ལས་འགུལ་ཁང་གི་སྙན་ཐོའི་ནང་ནས་བོད་ནང་དོན་ངོ་མའི་རང་སྐྱོང་གི་གནས་བབ་ཇི་ཙམ་ཡོད་མེད་འདི་གང་ཙམ་མངོན་ཐུབ་རྒྱུ་འདུག རྒྱལ་སྤྱིའི་བོད་དོན་ལས་འགུལ་ཁང་གིས་བཏོན་པའི་སྙན་ཐོ་འདིར་གཞིགས་ན། བོད་ནང་གི་འགོ་ཁྲིད་སུ་ཞིག་བསྐོ་བཞག་བྱེད་ཀྱི་ཡོད་མེད་དེ་གཙོ་འདོན་མིན་པར། བོད་ཀྱི་འགོ་ཁྲིད་ཀྱི་གོ་གནས་སུ་བོད་པ་ཡོད་ཀྱང་། དངོས་ཡོད་ཐག་གཅོད་ཀྱི་དབང་ཆ་ག་ཚོད་ཡོད་མེད་དང་། མ་འོངས་པའི་བོད་སྐྱོང་གི་མི་རབས་གསར་པའི་འགོ་ཁྲིད་ཚོས་དམར་ཤོག་ཚོགས་པའི་སྲིད་ཇུས་ལག་བསྟར་བྱེད་པ་ལས། བོད་མིའི་སྐད་ཡིག་དང་། ཆོས་ལུགས། རིག་གཞུང་དང་རང་སྐྱོང་གི་ཐོབ་ཐང་སྲུང་ཐུབ་མིན་དེ་དྲི་བ་ཞིག་ཆགས་ཡོད་འདུག

