ဗီယက်နမ်နိုင်ငံခြားရေးဝန်ကြီးလာရောက်၊ ကုန်သွယ်မှု သန်း တစ်ထောင်အထိ ရည်မှန်း
ဗီယက်နမ်နိုင်ငံခြားရေးဝန်ကြီး လီဟွိုင်ထရွန် (Lê Hoài Trung) ဟာ သြဂုတ်လ ၂၆ ရက်နေ့က စစ်တပ်ခန့် အစိုးရ သမ္မတ ဦးမင်းအောင်လှိုင်၊ ပြည်သူ့လွှတ်တော်ဥက္ကဋ္ဌနဲ့ ကြံ့ခိုင်ဖွံ့ဖြိုးရေးပါတီ ဥက္ကဋ္ဌ ခင်ရီတို့နဲံ့ နေပြည်တော်မှာ တွေ့ဆုံခဲ့ပြီး နှစ်နိုင်ငံချစ်ကြည်ရေးတိုးမြင့်ဖို့နဲ့ ကုန်သွယ်ရေးနဲ့ ရင်းနှီးမြုပ်နှံမှုတိုးမြှင့်ရေးတွေကို ဆွေးနွေးခဲ့တယ်လို့ သိရပါတယ်။ စစ်အာဏာသိမ်းအပြီး ဗီယက်အဆင့်မြင့်အစိုးရခေါင်းဆောင်တစ်ဦး ပထမဆုံး မြန်မာနိုင်ငံကို ချစ်ကြည်ရေး လာရောက်တာဖြစ်ပြီး နှစ်စဥ် နှစ်နိုင်ငံ ကုန်သွယ်မှုပမာဏ ၇၀ ရာခိုင်နှုန်းနဲ့ ညီမျှတဲ့ အမေရိကန်ဒေါ်လာ သန်း တစ်ထောင် (၁ ဘီလီယံ) အထိ တိုးမြင့်သွားဖိို့ နှစ်ဘက် သဘောတူညီခဲ့တယ်လို့ နီကေးသတင်းဌာနက သြဂုတ်လ ၂၇ ရက်နေ့က ရေးသားပါတယ်။ ဗီယက်နမ်အစိုးရသတင်းဌာနနဲ့ မြန်မာစစ်တပ်ခန့်အစိုးရရဲ့ ထုတ်ပြန်ချက်တွေ အရ နှစ်နိုင်ငံကုန်သွယ်မှုဟာ ၂၀၂၀ မှာ အမေရိကန်ဒေါ်လာ ၈၅၃ သန်းမှ ၂၀၂၅ မှာ အမေရိကန်ဒေါ်လာ ၅၉၀ သန်းအထိ ကျဆင်းခဲ့ ပါတယ်။ ၂၀၂၆ ပထမခြောက်လအတွင်း အမေရိကန်ဒေါ်လာ ၃၃၅ သန်းအထိ ရောက်ရှိခဲ့တယ် လို့သိရပါတယ်။ ဇွန်လ ၃၀ ရက်နေ့အထိ ဗီယက်နမ်နိုင်ငံက မြန်မာနိုင်ငံမှာ တရားဝင် ရင်းနှီးမြှုပ်နှံမှုစီမံကိန်း ၁၀၇ ခု ရှိပြီး အမေရိကန်ဒေါ်လာ ၁.၄ ဘီလီယံ ရှိတယ်လို့လည်း သိရပါတယ်။ ဗီယက်နမ်နိုင်ငံခြားရေးဝန်ကြီးရဲ့ မြန်မာပြည်ခရီးစဥ်ဟာ စစ်တပ်ခန့်အစိုးရတက်လာအပြီး အာဆီယံဒေသ တွင်းနိုင်ငံတွေထဲက မြန်မာနိုင်ငံကို ရောက်လာတဲ့ နောက်ဆုံးနိုင်ငံတစ်နိုင်ငံဖြစ်ပါတယ်။ စစ်အာဏာသိမ်း ခေါင်းဆောင်ဟောင်း ဦးမင်းအောင်လှိုင်ကို ဗီယက်နမ်နိုင်ငံကို ချစ်ကြည်ရေး ခရီးလာရောက် လည်ပတ်ဖို့လည်း ဗီယက်နမ်နိုင်ငံခြားရေးဝန်ကြီးက ဖိတ်ကြားခဲ့တယ်လို့ သိရပါတယ်။