RFA Tibetan རྒྱ་དཀར་ནག

རྒྱ་ནག་གི་བྱེད་བབ་དེར་བལྟས་ཚེ། རྒྱ་དཀར་ནག་གི་ས་མཚམས་རྩོད་རྙོག་སྐོར་གྱི་དམིགས་བསལ་སྐུ་ཚབ་དབར་གྱི་པེ་ཅིན་དུ་འཚོགས་པའི་གྲོས་མོལ་ཐེངས་ ༢༥ དེས། ས་མཚམས་ཀྱི་དཀའ་རྙོག་ཡོངས་སུ་སེལ་ཐབས་བྲལ་བ་ཡིན་ཞེས་གནད་དོན་དབྱེ་ཞིབ་པས་གསུང་གི་འདུག རྒྱ་ནག་གི་སྲིད་འཛིན་ཞི་ཅིན་ཕིང་ལོ་བདུན་གྱི་རྗེས་སུ་རྒྱ་གར་གྱི་རྒྱལ་ས་ལྡི་ལིར། སྦརིཀསི་ (BRICS) ཞེས་པའི་ཕྱི་ཟླ་ ༩ པའི་ནང་རྒྱལ་ཁབ་ལྔའི་དབུ་ཁྲིད་ལྷན་ཚོགས་ཐོག་མཉམ་ཞུགས་བྱ་རྒྱུ་ཡིན་པའི་སྐབས་འདིར། རྒྱ་གར་གྱི་རྒྱལ་སྲུང་སློབ་སྟོན་པ་ཨཇིཏ་ཌོ་ཝལ་ (Ajit Doval) ལགས་དང་རྒྱ་ནག་གི་ཕྱི་སྲིད་བློན་ཆེན་ཝང་ཡི་ (Wang Yi) དབར་ ཟླ་ ༨ ཚེས་ ༢༥ ཉིན་རྒྱ་ནག་གི་རྒྱལ་ས་པེ་ཅིན་དུ་ས་མཚམས་རྩོད་རྙོག་སྐོར་གྱི་དམིགས་བསལ་སྐུ་ཚབ་དབར་གྱི་གྲོས་མོལ་ཐེངས་ ༢༥ དེ་འཚོགས་འདུག ་ཅིང་། ས་མཚམས་དང་འབྲེལ་བའི་གྲོས་མོལ་ཐེངས་རྗེས་མ་དེ་ཕྱི་ལོ་ ༢༠༢༧ ལོར་རྒྱ་གར་དུ་འཚོགས་རྒྱུར་མོས་མཐུན་བྱུང་པའི་སྐོར་རྒྱ་ནག་གཞུང་འབྲེལ་ཤིན་ཧྭ་གསར་སྤེལ་ཁང་གིས་ཕྱི་ཚེས་ ༢༥ ཉིན་གནས་ཚུལ་སྤེལ་འདུག རྒྱ་གར་གྱི་རྒྱལ་སྲུང་སློབ་སྟོན་པ་ཨཇིཏ་ཌོ་ཝལ་ (Ajit Doval) ལགས་དང་རྒྱ་ནག་གི་ཕྱི་སྲིད་བློན་ཆེན་ཝང་ཡི་ (Wang Yi) དབར་ས་མཚམས་རྩོད་རྙོག་སྐོར་གྱི་དམིགས་བསལ་གྲོས་མོལ་གྲུབ་མཚམས། སྤྱི་ཚོགས་དྲྭ་ལམ་ཁག་ཏུ་ཐོན་བཞིན་པའི་བརྙན་ཁག་གི་ནང་། ཨ་ཇིཏ་དོ་ལྦལ་ལགས་ཀྱིས་ཚོགས་འདུའི་སྐབས། འདས་པའི་ལོ་གཅིག་གི་རིང་ང་ཚོའི་འབྲེལ་བ་དལ་གྱིས་དེ་སྔ་དང་འདྲ་བའི་རྒྱུན་ལྡན་ཅན་དུ་ལོག་བཞིན་པ་དེ་ནི་ང་ཚོ་ཕྱོགས་གཉིས་ཀས་ས་མཚམས་ཁུལ་དུ་ཞི་བདེ་དང་བརྟན་ལྷིང་རྒྱུན་འཁྱོངས་བྱས་པའི་འབྲས་བུ་ཞིག་རེད་ལ། ཐེངས་འདིའི་གྲོས་མོལ་བརྒྱུད་ང་ཚོས་ས་མཚམས་ཁུལ་དུ་ཞི་བདེ་ལྷིང་འཇགས་མུ་མཐུད་གནས་པར་འབད་བརྩོན་ཤུགས་སྣོན་གྱི་དམིགས་ཡུལ་བཟུང་བཞིན་ཡོད་ཅེས་གསུངས་འདུག་ལ། ལྦང་ཡིས་ཕྱོགས་ནས། ཉེ་བའི་ལོ་ཤས་རིང་སྲིད་འཛིན་ཞི་ཅིན་ཕིང་དང་སྲིད་བློན་མོ་དྷི་གཉིས་ཐེངས་གཉིས་རིང་གལ་ཆེའི་ཐུག་འཕྲད་གནང་བ་དེས། རྒྱལ་ཁབ་ཕྱོགས་གཉིས་ཀྱི་འབྲེལ་བ་ཡར་རྒྱས་གཏོང་བར་མཛུབ་སྟོན་བྱས་ཡོད་ལ། ཁོང་གཉིས་ཀྱི་ལམ་སྟོན་འོག་ང་གཉིས་དབར་གྲོས་མོལ་མང་པོ་བྱུང་ཡོད། གྲོས་མོལ་དེའི་བརྒྱུད་ས་མཚམས་ཁུལ་དུ་ཞི་བདེ་དང་བརྟན་ལྷིང་རྒྱུན་འཁྱོངས་བྱ་རྒྱུར་འབད་བརྩོན་བྱེད་བཞིན་ཡོད་པ་བརྗོད་འདུག རྒྱ་གར་གྱི་རྒྱལ་སྲུང་སློབ་སྟོན་པ་ཨ་ཇིཏ་ཌོ་ཝལ་ལགས་ཀྱིས་ཨི་རཱན་གྱི་རྒྱལ་ས་ཏེ་རཱན་དུ་རྒྱལ་སྲུང་བདེ་འཇགས་ཀྱི་ཚོགས་འདུ་ཞིག་ཏུ་ཕེབས་ཞུགས་སྐབས། ༢༠༡༨།༩།༢༦ (AFP) རྒྱ་གར་ཕྱི་སྲིད་ལས་ཁུངས་ཀྱིས་ཟླ་ ༨ ཚེས་ ༢༤ ཉིན་རྒྱ་གར་གྱི་རྒྱལ་སྲུང་སློབ་སྟོན་པ་ཨཇིཏ་ཌོ་ཝལ་ (Ajit Doval) ལགས་རྒྱ་ནག་ཏུ་ཕེབས་རྒྱུའི་གསལ་བསྒྲགས་ཤིག་སྤེལ་ཡོད་པ་དེའི་ནང་། རྒྱ་ནག་གི་ཕྱི་སྲིད་བློན་ཆེན་ལྦང་ཡིས་མགྲོན་འབོད་གནང་བ་བཞིན། རྒྱ་གར་དང་རྒྱ་ནག་གཉིས་ཀྱི་ས་མཚམས་གནད་དོན་ཐོག་རྒྱ་གར་གྱི་དམིགས་བསལ་སྐུ་ཚབ་ཨ་ཇིཏ་དོ་ལྦལ་ལགས་ཉིན་གཉིས་རིང་རྒྱ་ནག་གི་རྒྱལ་ས་པེ་ཅིན་དུ་ཕེབས་ཀྱི་ཡོད་པ་བཀོད་འདུག ས་མཚམས་རྩོད་རྙོག་སྐོར་གྱི་དམིགས་བསལ་སྐུ་ཚབ་དབར་གྱི་གྲོས་མོལ་སྐོར་ཐེངས་༢༥དེ་མ་ཚོགས་སྔོན་དུ། ཨ་ཇིཏ་དོ་ལྦལ་ལགས་ཀྱིས་རྒྱ་ནག་གི་སྲིད་འཛིན་གཞོན་པ་ (Han Zheng) དང་ཐུག་འཕྲད་གནང་སྟེ། ས་མཚམས་ཁུལ་དུ་ཞི་བདེ་བརྟན་ལྷིང་དང་། རྒྱལ་ཁབ་ཕྱོགས་གཉིས་ཀྱི་དཔལ་འབྱོར་དང་ཆབ་སྲིད། འབྲེལ་ལམ་གོང་མཐོར་གཏོང་ཕྱོགས་སོགས་ཀྱི་སྐོར་གྲོས་མོལ་གནང་ཡོད་པ། རྒྱ་ནག་གི་རྒྱལ་ས་པེ་ཅིན་དུ་རྟེན་གཞི་བྱས་པའི་རྒྱ་གར་གཞུང་ཚབ་ཁང་གིས་ (X) སྤྱི་ཚོགས་དྲྭ་ལམ་ཐོག་སྤེལ་འདུག་ལ། དེ་འབྲེལ་རྒྱ་གར་དུ་གནས་འཁོད་རྒྱ་ནག་གཞུང་ཚབ་ཤུ་ཕཡེ་ཧོང་ (Xu Feihong) ཀྱིས་ (X) ཐོག ཐུག་འཕྲད་དེའི་སྐབས་རྒྱ་ནག་གི་སྲིད་འཛིན་གཞོན་པས། འདས་པའི་ལོ་གཉིས་རིང་། སྲིད་འཛིན་ཞི་ཅིན་ཕིང་དང་སྲིད་བློན་མོ་དྷི་གཉིས་ཀ་ཛན་ (Kazan) དང་ཐེན་ཅིན་ (Tianjin) དུ་ཐུག་འཕྲད་བྱས་ཏེ་རྒྱ་དཀར་ནག་གི་འབྲེལ་བ་ཡར་རྒྱས་གཏོང་ཕྱོགས་ཐད་མོས་མཐུན་གལ་ཆེན་མང་པོ་བྱུང་བ་དང་། དེས་ཕྱོགས་གཉིས་ཀྱི་འབྲེལ་བ་སླར་ཡང་འཕེལ་རྒྱས་ཀྱི་ལམ་དུ་སྣེ་ཁྲིད་བྱས་ཡོད་པས། དཔལ་འབྱོར་ཡར་རྒྱས་འགྲོ་བཞིན་པའི་ཁྱིམ་མཚེས་རྒྱལ་ཁབ་ཅིག་ཡིན་པའི་ཆ་ནས། རྒྱ་ནག་དང་རྒྱ་གར་གཉིས་ཀས་ཕུགས་རྒྱང་རིང་པོའི་འབྲེལ་བར་དམིགས་ཏེ། ཕྱོགས་གཉིས་ཀྱི་དབུ་ཁྲིད་ཚོས་བཞག་པའི་གལ་ཆེའི་མོས་མཐུན་ལྟར། རྒྱལ་ཁབ་ཕན་ཚུན་དབར་ཡིད་ཆེས་ཤུགས་ཆེ་རུ་བཏང་ཐོག། མཉམ་ལས་ནུས་པ་གོང་སྤེལ་དང་མང་ཚོགས་ཀྱི་འབྲེལ་ལམ་བརྟན་པོ་བཟོ་བ། རྩོད་རྙོག་ཡོད་ས་རྣམས་ཚུལ་བཞིན་སྟངས་འཛིན་བྱེད་པ་སོགས་བྱེད་དེ་ཕྱོགས་གཉིས་ཀྱི་འབྲེལ་ལམ་བརྟན་ལྷིང་དང་འཕེལ་རྒྱས་འགྲོ་བར་སྐུལ་འདེད་གཏོང་དགོས་ཞེས་བརྗོད་ཡོད་པ་བཀོད་འདུག བོད་ཀྱི་གནད་དོན་ནི་ས་མཚམས་ཀྱི་གནད་དོན་གཞི་མ་ཡིན་སྐོར་གསུངས་པ། ཡང་བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་འབུམ་རམས་པ་ཚེ་དབང་རྡོ་རྗེ་ལགས་ཀྱིས། ཐེངས་འདིར་རྒྱ་དཀར་ནག་གཉིས་དབར་ས་མཚམས་ཀྱི་གྲོས་མོལ་བྱེད་བཞིན་པ་དེས། གནས་སྐབས་ས་མཚམས་ཐོག་གི་དཀའ་རྙོག་ཞི་འགྲིག་ཐོག་ཤུག་གནོན་སྤྲོད་སྲིད་ཀྱང་། ཁྱོན་ཡོངས་ཀྱི་དཀའ་རྙོག་སེལ་ཐུབ་ཐབས་མེད་ཅེས་དང་། གལ་ཏེ་རྒྱལ་ཁབ་ཕྱོགས་གཉིས་དབར་ས་མཚམས་ཀྱི་དཀའ་རྙོག་སེལ་དགོས་ཚེ། ངེས་པར་བོད་ཀྱི་གནད་དོན་གླེང་སློང་དགོས་ཤིང་བོད་ཀྱི་གནད་དོན་ལས་གཡོལ་ཐབས་བྲལ་བ་ཡིན་ལ། བོད་ཀྱི་དཀའ་རྙོག་སེལ་ན་མ་གཏོགས་ཐབས་ཤེས་གཞན་གང་ཡང་མེད་ཅེས་འདི་ག་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་། ཕྱོགས་གཉིས་ཀྱི་མཐོ་རིམ་དཔོན་རིགས་དབར་གྱི་གྲོས་མོལ་གྱི་གནད་དོན་དེ་དང་འབྲེལ་ཏེ་རྒྱ་གར་གྱི་གྲོས་ཚོགས་འོག་མའི་འཐུས་མི་ཤ་ཤི་ཐ་རུར་ (Shashi Tharoor) ལགས་ཀྱིས་གསར་འགྱུར་བརྒྱུད་ལམ་ཁག་གཅིག་ལ་བཀའ་མོལ་གནང་བ་ཞིག་གི་ནང་ཁོང་གིས། རྒྱ་ནག་གིས་ལོ་མང་རིང་རྒྱ་གར་ལ་ས་མཚམས་གསལ་ཁ་མེད་པའི་ས་ཁུལ་དེ་ནས་བསྟུད་མར་སུན་གཙེར་དང་དཀའ་ངལ་མང་པོ་ཞིག་སྤྲོད་བཞིན་ཡོད། ཐེངས་འདིར་ཨ་ཇིཏ་དོ་ལྦལ་ལགས་ཕེབས་ཏེ་གྲུབ་འབྲས་ཡག་པོ་ཞིག་ཐོབ་ཚེ་ང་ཚོར་དགའ་འོས་པ་ཞིག་ཡིན་ཡང་། ད་བར་ས་མཚམས་ཀྱི་རྩོད་རྙོག་དང་འབྲེལ་ས་མཚམས་རྩོད་རྙོག་སྐོར་གྱི་དམིགས་བསལ་སྐུ་ཚབ་དབར་གྱི་གྲོས་མོལ་སྐོར་ཐེངས་༢༥འཚོགས་ཟིན་པའི་བརྒྱུད། ང་ཚོས་ཡར་རྒྱས་གང་ཡང་མཐོང་མེད། མ་ཟད་ད་ལྟའི་ཆར་རྒྱ་ནག་གིས་ས་མཚམས་གནད་དོན་དེ་ནི་མ་འོངས་པའི་མི་རབས་རྣམས་ཀྱིས་ཐག་གཅོད་བྱ་དགོས་པར་ངོས་འཛིན་བྱེད་ཀྱི་ཡོད་ཀྱང་། དེའི་བར་ན་ཁོ་ཚོས་ས་མཚམས་ཁུལ་གྱི་དངོས་ཡོད་གནས་སྟངས་ལ་རིམ་བཞིན་བསྒྱུར་བཅོས་བྱས་ཏེ་རང་ཉིད་ཀྱི་བློ་དང་མཐུན་པ་ཞིག་གྲུབ་པའི་གནས་སྐབས་སུ། དུས་ཚོད་ངེས་མེད་ཅིག་ལ་ས་མཚམས་གནད་དོན་དེ་ཐག་གཅོད་བྱ་རྒྱུ་ཡིན་པར་བསམ་གྱི་ཡོད་ཅེས་གསུངས་འདུག ཨ་རུ་ཅལ་གྱི་གནད་དོན་དང་རྒྱ་གར་གྱི་ས་ཁྲ་གཏན་འབེབས། རྒྱ་ནག་གཞུང་གིས་རྒྱ་གར་གྱི་ཨ་རུ་ན་ཅཱལ་མངའ་སྡེར་བདག་དབང་ཡོད་སྐོར་བརྗོད་དེ་ཁུལ་དེའི་ས་ཚིགས་མང་པོར་མིང་བསྒྱུར་རིམ་པ་བྱེད་པ་སོགས། རྒྱ་དཀར་ནག་གཉིས་དབར་ས་མཚམས་ཀྱི་དཀའ་ངལ་རིམ་པ་འཕྲད་བཞིན་པའི་སྐབས་འདིར། ཉེ་ལམ་ཟླ་ ༨ ཚེས་ ༧ ཉིན་ རྒྱ་གར་གཞུང་གིས་ཨ་རུ་ན་ཅཱལ་ནང་གི་ས་ཚིགས་དང་གཞུང་ལམ། མཚོ་བཅས་ཁྱོན་ ༢༧ གྱི་མིང་ཡོད་བཞིན་པ་རྣམས་གཞུང་འབྲེལ་ས་ཁྲའི་ནང་སྤྱི་ཡོངས་གཏན་འབེབས་ དང་ཁྱབ་བསྒྲགས་བྱས་པའི་ཉིན་གཅིག་གི་རྗེས་རྒྱ་ནག་གཞུང་གིས། རྒྱ་གར་གྱི་བྱ་སྤྱོད་དེས་ཕྱོགས་གཉིས་ཀྱི་ས་མཚམས་ཀྱི་འབྲེལ་ལམ་ཙམ་མ་ཟད། རྒྱ་དཀར་ནག་གཉིས་ཀྱི་སྤྱི་ཡོངས་ཀྱི་འབྲེལ་ལམ་ལ་གནོད་སྐྱོན་འབྱུང་སྲིད་པའི་ཉེན་བརྡ་བཏང་འདུག་ཀྱང་། སྐབས་དེར་རྒྱ་གར་དབུས་གཞུང་ཕྱི་སྲིད་ལྷན་ཁང་གི་མགྲིན་ཚབ་པ་རཱན་དྷིར་འཇཡེསི་ཝལ་ (Randhir Jaiswal) ལགས་ཀྱིས་ཨ་རུ་ན་ཅལ་ནི་རྒྱ་གར་གྱི་ཁ་བྲལ་ཐབས་མེད་པའི་ཆ་ཤས་ཤིག་ཡིན་པར་སུས་ཀྱང་འགྱུར་བ་བཏང་མི་ཐུབ་ཅེས་ནན་བརྗོད་གནང་ཡོད་པ་རེད། གཞན་ཕྱི་ལོ་ ༢༠༢༤ ཟླ་ ༡༠ པའི་ནང་རྒྱ་གར་གྱི་སྲིད་བློན་མོ་དྷི་དང་རྒྱ་ནག་གི་སྲིད་འཛིན་ཞི་ཅིན་ཕིང་གཉིས་ཀཱ་ཛན་དུ་ཐུག་འཕྲད་སྐབས། ཕྱོགས་གཉིས་ཀས་རྒྱ་གར་དང་རྒྱ་ནག་གཉིས་མཐུན་གྲོགས་རྒྱལ་ཁབ་ཡིན་པ་ལས་འགྲན་ཟླའི་ཁ་གཏད་མིན་པས། ཕྱོགས་ཕན་ཚུན་དབར་གྱི་ཁྱད་པར་དེ་རྩོད་གཞིར་གྱུར་མི་རུང་བའི་ཁས་ལེན་བསྐྱར་ནན་བྱས་ཡོད་ཀྱང་། ད་ཆ་རྒྱལ་ཁབ་ཕྱོགས་གཉིས་ཀྱི་ས་མཚམས་རྩོད་རྙོག་སྐོར་གྱི་དམིགས་བསལ་སྐུ་ཚབ་དབར་གྱི་གྲོས་མོལ་སྐོར་ཐེངས་༢༥རྗེས་སུ་ས་མཚམས་ཀྱི་དཀའ་རྙོག་ཇེ་ལེགས་སུ་འགྲོ་བའམ་ཡང་ན། དེ་སྔ་བཞིན་དེ་མུར་ལྷག་རྒྱུ་ཡིན་མིན་སུས་ཀྱང་ཤེས་རྟོགས་ཐུབ་དཀའ་བར་གྱུར་ཡོད། འཛམ་གླིང་གི་མི་འབོར་མང་ཤོས་ཡིན་པའི་རྒྱལ་ཁབ་གཉིས་པོ་ནི་རྡུལ་ཕྲན་གོ་མཚོན་ཡོད་པའི་སྟོབས་ལྡན་གྱི་རྒྱལ་ཁབ་ཡིན་ཞིང་། འཕགས་བོད་ས་མཚམས་གཙོ་བོར་གྱུར་བའི་ཧི་མ་ལ་ཡའི་རི་རྒྱུད་དུ་ཀི་ལོ་མི་ཊར་ ༣༨༠༠ (3800 km) ཙམ་གྱི་ས་མཚམས་འཁེལ་ཡོད་ཅིང་། ས་མཚམས་དེའི་ཆ་ཤས་མང་ཆེ་བ་ཞིག་ད་དུང་ངེས་འཛིན་བྱས་མེད་པ་མ་ཟད། རྩོད་གླེང་ཅན་གྱི་ས་མཚམས་ཆགས་ཡོད་པ་རེད།། བརྙན་པར་སྒྲིག་སྦྱོར་བ། བསྟན་འཛིན་དོན་ཡོད། འབྲེལ་ཡོད་གནས་ཚུལ། འཕགས་བོད་ས་མཚམས་ཀྱི་ཚོང་ལམ་རྙིང་པ་གསུམ་བསྐྱར་དུ་སྒོ་མོ་ཕྱེ་པ། རྣ་ཐོས་ལར་ལོ་ ༦ རྗེས་ཚོང་ལམ་སྒོ་མོ་སླར་ཡང་ཕྱེ་འདུག རྒྱ་གར་ནང་སྲིད་བློན་ཆེན་གྱིས་བོད་དང་རྒྱ་གར་གྱི་འབྲེལ་བ་རྩ་ཆེན་ཞིག་ཡོད་སྐོར་གསུངས་པ།

RFA Tibetan བཙན་བྱོལ།

བོད་པའི་སློབ་གྲྭ་ཁག་ཏུ་སློབ་བཞིན་པའི་རིགས་ལམ་སློབ་ཚན་དེས། དེང་དུས་ཤེས་ཡོན་སློབ་སྦྱོང་ལ་རམ་འདེགས་བྱེད་བཞིན་ཡོད་པ་གསུང་གི་འདུག བོད་པའི་སློབ་གྲྭ་ཁག་ཏུ་སློབ་བཞིན་པའི་རིགས་ལམ་སློབ་ཚན་དེས། དེང་དུས་ཤེས་ཡོན་སློབ་སྦྱོང་ལ་རམ་འདེགས་བྱེད་བཞིན་ཡོད་པ་དང་། ནང་ཆོས་ཀྱི་རིགས་ལམ་ཐོག་ནས་སློབ་གཉེར་གནང་སྟངས་འདི་དེང་རབས་ཚན་རྩིས་སློབ་གཉེར་སོགས་ལའང་ཕན་ནུས་ཡོད་པ་སློབ་མ་ཚོས་གསུང་གི་འདུག སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དུས་ནས་དུས་སུ་རིགས་ལམ་ཞེས་པ་དེ་ནི་ཆོས་ཕྱོགས་ཀྱི་ངོ་བོ་ཁོ་ནར་མ་བཞག་པར། དགོན་སྡེ་གྲྭ་ཚང་དང་། བཤད་གྲྭ་ཁག་གཙོ་བོར་གྱུར་པའི་སློབ་གྲྭ་ཁག་ནང་འཚར་ལོངས་བྱུང་བཞིན་པའི་སློབ་མ་རྣམས་ལ་དེང་དུས་ཀྱི་སློབ་ཚན་ཚན་རྩིས་སོགས་རིགས་འགྲེ་གནང་ནས་སློབ་འཁྲིད་གནང་རྒྱུ་གལ་ཆེ་ཡིན་པ་བཀའ་ཕེབས་ཡོད་པ་བཞིན། རིགས་ལམ་འདུ་འཛོམས་ཐོག་མཉམ་ཞུགས་གནང་མཁན་གྱི་བོད་ཕྲུག་ཁག་ཅིག་གིས་རིགས་ལམ་སློབ་སྦྱོང་ནི་ཤེས་ཡོན་སློབ་སྦྱོང་བྱེད་སྟངས་སྤྱིའི་རྩ་བར་གྱུར་ཡོད་པ་གསུང་གི་འདུག དེ་ཡང་གྷོ་པལ་པུར་བོད་ཁྱིམ་ནས་ཡིན་པ་འོད་ཟེར་ཆོས་སྒྲོན་ལགས་ཀྱིས། ཁོང་གིས་འཛིན་གྲྭ་དང་པོ་ནས་དྲུག་པ་བར་སློབ་གྲྭའི་ནང་རིགས་ལམ་སློབ་སྦྱོང་གནང་བ་དེས། རིག་པ་འཕེལ་ཞིང་བསམ་བློ་རྒྱ་ཆེན་པོ་བཏང་ཐུབ་པ། ངག་ཏུ་འཇགས་སླ་བ་སོགས་ཀྱི་ཕན་ཐོགས་ཞེ་དྲགས་འདུག་ཅིང་། རྟགས་གསལ་བཏང་མཁན་དང་དམ་བཅའ་བར་ཡག་པོ་ཉན་ཚེ། དེའི་བརྒྱུད་ཤེས་བྱ་གསར་པ་མང་པོ་ཤེས་ཀྱི་རེད་ཅེས་གསུང་གི་འདུག་ལ། མ་སུ་རི་བོད་ཁྱིམ་ནས་ཡིན་པ་བསྟན་འཛིན་ནོར་འཛིན་ལགས་ཀྱིས། ཨང་རྩིས་ལ་རྩིས་ཀྱི་སྦྱོར་ཐབས་མང་པོ་ཞིག་བློ་འཛིན་བྱ་དགོས་པ་རྣྱམས། སྤྱིར་བཏང་བློ་འཛིན་བྱས་པ་ལས་རིགས་ལམ་བརྒྱུད་སྦྱོར་ཐབས་དེ་དག་ལ་ཞིབ་པར་གོ་རྟོགས་བྱུང་ཚེ། མ་འོངས་ཀླད་པར་གཏན་དུ་འཇགས་པར་ཕན་ཐོགས་ཡོང་གི་འདུག་ཅེས་གསུང་གི་འདུག ཡང་སེ་ལ་ཀུའི་བོད་ཁྱིམ་གྱི་སློབ་མ་བསྟན་འཛིན་ཕན་ཐོགས་ལགས་ཀྱིས། ཁོང་ད་ལྟའི་ཆར་རིགས་ལམ་སྦྱངས་ནས་ལོ་བཞི་འགྲོ་བཞིན་ཡོད་པ་དང་། རྩ་བའི་རིགས་ལམ་ཐོག་མར་སྦྱངས་དུས་ཤེས་རྟོགས་དང་གོ་བ་ལེན་དཀའ་ཡང་རིམ་པས་རིགས་ལམ་གྱིས་བསམ་བློ་རྒྱ་ཆེ་ཞིང་དོན་དང་ལྡན་པ་གཏོང་ཐུབ་པར་ཕན་ཐོགས་ཆེན་པོ་ལྡན་ཡོད་ཅེས་གསུངས་ཤིང་། སིམ་ལ་སཾ་བྷོ་ཊ་གཏན་སློབ་ནང་འགྲིམ་བཞིན་པ་བསྟན་འཛིན་ཟླ་སྒྲོན་ལགས་ཀྱིས་ལོ་ལྔའི་རིང་རིགས་ལམ་སློབ་སྦྱོང་གནང་བ་དེས། རིག་པ་གསལ་དུ་འགྲོ་བ་གང་ཞིག་ལ། སྐབས་རེ་ཚན་རྩིས་སོགས་དང་འབྲེལ་བའི་མགོ་རྙོག་པའི་སློབ་ཚན་སོགས་སུ། རིགས་ལམ་དང་ཚན་རིག་དགེ་རྒན་རྣམས་དང་ལྷན་རིགས་ལམ་བརྒྱུད་ཤེས་རྟོགས་ཐུབ་ཐབས་ལ་འབད་བརྩོན་བྱས་ཚེ། ཤེས་རྒྱུ་སླ་རུ་འགྲོ་བ་ཕན་ཐོགས་ཆེན་པོ་ཡོང་གི་འདུག་ཅེས་གསུང་གི་འདུག གཞན་ཡང་བདེ་སྐྱིད་གླིང་བོད་ཁྱིམ་ནས་ཡིན་པ་བསྟན་འཛིན་མདུན་བཟང་ལགས་ཀྱིས། དེ་སྔ་ཁོང་ལ་རིགས་ལམ་རྩོད་དུས་དཀའ་ངལ་འཕྲད་ཡོད་ཀྱང་། ད་ལྟའི་ཆར་དེར་དགའ་བ་སྐྱེས་ཤིང་། རིགས་ལམ་བརྒྱུད་སློབ་ཚན་མང་དག་ཅིག་ཁ་གསལ་དུ་འགྲོ་ཞིང་། རང་ཉིད་ཀྱི་ངག་ནས་ཀྱང་ཚིག་ཁ་གསལ་དང་སྒྲ་དག་པོ་ཡོང་བར་ཕན་ཐོགས་ཤིན་ཏུ་ཆེབས།་མ་འོངས་ཁོང་མཐོ་སློབ་འགྲིམ་སྐབས་སུའང་རིགས་ལམ་མུ་མཐུད་བཀོལ་སྤྱོད་གནང་རྒྱུ་ཡིན་ཞེས་གསུང་གི་འདུག བོད་པའི་སློབ་གྲྭ་ཁག་ཏུ་རིགས་ལམ་གྱི་ཐོག་ནས་སློབ་གཉེར་གནང་པའི་ལམ་སྲོལ་དེ་དར་ཁྱབ་བྱུང་ཞིང་། འདས་པའི་ལོ་ངོ་ ༡༤ ལྷག་གི་རིང་ལ་འཚོགས་བཞིན་པའི་རིགས་ལམ་གྱི་འདུ་འཛོམས་ཆེན་མོ་ཞིག་བཞུགས་སྒར་རྡ་སའི་ཉེ་འདབས་སུ་ཆག་པའི་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་འཚོགས་ཡོད་ལ། རྡ་ས་དང་མ་སུ་རི་ས་ཁོངས་ཀྱི་ནང་དུ་གཏོགས་པའི་གཏན་ཉིན་སློབ་གྲྭ་ཁག་བཅོ་ལྔ་ནས་སློབ་མ་གྲངས་ ༡༡༥ ཙམ་གྱིས་མཉམ་ཞུགས་གནང་སྟེ་སློབ་གྲྭ་སོ་སོའི་ནང་སློབ་འཁྲིད་གནང་བའི་ཨང་རྩིས་དང་ཚན་རིག་གཉིས་ཀྱི་སློབ་ཚན་ཐོག་རྟགས་གསལ་གྱི་ལམ་ནས་རྩོད་འགྲན་གནང་འདུག་ལ། རིགས་ལམ་འདུ་འཛོམས་དེ་ཡང་ཕྱི་ལོ་ ༢༠༡༢ ནས་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱིས་དབུ་འཛུགས་གནང་བ་ཞིག་རེད་འདུག རྩ་བའི་རྒྱ་ནག་གཞུང་གིས་བོད་ནང་དུ་བོད་པའི་སྐད་ཡིག་དང་ཆོས་རིག་སློབ་སྦྱོང་དང་ཉམས་ལེན་བྱེད་པར་འགོག་རྐྱེན་དང་། རྒྱ་ནག་གི་ངོ་བོར་བསྒྱུར་བའི་སྲིད་བྱུས་སྤེལ་བཞིན་པ་དང་། དེ་ཡང་ཉེ་བའི་ཆར་རྒྱ་ནག་གཞུང་གིས་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ལག་བསྟར་བྱེད་འགོ་བཙུགས་པའི་ཁྲོད་བོད་མི་རིགས་ཀྱི་ངོ་བོ་རྩ་བརླག་གཏོང་ཉེན་ཡོད་པར་བརྗོད་བཞིན་པའི་སྐབས་འདིར། བཙན་བྱོལ་བོད་པའི་སློབ་གྲྭ་ཁག་ཏུ་དེང་དུས་ཀྱི་ཚན་རྩིས་རིག་གནས་སོགས་དང་འབྲེལ་བའི་སློབ་སྦྱོང་རྣམས། བོད་ཀྱི་སྲོལ་རྒྱུན་སྦྱང་སྲོལ་ཅན་དུ་བསྒྱུར་ཏེ་དེང་རབས་ཀྱི་སློབ་ཚན་རྣམས་བོད་མིའི་ངོ་བོ་ཅན་དུ་འགྱུར་བའི་དུས་ཚིགས་ཤིག་ཆགས་ཀྱི་ཡོད་པ་རེད།། པར་ལེན་དང་བརྙན་པར་སྒྲིག་སྦྱོར་བ། བསྟན་འཛིན་དོན་ཡོད།

RFA Tibetan ▶ Clip ༸གོང་ས་མཆོག

ཕྱི་ལོ་ ༢༠༢༦ ཟླ་ ༨ ཚེས་ ༢༣ ཉིན་༧གོང་ས་༧སྐྱབས་མགོན་ཆེན་པོ་མཆོག་གིས་ལ་དྭགས་མང་སྤྲོ་དབྱར་ཆོས་ཆེན་མོར་དབུ་བཞཊ་མཛད་པ།

RFA Tibetan ༸གོང་ས་མཆོག

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༢༦ ཟླ་ ༨ ཚེས་ ༢༣ ཉིན་ལ་དྭགས་དབྱར་ཆོས་ཆེན་མོ་ཐེངས་ ༡༢ པ་ལ་དྭགས་མང་སྤྲོ་དགོན་དུ་ཚོགས་ཡོད་པ་དེར་ཚོགས་མགོན་དུ་ཆིབས་བསྒྱུར་བཀའ་དྲིན་བསྐྱངས་བའི་སྐབས་བཀའ་སློབ་བསྩལ་བའི་ནང་བོད་ཀྱི་ཆོས་དང་རིག་གཞུང་། དེ་བཞིན་སྐད་བཅས་དེང་གི་དུས་རབས་ ༢༡ པའི་འཛམ་གླིང་ནང་དོ་སྣང་དང་བེད་སྤྱོད་ཆེན་པོ་བྱུང་བཞིན་ཡོད་པ་དེར་བོད་ཀྱི་མི་རབས་གོང་མ་རྣམས་ཀྱི་བཀའ་དྲིན་དྲན་དགོས་པའི་སྐོར་བཀའ་བསྩལ་གནང་སོང་། དེ་ཡང་༧གོང་ས་༧སྐྱབས་མགོན་ཆེན་པོ་མཆོག་གིས་བཀའ་བསྩལ་དོན་དུ། བཅོམ་ལྡན་འདས་ཀྱི་གསུང་རྣམས་ནི་དཔལ་ན་ལན་དྲ་ནས་བརྒྱུད་དེ། བོད་ཆོལ་ཁ་གསུམ་གྱི་ནང་དུ་ནང་ཆོས་ཀྱི་ལྟ་བ་དང་རིག་པ་རྣམས་བརྟག་དཔྱད་ཞིབ་རྩད་དང་མཉམ་བོད་ཀྱི་སེ་འབྲས་དགའ་གསུམ་གྱི་ནང་དུ་ནང་པའི་གཞུང་ཆེན་རྣམས་སློབ་ཁྲིད་དང་སྦྱང་པ་ཞེ་དྲགས་ཡོད་པ། ཡང་བོད་ཀྱི་རིག་གཞུང་འདི་ཉིད་རྒྱ་ཆེན་པོ་ཞིག་ཡིན་པ་གསུངས་སོང་། ཡང་དེ་དག་དེང་སང་ཚན་རིག་པ་མང་པོ་ཞིག་གིས་༧མགོན་པོ་མཆོག་དང་གྲོས་བསྡུར་བྱུང་གི་ཡོད་པ། དེ་བཞིན་རྒྱ་ནག་ནང་དུ་ནང་ཆོས་ལ་དོ་སྣང་ཆེ་རུ་འགྲོ་ཡི་ཡོད་ཅིང་། ནང་ཆོས་ལ་སྦྱང་བརྩོན་ཉམས་གསོ་ཤུགས་ཆེ་རུ་འགྲོ་ཡི་ཡོད་པ་སོགས་ཀྱི་བརྒྱུད་ང་ཚོ་བོད་ཀྱི་རིག་གཞུང་དེ་ཉིད་འཛམ་གླིང་ནང་ཁྱབ་ཆེ་རུ་འགྲོ་བཞིན་ཡོད་པ་གསུངས་སོང་། ཕྱི་ལོ་ ༢༠༢༦ ཟླ་ ༨ ཚེས་ ༢༣ ཉིན་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་དྭགས་མང་སྤྲོ་དབྱར་ཆོས་ཆེན་མོར་དབུ་བཞུགས་སླད་ཆིབས་སྒྱུར་བསྐྱངས་པ། ཡང་དུས་རབས་ཉེར་གཅིག་པའི་ནང་པ་ཞིག་བྱེད་པར་རིགས་ལམ་སློབ་གཉེར་གནང་བ་དང་ཚན་རིག་གི་སྒོ་ནས་ནང་པ་ཞིག་བྱེད་དགོས་པའི་ཐོག་༧མགོན་པོ་མཆོག་ནས་ལ་དྭགས་སུ་ཡང་ནས་ཡང་དུ་བཀའ་སློབ་བསྩལ་བ་དེར་མི་མང་ནས་བཀའ་གསུང་ཅི་སྒྲུབ་ཞུ་ཕྱིར་དེ་རིང་ལ་དྭགས་ཀྱི་སློབ་གྲྭ་འདྲ་མིན་གྱི་སློབ་ཕྲུག་དང་མང་སྤྲོ་དགོན་གྱི་གྲྭ་བཙུན་རྣམས་ནས་རིགས་ལམ་གྱི་ཐོག་ནས་མཆོད་འབུལ་ཞུས་ཡོད་པའི་སྐོར་ལ་དྭགས་མང་སྤྲོ་དབྱར་ཆོས་ཆེན་མོའི་གོ་སྒྲིག་ཚོགས་ཆུང་གི་ཚོཊ་མི་འཇམ་དབྱངས་ཚེ་རིང་རྣམས་རྒྱལ་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་གི་གསར་འགོད་པར་གསུངས་བྱུང་། ཡང་ལ་དྭགས་མང་སྤྲོ་དགོན་དེ་བཞིན་ལ་དྭགས་ས་གནས་སུ་དཔལ་ས་སྐྱ་པའི་ཆོས་རྒྱུད་འཛིན་མཁན་དགོན་པ་ཁོ་ན་དེ་ཆགས་གི་ཡོད་པ་བཞིན་ད་རེས་དབྱར་ཆོས་ཆེན་མོར་ས་སྐྱ་པའི་བློ་སྦྱོང་ཚུལ་ཞེན་པ་བཞི་བྲལ་གྱི་ཐོག་ལ་ཉིན་གཅིག་གི་བགྲོ་གླེང་ཞིག་གོ་སྒྲིག་ཞུས་ཡོད་པ་མང་སྤྲོ་དགོན་པའི་མཁན་པོ་འཕྲིན་ལས་ཆོས་གསལ་ལགས་ཀྱིས་གསུངས་བྱུང་། ཕྱི་ཟླ་ ༨ ཚེས་ ༢༡ ནས་ ༢༣ བར་མང་སྤྲོ་དགོན་དུ་དབྱར་ཆོས་ཆེན་མོ་ཐེངས་ ༡༢ པ་ཚོགས་ཡོད་པ་རེད། (RFA Tibetan) ཡང་རིགས་ལམ་སྦྱང་རྒྱུ་དང་མཉམ་བླ་མ་རིན་པོ་ཆེ་དང་སངས་རྒྱས་མཇལ་རྒྱུ་རེད། དེ་བཞིན་སྔོན་མ་ནས་རིགས་ལམ་སྦྱང་ཚར་ཡིན་དུས་ལས་སླ་རུ་འགྲོ་ཡི་ཡོད་པ་དང་། རིགས་ལམ་སྦྱང་རྗེས་གཙོ་བོ་དྲི་བ་ལ་ལན་འདེབས་མགྱོགས་པོ་མགྱོགས་པོ་བྱེད་ཐུབ་པ་དང་དེའི་བརྒྱུད་བསམ་བློ་མགྱོགས་པོ་བཏང་ཐུབ་ཀྱི་ཡོད་པ་སོགས་དབྱར་ཆོས་ཆེན་མོ་དེ་ཉིད་ཕན་ཐོགས་ཆེན་པོ་བྱུང་ཡོད་པ་སློབ་གྲྭའི་སློབ་ཕྲུག་ཡིན་པ་བསྟན་འཛིན་འགྲོ་ཕན་ལགས་ཀྱིས་གསུངས་བྱུང་། ལ་དྭགས་དབྱར་ཆོས་ཆེན་མོ་ཐེངས་ ༡༢ པ་དེ་བཞིན་ལ་དྭགས་མང་སྤྲོ་དགོན་དུ་ཉིན་གསུམ་རིང་ཚོགས་པའི་སྐབས་གཙོ་བོ་སློབ་གྲྭ་འདྲ་མིན་གྱི་སློབ་ཕྲུག་རྣམས་ནས་རིགས་ལམ་སློབ་གཉེར་གནང་རྒྱུ་དང་དེང་སང་ལ་དྭགས་ཀྱི་སྤྱི་ཚོགས་ནང་དུག་རྫས་བཀོལ་སྤྱོད་སོགས་ཀྱི་དཀའ་ངལ་འདྲ་མིན་འཕྲད་བཞིན་ཡོད་པ་བཅས་ཀྱི་ཐོག་ལ་བཀའ་སློབ་ལམ་སྟོན་གྱི་ལས་རིམ་འདྲ་མིན་སྤེལ་བཞིན་ཡོད་འདུག པར་ལེན་དང་བརྙན་པར་སྒྲིག་སྦྱོར་བ། འཕྲིན་ལས་ཆོས་སྒྲོན། བརྙན་ཐུང་སྒྲིག་སྦྱོར་བ། བཀྲ་དབང་།

RFA Tibetan བཙན་བྱོལ།

རྒྱ་གར་གྱི་ལུ་དྷི་ཡ་ནར་པཎ་འཇབ་ཚོང་པ་མང་པོས་བློ་དགའ་རང་བཙན་ལཊ་སུ་རྗེས་དྲན་གྱི་ལས་འགུལ་ནང་མཉམ་ཞུགས་གནང་པ། ང་ཚོས་བོད་ལ་རང་དབང་མ་ཐོབ་ཀྱི་བར་དུ་གོམས་པ་མདུན་སྤོས་ཀྱི་འབད་བརྩོན་བྱ་རྒྱུའི་དམ་བཅའ་བཞག་དགོས་པ་རེད་ཅེས་རྒྱ་གར་གྱི་པན་ཇབ་མངའ་སྡེའི་གྲོང་ཁྱེར་ལུ་དྷི་ཡ་ན་ས་གནས་འཕགས་བོད་མཛའ་འབྲེལ་ཚོགས་པའི་ཚོགས་གཙོ་ན་ཝིན་སུདྷ་ལགས་ཀྱིས་ཕྱི་ཟླ་ ༨ ཚེས་ ༢༢ ཉིན་གྲོང་ཁྱེར་དེའི་ནང་བོད་དོན་ཆེད་ཞི་བའི་རྔམ་སྟོན་ཁྲོམ་སྐོར་གྱི་ལས་འགུལ་སྤེལ་སྐབས་གསུང་གནང་འདུག་ལ། ཁོང་གིས་སྐབས་དེར་མུ་མཐུད་གསུངས་དོན་དུ། རྒྱ་ནག་གི་དམག་མིས་བོད་ནང་བཙན་འཛུལ་བྱེད་སྐབས་རྒྱ་གར་གྱི་རོགས་སྐྱོར་བྱས་ཡོད་ན་ད་ལྟ་རྒྱ་གར་གྱི་བདེ་འཇགས་ཀྱི་ཐོག་དཀའ་ངལ་ཡོང་ཐབས་མེད་པ་རེད། ད་ལྟ་ཡིན་ཡང་བོད་ལ་རང་དབང་ཐོབ་རྒྱུ་ནི་རྒྱ་གར་གྱི་བདེ་འཇགས་ཀྱི་གནད་དོན་ཐོག་ནས་གནད་འགག་ཅིག་རེད་ཅེས་གསུངས་འདུག བོད་མིའི་སུད་ཚོང་པའི་ཚོང་ཟོག་འདོན་ཡུལ་གྱི་གྲོང་ཁྱེར་ལུ་དྷི་ཡ་ནར་རྔམ་སྟོན་ལས་འགུལ་སྤེལ་བ། ༢༠༢༦།༨།༢༢ (བོད་ཀྱི་གཞོན་ནུ་ལྷན་ཚོཊ།) ཡང་ལུ་དྷི་ཨ་ན་ལ་ལ་ (ཚོང་པ་) དང་བོད་ཀྱི་ཚོང་པ་ཚོགས་པའི་ཚོགས་གཙོ་གྷོ་ཌི་ཅའོ་ལཱ་ལགས་ཀྱིས་གསུངས་དོན་དུ། རྒྱ་ནག་གིས་བོད་ནང་བདུད་ལྟ་བུའི་སྡུག་རྩུབ་ཅན་གྱི་བྱ་སྤྱོད་སྤེལ་རྒྱུ་དེ་དག་མཚམས་འཇོག་བྱེད་དགོས་པ་རེད་ཅེས་དང་ང་ཚོ་ཚོང་པར་ལ་ལ་ཚང་མ་ཁྱེད་ཚོ་བོད་མི་ཚོའི་རྒྱབ་ཏུ་ལངས་ཡོད། ངོས་རང་ཉིད་རིང་མིན་རྒྱ་གར་གྲོས་ཚོགས་ཀྱི་འཐུས་མིའི་འོས་བསྡུའི་སྐབས་འོས་མིར་ལང་རྒྱུ་ཡིན། གལ་སྲིད་ང་ལ་རྒྱལ་ཁ་ཐོབ་པ་ཡིན་ན་རྒྱ་གར་གྲོས་ཚོགས་ཀྱི་ནང་བོད་དོན་གླེང་རྒྱུ་ཡིན་ཞེས་གསུངས་འདུག རྒྱ་གར་གྱི་གྲོང་ཁྱེར་ལུ་དྷི་ཡ་ནར་སྤེལ་བའི་ལས་འགུལ་དེ་ནི་བྷན་དྷ་ར་ས་གནས་བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲོག་འོག་བོད་ནང་གི་ད་ལྟའི་གནས་སྟངས་སྤྱི་དང་ལྷག་པར་བློ་དགའ་རང་བཙན་ལགས་ཀྱིས་བོད་དོན་ཆེད་རང་ལུས་མེར་བསྲེགས་བཏང་པའི་གནས་སྟངས་རྣམས་རྒྱ་གར་མི་མང་སྤྱི་དང་ལྷག་པར་ལུ་དྷི་ཨ་ནའི་རྒྱ་གར་མི་མང་ཚོར་ངོ་སྤྲོད་དང་། བོད་དོན་ཐོག་དོ་སྣང་འགུག་རྒྱུ་དང་གོ་རྟོགས་སྤེལ་རྒྱུའི་ཆེད་དུ་དམིགས་པ་བྷན་དྷ་ར་ས་གནས་གཞོན་ནུ་ལྷན་ཚོགས་ཀྱི་ཚོགས་གཙོ་བློ་བཟང་ལགས་ཀྱིས་གསུངས་བྱུང་། ལུ་དྷི་ཡ་ནར་བོད་དོན་ངོ་རྒོལ་ནང་ཞུགས་པ། ༢༠༢༦།༨།༢༢ (བོད་ཀྱི་གཞོན་ནུ་ལྷན་ཚོཊ།) རྒྱ་གར་ལུ་དྷི་ཡ་ན་ལ་ལ་ཚོང་པ་ཚོ་དང་བོད་མི་ཚོང་པ་ཚོའི་དབར་འདས་ལོ་ངོ་ ༧༠ ཙམ་རིང་ཕན་ཚུན་དབར་དངུལ་སྤྲོད་ལེན་གྱི་གན་རྒྱ་བཞག་མི་དགོས་པར་ཡིད་ཆེས་ཀྱི་ཚོང་འབྲེལ་ཡོད་པ་དེ་མུ་མཐུད་རྒྱུད་འཛིན་བྱེད་བཞིན་ཡོད་སྐོར་ད་བར་ལོ་ངོ་ ༣༡ རིང་བལ་གོས་ཀྱི་ཚོང་དོན་གཉེར་བཞིན་པ་དང་ད་ལྟ་བཙན་བྱོལ་བོད་མིའི་ཚོང་པའི་ལྷན་ཚོགས་ཀྱི་རྒྱུན་ལས་ཡིན་པ་བསྟན་འཛིན་མཁྱེན་རབ་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་། ལས་འགུལ་དེའི་ནང་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཞོན་གྱིས་གཙོས་རྒྱུན་ལས་རྣམ་པ་དང་རྒྱ་གར་བྱང་ཕྱོགས་པོན་ཌོ་ས་གནས་ཀྱིས་གཙོས་ས་གནས་ཁག་མང་པོ་ཞིག་ནས་བོད་མི་དང་རྒྱ་གར་ལུ་དྷི་ཡ་ན་ལ་ལ་བཅས་མཉམ་ཞུགས་གནང་ཡོད་པ་དང་། ཚེས་༢༠་ཉིན་ལུ་དྷི་ཡ་ནར་བཙན་བྱོལ་བོད་མིའི་ཚོང་པའི་ལྷན་ཚོགས་ཀྱིས་བློ་དགའ་རང་བཙན་ལགས་ཀྱི་ཞེ་དགུའི་དུས་ཚིགས་ལ་བསྔོ་སྨོན་མཆོད་འབུལ་ཡང་གནང་ཡོད་པ་རེད།། བརྙན་པར་སྒྲིག་སྦྱོར་བ། པདྨ་དངོས་གྲུབ།

RFA Tibetan ▶ Clip བཙན་བྱོལ།

རྒྱ་གར་ཀྱི་གྲོས་ཚོགས་འཐུས་མི་ཞིག་གིས་རྒྱ་ནག་གིས་མི་རིགས་མཐུན་སྒྲིལ་གྱི་ཁྲིམས་ལག་བསྟར་ཐད་ཉེན་བརྡ་བཏང་པ།

RFA Tibetan བཙན་བྱོལ།

རྒྱ་གར་ཀྱི་གྲོས་ཚོགས་འཐུས་མི་ཞིག་གིས་རྒྱ་ནག་གིས་མི་རིགས་མཐུན་སྒྲིལ་གྱི་ཁྲིམས་ལག་བསྟར་བྱེད་བཞིན་པའི་སྐབས་འདིར། རྒྱ་གར་གཞུང་ལ་བཙན་བྱོལ་བོད་མིའི་རང་དབང་དང་བདེ་འཇགས་སྲུང་དགོས་ཞེས་འབོད་སྐུལ་ཞུས་འདུག རྒྱ་གར་གྱི་རྒྱལ་ས་ལྡི་ལིར་ཆར་དུས་་གྲོས་ཚོགས་འཚོགས་བཞིན་པ་དང་བསྟུན་བོད་མི་མང་སྤྱི་འཐུས་སྐུ་ཚབ་ཚོགས་ཆུང་ཞིག་དང་བོད་དོན་ཞུ་གཏུག་མཐུན་ཚོགས་ཀྱིས་རྒྱ་གར་གྲོས་ཚོགས་འཐུས་མི་མང་དག་ཅིག་ལ་བོད་དོན་ཞུ་གཏུག་གནང་བའི་རྗེས། མ་ཧ་རཤ་ཏྲ་མངའ་སྡེ་ནས་ཡིན་པའི་རྒྱ་གར་གྲོས་ཚོགས་འཐུས་མི་ཝར་ཤ་ ཨེཀ་ནཐ་ གྷཡེཀ་ཝཌ་ (Varsha Eknath Gaikwad) ལགས་ཀྱིས་རྒྱ་ནག་གཞུང་གིས་གཏན་འབེབས་ལག་བསྟར་བྱེད་བཞིན་པའི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་དེས་བོད་མིའི་རང་དབང་ལ་རྡོག་རོལ་གཏོང་སྲིད་པའི་སེམས་འཚབ་གསལ་སྟོན་གྱི་ཞུ་ཡིག་ཅིག་རྒྱ་གར་ཕྱི་སྲིད་བློན་ཆེན་ཇཡེ་ཤང་ཀར་ (S. Jaishankar) ལགས་དང་ནང་སྲིད་བློན་ཆེན་ ཨ་མིཏ་ ཤཱ་ (Amit Shah) གཉིས་ལ་ཕུལ་འདུག རྒྱ་གར་གཞུང་ལ་བཙན་བྱོལ་བོད་མིའི་རང་དབང་དང་བདེ་འཇཊ་སྲུང་དགོས་པ་གྲོས་ཚོཊ་འཐུས་མིས་འབོད་སྐུལ་ཞུས་འདུག གྲོས་ཚོགས་འཐུས་མི་ཝར་ཤ་ ཨེཀ་ནཐ་ གྷཡེཀ་ཝཌ་ (Varsha Eknath Gaikwad) ལགས་ཀྱིས་ཕུལ་བའི་ཞུ་ཡིག་དེའི་ནང་། རྒྱ་ནག་གཞུང་གིས་ལག་བསྟར་བྱེད་བཞིན་པའི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་དེས། རྒྱལ་མཚམས་བརྒལ་བའི་དྲག་གནོན་ཡོང་སྲིད་པའི་ཉེན་ཁ་ཡོད་པའི་སྐབས་འདིར། རྒྱ་གར་ནང་དུ་གནས་སྡོད་བྱེད་བཞིན་པའི་བོད་མི་རྣམས་ཀྱི་བདེ་འཇགས་དང་རང་དབང་ལའང་དམིགས་བསལ་ཉེན་ཁ་ཡོད་པས། རྒྱ་གར་གཞུང་ངོས་ནས་རྒྱ་ནག་གི་ཁྲིམས་ཡིག་དེའི་བརྒྱུད་བོད་མི་བཙན་བྱོལ་བ་རྣམས་ལ་དོ་ཕོག་གང་འགྲོ་སྲིད་པའི་ཐད་ཞིབ་འཇུག་དགོས་པའི་སྐུལ་བ་གནང་ཞིང་། རྒྱལ་སྤྱིའི་སྤྱི་ཚོགས་ཁྲོད་རྒྱ་ནག་གཞུང་གིས་བོད་མིའི་འགྲོ་བ་མིའི་ཐོབ་ཐང་རྡོག་རོལ་དང་རིག་གཞུང་རྩ་གཏོར་བཞིན་པ་རྣམས་ཀྱི་སྐོར་ལ་བཀའ་མོལ་གནང་དགོས་པའི་སྐུལ་མ་གནང་འདུག གཞན་ཡང་ཁོང་གིས། རྒྱ་གར་ནི་འགྲོ་བ་མིའི་ཐོབ་ཐང་དང་དྲང་བདེན་ལ་རྒྱབ་སྐྱོར་བྱེད་མཁན་དང། མནར་གཅོད་མྱོང་མཁན་རྣམས་སྲུང་སྐྱོབ་བྱེད་མཁན་གྱི་རྒྱལ་ཁབ་ཞིག་ཡིན་ཞིང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་བཙན་བྱོལ་བོད་མི་རྣམས་ལ་སྐྱབས་བཅོལ་གྱི་གནས་བབ་ཕུལ་ཡོད་པ་ལྟར། ད་ཆ་བོད་མི་རིགས་ཀྱི་ཐོབ་ཐང་དང་རིག་གཞུང་དང་ངོ་བོ། རང་དབང་བཅས་ཀྱི་གནད་དོན་ལ་ཁུ་སིམ་མི་སྡོད་པར་དབུས་གཞུང་གིས་དེ་འབྲེལ་ལངས་ཕྱོགས་གསལ་པོ་ཞིག་འཛིན་དགོས་པ་སོགས་གསུངས་འདུག མི་རིགས་མཐུན་སྒྲིལ་ཡར་ཐོན་སྐུལ་སྤེལ་ཟེར་བའི་ཁྲིམས་ཡིག་དེའི་བརྒྱུད་ཤུགས་སུ་འཕགས་བོད་ས་མཚམས་དང་འབྲེལ་བའི་གནད་དོན་ལ་དོ་ཕོག་འགྲོ་སྲིད་པ་འགྲེལ་བརྗོད་དང་སྦྲགས། ཁྲིམས་ཡིག་དེར་བརྟེན་ཉེ་ལམ་བློ་དགའ་རང་བཙན་ལགས་ཀྱིས་རྒྱལ་ཚོགས་ཀྱི་མདུན་དུ་རང་ལུས་མེར་བསྲེགས་གནང་བ་སོགས། ཁྲིམས་ཡིག་དེས་མི་མང་པོའི་སེམས་ཁོངས་ལ་རྨ་ཁ་བཟོས་ཡོད་པ་སོགས་འཁོད་འདུག འདི་ག་ཨེ་ཤེ་ཡ་རང་དབང་རླུང་འཕྲིན་ཁང་གིས་གྲོས་ཚོགས་འཐུས་མི་ཝར་ཤ་ ཨེཀ་ནཐ་ གྷཡེཀ་ཝཌ་ (Varsha Eknath Gaikwad) ལགས་ལ་ཕྱག་བྲིས་དེར་ལན་འདེབས་བྱུང་ཡོད་མིན་སོགས་ཀྱི་སྐོར་བཀའ་འདྲི་ཞུ་ཆེད་འབྲེལ་བ་མཐུད་ཐབས་བྱས་ཀྱང་། ད་བར་བཀའ་ལན་བྱུང་མ་སོང་། རྒྱ་གར་གྲོས་ཚོཊ་འཐུས་མི་ཝར་ཤ་ལགས་ཀྱིས་དབུས་གཞུང་ཕྱི་སྲིད་བློན་ཆེན་ལ་ཕུལ་བའི་ཕྱག་བྲིས། (Varsha Gaikwad via X) རྩ་བའི་ཟླ་འདིའི་ཚེས་ ༣ ནས་ ༧ བར་རྒྱ་གར་གྱི་རྒྱལ་ས་ལྡི་ལིར་བོད་མིའི་གཞུང་འབྲེལ་མ་ཡིན་པའི་ཚོགས་པ་ལྔ་ལས་གྲུབ་པའི་བོད་དོན་ཞུ་གཏུག་མཐུན་ཚོགས་ཀྱིས་རྒྱ་གར་གྲོས་ཚོགས་འཐུས་མི་རྣམས་ལ་བོད་དོན་ཞུ་གཏུག་གནང་བའི་ཁྲོད། གྲོས་ཚོགས་འཐུས་མི་ (Varsha) ལགས་ལ་ཆེད་བཅར་གྱིས་རྒྱ་ནག་གཞུང་གིས་མི་རིགས་མཐུན་སྒྲིལ་ཡར་ཐོན་སྐུལ་སྤེལ་ཟེར་བའི་ཁྲིམས་ཡིག་བརྒྱུད་བོད་ཀྱི་ཆོས་དང་རིག་གཞུང་། སྐད་ཡིག་སོགས་རྩ་མེད་དུ་གཏོང་ཐབས་ཀྱི་སྲིད་བྱུས་ཤིག་ཡིན་ཞིང། ཁྲིམས་ཡིག་དེ་ལག་བསྟར་བྱེད་འགོ་བཙུགས་ནས་ཉིན་གཅིག་གི་རྗེས་སུ་བློ་དགའ་རང་བཙན་ལགས་ཀྱིས་རང་ལུས་མེར་བསྲེགས་གནང་ཡོད་པའི་གནས་སྟངས་སོགས་ཞིབ་ཕྲ་སྙན་གསེང་ཞུས་ཡོད་པ་རྒྱལ་སྤྱི་བོད་དོན་འབྲེལ་མཐུད་ཁང་གི་ཉམས་ཞིབ་པ་བློ་བཟང་དབྱངས་མཚོ་ལགས་ཀྱིས་འདི་ག་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་། བོད་མི་མང་སྤྱི་འཐུས་སྐུ་ཚབ་ཚོགས་ཆུང་གིས་རྒྱ་གར་གྲོས་ཚོགས་འཐུས་མི་ ༤༣ ལ་དོན་ཚན་ལྔ་ཅན་གྱི་བོད་དོན་ཞུ་གཏུག་གནང་རྗེས། སྤྱི་འཐུས་རྣམས་ཀྱིས་བོད་དོན་ཞུ་གཏུག་གནང་སའི་རྒྱ་གར་གྲོས་ཚོགས་འཐུས་མི་ཁག་ཅིག་གིས་སྤྱི་ཚོགས་དྲྭ་ལམ་ཐོག བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་དང་བཀའ་མོལ་བྱུང་བ་དེས་ཕྱོགས་གཉིས་དབར་བསམ་ཤེས་དང་མཉམ་ལས་གོང་འཕེལ་ཡོང་བར་ཕན་ཐོགས་བྱུང་ཡོད་ཅིང་། རྒྱ་གར་ནི་བོད་མི་རིགས་ཀྱི་གཏན་གྲོགས་ཤིག་ཡིན་ཞིང་། རྒྱ་གར་དང་བོད་པའི་སྤྱི་ཚོགས་དབར་འགྱུར་བ་མེད་པའི་འབྲེལ་བ་ཞིག་ཡོད་པ་སོགས་གསུངས་འདུག བརྙན་པར་སྒྲིག་སྦྱོར་བ། བསྟན་འཛིན་དོན་ཡོད།

RFA Tibetan ▶ Clip བཙན་བྱོལ།

བློ་དགའ་རང་བཙན་ལགས་ཀྱི་ཆེད་གཞུང་འབྲེལ་གྱི་མཆོད་འབུལ་དང་གོམ་བགྲོད་གནང་པ།

RFA Tibetan ▶ Clip བཙན་བྱོལ།

བློ་དགའ་རང་བཙན་ལགས་ཀྱི་ཆེད་གཞུང་འབྲེལ་གྱི་མཆོད་འབུལ་དང་གོམ་བགྲོད་གནང་པ།

RFA Tibetan བཙན་བྱོལ།

བློ་དགའ་རང་བཙན་ལཊ་ཀྱིས་རང་ལུས་མེར་བསྲེགས་གནང་སྟེ་འདས་གྲོངས་སུ་གྱུར་ཏེ་ཞག་ ༤༩ འཁོར་བར་བཀའ་ཤག་དང་སྤྱི་འཐུས་ལྷན་ཚོགས་ཟུང་སྦྲེལ་གྱི་གཞུང་འབྲེལ་མཆོད་འབུལ་དང་ཞི་བའི་གོམ་བགྲོད་གནང་པ། བློ་དགའ་རང་བཙན་ལགས་ཀྱིས་སྐུ་ལུས་མེར་བསྲེགས་གནང་སྟེ་བདུན་ཚིགས་བདུན་པ་འཁེལ་གྱི་ཡོད་སྟབས་དམ་པ་ཁོང་ཉིད་དང་། བོད་ཕྱི་ནང་གཉིས་སུ་བསྟན་སྲིད་མི་རིགས་ཀྱི་ཆེད་དུ་ལུས་སྲོག་ལོངས་སྤྱོད་བློས་གཏོང་གནང་མཁན་རྣམ་པར་གདུང་སེམས་མཉམ་སྐྱེད་དང་། མྱ་ངན་གུས་འདུད། རྒྱ་ནག་གི་མི་རིགས་མཐུན་སྒྲིལ་གྱི་ཁྲིམས་ལ་ངོ་རྒོལ་མཚོན་ཕྱིར། བཀའ་སྤྱི་གཉིས་ཐུན་མོང་གིས་གོ་སྒྲིག་འོག སྔ་དྲོར་ཐེག་ཆེན་ཆོས་གླིང་གཙུག་ལག་ཁང་དུ་མཆོད་འབུལ་སྨོན་ལམ་དང་། དེ་རྗེས་རྡ་ཤོད་ཉེན་རྟོག་པའི་ཐང་བར་ཞི་བའི་གོམ་བགྲོད་གནང་སོང་། གཞུང་འབྲེལ་མཆོད་འབུལ་དང་གོམ་བགྲོད་སྐབས། ༢༠༢༦།༨།༢༠ (RFA Tibetan) ཐེངས་འདིར་སྲིད་སྐྱོང་སྤེན་པ་ཚེ་རིང་ལགས་ཀྱིས་བཀའ་ཤག་གི་གསུང་འཕྲིན་སྒྲོག་སྦྱང་གནང་བའི་ནང་། རྒྱ་ནག་གི་མི་རིགས་མཐུན་སྒྲིལ་གྱི་ཁྲིམས་ཡིག་དེའི་དམིགས་འབེན་རྣམས་དུས་ཡུན་ངེས་ཅན་ནང་མཇུག་འབྲས་ཇི་ལྟར་ཐོན་མིན་ནི་གཞིས་བྱེས་བོད་མི་ཚོས་ངན་བྱུས་དེ་ལམ་དུ་མི་འགྲོ་བའི་ཁ་གཏད་གདོང་ལེན་ཇི་ལྟར་བྱེད་ཐུབ་མིན་དང་། རྒྱལ་སྤྱིའི་སྤྱི་ཚོགས་ནས་ང་ཚོར་བདེན་པའི་དཔུང་རོགས་ཅི་ཙམ་བྱེད་ཐུབ་མིན་ལ་རགས་ལས་ཡོད་པ་གསུངས་སོང་ལ། རྒྱ་ནག་གཞུང་གིས་གཞིས་ལུས་བོད་མི་ཚོར་རྩ་གཏོར་གྱི་སྲིད་བྱུས་རྒྱུན་མཐུད་སྤེལ་བཞིན་པར་རྒྱལ་སྤྱིའི་དོ་སྣང་འདྲེན་ཆེད། ཕྱི་ལོ་ ༢༠༠༩ ནས་བཟུང་བོད་ནང་དུ་ཤེས་རྟོགས་བྱུས་བའི་བོད་མི་ ༡༥༧ ནས་རང་ལུས་མེར་བསྲེགས་གནང་སྟེ། འདས་གྲོངས་སུ་གྱུར་བ་ ༡༣༦ དང་། སྐུ་འཚོ་བཞུགས་ཡོད་པ་ ༩། གནས་སྟངས་གསལ་པོ་མེད་པ་ ༡༢ བྱུང་ཡོད་ཅིང་།་བཙན་བྱོལ་ནང་དུ་བློ་དགའ་རང་བཙན་ལགས་ཚུད་པའི་བོད་མི་ ༡༡ གིས་རང་ལུས་མེར་བསྲེགས་གནང་སྟེ། འདས་གྲོངས་སུ་གྱུར་བ་ ༩ དང་སྐུ་འཚོ་བཞུགས་ཡོད་པ་ ༢ ཡོད་བཅས་ཀྱི་ཁ་གྲངས་སོགས་གསུངས་སོང་། བོད་མི་བློས་གཏོང་གནང་མཁན་རྣམས་ལ་རྗེས་དྲན་གྱི་མཆོད་འབུལ་དང་ཞི་བའི་གོམ་བགྲོད་གནང་སྐབས། ༢༠༢༦།༠༨།༢༠ (RFA Tibetan) གཞན་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་བཀྲས་ཁང་སྒྲོལ་མ་ཚེ་རིང་ལགས་ཀྱིས། རྒྱལ་སྤྱིའི་སྤྱི་ཚོགས་ནས་བོད་ཀྱི་གནས་སྟངས་ཛ་དྲག་ཆེའི་བའི་དུས་སྐབས་འདིར་བཟང་སྤྱོད་དང་དྲང་བདེན་གྱིས་འགན་ཁུར་གནང་དགོས་པའི་དོན་ཚན་བརྒྱད་ཅན་གྱི་འབོད་སྐུལ་ཞུས་པ་དང་སྦྲགས། བློ་དགའ་རང་བཙན་ལགས་ཀྱིས་རང་ལུས་མེར་བསྲེགས་ཀྱིས་བློས་གཏོང་གནང་བ་འདིས་མཉམ་འབྲེལ་རྒྱལ་ཚོགས་དང་། སྲིད་གཞུང་ཁག མི་མང་བཅས་འཛམ་གླིང་ཡོངས་ལ་བོད་ཀྱི་དཀའ་སྡུག་རྣམས་གསལ་སྟོན་བྱས་ཏེ་རྒྱ་ནག་གཞུང་གི་སྲིད་བྱུས་ལ་གདོང་ལེན་དང་ངོ་རྒོལ་གྱིས་བོད་ཀྱི་ལོ་རྒྱུས་ནང་བོད་མིའི་བདེན་དོན་འཐབ་རྩོད་ཀྱི་ལེའུ་གསར་པ་ཞིག་ཆགས་ཡོད་ཅེས་འཁོད་འདུག བཞུགས་སྒར་དུ་གནང་བའི་ངོ་རྒོལ་སྐད་འབོད་ཀྱི་ལས་འགུལ་འདིའི་ཐོག་བོད་མི་སྟོང་ཕྲག་ཁ་ཤས་ཀྱིས་མཉམ་ཞུགས་གནང་སོང་ལ། ལས་འགུལ་དེ་བཞིན་གྲུབ་མཚམས་རྡ་ས་ས་གནས་གཞོན་ལྷན་གྱི་དྲུང་ཆེ་ཚེ་རིང་ཐར་ཕྱིན་ལགས་ཀྱིས་རྡ་ས་ནས་ལྡི་ལི་བར་ཁེར་རྐྱང་གི་གོམ་བགྲོད་ལས་འགུལ་འགོ་བཙུགས་གནང་བ་དང་འབྲེལ། ལས་འགུལ་དེའི་བརྒྱུད་གཙོ་བོ་རྒྱ་གར་གྱི་སྤྱི་ཚོགས་ཁྲོད་ཀྱི་གནད་ཡོད་མི་སྣ་དང་མཁས་ལས་པ་རྣམས་ལ་བོད་དོན་གོ་རྟོགས་སྤེལ་རྒྱུའི་དམིགས་ཡུལ་ཡོད་པ་གསུང་གི་འདུག རྡ་སར་གཞུང་འབྲེལ་གྱི་ཞི་བའི་གོམ་བགྲོད་གནང་སྐབས། ༢༠༢༦།༠༨།༢༠ (RFA Tibetan) ཀོལ་ཀ་ཏར་ངོ་རྒོལ་གནང་པ། ཕྱི་ཟླ་ ༨ ཚེས་ ༢༠ ཉིན་རྒྱ་གར་གྱི་ཀོལ་ཀ་ཏ་གྲོང་ཁྱེར་དུ་རྒྱ་ནག་གཞུང་ཚབ་ཡན་ལག་མདུན་ས་གནས་གཞོན་ལྷན་གྱི་གོ་སྒྲིག་འོག་རྔམ་སྟོན་ལས་འགུལ་གནང་སྟེ་བློ་དགའ་རང་བཙན་ལཊ་ཀྱི་རེ་འབོད་གསལ་སྟོན་གནང་འདུག ས་གནས་གཞོན་ནུའི་གོ་སྒྲིག་འོག་རྒྱ་ནག་གཞུང་ལ་ངོ་རྒོལ་དང་བློ་དགའ་རང་བཙན་ལགས་ཀྱི་ཞག་ཞེ་དགུའི་རྗེས་དྲན་གྱི་ལས་འགུལ་གནང་པ། རྒྱ་གར་བོད་དོན་རྒྱབ་སྐྱོར་བ་རུ་བི་མུ་ཁེར་ཇི་ལགས་ཀྱིས། རྒྱ་ནག་གཞུང་གིས་སྲིད་བྱུས་ལ་ངོ་རྒོལ་དང། ང་ཚོའི་དགོས་འདུན་གཙོ་བོ་ནི་བོད་ལ་རང་དབང་སྤྲོད་དགོས་པ་དང་རྒྱ་མི་བོད་ནས་ཕྱིར་ཐོན་དགོས། བོད་དེ་རང་བཙན་གཙང་མའི་རྒྱལ་ཁབ་ཅིག་རེད་ལ་མ་འོངས་པར་ཡང་བོད་དེ་རང་བཙན་གཙང་མའི་རྒྱལ་ཁབ་ཞིག་གནས་ཀྱི་རེད། ང་ཚོ་རྒྱ་གར་མི་མང་གི་བོད་དོན་ལ་རྒྱབ་སྐྱོར་མུ་མཐུད་གནང་གི་རེད། འཛམ་གླིང་ནང་གི་རྒྱལ་ཁབ་ཚང་མས་བོད་ལ་རང་དབང་ཐོབ་པའི་ཆེད་དུ་རྒྱབ་སྐྱོར་གནང་རོགས་ཞེས་འབོད་སྐུལ་ཞུ་བཞིན་ཡོད་ཅེས་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་། ད་རེས་ཀྱི་ལས་འགུལ་ནང་རྒྱ་གར་བྱང་ཤར་ཁུལ་གྱི་ས་གནས་ཁག་བཅོ་ལྔ་དང་ཨོ་རི་ས་བཅས་ནས་བོད་མི་ལས་འགུལ་བ་མི་གྲངས་ ༦༠༠ ལྷག་དང་ས་གནས་ཀྱི་རྒྱ་གར་བོད་དོན་རྒྱབ་སྐྱོར་བ་ཁག་གཅིག་ནས་མཉམ་ཞུགས་གནང་ཡོད་པ་རེད། རྒྱ་གར་ལྷོ་ཕྱོགས། སློབ་ཕྲུག་མང་པོས་བློ་དགའ་རང་བཙན་ལགས་སུ་རྗེས་དྲན་ཞུས་ཤིང་། མ་འོངས་བོད་ཀྱི་གནད་དོན་ཐོག་ལ་ལས་འགུལ་མང་ཙམ་སྤེལ་དགོས་པ་དང་རང་རང་སོ་སོའི་ངོས་ནས་བྱེད་སྒོའི་ཐད་ལ་ཁས་ལེན་ཁག་ཅིག་གནང་གི་འདུག མ་འོངས་བོད་ཀྱི་གནད་དོན་ཐོག་ལ་ལས་འགུལ་མང་ཙམ་སྤེལ་དགོས་པ་དང་རང་རང་སོ་སོའི་ངོས་ནས་བྱེད་སྒོའི་ཐད་ལ་ཁས་ལེན་ཁག་ཅིག་གནང་གི་འདུག ཨོསི་ཊརེ་ལི་ཡར་ལས་འགུལ། གཞན་ཨོསི་ཊརེ་ལི་ཡའི་བོད་དོན་ལྷན་ཚོགས་ (ATC)ཡི་གོ་སྒྲིག་འོག ཨོ་གླིང་གི་སྲིད་བློན་དང་ཕྱི་སྲིད་བློན་ཆེན་གཉིས་ཟླ་བ་རྗེས་མར་ཨ་རི་ནིའུ་ཡོག་ཏུ་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་སུ་ཕེབས་རྒྱུ་ཡིན་པའི་སྐབས་དེར། བོད་དོན་གླེང་སློང་དགོས་པ་དང་། མི་རིགས་མཐུན་སྒྲིལ་གྱི་ཁྲིམས་འོག་བོད་ཀྱི་རིག་གཞུང་རྩ་མེད་དུ་གཏོང་བཞིན་པའི་སྲིད་བྱུས་ཐེར་འདོན་དགོས་པ་སོགས་ཀྱི་དགོས་འདུན་འོག ཨོ་སི་ཀྲོ་ལི་ཡར་གནས་སྡོད་བོད་མི་དང་བོད་དོན་རྒྱབ་སྐྱོར་བ་ཚོས། ཨོསི་ཊརེ་ལི་ཡའི་ (Australia) རྒྱལ་ས་ཁེན་བྷེ་ར་ (Canberra) རྟེན་གཞི་བྱས་པའི་གྲོས་ཚོགས་མདུན་དུ་དང་རྒྱ་ནག་གཞུང་ཚབ་ཁང་གི་མདུན་དུ་བོད་མི་༥༥ནས་སྐྲ་བཞར་གྱི་ལས་འགུལ་སྤེལ་ཏེ་རྒྱ་ནག་གཞུང་ལ་ངོ་རྒོལ་དང་བློ་དགའ་རང་བཙན་ལགས་རྗེས་དྲན་ཞུས་འདུག པར་ལེན་ཕྱོགས་སྒྲིག་པ། བསྟན་འཛིན་དོན་ཡོད། པ་སངས་ཚེ་རིང་། པདྨ་དངོས་གྲུབ།

RFA Tibetan ▶ Clip བཙན་བྱོལ།

བློ་དགའ་རང་བཙན་ལགས་འདས་ནས་ཞག་ ༤༩ སོང་བའི་ཉིན་ནང་མི་ཚོས་ཨ་རིའི་ཕྱི་སྲིད་ལས་ཁུངས་སུ་ཞུ་འབོད་གནང་པ།

RFA Tibetan ▶ Clip བཙན་བྱོལ།

བློ་དགའ་རང་བཙན་ལགས་འདས་ནས་ཞག་ ༤༩ སོང་བའི་ཉིན་ནང་མི་ཚོས་ཨ་རིའི་ཕྱི་སྲིད་ལས་ཁུངས་སུ་ཞུ་འབོད་གནང་པ།

RFA Tibetan བཙན་བྱོལ།

བློ་དགའ་རང་བཙན་ལགས་འདས་གྲོངས་སུ་གྱུར་ནས་ཞག་ ༤༩ སོང་བའི་ཉིན་ནང་མི་ཚོས་ཨ་རིའི་ཕྱི་སྲིད་ལས་ཁུངས་སུ་ཁོང་གི་དགོས་འདུན་ཞུ་འབོད་རྣམས་ཞུ་སྐུལ་གནང་འདུག བློ་དགའ་རང་བཙན་ལགས་ཀྱིས་ཨ་རིའི་གྲོང་ཁྱེར་ནིའུ་ཡོག་ཏུ་ཡོད་པའི་མཉམ་འབྲེལ་རྒྱལ་ཚོགས་ཀྱི་མདུན་དུ་རང་ལུས་མེར་བསྲེགས་གནང་སྟེ་འདས་གྲོངས་སུ་གྱུར་ནས་ཞག་ ༤༩ སོང་བའི་ཉིན་ཏེ་ཕྱི་ཟླ་ ༨ ཚེས་ ༡༩ ཉིན་ཁོང་གི་ཚ་མོ་དང་གཉེན་ཉེ་གཙོ་བོར་གྱུར་བའི་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་དང་ནིའུ་ཡོག་ས་གནས་གཞོན་ནུའི་ཚོགས་གཙོ་དང་རྒྱུན་ལས། སྤྱི་ཟུར་བསྟན་འཛིན་འཇིགས་མེད་ལགས་བཅས་ཀྱིས་ཨ་རིའི་ཕྱི་སྲིད་ལས་ཁུངས་སུ་བཅར་ཏེ་ཨ་རིའི་གཞུང་གི་བོད་དོན་ཆེད་དམིགས་བསལ་འབྲེལ་མཐུད་པ་རི་ལེ་སྦརཎསི་མཆོག་དང་མཇལ་ཕྲད་ཞུས་ཤིང་། བློ་དགའ་རང་བཙན་ལགས་ཀྱི་ཞུ་འབོད་ཁག་ངོ་སྤྲོད་ཞུས་འདུག་ལ། བློ་དགའ་ལགས་ཀྱི་ཚ་མོ་བསོད་ནམས་ཆོས་སྒྲོན་ལགས་ཀྱིས ་ཨེ་ཤེ་ཡ་རང་དབང་རླུང་འཕྲིན་ཁང་ལ་ཕྱི་སྲིད་ལས་ཁུངས་སུ་མཇལ་ཕྲད་གྲུབ་མ་ཐག་འགྲེལ་བརྗོད་གནང་དོན་དུ། བོད་དོན་དམིགས་བསལ་སྐུ་ཚབ་ཀྱིས་ཨ་ཞང་ལགས་(བློ་དགའ་རང་བཙན་) གྱི་ཕ་མ་དང་སྤུན་མཆེད་ཚོར་བོད་ནང་དཀའ་ངལ་འཕྲད་ཀྱི་ཡོད་མེད་སྐོར་བཀའ་རྩད་གནང་གི་འདུག་ལ། རྒྱ་ནག་གཞུང་གིས་ཨ་ཞང་ལགས་ཀྱི་ཕ་ཡུལ་དུ་མི་མང་ཚོར་འདྲི་རྩད་བྱེད་པ་དང་། དམག་མི་སླེབས་ཏེ་དགོན་པ་སོགས་གང་སར་རྩད་ཞིབ་བྱས་ཡོད་པའི་སྐོར་གནས་ཚུལ་ཆ་ཚང་ཞུ་རྒྱུ་བྱུང་ ཞེས་འགྲེལ་བརྗོད་གནང་བྱུང་། བློ་དགའ་ལཊ་ཀྱི་གཉེན་སྤུན་དང་བོད་ཀྱི་གཞོན་ལྷན་སྐུ་ཚབ་བཅས་ཀྱིས་ཨ་རིའི་ཕྱི་སྲིད་ལས་ཁུངས་སུ་བོད་དོན་དམིགས་བསལ་འབྲེལ་མཐུད་པ་དང་མཇལ་ཕྲད་ཀྱི་བློ་དགའ་ལགས་ཀྱི་གནད་དོན་སྐོར་ཞུ་འབོད་གནང་པ། ༢༠༢༦།༠༨།༡༩ (བསྟན་འཛིན་འཇིཊ་མེད།) མཇལ་ཕྲད་འདིའི་སྐབས་བོད་མིའི་སྐུ་ཚབ་རྣམས་ཀྱིས་བློ་དགའ་རང་བཙན་ལགས་འདས་གྲོངས་སུ་གྱུར་བའི་གནས་ཚུལ་དང་། སྤྱི་ཡོངས་ཀྱི་བོད་མིའི་གནད་དོན། ལྷག་པར་ཉེ་ལམ་ཕྱི་ཟླ་ ༧ ཚེས་ ༡ ཉིན་རྒྱ་ནག་གཞུང་གིས་ལག་བསྟར་འགོ་འཛུགས་བྱས་པའི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་དེས་བོད་མི་ཚོར་ཐད་ཀར་དོ་ཕོག་ཇི་ལྟར་ཐེབས་ཀྱི་ཡོད་མེད་དང་། མི་རིགས་རྩ་མེད་བཟོ་བའི་སྲིད་བྱུས་ཤིག་ཡིན་པ་ཞུ་འབོད་གནང་འདུག དེ་ཡང་ བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ཚེ་རིང་ཆོས་འཕེལ་ལགས་ཀྱིས་གསུངས་དོན་དུ། མཇལ་ཕྲད་སྐབས་ཞུ་ཡིག་ཕུལ་བའི་ནང་དགོས་འདུན་གཙོ་བོ་གསུམ་ཡོད་པ་ནི། རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས་རང་ལུས་མེར་བསྲེགས་བཏང་པ་འདི་ཆབ་སྲིད་ཀྱི་ལས་འགུལ་ཡིན་པ་དང་། ཨ་རིའི་གཞུང་གིས་རྒྱ་ནག་གཞུང་ལ་དྲི་བ་ཐོངས་དགོས་ཤིང་། རིང་མིན་ཞི་ཅིན་ཕིང་ཨ་མི་རི་ཀའི་ནང་ཡོང་གི་ཡོད་སྟབས། སྲིད་འཛིན་ཊམཔ་མཆོག་དང་མཇལ་མོལ་ཞུས་པའི་སྐབས་ངེས་པར་དུ་བོད་ཀྱི་གནད་དོན་ཐོག་ལ་བཀའ་མོལ་གནང་དགོས་པ། དེ་བཞིན་རྒྱ་ནག་གཞུང་གིས་གཏན་འབེབས་ལག་བསྟར་བྱེད་པའི་ཁྲིམས་འདི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་མིན་པར་མི་རིགས་རྩ་བརླག་གཏོང་བའི་ཁྲིམས་ཤིག་ཡིན་པས། ཁྲིམས་འདི་ཕྱིར་འཐེན་ཡོང་བར་ཤུགས་བསྐྱོན་དགོས་པ། བོད་ནང་དཀའ་ངལ་གང་ཞིག་འཕྲད་ཀྱི་ཡོད་པ་ཡོངས་སུ་རྒྱ་ནག་གཞུང་གིས་འགན་འཁྱེར་དགོས་པ་བཅས་དོན་ཚན་གསུམ་གྱི་ཐོག་ལ་ཞུ་གཏུག་བྱས་པ་ཡིན ་ཞེས་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་། སྤྱི་ཟུར་བསྟན་འཛིན་འཇིགས་མེད་ལགས་ཀྱིས་གསུངས་དོན་དུ། བློ་དགའ་རང་བཙན་ལགས་ཀྱིས་མཉམ་འབྲེལ་རྒྱལ་ཚོགས་ཀྱི་མདུན་དུ་རང་ལུས་མེར་བསྲེགས་གནང་སྟེ་ཞག་ ༤༩ སོང་ཡང་། མཉམ་འབྲེལ་རྒྱལ་ཚོགས་ཀྱི་ཕྱོགས་ནས་སྐུ་ཚབ་གཅིག་ཀྱང་མ་ཕེབས་པ་འདིར་བློ་ཕམ་ཡོད་པ་དང་། རྒྱལ་ཚོགས་ཀྱི་སྐུ་ཚབ་མར་ལས་འགུལ་སྤེལ་ཡུལ་དུ་ཕེབས་ཏེ་བོད་མི་ཚོར་གདུང་སེམས་མཉམ་སྐྱེད་གནང་རྒྱུ་འདི་ཤིན་ཏུ་གལ་ཆེན་པོ་ཡིན་པ་ནན་ཏན་གྱིས་ཞུས་པ་ཡིན། འདིའི་ཐོག་ལ་ཁོང་གིས་ངོས་ནས་ཤུགས་བསྐྱོན་རྒྱུ་ཡིན་པ་གསུངས་བྱུང་ཞེས་དང་། རིང་མིན་མཉམ་འབྲེལ་རྒྱལ་ཚོགས་ཀྱི་ཚོགས་ཆེན་ཞིག་འཚོགས་རྒྱུ་ཡིན་པར། འདིའི་སྐབས་སུ་བོད་དོན་ཐོག་ལ་ངེས་པར་དུ་གླེང་སློང་དགོས་རྒྱུ་གལ་ཆེ་ཡིན་པ་དང་། རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱི་གནད་དོན་སྐོར་ལ་ཡང་གླེང་སློང་དགོས་པའི་འབོད་སྐུལ་ཞུས་ཡོད་ ཅེས་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་། ཨ་རིའི་ཕྱི་སྲིད་ལས་ཁུངས་ཀྱི་ལན་འདེབས། ཨ་རིའི་ཕྱི་སྲིད་ལས་ཁུངས་ལ་ཨེ་ཤེ་ཡ་རང་དབང་རླུང་འཕྲིན་ཁང་གིས་བཀའ་དྲི་ཞུས་དུས། མཇལ་ཕྲད་བྱུང་པ་འདི་ཁས་ལེན་ར་སྤྲོད་གནང་ཡང་། མཇལ་ཕྲད་སྐབས་སུ་བཀའ་མོལ་ཇི་གནང་བཀའ་འདྲི་ཞུས་པ་དེར་འགྲོ་ལུགས་ཀྱི་ཐོག་ནས་ལན་འདེབས་གནང་སྲོལ་མེད་པ་གསུངས་པ་དང་ཆབས་ཅིག ཕྱི་སྲིད་ལས་ཁུངས་ཀྱིས་ཡིག་ཐོག་ལན་འདེབས་གནང་པའི་ནང་། མགྲིན་ཚབ་པ་ཞིག་གིས། ཨ་རིས་བོད་མིའི་འགྲོ་བ་མིའི་ཐོབ་ཐང་གོང་འཕེལ་གཏོང་རྒྱུ་དང་བོད་ཀྱི་ཆོས་དང་རིག་གཞུང་། སྐད་ཡིག་ལ་རྒྱབ་སྐྱོར་གནང་རྒྱུའི་ཁས་ལེན་བྱེད་ཀྱི་ཡོད་ལ། བོད་མི་ཚོར་གཞན་གི་ཐེ་ཇུས་མེད་པར་ཆོས་ལུཊ་ཀྱི་དབུ་ཁྲིད་རང་དབང་གིས་འདེམས་སྒྲུག་དང་གུས་བཀུར་བྱེད་འཇུག་དགོས་པ་རེད་ ཅེས་ཨེ་ཤེ་ཡ་རང་དབང་རླུང་འཕྲིན་ཁང་ལ་ཕྱི་ཟླ་ ༨ ཚེས་ ༡༩ ཉིན་ལན་འདེབས་གནང་བྱུང་། ཨེ་ཤི་ཡ་རང་དབང་རླུང་འཕྲིན་ཁང་ལ་ཡིག་ཐོག་ལེན་འདེབས་གནང་བརྗོད་བྱུང་།། འཛམ་གླིང་ས་ཕྱོགས་གང་སར་རྣམ་པ་འདྲ་མིན་གྱི་ཐོག་ནས་ལས་འགུལ་གནང་སྟེ་བློ་དགའ་རང་བཙན་ལགས་སུ་རྗེས་དྲན་ཞུས་པ། མཉམ་འབྲེལ་རྒྱལ་ཚོགས་མདུན་ནས་ཁྱབ་པའི་བོད་དོན་ལས་འགུལ་མུ་མཐུད་པ། བོད་དོན་ལས་འགུལ་པ་བློ་དགའ་རང་བཙན་ལགས་ཀྱིས་ནིའུ་ཡོག་ཏུ་མཉམ་འབྲེལ་རྒྱལ་ཚོགས་ལས་ཁུངས་ཀྱི་མདུན་དུ་རང་ལུས་མེར་སྲེག་གནང་སྟེ་འདས་གྲོངས་སུ་སོང་ནས་ཉིན་ལྔ་བཅུ་ཕྱིན་པའི་མཚམས་འདིར། བློ་དགའ་རང་བཙན་ལགས་ཀྱིས་རང་སྲེག་གནང་ཡུལ་དུ་མཆོད་མེ་དང་མེ་ཏོག་གི་རྭ་བ་ཞིག་བཟོས་པའི་རྗེས་དྲན་ས་ཁུལ་དེ་ནིའུ་ཡོག་གྲོང་ཁྱེར་གྱི་བཀོད་སྒྲིག་ལྟར་གཞི་ཁྱོན་ཆུང་དུ་བཏང་ཡོད་པ་ནིའུ་ཡོཀ་ནས་དྭང་བླངས་ལས་འགུལ་བ་ཕུར་བུ་ཚེ་རིང་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་ཡོད་རུང་། བོད་དོན་ལས་འགུལ་ནི་མཚམས་ཆད་མེད་པར། ས་གནས་ཁག་ཏུ་རྣམ་པ་མི་འདྲ་བའི་ཐོག་ནས་མུ་མཐུད་སྤེལ་བཞིན་འདུག མཉམ་འབྲེལ་རྒྱལ་ཚོགས་མདུན་ནས་ཁྱབ་པའི་བོད་དོན་ལས་འགུལ་མུ་མཐུད་པ། ཡང་རྗེས་དྲན་འདི་མུ་མཐུད་གནས་ཐབས་ཆེད་གྲོང་ཁྱེར་གྱི་སྤྱི་ཁྱབ་ལས་ཁུངས་སོགས་ལ་ཞུ་གཏུག་གནང་བཞིན་ཡོད་འདུག་ལ། ལས་འགུལ་མུ་མཐུད་སྤེལ་བཞིན་ཡོད་པའི་ཁོངས་སུ་ཚེས་ ༢༠ ཉིན་ནས་བོད་ཀྱི་གཞོན་ནུ་ལྷན་ཚོགས་ཀྱིས་སྤེལ་བའི་རྒྱུན་མཐུད་ཟས་བཅད་ངོ་རྒོལ་གྱི་ལས་འགུལ་སྤེལ་འདུག ཨ་རིའི་ནིའུ་ཡོག་ས་གནས་སྐོར་སྲུང་ལས་ཁུངས་སུ་ས་ཚིགས་འདིའི་གནས་བབ་ཇི་ཆགས་ཐད་བཀའ་དྲི་ཞུས་པར་ལན་འདེབས་གནང་མ་བྱུང་། པོར་ཊི་ལནཌི། ཨ་རི། ཡང་ཨ་རིའི་པོར་ཊི་ལནཌི་ས་གནས་གཞོན་ནུས་གོ་སྒྲིག་འོག་བོད་མི་ ༡༡ གིས་ཞི་བའི་གོམ་བགྲོད་གནང་སྟེ། གྲོས་ཚོགས་འཐུས་མིས་རྒྱ་ནག་གི་མི་རིགས་མཐུན་སྒྲིལ་གྱི་ཁྲིམས་གསར་པ་ཕྱིར་འཐེན་དང་། ཨ་རིའི་གྲོས་ཚོགས་ནང་གི་བོད་འབྲེལ་ཁྲིམས་འཆར་གཉིས་ལ་རྒྱབ་སྐྱོར། བོད་མིའི་སྐད་ཡིག་དང་རིག་གཞུང་། ཆོས་དད་དང་ངོ་བོའི་ཐོབ་ཐང་སྲུང་སྐྱོབ་བཅས་ཀྱི་ཐད་འབོད་སྐུལ་གནང་ཡོད་འདུག་ལ། པོར་ཌི་ལནཌི་ནས་སེ་ལམ་བར་གྱི་རྒྱང་ཐག་མཡེལ་ ༥༠ ཙམ་གྱི་ལས་འགུལ་མཇུག་སྒྲིལ་གནང་སྐབས་ཨ་རིའི་གྲོས་ཚོཊ་གོང་མའི་འཐུས་མི་ འཇེཕ་མརྐ་ལིའི་སྐུ་ཚབ་ Gustav Guerraro ལཊ་ཆེད་ཕེབས་ཀྱིས་སྣེ་ལེན་གནང་འདུག ཨ་རིའི་གྲོས་ཚོཊ་འཐུས་མི་འཇེཕ་མརྐ་ལིའི་སྐུ་ཚབ་ཆེད་ཕེབས་ཀྱིས་སྣེ་ལེན་གནང་པ། ༢༠༢༦།༨།༢༠ (ས་གནས་བོད་ཀྱི་གཞོན་ལྷན།) ནོར་བུ་ཚེ་རིང་དང་ས་གནས་གཞོན་ནུའི་ཚོགས་གཞོན་ཀུན་བཟང་ལགས་ཀྱིས་གསུངས་དོན་ལྟར་ན། ས་གནས་བོད་མི་ཚོས་གྲོས་ཚོགས་ཀྱི་འཐུས་མི་ཚོར་མུ་མཐུད་ཞུ་སྐུལ་དང་གླེང་སློང་དགོས་པའི་ཕྱག་བྲིས་ཕུལ་བ་དང་། ཞུ་གཏུག་མུ་མཐུད་གནང་རྒྱུ་ཡིན་པ་གསུང་གི་འདུག བློ་དགའ་རང་བཙན་ལགས་དམ་པའི་རྗེས་དྲན་ཞུ་ཡུལ་ས་ཚིགས་འདི་ཆུང་དུ་ཕྱིན་ཡོད་ཀྱང་། བོད་དོན་ལས་འགུལ་གྱི་རྒྱུན་འདི་རྣམ་པ་འདྲ་མིན་ཐོག་ནས་མུ་མཐུད་སྤེལ་བཞིན་ཡོད་འདུག་ལ། ལས་འགུལ་འདྲ་མིན་འདི་རྣམས་གཞུང་དང་གྲོས་ཚོགས་ལ་ཐད་ཀར་འབོད་སྐུལ་བྱེད་པའི་རྣམ་པར་འགྱུར་བཞིན་ཡོད་འདུག ཨོསི་ཊརེ་ལི་ཡ། བོད་དོན་ལས་འགུལ་དེ་ཨ་རི་ཙམ་མ་ཟད། ད་དུང་ ཨོསི་ཊརེ་ལི་ ཡར་མཚོན་ན། གྲོས་ཚོགས་མདུན་དུ་བློ་དགའ་རང་བཙན་ལགས་དམ་པར་རྗེས་དྲན་དང་གྲོས་ཚོགས་ནས་རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་འདིར་ངོས་ལེན་མེད་པའི་འབོད་སྐུལ་གྱི་ལས་འགུལ་རྒྱ་ཆེ་ཞིག་སྤེལ་འདུག་ལ། རྒྱལ་མཚམས་བརྒལ་བའི་དྲག་གནོན་ལས་སྲུང་སྐྱོབ་དགོས་པའི་དགོས་འདུན་བཏོན་ཡོད་པ་ཨོསི་ཊརེ་ལེ་ཤི་ཡའི་སྤྱི་འཐུས་སྐལ་བཟང་ཚེ་རིང་ལགས་ཀྱིས་གསུངས་བྱུང་ལ། ཨོསི་ཊརེ་ལི་ ཡའི་སྲིད་བློན་དང་ཕྱི་སྲིད་བློན་ཆེན་གཉིས་མཉམ་འབྲེལ་རྒྱལ་ཚོགས་ཀྱི་ཚོགས་འདུར་ཕེབས་དུས་བོད་དོན་གླེང་རྒྱུའི་འབོད་སྐུལ་ཞུས་གནང་འདུག་ལ། གྲོས་ཚོགས་ཀྱི་འཐུས་མིས་རྒྱབ་སྐྱོར་གནང་འདུག ཨོསི་ཊརེ་ལི་ཡ་གྲོས་ཚོཊ་མདུན་དུ་བོད་དོན་ཚོགས་པ་དང་བོད་མི་ཚོས་སྐྲ་བཞར་གྱི་ལས་འགུལ་སྤེལ་ཞིང་། གྲོས་ཚོགས་འཐུས་མིར་མཇལ་ཕྲད་ཀྱིས་ཞུ་གཏུགས་གནང་འདུག ༢༠༢༦།༨།༢༠ (སྐལ་བཟང་ཚེ་རིང་།) ཁ་སྣོན། ཕྱི་ཚེས་ ༢༠ ཉིན་གྱི་ནིའུ་ཡོཀ་དང་། པོར་ཊི་ལནཌི། ཨོསི་ཊརེ་ལི་ཡའི་གནས་ཚུལ་ཁ་སྣོན་ཞུས་ཡོད། པར་རིས་སྒྲིག་བཟོ་དང་བརྙན་པར་སྒྲིག་སྦྱོར་བ། ནོར་སྡེ་སྒྲོལ་མ།